شسالفھ المستشفى ؟

[ام حمادي]

السلام عليكم ورحمة الله وبركاته



حبيت اطرح موضوع مهم جدا للنساء من الدرجه الاولى والرجال ايضا لاسباب سيتم طرحها


موضوع غرف التنويم في مستشفى النساء والولاده

هل تؤيد وضع الاجنبية بجانب القطريه ؟ وهل هناك قانون يلزم قسم للقطريات واخر للاجانب ؟

الردود اللي بيكتبون تكبر وكذا من اولها اقول الموضوع مو تكبر او شي ولكن الاجنبيات معروفين سواء كانوا عربيين او غيرهم ان رجالهم عندهم 24 ساعه مما يسبب المضايقات للاخرين


انا ترقد في المستشفى لفتره وصراحه اشوفهم يحطون جنبي اجانب واتلعوز من رجالهم واوقات الزياره عندهم لان اكثرهم شغالين العصر الظاهر فيزورون المريضه فليل


وانا سمعت انه ممنوع

طرحت هذا الموضوع لا لسب الخدمات

انما اولا : رساله اودها تصل الى اداره المستشفى
ثانيا : تفيدوني بالقوانين المتعلقه بهذا الامر لاني جاهلتها تماما



وشكرا

[@الأدعم@]

طيب انتي لقيتي سرير غيرك مالقى وعطوها مسكنات وراحت البيت الين مايلقون لها سرير :(

[شيزكيك]

على ما اظن القطريات يخلونهم مع بعض وفي ناس ما يصدقون وحده تنوم عندهم الا الكل مرتز عندهم وممكن اليهال يطلون عليك من تحت الستاره

اخر مره تنومت واحذاي قطريه زوجها واهلها تموا لين الساعه عشر في الليل وعقب طلعوا والا الغرفه الي

احذانا فيها عرب وصج سندرونا وما اطلعوا الا الساعه 12 وغقب حضرتها طولت على صوت التلفزيون

فري الله علي وربيت ورحت الدور الخامس يازينه ويازين هدوءة

[ام حمادي]

المسأله مو مسألة سرير وما سرير انا ما اعترض ع وجود السيده اعترض ع زياراتهم

ليش مافي قسم خاص فالقطريات اتوقع بنلاقيه فاضي

والله يا اختي اذا ع الاسره ترا فاضيه بس هم ما يتعبون نفسهم ويشوفون وصارت كذا مره

[ام حمادي]

تشيز كيك

والله انا يجيبون حتى ما يستأذنون ولا شي ومره دخلوا الرجال ومرته وانا الله يكرمكم فالحمام وطلعت انصدمت


قمة الامبالاه وانقهرت ليه ما هاوشت النيرس وقتها بس من الصدمه قعدت في مكاني غلط يدخلون رجال وانا حتى مو لابسه عباه وشيله طالعه قدامه المفروض يخلونه ينطر برا لين اقعد مكاني واسكر الستاره ع نفسي

والله لو عندي امكانيه رحت هناك انا مطوله عندهم توصل لشهر ماقدر ع الخامس شهر بصير بنت الوليد بن طلال لو رحت :)

[الأصيلة]

المفروض يكون قسم لـ غير القطريات
احترام لـ بنت البلد
فعاداتهم مختلفه عن عاداتنا وتقاليدنا...
ولأن الغرف صغيرة ..
لو بعد كبيرة وفيه مساحة وحاجز بيكون أهون...
لكن اللي ألاحظه أن المستشفى يحاول قدر الإمكان وضع القطرية مع القطرية...

[£عبدالعزيز£]

الحل مب في انهم يسوون قسم خاص للقطريات لانه احنا نتكلم عن مستشفى مب عن

فندق او مطعم او اي مكان عام .. المفروض ان جميع المرضى سواسية

في حلول ثانية .. ممكن يمنعون الزيارات او تواجد اكثر من شخص عند المريض

اما انهم يسوون قسم خاص للقطريات قوية .. يعني مثلا القطريات بس مسلمات وباقي الجنسيات لا ؟

[ام حمادي]

اؤيد الاصيله

الحاجز ستاره عاد استحي اكلم ورجال جنبنا صوت المره عوره وبعدين الدكتور اذا جا۽ او النيرس واقولها حالتي احراج يكون رجال جنبي يسمع والله موب عدله


عبدالعزيز
ليش ما يكون لنا قسم بلدنا وابسط شي نجد الراحه النفسيه والصحيه القطريين يستحون يبسطون عند نسوانهم واذا جاوا دكاتره احترموا المريض اللي جنبهم وراحوا يعني فيه عادات متشابه نعرف وش العيب عندنا ووش اللي يصح

اما يجي رجال يقعد ما بيني وبينه الا ستاره من الصباح لين قريب اذان العصر لا اروح مكان ولا اكلم ع راحتي ولا اقدر اتفاهم مع دكتوره بسبته

محد يرضاها لمرته ولا لاخته وغير كذا يدخل الغرفه وانا بالحمام الله يكرمكم اتفاجأ بوجوده وليتهم يسكرون الستاره عليهم لا ياخذون راحتهم وكل شوي رايحين للمغسله يغسلون

والتلفزيون ممنوع لان ما نقدر نفتح الستاره عشان الاخ اذا راح المغسله ورجع مكانه شافنا


هذي كلها ما تسبب ازمه


والله ودي اطلع من المستشفى بس حالتي ما تسمح مليت من الحركات هذي

[الأصيلة]

أختي أم حمادي
بما انك مقيمة بالمستشفى مدة طويلة من حقك
غرفة مستقلة..
أو غرفة بسرير 14... في الدور الثاني والثالث والسادس
لاتسكتين عن حقك بما أنك قطرية...

[hamoor4ever]

المشكله في اختلاف العادات صحيح انهم مسلمين بس هم مايراعون حد عن تجربه ويحبون اطفالهم يسرحون ويمرحون ماعندهم اي مشكله ، والله مره صادني موقف فعلا ماعندهم احترام للعائله مااعمم بس اقول الاغلب وماعندهم فكره عن اي عادات وتقاليد عندنا لانهم الحياه عندهم سهله ، وماعندهم اي مشكله ان الزوج او رجالهم يطالعون حريمنا ولايعتبرونه عيب وساعات تنحط بموقف ياانك تسوي مشكله وياهم ياانك تغير تبتعد عنهم ، الله المستعان

[penguin]

خلاص كل شخص يروح المستشفى ماله الا يسحب سريره معاه

و يحط سدادة اذن و يعطيهم ظهره

[الـقـاسـي]

الا ليش الغرف الجماعيه هذي ليش مب كل غرفه لحالها

[مضارب دوسري]

من فتره زوجتي ولدت
وانا طلبت غرفه خاصه
ولكن الغرف الخاصه تبدا من 2 الظهر

المهم حطوها في غرفه على جنبها وحده شاميه للاسف كلها 6 ساعات ولكن كانها 6 ايام
اول شي التحكم فالتكييف كان عندها
وكانت حاطه درجة الحراره 26 في وقت كانت درجة الحراره برى اعلى من 40
يعني الغرفه صارت غرفة سونا مب غرفة مستشفى
كلمت زوجها وقعد يقول ما بئدر أسف
طبعا مع الهواش نزلوا درجة حرارة التكييف لين 20

ثاني شي الساعه 10 وقت فطور والاخ جايب اسماك مدري ربيان لزوجته
والريحه حدث ولا حرج
هذا غير الازعاج لان الاخ اللطيف جايب العايله كلهم عند مرته مع ان قوانين مستشفى حمد كاتبين مواعيد الاطفال من 3 لين 10

الشي الثاني الغرف الخاصه
جات الساعه 2 وطبعا موضوع الغرف الخاصه تكون بالواسطات او ( رفع الاصوات)

مع رفع الصوت والهواش والفضيحه نقلوا زوجتي لغرفه خاصه
كان رقمها 2 فالانتظار
ؤفوق هذا الموظفات اللي مختصين فالغرف الخاصه يقولون لي محد طلع اليوم الا وحده ومافي مكان
وبعد مشاجره وهددتهم اني بدش لمسؤولهم واكلمه انه هم يتبعون نظام الواسطه فيما بينهم او اللي يعرفونهم
حبوا يختصرون الموضوع بكلمه خلاص كفايه صراخ روح ادفع ثمن الغرفه

طبعا ثاني يوم بعد الولاده وحده من الموظفات متصله فالغرفه تقول لزوجتي انتوا بتطلعون الساعه 2 لان مافيج الا العافيه ههههههههه مع ان الولد كان للحين ماختنوه
طبعا رجعنا لنفس الموال هواش وغيره



يعني بصراحه مايجون الا بهواش ورفع اصوات او واسطات

[qrt_trading]

اختي الله يعينك ان شاء الله لكن هذا اللي اتقولينه مش حل الحل الوحيد هو ان يكون هناك ساعات زيارة صارمة يعني بعد العشر ممنوع دخول اي رجل لقسم الحريم، واذا على موضوع قطرية وأجنبية والله أنا لما ربيت في بنتي كانت معاي أجنبية والله قمة في الاخلاق ولا حسيت فيها ولا في زوارها لكن لما راحت جات عندي قطرية والله ثم الله انها ماكملت عندي خمس دقايق الا شلة اليهال اللي معاها كاتين مرتين على الارض بيبسي وعصير ويلا اصراخ وهم ينادون على اللي ينظفون الغرف علشان ينظفون الوصخ ولا بعد أطرش اليهال عندي تبي ريموت التلفزيون والله أني ما عطيتها إياه لأني أنا اموقعة على ورقة بالاستلام فإذا اكسرو الريموت أنا اللي لازم ادفع ، وفي فترة عشر دقايق شردوني من الغرفة نزلت غرفة العناية للمواليد لان بنتي كانت تعاني من بعض الصعوبات في التنفس ولما رجعت لقيت مكاني معفوس عفاس افتشين في شنطتي والحمد لله ماكان فيها فلوس وقضوا على الجوكلت او ثلاث أرباعه للأمانة حلفت أني ما اقعد وكلمت زوجي وقاتله أني باطلع من المستشفى وراح اخلي بنتي في العناية لكني ما اقدر اقعد معاهم في غرفة وراح وحاول يحصل لي على غرفة لكن دون فائدة تذكر فطلعت من المستشفى ولما رجعت البيت وبديت اطلع وارتب اغراضي اكتشفت انهم بايقين من التوزيعات تقريباً ست او سبع اكياس.
المشكلة مش مشكلةقطرية ولا أجنبية المشكلة ان بعضهم ما يعرفون السنع حتى القطريات المهم هم يكونون مرتاحين اما انتي ماتهمينهم في شي.
ولا تقولين هذي حالة وحدة اختي بعد يوم ربت كانت اللي معاها في الغرفة قطرية ولعوزتها وباليالله اصبرت يوم واحد وبعدها طلعت من المستشفى ورجعت البيت.*

[ام حمادي]

الاصيله

شلون بسرير 14 ؟

في غرف مستقله هنا غير الغرف الخاصه




هامور فور ايفر

صحيح كلامك وانا حطيت الموضوع بهدف الحد من ذا الشي وتوصيله للجهات المعنيه
ومعرفة قوانين وضوابط المستشفى التي نجهلها بمثل هذه المواقف

[ام حمادي]

اشكركم كلكم

لكن الحل شنو الصراخ ؟ قالت لي وحده هذيل ما ينفع معهم الا الصراخ وهي موظفه بس انا موب من عادتي ولا من قناعاتي ان الصراخ حل ما اقدر

احب الزم الناس بالقوانين اللي بينا بس للاسف مدري ليش قوانين وضوابط المستشفى مخفيه ؟؟؟؟؟؟؟؟؟؟


اختي قطر ترادنغ
صراحه الله يعين لو فعلا بيصير لي نفس الشي والله استانس اذا جاتني قطريه اخاف تطلع اخس هههه

واللخس ما تقدرين تهاوشينهم تحسين احراج نتم معاهم ايام واحنا متهاوشين هه عشان زياره وما زياره


بالنسبه لقوانين الزياره الحين ما فيه تجي ١٢ ويبدأ السهر والسمر وليت زوج المريضه بس اللي يجي رجال اثنين ثالثه ودقوها سوالف والله بعد مادري بعد ١٢ فيه والا ممنوع




مافي حد عنده خبره يقولنا قوانين المستشفى

[أم حمد ومحمد]

اختي العزيزه ام حمادي

الشهر اللي طاف كنت بالمستشفى
مستشفى النساء والولاده
والقانون يقول القطريه مع القطريه
لكن
اللي صار اني تسندرت من القطريه للاسف
تحكم بالمكيف وزيارات لين 11 بالليل غير الرجال اللي يزورونها من اهلها واخوانها تعال وافتح الباب كأن الغرفه خاصه لهم وتحكم حتى بالاضاءه لدرجة اني نزلت تحت لمسوؤلين الغرف طلبت نقلي مع اي جنسيه غير قطريه من كثر ما تعبت نفسيا

الحل

كلن يتسنع ويعتدل ويعرف ان هذا مستشفى مب فندق

والله اني حولت للاهلي بس عشان اشتري راحتي

[chillis]

الي اعرفه ان قسم القطريات لحالهم والاجنبيات احالهم الا اذا كان عندهم ضغط غرف :) ياما رقدنا بس عمري ماكانت اجنبيه معاي

[khaldoon]

اتفق تماما معاج

[ام حمادي]

من خلال الردود تبين ان القطريات ايضا بعضهم سبب في ازعاج المرضى بسبة الزيارات

مدري وين احترام الاخرين انا اقصر صوتي انا والزوار عشان لا ازعجهم وذيلا صايره غرفتي فندق رجال داخل رجال طالع




اذن حل ١ قوانين صارمه وجديه بالنسبة لزيارات الرجال

[الأصيلة]

الاصيله

شلون بسرير 14 ؟

في غرف مستقله هنا غير الغرف الخاصه




هامور فور ايفر

صحيح كلامك وانا حطيت الموضوع بهدف الحد من ذا الشي وتوصيله للجهات المعنيه
ومعرفة قوانين وضوابط المستشفى التي نجهلها بمثل هذه المواقف

أتذكر أن في كل دور غرفة مثلا 314 أو 214 أو 614
تكون بسرير واحد فقط ( خاصة )
إلا إذا أخذوا هذه الغرف للأطفال يمكن...

[الأصيلة]

من خلال الردود تبين ان القطريات ايضا بعضهم سبب في ازعاج المرضى بسبة الزيارات

مدري وين احترام الاخرين انا اقصر صوتي انا والزوار عشان لا ازعجهم وذيلا صايره غرفتي فندق رجال داخل رجال طالع




اذن حل ١ قوانين صارمه وجديه بالنسبة لزيارات الرجال

مب كل القطريات مزعجات ولا بكل الأجنبيات مزعجات...
كلن حسب بيئته وتربيته وثقافته...
وإن شاء الله يفتحون مستشفى السدرة وتخف حدة المشكلة..
ويكون للقطريات فقط...

[غايه الطواش]

مره مرت اخوي ترقد بالمستشفى والي جنبها قطريه
الله لايوريكم ...ولاجنهم متعلمين ولاجنهم متربين ..وعيالهم هادينهم ويطلطلون ..ورياييلهم داشين وطالعين لاحيا ومستحى .....
ويتكلمون على راحتهم ...وشيبتهم جر الستاره وقام ينشد ....
وش جاكم وش سميتو الرجال ووووووو

مادري متى هالفئه من الناس بترتقي باسلوب حياتها واخلاقها ....
مادري متى بعرفون الاحترام والاخلاق واساليب التعامل وحق المريض ...

[الصغيره]

الكل مريض وانسان سواء قطريه او اجنبيه

واللي ما يعجبها اكيد به مستشفايات خاصه وغرف خاصه بنظري ان الرض لا يفرق بين قطري او غيره

[ريتويت]

مب سالفه انهم مزعجين اختي .. المستشفى تفتقر للسراير وهذي مشكله والحين هم يوسعونها انشاء الله تتعدل