المساعد الشخصي الرقمي

مشاهدة النسخة كاملة : من فيكم مسوي عملية لحمية الانف بنج كامل؟



فراشة ناعمة
29-01-2012, 10:07 PM
السلام عليكم ورحمة الله وبركاته

سبق وسويت عملية بنج موضعي في العيادة حق لحمية الانف،، وكتبت موضوع بهالخصوص واستفدت منكم وايد ولله الحمد..

لكن ردت لي الحالة مرة ثانية وخشمي متعبني وااايد،، والدكتور يقولي لازم تسوين عملية علشان ترتاحين،، وانا ضد فكرة العملية بنج كامل،،

رحت عند دكتور ثاني،، عطاني علاج وقالي استخدميه شهرين وكل الادوية اللي كتبهم لي استخدمتهم من قبل ومااستفدت منهم شي،، الا تعبوني بزود،،

ماكو دواء او بخاخ الا واستخدمته ومااستفدت شي،، وصرت كل جم اسبوع ارد امرض واتعب،،

العملية سهلة وبسيطة والكثير اكيد سووها،، بس ابي اعرف من فيكم مسوي هالعملية بنج كامل،، عند اي دكتور؟ وهل مرتاحين من العملية؟

وشنهي الاسباب اللي خلتكم تسوون هالعملية؟

أتمنى تفيدوني بتجاربكم علشان اعرف اقرر شنو اسوي بالضبط،،

كتكوت الوحش
29-01-2012, 10:10 PM
أنا ابي اسويها ومتردد
وعندي تامين صحي ومحتار في المغربي ولا العمادي طبعا مش في مستشفى حمد اذا بسويها
هل اسويها ولا كيف ؟؟؟؟؟ ياريت اتفيدوني

R 7 A L
29-01-2012, 10:38 PM
أنا ابي اسويها ومتردد
وعندي تامين صحي ومحتار في المغربي ولا العمادي طبعا مش في مستشفى حمد اذا بسويها
هل اسويها ولا كيف ؟؟؟؟؟ ياريت اتفيدوني


وانا بعد أبي اسويها وعندي تأمين
:(



اختي
البنج الكامل أحسن من الموضعي

الجوهره 2012
29-01-2012, 10:40 PM
البنج الكامل احسه احس ولا تحسين بشي ..
ايش اللي يخوفج من الكامل


ياعل ربي يشفيكم جميع يارب

بنت امي
29-01-2012, 10:43 PM
شفيه البنج الكامل عادي

مسكين قلبي
30-01-2012, 12:07 AM
اختي توكلي على الله وسويه لاتحافي

انا سويت حق عيالي اثنين سويتها له وعمره سنه ونص بنج كامل في الرميلة

عند الدكتور كمال ناجي والحمد لله الحين عمره 13 سنه والحمد لله

والثاني العام سويتها في مستشفى الخوربنج كامل وعمره خمس سنوات .

Dawn
30-01-2012, 12:31 AM
ما تشوفين شر اختي
وانا مثلج خايفه من البنج الكامل.. ولازم اشيل ضروس العقل :(
أجلت الموضوع من سنه وانا افكر في العمليه بس من اتذكر ان يبيلها بنج كامل اهون ..

انتي استخيري وربي بيسهل لج ان كانت حالتج محتاجه للعمليه .. بس ما انصحج في المستشفيات الخاصه بسبب انها عمليه تحتاج تخدير كامل وما تدرين الظروف شلون تصير وقت العمليه،، لو صارت مضاعفات او خطأ بيردونج على حمد ..

اسأل الله العظيم رب العرش العظيم ان يشفيج

بوحارب
30-01-2012, 12:39 AM
أنا ابي اسويها ومتردد
وعندي تامين صحي ومحتار في المغربي ولا العمادي طبعا مش في مستشفى حمد اذا بسويها
هل اسويها ولا كيف ؟؟؟؟؟ ياريت اتفيدوني

واحد من ربعي سواها على التأمين عن الدكتور الجفيري في العمادي والحمدلله مرتاح

وواحد ثاني سواها في حمد يمكن فوق الثلاث مرات ومتسندر مسكين من العملية !!


انا قرروا يسوون لي هالعملية عند بروفسور ياسر في الأهلي بس شركة التأمين ما وافقت لأنه بينهم مشاكل مع الأهلي :) لكن حاليا موقف الموضوع عشان فقر الدم :rolleyes2:

وعقب بروح اسويها في الدوحة او العمادي والأرجح العمادي عند الجفيري الكل يمدحه





ماتشوفين شر اختي واذا انتي محتاره خذ راي اكثر من دكتور والله يشفيج :)

ahmed jasim
30-01-2012, 04:53 AM
ماتشوفين شر اختي
زوجتى سوتها عند الجفيري فى العمادي
ضروري إتسوينها بنج كامل علشان مابتقدرين على الألم
لا تشيلين الفتيلة إلا بعد يومين أقل شىء وإذا تقدرين تصبرين خليها 4 أيام

saad1125
30-01-2012, 07:07 AM
انا مسوي العملية بنج كامل بس مع توسعة وتقويم لانف التقويم متعب جدا بس اللحمية عملية كثير بسيطة في مغربي

بو الجوري
30-01-2012, 07:55 AM
أنا إختي سويت العمليـه من سنتين تقريباً :..

بنج كامل ، عند الدكتور عبدالعزيز الجفيري ، سواهـا لي في مستشفى العمادي

رحت الصبح المستشفى ، وسواها لي تقريبا الساعـه 10 الصبح

بعد العمليـه وعيت وأنا عالسرير في طريقي للغرفـه :)

و الأمور طيبه كانت الحمدلله ،،

ثاني يوم الظـهر طلعت ،، طبعاً مـر علي الدكتور و تأكد إن الأمور طيبه


طبعاً هـم ماراح يسوون لج بنج كامل إلا بعد مايكشف عليج دكتور البنـج
ويتأكد إن أمورج تمام ،، لاتحاتين إختي و ماعليج شـر

حراير قطر
30-01-2012, 08:39 AM
سويت لولدي عملية لحميه بنج كامل

من 2008 والحمدلله اموره طيبه

عند دكتور عبدالعزيز الجفيري ...

شمس المغيب
30-01-2012, 12:04 PM
مرحبا

ماتشوفين شر إن شاء الله

ولدي سوا العمليه عند عبدالعزيز الجفيري في مستشفى رميله
والحمد لله أموره طيبه
الدكتور قالي بسويها له في العمادي على التأمين بس أنا رفضت
خفت من البنج عندهم
إستخيري وتوكلي على الله

™كاسـبر™
30-01-2012, 12:28 PM
توكلي على الله وسويها ماعليه خوف البنج كامل افضلج واحسن لج انج ماتحسين بأي الاااام

انا سويتها من 6 شهور عند د.عبدالعزيز الجفيري عن طريق التأمين الصحي في مستشفى العمادي

وترقدت يوم والحمدلله ماكانت فيه اي اعراض او شي مضايقني ماعدا الفتيلة مضايقتني بالتنفس لين ماشلوها لي ثاني يوم الصباح

وراجعت الدكتور مرتين كل اسبوع بس يتطمن والحمدلله كل شي سلييم

وماعليج شر ان شالله

كود نمبر
30-01-2012, 02:57 PM
انا مسويها 4 مرات مره بنج موضعي عند لبدكتور تومس وثلاث مرات بنج كامل
في حمد ومصر والهند وامور العمليه طيبه وعاديه بس ترجع بعد فتره من الزمن على حسب الحميه عند المريض

فيصـــل
30-01-2012, 06:37 PM
انا سويتها من ثلاث اسابيع تقريبا عند الدكتور احمد سليمان في مستشفى العمادي

سوالي عملية اللحميه والجيوب الانفية والحاجز الانفي .. وبنج كامل

والحمدلله للحين الامور طيبه اللهم لك الحمد والمنه والدكتور فنان الشهاده لله

وميزة البنج الكامل انه من يخدرونج ماتحسين بنفسج الا وانتي فالغرفه والعمليه اخلصت

لكن عيبه متعب خاصه اول يوم لكن بعدها الامور طيبه

فراشة ناعمة
30-01-2012, 10:12 PM
أشكركم من كل أعماق قلبي على المساعدة ،،

استفدت من مشاركاتكم واااايد،،

خايفة من البنج الكامل وغرفة العمليات شي يخووف وااايد بس هم احس ان عقب العملية بتعب وايد،، يعني اخاف من هالسوالف،،

انا من الاساس اتابع عند دكتور الجفيري وهو اللي خبرني اني لازم اسوي العملية،، وانا بصراحة ماودي اسويها في المستشفيات الخاصة اخاف من العمليات بنج كامل عندهم مااثق ابدااا،، ومستشفيات حمد ولا رميلة سمعت ان مواعيد العمليات جدا بعيدة يعني تصبر اكثر من سنة لين يي دورك،،

بس ودي من اللي قال انه مسوي العملية بالبنج الكامل يعطيني التفاصيل جزاكم الله خير،،

ابي اعرف شنهي الاسباب اللي خلتكم تسوون هالعملية؟؟

شنهي الاعراض اللي كانت فيكم؟؟

ومن متى مسووين هالعملية؟؟ وماردت لكم المشكلة مرة ثانية؟؟

بو الجوري
31-01-2012, 09:03 AM
مثل ماقلت قبل ،، لاتحاتين


و الدكتور الجفيري ممتاز ، و ماراح يبنجونـج كامل إلا عقب مايشوفـج دكتور التخدير :..

أنا كنت دايما أزكـم ولو ماكنت مزكـم يكون عندي Runny Nose الصبح ساعتين 3 وعقب عادي :..

يوم كشف عليّ قالي عندك إنحراف فالغضروف فاليمين ، و لحميه صغيره فاليسار

وسويت العمليه فالعمادي و مثل ماقلت قبل ثاني يوم طلعت :..
والحمدلله بعد البنج أموري طيبه كانت ، لا رجـّعت ولا هلوست :)

وخذت إجازه مرضيه إسبوعين و الحمدلله أحسـن من قبل بواااايد

فراشة ناعمة
31-01-2012, 09:41 AM
مثل ماقلت قبل ،، لاتحاتين


و الدكتور الجفيري ممتاز ، و ماراح يبنجونـج كامل إلا عقب مايشوفـج دكتور التخدير :..

أنا كنت دايما أزكـم ولو ماكنت مزكـم يكون عندي runny nose الصبح ساعتين 3 وعقب عادي :..

يوم كشف عليّ قالي عندك إنحراف فالغضروف فاليمين ، و لحميه صغيره فاليسار

وسويت العمليه فالعمادي و مثل ماقلت قبل ثاني يوم طلعت :..
والحمدلله بعد البنج أموري طيبه كانت ، لا رجـّعت ولا هلوست :)

وخذت إجازه مرضيه إسبوعين و الحمدلله أحسـن من قبل بواااايد


تسلم يالطيب على المساعدة،،

انا سبق وسويت عملية اللوز يعني مب اول مرة لي ادش العمليات ويسوون لي بنج كامل،، بس مستصعبة الموضوع لأني تقريبا مثلك عندي انحراف وسبق وسويت عملية اللحمية بالكي عنده بالعيادة،، بس ردت لي الحالة مرة ثانية والدكتور قالي مالج الا العملية خاصة اني ماخلت بخاخ والا دواء الا واستخدمته ومافادني بشي،، وصرت كل فترة امرض كللللش مو مرتاحة،،

ولأن بعد الوالد الله يحفظه مشكلته اكبر من مشكلتي ووايد قالوا له لاتسويها لأنها مابتفيدك الا بتعبك بزود،، عشان جي مو متشجعة،،

مشكور ،، جزاك الله خير،، خلتوني افكر في الموضوع بشكل جدي اكثر،،

فراشة ناعمة
31-01-2012, 09:44 AM
أخوي بو الجوري الله يحفظك،، كم كلفتك العملية في العمادي؟

وماحسيت بخوف انك تسويها في الخاص؟

بو الجوري
31-01-2012, 09:46 AM
ما عليكـم شر إن شاء الله ،، و إستخيري دامج متردده :..

دام سويتي اللوز ، الحين دورج تفيديني :.. :shy:

ليش سويتيهـا ، شنو كان فيـج :..

انا عندي مشكله ، إني إذا مرضت ، أتم إسبوعين على الأقل لين ماطيب

كحه وزكام وعقب كحه ناشفه وعقب مادري شنو :( :weeping:

مع إني آخذ أول ما أمرض أدويه و مضادات حيويه :.. لكن بدون فايده ، لازم إسبوعين عالأقل أتم مريض :weeping:

فبغيت أعرف ليش شلتي اللوز ! :)

badboss
31-01-2012, 10:00 AM
اختي توكلي على الله وسويها

انا سويتها وبيصيرلي سنه مسويها عند الدكتور عبدالعزيز الانصاري اعتقد في مستشفى الرميله مع دكتور مصري كان زائر للبلد

الاعراض الي كانت عندي ( انحراف بالحاجز الانفي وجيوب انفيه و لحميات و انتفاخات بالقرنيات الانفيه ) بنجوني بنج كامل العمليه خذت ساعتين ونص والعمليه ما تخوف بس الي صار معاي البنج يوم رحت الحمام الله يكرمج ويكرم الجميع جاتني دوخه وكنت بطيح يعني يوم بتروحين الحمام بعد العمليه لازم يدش احد معاج لانه بتحسين بدوخه وبعدين بيشيلون لج الفتيله ثاني يوم واصعب شي يوم شالو لي الفتيله لانه يكون في دم متجلط داخل الخشم ويوم يسحب الفتيله يحك فالجلد من داخل ويحرق بطريقه مب طبيعيه وبس والحمدلله الحين احسن من قبل بوايد توكلي على الله وسويها

وسلامتج ماتشوفين شر اجر وعافيه ان شاء الله

حراير قطر
31-01-2012, 10:12 AM
ما عليكـم شر إن شاء الله ،، و إستخيري دامج متردده :..

دام سويتي اللوز ، الحين دورج تفيديني :.. :shy:

ليش سويتيهـا ، شنو كان فيـج :..

انا عندي مشكله ، إني إذا مرضت ، أتم إسبوعين على الأقل لين ماطيب

كحه وزكام وعقب كحه ناشفه وعقب مادري شنو :( :weeping:

مع إني آخذ أول ما أمرض أدويه و مضادات حيويه :.. لكن بدون فايده ، لازم إسبوعين عالأقل أتم مريض :weeping:

فبغيت أعرف ليش شلتي اللوز ! :)

كثرة المضادات ما تنفع كلش

عندي ولدي كل اسبوعين طايح مريض

لين ما سويت له عملية اللوز ولحميه وشفط ماي من الاذن

عنده تضخم بالحنجرة حجمهم مب طبيعي والحمدلله

يوم سويتها له وانا مرتاحه واهو مرتاح من الادوية

يمرض بس قول مرتين الى 3 مرات بالسنه مو نفس قبل :rolleyes2: ...

فراشة ناعمة
31-01-2012, 10:13 AM
ما عليكـم شر إن شاء الله ،، و إستخيري دامج متردده :..

دام سويتي اللوز ، الحين دورج تفيديني :.. :shy:

ليش سويتيهـا ، شنو كان فيـج :..

انا عندي مشكله ، إني إذا مرضت ، أتم إسبوعين على الأقل لين ماطيب

كحه وزكام وعقب كحه ناشفه وعقب مادري شنو :( :weeping:

مع إني آخذ أول ما أمرض أدويه و مضادات حيويه :.. لكن بدون فايده ، لازم إسبوعين عالأقل أتم مريض :weeping:

فبغيت أعرف ليش شلتي اللوز ! :)

الشر ماييك،،

بخبرك على التفاصيل :) ،،

عملية اللوز كانت اول عملية لي بحياتي فمآساتي معاها كانت كبيرة بالنسبة لي،،

انا كنت دووم امرض يعني كل اسبوعين امرض عليهم وترتفع حرارتي ويصيدني احتقان شديد،، يعني تخيل كانت حرارتي 39 او 40 ،، وجسمي كانت مناعته جدا ضعيفة،، وكنت اتغيب عن المدرسة ذيج الايام يومين الى 3 ايام،، وكل مااروح للدكتور يقول للوالد الله يحفظه بنتك اللوز عندها وايد ملتهبة ومرضها دوم بسبب اللوز ولازم تنشال،، بس ايامها كنت صغيرة،، لين وصلت اعدادي واذكر ايامها مرضت مرض كنت تعبااااانة واااايد وكله طايحة في الفراش،، وتميت على هالحال شهر ولما رحت المستشفى الدكتور قال لأهلي لازم عملية وضروري،، واضطريت عقب اسويها،، الخيار ماكان بيدي كان غصب عني،،
سويت العملية ولله الحمد حسيت بتعب وبمكان العملية بس مو ذاك الزود،، وكان كل شي ممنوع عني الا الاشياء الباردة المثلجة،، يعني حياتي حزتها كانت بس مثلجات وممنوع عني الباقي،، يعني فرصة للي يبي ينزل وزنه :) :) ،،

بس شوف انا بقولك على شي،، دايما يقولون ان اللي يشيل اللوز حالته مابتغير،، الا بيتعب اكثر ولا بعد بيزيد وزنه،، انا بقولك ليش يقولون هالكلام،،
اول شي بالنسبة ان اللوز ملتهبه ويشيلونها وليش الواحد يرد يمرض مرة ثانية،، السبب في هالشي ان الدكاترة يشوفون ان اللوز وايد مأثرة صحيا على المريض ومتعبته وايد فلما يشوفون ان حالته صارت صعبة ومايقدر يتحملها فيضطرون يشيلونها عشان يرتاح المريض،، لكن في ناس عقب العملية يكون من السهل يلقطون المرض لأن مناعتهم صارت اضعف وفي ناس لا،، وانا ولله الحمد كنت من الناس اللي لا،، كنت امرض من وقت لوقت،، والحمدلله ان التعب اللي يجيني الحين واااايد اخف من قبل عملية اللوز فرق شااسع،، قبل العملية كنت اتم راقدة 3 ايام على السرير لكن الحين لا ،،مريضة وتعبانة لكن امارس حياتي طبيعية،،

اما بالنسبة للي يزيد وزنهم بعد العملية ليش،، لانهم قبل العملية بسبب المرض ماياكلون عدل بسبب الالتهاب والاحتقان لكن عقب العملية مكان اللوز يفضى ويكون سهل للاكل انه يمر والانسان يكون مشتهي الاكل ويتم ياكل وياكل،، بس مب الكل يمتن بعد العملية،، يعني انا هالشي ما أثر علي ولله الحمد،،

لكن الحين للأسف صرت امرض احتقان وزكام وكحة وحالتي حاله بسبب خشمي :weeping: ،، الله المستعان،،

طولت عليك،، بس حبيت اعطيك التفاصيل لعلها تفيدك،، واي سؤال حاضرة،، :)

ياليت اخوي بوالجوري ترد على سؤالي،،


أخوي بو الجوري الله يحفظك،، كم كلفتك العملية في العمادي؟

وماحسيت بخوف انك تسويها في الخاص؟

بو الجوري
31-01-2012, 10:14 AM
^

و الله يا حراير إني تعبت :( المشكلـه كل شهرين وإلا 3 أمرض إسبوعين :(

تهقيـن أشوف موضوع اللوز !!

بو الجوري
31-01-2012, 10:18 AM
تسلمين إختي فراشه على التفاصيل :)

و بخصوص سؤالـج :

و الله مادري :( لأنهـا كانت على التأمين الصحي من الدوام :..

و بخصوص التخوّف ، و الله ماجاني خوف ولله الحمد :..
لأني كنت سآئل عن د.الجفيري والكل إمدحـه

فكنت نفسياً مرتاح :)

مسك روز
31-01-2012, 10:24 AM
سبحان الله ناس وناس

اختي سوت العمليه عند الجفيري ( تعديل الغضروف +لحميه ) في العمادي

بس ماستفادت شي ولا كأنها سوت عمليه

عشان جذي انا كنسلت عمليتي عنده وبشوف دكتور ثاني

اذا لقيتي دكتور غير الجفيري ياريت تعطيني خبر

حالتي حاله :weeping:


الله يشفيج اختي ..

فراشة ناعمة
31-01-2012, 11:37 AM
مشكور أخوي بوالجوري،،

أختي مسك،،

انا حصلت تقريبا فوق 95% من الناس يمدحون الجفيري،،
انا ماابي اسوي هالعملية وترد لي الحالة مرة ثانية،،

على العموم انا استشرت وبستخير وبشوف شيصير معاي،،

بس ياليت لو تفيدني ان اشلون اختج مااستفادت،، شالي رد لها مرة ثانية ؟ او ايش صار لها بالضبط قبل وبعد العملية؟

مسك روز
31-01-2012, 12:04 PM
سألت اختي

تقول انها كانت تعاني من ضيق في التنفس وفقدان لحاسة الشم

وبعد العمليه ماتغير شي بالعكس تقول زاد ضيق النفس اكثر وحاسة الشم مارجعت لها

والحين بتشوف دكتور ثاني ..

العمليه كانت : لحميه + جيوب + تعديل غضروف

فيصـــل
31-01-2012, 12:04 PM
بس ودي من اللي قال انه مسوي العملية بالبنج الكامل يعطيني التفاصيل جزاكم الله خير،،

ابي اعرف شنهي الاسباب اللي خلتكم تسوون هالعملية؟؟

شنهي الاعراض اللي كانت فيكم؟؟

ومن متى مسووين هالعملية؟؟ وماردت لكم المشكلة مرة ثانية؟؟

الاسباب اللي خلتني اسويها لاني ومن اصغرتي وانا اعاني من هالمشكلة خشمي دايما ينسد
واذا زكمت يطول معاي الزكام ويتم معاي لين شهر .. وغير هذا كنت اعاني من صداع وبشكل مستمر واللي سببه انسداد الخشم بسبة التهاب الجيوب الانفية وتضخم اللحميه

ومافي علاج ما استخدمته لتخفيفها لامن حبوب وبخاخات .. لكن تخف وترجعلي لين ماوصلت لمرحله ان خلاص البخاخات ماعادت اتفيد

كشفت عند دكتور فالاهلي وقالي العلاج الدايم العمليه قلت طيب بستشير اكثر من دكتور

وخذت موعد عند الدكتور احمد سليمان فالعمادي وقال محتاج اشعه مقطعيه عشان انحدد عملت الاشعه وقعدت يرويني الوضع شلون عن طريق الكمبيوتر وشفت بعيني ان وضعي كان مأساوي وقال انت وضعك محتاج عمليه .. قلت استخير واجيك واستخرت وتوكلت على الله

سويتها يوم السبت تاريخ 7 يناير 2012 والحين اللهم لك الحمد ما اشتكي من شي

بس التعب اول يومين وقالي بعد العمليه انت محتاج اقامة ليلة ..

واي استفسار ثاني انا حاضر

هجمة مرتدة
31-01-2012, 03:18 PM
مافي أحسن من الدكتور عبدالعزيز الجفيري في هذا المجال . .

أنا أجريت عنده (في المستشفى العمادي) عملية الانحراف / اللحمية . .

ولله الحمد العملية ناجحة وبسيطة من كل المقاييس . .

وهو ما شاء الله يده خفيفة وإن شاء الله علاجك على يده . .

Mishaal
31-01-2012, 03:24 PM
الدكتور الجفيري هو المتخصص في هالعمليات ومعظم الاشخاص اللي اعرفهم مسويين عنده في مستشفى العمادي
العملية حسب ما سمعت بسيطة جدا جدا ........
انصحك بالدكتور الجفيري

فراشة ناعمة
31-01-2012, 04:15 PM
واي استفسار ثاني انا حاضر

أشكرك يالطيب على التفاصيل،، استفدت وااايد،،

ابي آخذ استشارة هالدكتور،، احصل مواعيد عنده بسهولة والا نظام ارقام؟

اتصل ومحد يرد علي،،

فراشة ناعمة
31-01-2012, 04:16 PM
أشكركم جميعا،،

الاغلبية مسويين في العمادي،، محد منكم مسويه في رميلة؟

badboss
01-02-2012, 06:36 AM
أشكركم جميعا،،

الاغلبية مسويين في العمادي،، محد منكم مسويه في رميلة؟

اختي انا سويتها في رميلة ويمكن ما شفتي ردي فالصفحه الي قبلها

فراشة ناعمة
01-02-2012, 11:39 AM
ممكن تفيدني الله يجزاك خير،،

حصلت موعد للعملية بسهولة؟

لأني اللي سمعته ان المواعيد عندهم صعبه وايد توصل للسنة؟!

فراشة ناعمة
01-02-2012, 11:41 AM
ايش كثر اتصلت العمادي محد يرد علي وبلاقسم ماادري ايش فايدة التليفونات عندهم؟!

عيزت وانا اتصل ومحد يرد،،

badboss
01-02-2012, 01:23 PM
ممكن تفيدني الله يجزاك خير،،

حصلت موعد للعملية بسهولة؟

لأني اللي سمعته ان المواعيد عندهم صعبه وايد توصل للسنة؟!

انا سويت اقتباس لردي السابق

اختي توكلي على الله وسويها

انا سويتها وبيصيرلي سنه مسويها عند الدكتور عبدالعزيز الانصاري اعتقد في مستشفى الرميله مع دكتور مصري كان زائر للبلد

الاعراض الي كانت عندي ( انحراف بالحاجز الانفي وجيوب انفيه و لحميات و انتفاخات بالقرنيات الانفيه ) بنجوني بنج كامل العمليه خذت ساعتين ونص والعمليه ما تخوف بس الي صار معاي البنج يوم رحت الحمام الله يكرمج ويكرم الجميع جاتني دوخه وكنت بطيح يعني يوم بتروحين الحمام بعد العمليه لازم يدش احد معاج لانه بتحسين بدوخه وبعدين بيشيلون لج الفتيله ثاني يوم واصعب شي يوم شالو لي الفتيله لانه يكون في دم متجلط داخل الخشم ويوم يسحب الفتيله يحك فالجلد من داخل ويحرق بطريقه مب طبيعيه وبس والحمدلله الحين احسن من قبل بوايد توكلي على الله وسويها

وسلامتج ماتشوفين شر اجر وعافيه ان شاء الله

المواعيد كانت طويله مع الدكتور عبدالعزيز الانصاري انا يوم حطلي موعد العمليه كنا بشهر 2010-10 والعمليه حطلي اياها بشهر2011- 1 من السنه اليديه وما رحت لهم بشهر 1 اتصلو علي بشهر 2 قالو لي انت كنت محدد موعد عمليه وماجيت الموعد لازم تيجي بكره لانه في دكتور زائر بيجي الدوحه من مصر وانا محطوط اسمي فالقائمه وكان عددهم 12 ورحت لهم وشافني الدكتور وحددلي موعد العمليه ثاني يوم وسويتها اذا تبين تسوينها في رميله بتعانين من بعد الايام لانها وايد بعيده شوفي المستشفى الاهلي او العمادي

فراشة ناعمة
02-02-2012, 09:53 AM
ماشاء الله عليك حصلت موعد اعتبره قريب،، انا اعرف ناس ينتظرون بالسنة واكثر لين ييهم الدور،،

على العموم،،

انا رحت عند دكتور احمد سليمان وعطاني علاج استخدمه اسبوع اذا ماشاف اي تحسن قالي لازم عملية،،

qatari4
02-02-2012, 01:11 PM
أنا مانصح في د.احمد سلمان عملي عمليه اللحمية من 4 شهور والحين أعاني من رجوع اللحمية وحاسة الشم راحت وأعاني من كثرت الإفرازات وأخذ في العمليات 4 ساعات وانا في البنج

فيصـــل
02-02-2012, 03:57 PM
أشكرك يالطيب على التفاصيل،، استفدت وااايد،،

ابي آخذ استشارة هالدكتور،، احصل مواعيد عنده بسهولة والا نظام ارقام؟

اتصل ومحد يرد علي،،

مرحبا اختي السموحه على التاخير فالرد

دوام العمادي من الساعه 9 صباحا الى 12 الظهر

ومن 5 المسا الى 9 المسا

الافضل تتصلين الصباح عقب التسع وتاخذين موعد بالتلفون وعقب تروحين

انا عن نفسي اسوي هالحركه اخذ موعد الصباح واجيهم المسا لان زحمه عليه

44666009

qatari4
02-02-2012, 04:50 PM
اتعالج الان من بخاخات الكورتزون وبعض الاحيان حبوب الكرتزون والسبب رجوع اللحميه بعد عملية د.احمد سليمان

فراشة ناعمة
02-02-2012, 08:50 PM
مرحبا اختي السموحه على التاخير فالرد

دوام العمادي من الساعه 9 صباحا الى 12 الظهر

ومن 5 المسا الى 9 المسا

الافضل تتصلين الصباح عقب التسع وتاخذين موعد بالتلفون وعقب تروحين

انا عن نفسي اسوي هالحركه اخذ موعد الصباح واجيهم المسا لان زحمه عليه

44666009


هو أخوي،، رحت لهم الحمدلله والدكتور عطاني علاج، واذا ماتحسنت خلال اسبوع قالي عملية،،

جزاك الله خير،،

فراشة ناعمة
02-02-2012, 08:51 PM
اتعالج الان من بخاخات الكورتزون وبعض الاحيان حبوب الكرتزون والسبب رجوع اللحميه بعد عملية د.احمد سليمان


انا لو اضطريت اسوي العملية،، ماراح اسويها في العمادي،،

الله يشافيك،،

فيصـــل
03-02-2012, 08:01 AM
هو أخوي،، رحت لهم الحمدلله والدكتور عطاني علاج، واذا ماتحسنت خلال اسبوع قالي عملية،،

جزاك الله خير،،

ويجزيج بمثله اختي الكريمه

وباذن الله ماعليج شر والله لايحوجج للعمليه

صباحكم خير