شلاخ + لوتي + عيار + مهايط + جمبازي

[المفترسه]

تعددت الاسماء والمعنى واحد " الكذب" انتشر بشكل رهيب
الكثير صار يكذب ويهايط ووصلوا لمرحله لاتطاق عند البعض:court:
في نظري الكذب مرض نفسي يعاني صاحبه من خيال واسع
و ذكاء وخبث ودهاء يمكنه من خلق عالمه الخاص
الذي يمارس فيه بطولاته وجولاته الوهميه والبقيه
يلعبون دور الكومبارس المشكله انه الشلخ والعياره
مرض يصيب الرجال والنساء بكافة الاعمار فنجدهم
يتكلمون بكل ثقه ويمارسون حركات بهلوانيه توهم الطرف الثاني
انه الامر صحيح وكثير منا تعرضوا ووقعوا ضحايا للكذابين:cry2:
العجيب في الامر انه المهايط انتقل الى عالم الانترنت
واصبحت مواقع الدردشه والمنتديات ميدان لصقل مواهبهم
وتطوير لياقتهم العقليه واللسانيه في تاليف الكذبات
وترتيب الاحداث بتالي يتمكن من سردها وطرحها في المواضيع


وهناك عدة مراحل يمر فيها المهايط فالبداية يخترع
لنفسه شخصية أسطورية وكيان تمتزج فيها شجاعة
عنترة بن شداد العبسي بثروة الوليد بن طلال على وسامة
مدرب فريق ريال مدريد جوزيه مورينو

http://files.mothhelah.com/img/v5F06552.jpg (http://files.mothhelah.com/)

^

^

^


ومن ثم يبدا بسرد الردود الخرافيه حتى وان كانت فيها نسبه من الصدق فانه يتبع
اسلوب الشلخ والهياط والجمبازيه



ايه والله انا البنات يلاحقوني ويترجوني بس ماعطيهم ويه


:eek5:



:eek5:



:eek5:




يا رجال يرحم والديك وين يترجونك وانت في الاخير طلعت شبه اللمبي


http://files.mothhelah.com/img/WNh06552.jpg (http://files.mothhelah.com/)

^

^

وهذا رد ثاني لاحد الاعضاء



انا عندي ملايين في حسابي بس اداوم من الملل ولا هالمكان ما يليق فيني كلش





^

ورد اخر لعضو متناقض مره يدور وظيفه وموتر مستعمل ومره يقول انه رفيج الوزير حيرني



تصدقون ذاك اليوم متصل فيني الوزير قال ليش ما تمر الميلس الحين ليكون زعلان ولا في شيء في خاطرك وينك وحشتنا تعال باخذ شورك في مشروع في الوزاره




^


^


^


اما هياط الحريم فحدث ولا حرج لاني عانيت بصراحه من هياطهم وشلخهم



والله ريلي مللني 24 ساعه يدلعني وكله يناديني توووته

خفي علينا يا تووووته :p



^


^


^


وفي الاخير نسخه من زكية زكريا :rolleyes2:

http://files.mothhelah.com/img/AKo08261.jpg (http://files.mothhelah.com/)


^

^

والشيخه تبي تاخذ شورنا محتاره وين تروح فالويكند:waiting:



بنات انا محتاره وين نروح هالويكند بصراحه تمللنا كله نروح باغيس
شرايكم في البرازيل سمعت بنات يمدحونها


الله واكبر كل خميس مطيحه في باغيس :eek5: والحين تبي تفتل في البرازيل ( صاروخ ارض جو )

ملاحظه باغيس= باريس بلغتنا الدلوعيه:shy:


^


^


وعندما يرا المهايط انه اكاذيبه بدات تتضح للاخرين يلجأ الى خطة جيمس بوند صفر صفر سبعة و هي احالة الشخصية الوهمية للتقاعد و ادخال شخصيته الحقيقية في الصورة ,
يعني يقولك (والله أنا مريض و بسافر ريو ديجانيرو للقيام بعملية احتمال نجاحها ضئيل جدا بس هذا ايميل ولد عمي أو أعز أصدقائي – الشخصية الحقيقية – تقدر تكلمه و تسأله عني و أنا مكلمه عنك )
وبهذه الطريقة يضرب الكذاب عصفورين بحجر,
فهو لم يعترف بالكذب و استطاع ادخال شخصيته الحقيقية في الفورمة

وهذا مثال صريح اقتبسته من احد المنتديات النسائيه



السموحه منكم يابنات تكفون ادعولي انا مسافره اسوي
عمليه في سويسرا عندي خراج فالمخ وصديد ونسبة نجاحها ضئيله ويمكن اموووت وسامحوني اذا غلطت عليكم او جرحتكم
هذا ايميل بنت خالتي اللي حابه تسال عني تتواصل معاها
دعواتكم يابنات وسامحوني

هاه يمكن اموووت:secret:



^

^

هاذي امثله بسيطه عن مرض الكذب والعياذ بالله

وموضوع نقاشنا هو هل صادفت في حياتك العامه شخص
مهايطي وجمبازي وكيف كان ردت فعلك لصواريخ الارض الجو؟؟ هل كنت تصدقه !! ام تكشفه وتتعمد احراجه؟؟
اتحفوني بمشاركاتكم وتجاربكم وان شاءالله راح اعطيكم طرق تكشف الشخص الكاذب

ارحب بالجميع/QUOTE]

[Right]

هههههههههههههههههههه :nice:



شكثرهم في المجتمع

[بصمة قطرية]

خخخخخخخخخخخ
موضوعج عجيب المفترسة ..:nice:
مكثرهم هالنوعية
صواريخهم ما تخلص
ارض جو :tease:
لي عودة ن شاء الله ~:nice:

[استغفرالله]

يا مكثرهم

[حسن]

الصراحه الموضوع ماله حل هو مب الكذب زاد النفاق بعد اكثر اي والله يامكثر الجمبازيه

[الـقـاسـي]

ههههههههه اكثر ماعجبني الاقتباسات ..

[التميمي 3]

والله جيبتيها صح بالوقت المناسب

[الإكسير]

موضوع حلوو وطريقتج في طرحه احلى....
انا من النوع الي تقدرين تقولين عندي القليل من الفراسه :eek5: بسرعه اعرف النوعيه هذي من الناس... بس للاسف مب من النوع الي يحرج :secret: امشي معاهم ... وضحك عليهم في داخلي وقووول الله يشفيه

[مضاربه]

ماشاءالله الموضوع حلو يامكثر الي يفوشرون ويكذبون اعرف ناس كل ماجاو يسافرون والله حجزنا في اخر لحظه مالقينا الا سياحيه من عرفتهم لين اليوم وهم نفس القصه زين تلثموا وروحوا سياحيه من درا عنكم عاد انا كاشفتهم مشكله الي يكذب ولايحس بنفسه وعلى امور تافهه انا احس ان هذا نوع من المرض

[شمـوخ]

تدرين عاد شاللي يحر ويقهر صج .. مب انه يهايط وبس لا ..
ان واحد او وحده انتي عارفه شنو ساسه ومن وين له ..
وشنو كان ويبي يحط راسه براسج ويتكلم عن البذخ والترف والعز
وجنّه ولد الملك لويس السادس عشر او ولد اخو هنرى السابع ههههههه
والغريب ان الناس اللي انولدوا بمعلقة ذهب مثل مايقولون تلقينه قمة
بالتواضع والذوق والهدوووووء بروحاته وجياته مايستعرض في حاله


مشكوره حبيبتي ..





..

[تحداني]

الكلام ابلاش ما يبيله شي ومتى ما كان بفلوس الكل راح يحسب له مليون حساب
بس لا يقعدون يهايطون على قولتج ويشلخون ويكذبون عند ناس اتعرفهم عدل لان احراج ما بعده احراج والدوحه لقمه


جملك الله برضاه

[خليفـة]

ههههههههههه
ضحكتني بعض الاقتباسات وتعليقاتج عليها
ههههههههههه

عموما .. الكذاب في نظري
لا يستحق الاحترام

ومن طبعي لما اكتشف ان هذا الشخص الي اعرفه طلع انسان مخادع او كذاب
مباشرة احوله الى سلة المهملات .. او الى مزبلة الذكريات

لانني لا أتشرف بمعرفته أبداً

شكرا للموضوع الجميل مفترسة
واذا بتسوين فينا خير .. غيري اسمج عشان نقدر نشارك بحرية أكبر في مواضيعج الطيبه
ههههههه
:nice:

[بوعلي2]

ههههههههههههه

عجبني موضوعج واااايدد

اعطيج ١٠ على ١٠ بسرد الموضوع هههههههههه

شكرا للطرح الجميل واسلوبج الجميل بالموضوع

استمتعت وانا اقرى

والله لايقطنا بينهم يارب

فمان الله

[بوحارب]

هالأشكال احط عليهم اكس على طووووول

[ام السعف]

بل عليه صاير 5 في واحد

[البدع]

عندي قصة ثانية

ولكن ليس في الانترنت

هي لشاب فاشل في الدراسة

إخوانه انجحوا في الدراسة

وحتي عيال عمه وعيال خاله وخالته

هو الوحيد الفاشل

لا شهادة

ولا تجارة

ويشتغل موظف عادي في تلفزيون قطر

ويحاول يعوض عقدة النقص الي فيه بانه ينفخ نفسه

مرة اعرف فلان ولد الوزير

ومرة سيارتي كذا وكذا

ومرة يكشخ بلبسه وساعته

ومرة يكشخ بعلاقته النسائية

المسكين

ماكان يدري ان كل ربعه يعرفون المشكلة النفسية الي هو يعيشها

عايش علي راتب ابوه

[المفترسه]

هههههههههههههههههههه :nice:



شكثرهم في المجتمع





صحيح
ملاحظه انه الكذب قاعد يزيد وينتشر بشكل رهيب
شكرا على المشاركه اخوي

[المفترسه]

خخخخخخخخخخخ
موضوعج عجيب المفترسة ..:nice:
مكثرهم هالنوعية
صواريخهم ما تخلص
ارض جو :tease:
لي عودة ن شاء الله ~:nice:

الاحلى مرورج

بانتظارج يالغلا

[دلة الرسلان]

دعو الخلق للخالق :)

[moon_night]

على اي اساس قستوا ان الكذب قاعد ينتشر بشكل كبير؟؟؟

والله ياكثرهم الصادقين والطيبين بالدنيا والحمدلله

[التقني]

الاقتباسات عجيبه
سلمت يمناك

[intesar]

الكذاب الكذاب.. إنه شر الصحاب..

[بـن عدوان]

مالج حل والله ههههههههه

[قطر love]

هههههههههههههههههههههههههههههههههههه


موضوع الصراحة شيق وحلو وفي نفس الوقت يتكلم عن جزء من المجتمع


بس أشوف الموضوع تشعب من بعض الاعضاء

بس نرجع لهم بعدين

بس الموضوع الصراحه مطروح بطريقه فكاهيه وتسلط على جزء من مشكلات المجتمع إلي الأغلب يعاني منها


الكذب والنفاق كلها طرق تؤدي إلى المثاليه والحياه الخياليه يعني وإيد ناس يكذبون ويعيشون الكذبه وهم مصدقين الكذب ويعيشون الدور في حياتهم احنا نشوفه كذب بس بالنسبه لهم هذا الصج وهذي حياتهم عندي مثال قريب من الاقتباسات واحد من الشباب كل يوم يشتكي من واحد معاهم في الدوام كل يوم يمر عليهم المكاتب ويقول نفس الكلام ( تدري يا فلان أنا كل يوم ينزل في حسابي 3 ملايين وأنا المفروض ما إداوم بس تدري الواحد يتملل ) إشدعوه كل يوم هههههههههههههههههههههههههههههههههههه
يأخي بلغيتس شنو يقرب لك المشكله هو عايش الدور وعايش حياته على ذي الأساس



أما بالنسبه للاخت مع زوجها بو توته هههههههههههههههههههههههههههههههههههه
إلي أعرفه انه البنات يموتون في الدلع ويحبون الرجال يدلعهم ويتمنون شباب قطر يصيرون مهند ولا مادري من ويوم يجئ الرجال يدعها تشتكي منه هههههههههههههههههههههههههههههههههههه


بطعا كل الأمور ذي توصل لمواضيع خرافيه سواء في الحياة الواقعيه أو في حياة الإنترنت نرد ونقول تعبنا من المثاليه والكذب والخرافات

الأخت دله رسلان المجتمع كل يوم تطلع له عله جديده وكل يوم مرض جديد واحنا نسكت ونقول دعو الخلق للخالق والنعم بالله صحيح بس ما يصير نسكت عن كل المشاكل إلي تصير ونقول الله كريم على الأقل نغير بأضعف الأيمان


الأخ أو الأخت مون لايغت الطيبين صحيح موجودين ووايدين الله يكثر من أمثالهم بس ولله الحمد الطيبين أعمالهم تتكلم عنهم وتأكدي الطيب لا ينتظر جزاء من الناس أو الشكر بل ينتظرون الإحسان من الله تعالى في الدنيا والآخره وليس من الناس

[حليتان*]

بالنسبه لي الي يجذب والي يهايط كيفه دام ما يضيرني

لكن الي يبط جبدي الي يضحك معاي ومن وراي يتكلم علي عند غيري وفنفس الوقت يتكلم عن غيري عندي !!
بالمختصر المفيد اكررره النفااااق

[ظبيــღــه]

بالنسبه لي الي يجذب والي يهايط كيفه دام ما يضيرني

لكن الي يبط جبدي الي يضحك معاي ومن وراي يتكلم علي عند غيري وفنفس الوقت يتكلم عن غيري عندي !!
بالمختصر المفيد اكررره النفااااق

اي والله اي والله يبطون الجبد .. حسبي الله عليهم مناافقين :(

[الزعفراني]

الصراحة أنا مرات أحب أكون " عيّار " طبعا مب مع الكل ولكن مع ناس أعرفهم وبيني وبينهم تواصل ، لأن بعض الأمور عشان نقدر نمررها بطريقة حلوة ومحببة لازم نكون " عيّارين " :)

[راسي براسك]

هههههههههههههههههههههههههههههههههه


صراحة هالموضوع يبي لي أخلي ناس يقرونه !!

الهياط صار فيه نوع من المنافسه الحين

بغض النظر في وشو يهايطون ؟؟

الله يهديهم ويهدي الجميع يارب ..

[chillis]

للاسف كثروا بالمجتمع وانواع هم مثل ما قلتي منافق كذاب مهايطي .... الخ

[ام علي1981]

موضوع عجيب
ههههههههه

[R 7 A L]

الهياط
يختلف من شخص لاخر
بعضهم يهايط وعنده رصيد
وبعضهم يهايط من رصيد غيرة

[شبح الصمت]

صباحكم ورد وجوري

يعطيج العآآآفيه يالمفترسه

ضحكت من قلبي على الكلام والتعليقات ..

الله لا يبلينا ونصير مثل هذولي الي يهايطون ومازبى على شيء ممايش


عن آآذنكم















































































انا الحين في الطياره والامور طيبه لا تحاتون بروح لندن بس بتقهوى وبرد

احد في خاطره شيء والا شيء حاضرين ترى ..

بس حذفت حصاه

ضربت عندي أمسكت غلط ساسوي :)

:tease:

[وتبقى الدنيا حلوه]

كنت اعرف وحده من كثر ما تكذب مره غلطت و فشلتها جدام البنات

قالت لما كنا بالسعوديه رحت السينما !!!

اي سينما بالسعوديه

هههههههههاي ام شلاخ

[شبح الصمت]

كنت اعرف وحده من كثر ما تكذب مره غلطت و فشلتها جدام البنات

قالت لما كنا بالسعوديه رحت السينما !!!

اي سينما بالسعوديه

هههههههههاي ام شلاخ



ترى صج سمعت في جده في سينما

والعهد على الرآآوي


:eek5:

[بوعلي2]

شبح انا فالهنولولو انتظرك تجي

برب هنلولو تايم :shy:

[شبح الصمت]

شبح انا فالهنولولو انتظرك تجي

برب هنلولو تايم :shy:



آآصبر اشوي الطيار قاعد يصخن الطياره يبيلها ساعة


بس لا تحاتي على 10 بكون عندك

عاد آآطلب لي هوت شوكليت مع مطارة ماي واثنين علووج بونص ريال


:shy:

[وتبقى الدنيا حلوه]

ترى صج سمعت في جده في سينما

والعهد على الرآآوي


:eek5:

تتوقع لو في سينما بيدخلون حريم !!

[شبح الصمت]

تتوقع لو في سينما بيدخلون حريم !!



ممكن الاتصال في صديق

:)

[وتبقى الدنيا حلوه]

ممكن الاتصال في صديق

:)

يمقن اي يمقن لا

[مهرة]

صباح الخير اختي المفترسة .. كلنا كذبنا في حياتنا سواءً مجاملة او طريقة للضحك للهرب للمفوشر..

بس في بعض الحالات مانسمية ( كذب) كلمة قوية اشوي ممكن انسمية مجاملة (وأهم شي النية ) ولكن في بعض المعضلات بتكون قضائية وحقيقة وفيها تحقيق وشهادات واثباتات والى اخره من اجراءات .. فالذلك امسك وحصن لسانك وثمن كلامك وحاسب من الي حولك .. ربعك أهلك زملائك مجتمعك كلن له طريقته واسلوبه في الكلام والمعاملة معتمداً ذلك على شخصيتك وقبولك عند الآخرين .. ( الميانه والصحوبية والأخوية العفوية ) تفرق من شخص لشخص ومن بيئة لبيئة ..

يعطيج العافية على الكذب من الصبح >>>>:tease: مجرد دعابة :nice:

[هتـان قطر]

كله كوم واللي عندها خراج في المخيخ وصديد كوم آخر :nice:

يمقن ماتت يمقن لا :secret:

تسلمين أختي المفترسه على هالموضوع الرائع

اللي بالفعل تفشى في المجتمع

نسأل الله السلامة والمعافاة

[المقاول]

الله يسعد صباحك اختي المفترسة موضوعك كان سبب في ابتسامة الصباح
وكلامك كل صحيح .. بس هذا مرض نفسي .. الكل يعرف الكذب حبلة قصير
ومصيرة بينعرف انة مهايطي وكذاب ... بس بعد يستمر ليش مدري لانة مريض
وعلى فكرة منتشرة في كل دول الخليج ..

[ابداع قلم]

ان الواحد ليتحرى الكذب حتى يكتب عند الله كذابا

[كلنا قطر 1981]

اختي المفترسه

في كذب امشيه و في كذب لا و في انواع

الكذب الي امشيه يكون من شخص هو يالف سالفه حق الضحك و الغشمره و هو يدري انه الكل داري انه السالفه كلها من اولها لين اخرها اكشن و حق الضحك

هذا اوكي امشيه و اكمل وياه بعد :nice:

و في مهايط يبط الكبد و منتشر بين بعض الشباب و حتى البنات الي من صار شي الا قال انت او ما تعرف انا ولد من ؟؟؟؟؟؟:anger1:

هذا النوع يقهرني من الكذب :omen2:

في الكذب الي ينقل السالفه و يحط عليها بهارات علشان يسبب مشاكل بين البشر و هو يسود المكان طبعا هذي النوعيه اكثر شي موجوده في الشغل فئة فرق تسود

هذا النوع من الكذب اكرهه من قلب

لكن في الاول و الاخير انا مب مع الكذب و المفوشر بشكل عام لانه بينقص من قيمة الشخص نفسه

الله يهدينا و يصلح حالنا اجمعين

[المفترسه]

الصراحه الموضوع ماله حل هو مب الكذب زاد النفاق بعد اكثر اي والله يامكثر الجمبازيه

صدقت اخوي حسن
شكرا على المشاركه

[بصمة قطرية]

المشكلة مب في الكذب ..
ممكن نعديها لو مرة ..
بنســوي نفسنا أغبيه و نمشيهــا ..
لكن ان الكذب يتكرر بصراحه ما اقــول غير
الله يعينه على نفســه هالشخــص ..
الكــذب مــرض ..
الله لا يبلانــا ..
و اللي يكــذب يفتكـر النــاس غبية و ما تعــرف بكــذباته ..!!!!
سبحــان الله الكذب ينكشف بســرعة ..
ذيـك الحـزة ما يسـوى عليه هالكذبة
اللي صغــرته في عين النــاس ..

[الجوكر90]

على اي اساس قستوا ان الكذب قاعد ينتشر بشكل كبير؟؟؟

والله ياكثرهم الصادقين والطيبين بالدنيا والحمدلله

انتي :nice:
انا معاج
شوفوني صادق وطيب ماعرف اكذب :shy: