رايكم باركيه أو سيراميك بشكل باركيه؟وشنهي تجربتكم مع رافكو؟

[ليل وتعاليل]

اهلا وسهلا جميعا . .

أعضاء المنتدى الغالي ..


استشارة سريعه .. أنا في حيرة بين الباركية والسيراميك ..

حق غرف نوم ..

رحت رافكو واعجبتني الألوان اللي عندهم واستقريت على الخشب الصناعي المتر بـ 135

بس مدري هل سبقت لكم تجربتهم .. وكيف السعر والضمان ,,


وهل أصلا اركب باركية والا تنصحوني بسيراميك ؟؟



مشكووووورين ,, و عساكم ع القوة ,,

[M O H D]

حق غرفة النوم انا اشوف الباركيه افظل
بس اعتقد الي حصلته سعره فوق شوي
في محل فطريق سلوى ناسي اسمه
بس تقريبآ مجابل شركة الطارق حق سيارات التيوتا عند جسر مدماك
هو محل ستاير وباركيه
عنده اشياء حلوه بسعر اقل من الي انت محصله

[Fendi]

نصيحتي حق الغرف انا اشوف الباركيه افضل بوايد

[آهـل شَـرق]

يفضل الباركيه حق غرفة النوم
انصحج اختي تروحين شارع الاصمخ حق الباركيه اسعارهم حلوه وشغلهم عدل

[بو الجوري]

انا عن نفسي خذت لغرف النوم كلها ( سيراميك على شكل باركيه )
تجيك نفس الباركيه ، شرايح ،،

أنا فضلته عن الباركيه الأصلي ، لأني ماحب الباركيه
يطلع صوت إذا تمشي عليه ومع الأيام سمعت إنه ينفش

يعني الغرف عندي لوتشوف تحسبها باركيه :.. ممكن أدليك بيتي ، مر وشوف

نصهم خذتهم من نابينا ونصهم من الدهليز و حسين فكري أعتقد

ناسي أسعارهم بس أتوقع من 75 لين 120 مب متذكـر

[أم وضاحي]

عن تجربه
عن تجربه
عن تجربه
لما كنت في بيت أبوي جددت غرفتي و حطيت باركيه
سويته عند دورا إللي في طريق سلوى
عطاني إياه ب 130 ريال
ولما تزوجت
حطيت الباركيه في الممرات و الصاله و غرفة الطعام

مميزاته
سهل التركيب يعني في كم ساعه يركبونه و يخلصون
سهل التنظيف مجرد مسح بالممسحه القطنيه عن الغبار أو فوطه مبلوله عن أي شي لزج
فخم في المنظر و ألوانه و درجاته كثيره و مناسبه
عيوبه
كانه سيراميك في مسألة أنه يمسك البروده
تجنب الماء قد ما تقدر و لا بينتفخ و يتفكك
ولازم تهويه في المكان وتبريد ولا بنتفخ و بيتفكك يعني لما تسافرون لازم تخلون مكيف شغال و خلو حد كل يوم يبند مكيف و يشغل الثاني عشان ما ترتفع حرارة البيت و يتفكك الباركيه ادري معاناه
وما أنصح بالباركيه و لا السيراميك في غرفة النوم لأنها مثل ما قلت رغم أنها تعطي فخامه للمكان إلا أنها تمسك البروده حق المرض و الزكام
و إذا حابه الباركيه في غرفة النوم لآزم قطع سجاد فوقها قد ما يناسب المكان

وكل هاي النصايح عن تجربه
و بالتوفيق

[OREO]

الباركيه احلى و افخم من السيراميك ،، لكن من وجهة نظري اشوف تفرشين الغرف بمكيت احسن ،، لان تتفادين البروده و خاصه في الشتا و المشي فوق الباركيه او السيراميك ممل ممل ممل و غير ان دوم تحرصين ان ما يطيح منج شي مثل غراش العطور و الخ لان ع طول تنكسر ،،، و غير ان المكيت للتجديد احسن و اسرع و افوفر ،،،

[ليل وتعاليل]

بو الجوري
اهل شرق
ام وضاحي

mohd
fendi
oreo

مشكووووورين كلكم و يعطيكم العافية
خلاص انا قررت اسوي نص باركية و نص موكيت الحركة
وبتوكل اشوف شارع سلوى
يمكن احسن من رامكو

ولكم جزيل الشكر

[QTR-SOUL]

بالنسبه لي الباركيه احلى و افخم من السيراميك مافي مقارنه
انصح بالباركيه وبقوه خصوصا لانه نعاني من الربو فالموكيت ممنوع من الغرف والباركيه احلى وادفى وانظف ومجرد ماتحط سجاد مافيه صوت له وانا ركبته من محل في شارع سلوى اسمع كازا بلو المتر ب70 من 3سنوات ومااشتكيت منه