المساعد الشخصي الرقمي

مشاهدة النسخة كاملة : الواتس اب...... والبيانات غير المشفرة .. نصائح ارجوا الدخول



يراعٌ فراتي
20-02-2012, 05:35 PM
الاخوة والاخوات الاعزاء

السلام عليكم ورحمة الله وبركاته

نظرا لانتشار برنامج الواتس اب بشكل رهيب

http://4.bp.blogspot.com/-scN3jHiUbrc/TlnB-g_dSYI/AAAAAAAAEmI/vIqvis9gbrg/s1600/Whatsapp-Nokia.png

ونظرا لعدم معرفة البعض بان البيانات المرسله عبر هذا البرنامج قد تكون عرضة للخطر بسبب انها بيانات غير مشفرة
اما بالنسبة لانتشار ارقام غريبة تحاول ارسال رسائل غير لائقة لاهل قطر
اعتقد ان اللي يسويه صاحب هالارقام مب شي اسمه هكر
لكن مجرد انه ارسال عشوائي او محاولة احتيال او كما يقال انها خدمة بفلوس

ولكن الحذر واجب

انا مهندس بخبرة 10 سنوات واكد لكم خطورة هالبرنامج وخصوصا في مجتمع محافظ

اشرح لكم شوي عن الواتس اب للحذر والتنبيه
---------------------------------------------------------

امكانية اعتراض اي معلومة مرسلة من جوالك من خلال برنامج الواتس اب
=============================
تتم بطريقتين
الاولى :


تكون شابك على الوايرلس

هني كارثة اي واحد عنده خبرة في الهاكينك ممكن يكون شابك على نفس النت وورك
ويسوي محطة بويزننك اي كانه هو المحطة اللي توجه لها المسجات وهذه كارثة

يقدر يشوف كل اللي تطرشه من صور و لينكات ومحادثة

==============================
الطريقة الثانية :

شبكة البيانات الخلوية :
مثلا شبكة كيوتل او فودافون
هني يكون الوضع اصعب بالاختراق
لانه يحتاج الى معدات وبرامج خاصة صعب انها تكون عند شخص عادي

وهذا الاعتراض ممكن يكون موجود عند شركات الاتصال للمراقبة

===================================

ملخص الكلام

لاترسل اشياء مهمة على الواتس اب
واذا ارسلت لا ترسلها ونت شابك وايرلس

اي رقم غريب وضايققك سوى له بلوك يقدر هو يشوف الستاتس اللي حاطها انت " يعني النك نيم اللي حاطه بالواتس اب " بس مايقدر يطرش لك

نصيحة للاخوات في المنتدى
لا تحفظين اي صور مهمة او بيانات على جوالج نهااااااائي
لانه معرض للهاكينك
او للسرقة او للضياع

حطوا ارقام سرية على جوالاتكم

لاتبيع جوال الا وانت متاكد انه مافي صور خاصة حتى لو حذفتها
والميموري كارد بعد يا احتفظ فيه او يكسره

وقريبا بنزل لكم موضوع عن كيفية حذف الصور والبيانات المهمة بطريقة امنه
وفورمات الاجهزة بطريقة تضمن عدم استرجاع الصور والبيانات



----------------------------------------------------------------------
اتمنى من ادارة المنتدى عدم نقل الموضوع الى قسم الكمبيوتر وابقائه اطول فترة ممكنة في هذا القسم
كي يتسنى للجميع قراته ومن المعروف ان الكل يدخل الى قسم الحوار العام


الله يحفظنا ويحفظكم

اخوكم فالله

يراع

الموضوع حصري وغير منقول من اي منتدى اخر

Hassan33
20-02-2012, 05:43 PM
شكراً أخوي يراع على هالمعلومات والتى يجهلها كثير من مستخدمي الواتس اب ....والله يحمي الجميع من ضعاف النفوس

bus3od
20-02-2012, 05:46 PM
يعني بالعربي هذا الشخص يقدر يدخل على ملفات الصور اللي فالجوال ؟

وشلون طريقة الدخول على جوال الضحيه ( هل صحيح انه يقدر يطرش صوره واذا تم قبولها يخترق الجهاز) ؟

يراعٌ فراتي
20-02-2012, 05:57 PM
اخوي بسعود دام العلم في تطور لا تستبعد اي شي

واجهزة الجوال الحديثة اصبحت كمبيوترات مصغرة
يعني فتح اي بورت فيها والاتصال معه
بحد ذاته مصيبة

طرفه
20-02-2012, 05:59 PM
جزاك الله خير على التذكير

bus3od
20-02-2012, 06:06 PM
مشكور اخوي

طائر النورس
20-02-2012, 07:09 PM
سؤالي للأخ المهندس الفاضل:

بالنسبة للآيفون....عند حذف الصور أو البيانات منه هل تنحذف بشكل نهائي؟؟؟؟

وهل يستطيع من يشتري الجهاز -مثلاً- من بعدي عمل استرجاع لتلك الصور أو البيانات؟؟؟

فإن كان كذلك: فهل من طريقة للحذف النهائي؟؟؟

ريتويت
20-02-2012, 07:16 PM
معلومات مهمه

STAR
20-02-2012, 07:22 PM
هل بامكان كيوتل معرفة الشخص ؟!!

نيساني
20-02-2012, 07:29 PM
جزاك الله خير والله يكثر من امثالك اخوي


واتمنى من البنات الحذر من التصوير بالتلفونات ولو اني غاسل يدي بس يالله لعلى وعسى


وشكرأ

وطن
20-02-2012, 07:35 PM
جزاك الله خير

يراعٌ فراتي
20-02-2012, 07:43 PM
اخوي بالنسبة للايفون الملفات فيها تشفير افضل من غيرها
وخصوصا اذا فور اس وكنت منزل اخر فيرجن

ولكن هذا لايعني انه انت في مآمن
في برامج ترجع ملفات وصور من الايبود
يعني الموضوع اصعب بالايفون ولكن ليس بمستحيل

فمن يكسر نظام تشغيل بجلبريك
لن يعجز عن استرجاع الملفات
-----------
بالنسبة لكويتل
ما اعتقد انه اختصاصهم مراقبة شبكات الواير لس لحمايتها من تهكير داخلي
في كل مكان
والله اعلم

الافضل هو الاعتماد على شبكة الارسال يعني كيوتل او فودافون
وفي حال اردنا الاتصال بالواير لس مفروض يكون الواير لس خاص فينا ومحمي برقم

اما اذا شبكنا على وايرلس عام
هنا المصيبة

فالوايرلس العمومي ممكن يكون اكثر الاماكن خطورة

يراعٌ فراتي
20-02-2012, 07:55 PM
70 % من فرص الهكر
تجي من جهل المستخدم

فمثلا استطيع ان اخذ حساب شخص في الفيس بوك خلال دقيقة

وقد احتاج شهور او يمكن ما اقدر على شخص اخر عنده وعي كافي

هنا تكمن المشكلة

يعني اي شي نستخدمه له علاقة بالتكنولوجيا
مفروض يكون عندنا وعي وحذر كافي في استخدامه

لمعة الالماس
20-02-2012, 08:20 PM
اوكي واذا رقم غريب ارسل لي صورة بالواتس اب ؟

شنو يستفيد؟

او شنو ممكن يحصل عليه من جهازي؟

سـ ع ـود
20-02-2012, 08:35 PM
ياهلواتس اب اللي مابلعته حاولت اتعلمه بس ماقدر مب بالعه
مسنجر البلاك بيري والهوتميل ويالله يالله

بازار
20-02-2012, 08:39 PM
اي رقم غريب وضايققك سوى له بلوك يقدر هو يشوف الستاتس اللي حاطها انت " يعني النك نيم اللي حاطه بالواتس اب " بس مايقدر يطرش لك


[/color]

اخوي الكريم شكر الله اجتهادك ..

عندي تعليق على نقطه (رقم غريب ضايفك)

البرنامج لا يُـظهر الرقم الذي قام باضفاتك الا في حالة قيامه بارسال رسالة

يعني اذا ضافك عنده في البرنامج وما ارسل لك شي ماتعرف انك انت عنده اصلا ،،

وشكرا لك

واقعية
20-02-2012, 10:08 PM
جزاك الله خير

اول انا ماكنت احط اي شي ع الجوال

الحين صور عيالي و غيرهم كلها ع الجوال

الله يستر علينا و على جميع المسلمين

شاكرة الطرح المهم
واقعية

يراعٌ فراتي
20-02-2012, 10:09 PM
اخوي الكريم شكر الله اجتهادك ..

عندي تعليق على نقطه (رقم غريب ضايفك)

البرنامج لا يُـظهر الرقم الذي قام باضفاتك الا في حالة قيامه بارسال رسالة

يعني اذا ضافك عنده في البرنامج وما ارسل لك شي ماتعرف انك انت عنده اصلا ،،

وشكرا لك



هلا اخوي

اخوي يمكن في مليون شخص ضايفك وانت ماتدري ومارح يظهرون لك في الواتس اب
هذول مالنا شغل فيهم

انا اقصد رقم جاك على الواتس اب
يعني اذا ازعجك
سميه ازعاج واتس اب
وسوا له بلوك

اتمنى تكون فهمت قصدي

JN000N
20-02-2012, 10:12 PM
متاااابعه

المبرمج صلاح
20-02-2012, 10:28 PM
فعلا كلامك صحيح
ولهذا دائما انصح اللي عنده وايرلس في البيت لازم يحطون له كلمة سر وتكون قوية
معظم الرواترات الان فيها التشفير wpa وهو تشفير قوي جدا لا يستطيع احد اختراقه بسهوله
وكلمة السر تكون فيه عالاقل 8 خانات

معظم رواترات كيوتل التومسون تيجي بكلمة سر مشفرة بالتشفير wep وهو تشفير قابل للاختراق للاسف
يجب تحويلها الي wpa من اعدادادت الرواتر للمزيد من الامان

ولكن في كل الاحوال لا تخلون وايرلس البيت من غير كلمة سر
ولمن تشبكون في مكان عام خليكم حذرين في التعامل
وسمعت في منتدي اجنبي انهم مشتكين من هالمشكلة في الواتس اب والشركة بتدرس موضوع تشفير الارسال والاستقبال في الواتس اب

الله يحفظنا ويحفظكم ويستر عليكم ان شاء الله

نــويصــر
20-02-2012, 10:39 PM
اي رقم غريب وضايققك سوى له بلوك يقدر هو يشوف الستاتس اللي حاطها انت " يعني النك نيم اللي حاطه بالواتس اب " بس مايقدر يطرش لك

اخوي شلون اسوي بلوك

المبرمج صلاح
20-02-2012, 11:09 PM
اي رقم غريب وضايققك سوى له بلوك يقدر هو يشوف الستاتس اللي حاطها انت " يعني النك نيم اللي حاطه بالواتس اب " بس مايقدر يطرش لك

اخوي شلون اسوي بلوك


عندما يرسل لك رساله وتفتحها لتقراءها (بمعني انك تكون في نافذة الكتابة للشخص)
اضغط خيارات وغالبا يكون الزر ااايسر في الجالاكسي والبلاكبيري
واختر more وبتحصل فيها بلوك اضغط عليها وسلامتك

ام السعف
20-02-2012, 11:20 PM
السلام عليكم ،،

اخوي الكريم اسمح لي اسئلك عدة اسئلة ،،

1- المخترق اللي بيلتقط رسايلنا من الواتس اب لازم يكون شابك من النتوورك اللي شغالين عليه؟
اهنيه التحذير لازم يكون بأهمية وضع باسوردات ،، من خلالها يمنع دخول اي مخترق على الشبكة ،
صح ؟

2- لما يشبك بالنتوورك ،، مثل الكمبيوتر ،، هو يقدر يشوف كمبيوتري وكل مافيه،، بس ما يقدر
يشوف كمبيوتر الآخرين ،، يعني اللي بيدخل على نتووركي راح يطلع على كل محادثتي
والصور اللي بفتحها ،، وتبقى اهنيه كيفية حصوله على الصور هذي بطرق مختلفة
او بطريقة يعرفها هو شخصيا ؟ صح ؟

3- في مثل هالحالات من التحذيرات ،، ومع انتشار تطبيقات كثيرة ومب بس الواتس اب
فاللي يحصل في حال اختراق شبكة الواير لس ،، كل البيانات المتداولة على الكمبيوترات
تكون معرضة للاطلاع عليها،، بما فيها الماسنجر ،،
ففي حال الهواتف الذكية ،، هناك تطبيقات كثيرة نتداولها ونستخدمها
فهل التطبيقات هذي آمنة والا بس الواتس اب عليه التهمة ؟

4- للأسف الشديد" ومب تكذيبا لخبرتك في عالم الكمبيوتر " احنا ما نقدر نصدق كل معلومة
تنكتب ،، ومن خلال هالموضوع ياليت تكون عندنا هيئة وطنية تراجع مثل هالأمور
او يكون للنادي العلمي القطري صفة مخولة بتجربة البرامج هذي ،، وتقديم النصائح
والارشادات اللازمة لحماية المعلومات الخاصة ،،

فمثلا اليوم بتدخل ام السعف وبتكتب خبر عن برنامج واو ميم وتقول انه غير مشفر
وراح يتنقال الكثيرين كلام ام السعف ،، طيب احنا اشلون نصدق ما قالته ام السعف ؟
ربما يدخل عضو ثاني ويقول : لا ماعليكم منها ،، ولا حد يحاتي واللي انباقت صوره
خله يقول لنا انه باقها ،،

فاللي ابي اوصل له ،، ان الهيئة هذي لابد ان تضم ناس عنهم خبرة ف هالمجال
ويجربون من خلال مركزهم الاختراقات اللي يتكلمون عنها في عالم النت ،،

لأن في مثل هالثورة التكنالوجية احنا بحاجة على اسس قوية نستند عليها
عند التعامل مع التطبيقات ،،

ملاحظة : اخوي كاتب الموضوع اسمح لي لو اني كتبت رايي من خلال موضوعك هذا
احترم خبرتك جدا ،، واحترم حرصك على التنبيه ،، بس احنا بالفعل اصبحنا بحاجة الى
مراكز او جهات رسمية نعتمد عليها ،،

الخزرجي قطر
20-02-2012, 11:26 PM
جزاك الله خير على موضوعك والتوضيح الي ذكرته عن الواتس اب

00soma00
20-02-2012, 11:38 PM
جزاك الله خير

يراعٌ فراتي
21-02-2012, 12:32 AM
هلا اختي ام السعف
اذا نفس النت ورك يعني هو يشوف الكل
انتي وغيرج وكل اللي شابكين على نفس شبكة الوايرلس سواء كمبيوترات او تلفونات

واقل شي يمكن يسويه هو انه يشوف الاي بي ويعرف المواقع اللي دشيتيها والمحادثات
ويقدر يسحب ملفات الكوكي وغيرها
واذا سحب الكوكيز تقدرين تقولين باي باي (الفيس بوك وتويتر والمنتديات والايميلات .... الخ )

يعني اعطيج مثال

انا والحين اكلمج قاعد اجرب ادش على الواتس اب في التلفون عندي وانا شابكه على الوايرلس مال البيت واحاول اسحب المحادثة عن طريق الكمبيوتر

واذا فعلا قدرت اني اشوف مسجات الواتس اب معنها فعلا الواتس اب سالفته خطيرة وخصوصا اذا شبكناه وايرلس


اما الكمبيوترات فموضوعها ربما اسهل

فمثلا الحين اخوي شبك على الوايرلس اللي في بيتي ودش على الفيس بوك الخاص فيه

في هالحالة
مب بس اشوف محادثاته
الا اقدر ادش على حسابه:tease:

http://www.qatarshares.com/vb/attachment.php?attachmentid=85&d=1329776882

يعني لا حد يشبك وايرلس في مكان مب ثقة

ام السعف
21-02-2012, 12:37 AM
هلا اختي ام السعف
اذا نفس النت ورك يعني هو يشوف الكل
انتي وغيرج وكل اللي شابكين على نفس شبكة الوايرلس سواء كمبيوترات او تلفونات

واقل شي يمكن يسويه هو انه يشوف الاي بي ويعرف المواقع اللي دشيتيها والمحادثات
ويقدر يسحب ملفات الكوكي وغيرها
واذا سحب الكوكيز تقدرين تقولين باي باي (الفيس بوك وتويتر والمنتديات والايميلات .... الخ )

يعني اعطيج مثال

انا والحين اكلمج قاعد اجرب ادش على الواتس اب في التلفون عندي وانا شابكه على الوايرلس مال البيت واحاول اسحب المحادثة عن طريق الكمبيوتر

واذا فعلا قدرت اني اشوف مسجات الواتس اب معنها فعلا الواتس اب سالفته خطيرة وخصوصا اذا شبكناه وايرلس


اما الكمبيوترات فموضوعها ربما اسهل

فمثلا الحين اخوي شبك على الوايرلس اللي في بيتي ودش على الفيس بوك الخاص فيه

في هالحالة
مب بس اشوف محادثاته
الا اقدر ادش على حسابه:tease:

http://www.qatarshares.com/vb/attachment.php?attachmentid=78555&d=1329776882

يعني لا حد يشبك وايرلس في مكان مب ثقة


توني من ساعة كنت اتكلم مع وحدة بالواتس اب عن موضوعك
وقلت لها كل الكلام اللي كتبته لي الحين ،، وان ممكن يدخل على العناوين
وغيره ،،

لذلك يا اخوي ما اقول كلامك غلط ،، بس بعد يبي لنا نوثقه
صحيح هناك اختراقات للكمبيوترات،، بس في حال الهواتف

جرب على جوالك وقول لنا وين بتوصل ،، وخلنا انجرب وياك على
جواويل عيالنا :telephone:

R 7 A L
21-02-2012, 12:42 AM
هذه سلبيات الاشياء المهجنه
هالبرنامج غير طبيعي ( مهجن ) على شأن كذا يسهل اختراقه
عليكم بالطبيعي

ام السعف
21-02-2012, 01:29 AM
هذه سلبيات الاشياء المهجنه
هالبرنامج غير طبيعي ( مهجن ) على شأن كذا يسهل اختراقه
عليكم بالطبيعي

عليك سوالف عجيبة وغريبة من يوم ما رديت من امريكا
شنهي سالفة برنامج مهجن وعليكم بالطبيعي ؟؟

وشنهو الطبيعي لو قلنا الواتس اب مهجن ؟ :/

مشتاقة لقطر
21-02-2012, 07:02 AM
شكرا لك

ضوى
21-02-2012, 07:30 AM
عليك سوالف عجيبة وغريبة من يوم ما رديت من امريكا
شنهي سالفة برنامج مهجن وعليكم بالطبيعي ؟؟

وشنهو الطبيعي لو قلنا الواتس اب مهجن ؟ :/

يقصد اللي منزلينه بالجلبيرك واللي منزلينه من الابل ستور :shy: على ماعتقد

جمال اليافعي
21-02-2012, 08:14 AM
أبسط شي اختراق الشبكات المحليه :) ... لابتوب قديم عليه كم من برنامج ونظام تشغيله linux و وصله يو اس بي انت تعرفها ماني ذاكر اسمها . و اي شبكة منزلية مكشوفه خلال 15 دقيقه ههههه :)

بولينجر
21-02-2012, 08:42 AM
التشفير بـ Wpa2 للشبكات المنزلية وخصوصا لو الباسوورد من 8 خانات واكثر مب سهل اختراقه. بالتالي التحذير بشكل عام من دخول الشبكات العامة وحماية الشبكات المنزلية. لأن كل البيانات عبر الشبكة معرضة للتهكير مب بس واتس اب.

اليحصبي
21-02-2012, 09:16 AM
الله يجزاك خير اخوي

اتذكر على ايام النوكيآ في مجلد ينحفظ فيه البيانات حقت الوت ساب
وهذآ مساره -لاني كنت حافضه في الذاكره الخارجيه-
E:\WALogs
او
C:\WALogs
مسجل فيه الاحداث اليوميه كل يوم له في ملف منفصـل بأمتداد .log ، طبعا الصور الي يتم ارسالها اولا ترفع لـ سيرفر الوت ساب
ثم يتم ارسال رابط للطرف الاخر ومنه يتم التحمـيل ، طبعآ لو تنسخ رابط وتفتحه بالمكبيوتر يطلع لك الصوره المرسله

الوت ساب يجب ان يدعم تشفير قوي ، على الاقل يحتذي بـ ماسنجر msn تشفيرتهم RSA
الله يستر علينا وعلى امة محمد

اليحصبي
21-02-2012, 09:28 AM
اي رقم غريب وضايققك سوى له بلوك يقدر هو يشوف الستاتس اللي حاطها انت " يعني النك نيم اللي حاطه بالواتس اب " بس مايقدر يطرش لك

اخوي شلون اسوي بلوك

شوف يالطيب
من الوت ساب ، الي عندي المحدث ماعليه بس شوف الصور
اول شي تدش عالقائمه وتختار مثل الي بالصوره
http://www.9o9i.com/upfiles/atp09799.png


بعدين تضيف الرقم الي تبي تسوي له بلوك
http://www.9o9i.com/upfiles/yng09799.png

اليحصبي
21-02-2012, 09:34 AM
هذه سلبيات الاشياء المهجنه
هالبرنامج غير طبيعي ( مهجن ) على شأن كذا يسهل اختراقه
عليكم بالطبيعي


http://www.shooq4.com/vb/images/bb/11.png
اسمحلي يالشيخ كلامك غير صحيح ، في اشياء مهجنه افضل من الاصليـه

محمد
21-02-2012, 11:44 AM
يمكن لاي شخص لا يستطيع الاستغناء عن الوتس اب ان يستخدم اتصال vpn و راح يكون كل شي مشفر مب بس الوتس اب ..

ام السعف
21-02-2012, 12:10 PM
يقصد اللي منزلينه بالجلبيرك واللي منزلينه من الابل ستور :shy: على ماعتقد

ما ادري بصراحة اشيقصد .... الموضوع يتكلم عن البرنامج نفسه ونظام برمجته
ووجود ثغرة ومب مشفرة بياناته المرسلة والمستقبلة فيه بحيث يسهل تعرضها
والتعرف عليها ،،

ما عندي فكرة ان كانت النسخة الأصلية محمية ،، لكن الواضح ان الكلام بشكل عام
للبرنامج نفسه وغيره من البرامج الكثيرة المشابهة ،،

يعني من خلال هالموضوع نسأل الخبراء،،

الفيس بوك والتويتر ................> سمعت انهم مب مشفرين

السكايب والماسنجر ....................> مشفرين ؟؟؟

في تطبيقات الهواتف ؟؟

اليحصبي
21-02-2012, 12:11 PM
يمكن لاي شخص لا يستطيع الاستغناء عن الوتس اب ان يستخدم اتصال vpn و راح يكون كل شي مشفر مب بس الوتس اب ..

http://www.shooq4.com/vb/images/bb/19.png
بس اتذكر من زمان يخترقون عن طريق vpn
http://www.shooq4.com/vb/images/bb/11.png

بالنسبه تأمن الشبكه وكتآلي
- اول شي لازم تخفي اسم الشبكه
- ثانيا اكيد لازم باسورد
- ثآلث غير باسوورد الراوتر نفسه - كثير شبكات مب مغيرين الباسوردات
- رابعا لو عدد الاجهزهـ محدده ، تسوي فلتر للماك أدْرٍس

او يكفي تسوي فلتر ماك ادرس ، وحط الشبكه غير مخفيه وبدون بآسوورد
http://www.shooq4.com/vb/images/bb/35.png وريح بالك عشآن تقهر الي يحاول يشبك بشبكتك حط اسمها only4uBaby http://www.shooq4.com/vb/images/bb/18.png ولا TryAgain

اليحصبي
21-02-2012, 12:15 PM
ما ادري بصراحة اشيقصد .... الموضوع يتكلم عن البرنامج نفسه ونظام برمجته
ووجود ثغرة ومب مشفرة بياناته المرسلة والمستقبلة فيه بحيث يسهل تعرضها
والتعرف عليها ،،

ما عندي فكرة ان كانت النسخة الأصلية محمية ،، لكن الواضح ان الكلام بشكل عام
للبرنامج نفسه وغيره من البرامج الكثيرة المشابهة ،،

يعني من خلال هالموضوع نسأل الخبراء،،

الفيس بوك والتويتر ................> سمعت انهم مب مشفرين

السكايب والماسنجر ....................> مشفرين

في الهواتف ؟


الفرق بين النسخه الاصليه والمهجنه ، ان النسخه المهجنه فيها تعديلات سواء اضافات او حذف او اي تعديل

ااما سالفه التشفير اعتقد مشفر لان فيس بوك 800 مليون مستخدم فطبيعي مشفر ، برب غدى http://www.shooq4.com/vb/images/bb/25.png

ام السعف
21-02-2012, 12:38 PM
الفرق بين النسخه الاصليه والمهجنه ، ان النسخه المهجنه فيها تعديلات سواء اضافات او حذف او اي تعديل

ااما سالفه التشفير اعتقد مشفر لان فيس بوك 800 مليون مستخدم فطبيعي مشفر ، برب غدى http://www.shooq4.com/vb/images/bb/25.png

يوم أبل ستور احذفوا الواتس اب من ستورهم ؟
المشكلة حسب ما سمعت كانت متعلقة بالنسخة الأصلية،،
لأن ماركت الأبل مستحيل يبيع نسخ مهجنة ......> هذا اولا ،،

ثانيا: اما بخصوص اعداد مستخدمي الفيس بوك يؤكد حتمية تشفيره
اشوف ماله خص ،،
احنا ما نبي نركن للأعداد لتثبيت الحقائق ،، احنا نبي نتأكيدات تقنية
تؤكد ان كانت مشفرة او لا ،،

تغديت ولله الحمد....> وفيه العافية لك

يراعٌ فراتي
21-02-2012, 12:55 PM
اللي يبي نجرب عليه
حياه يجي يشبك على الوايرلس عندي واموره طيبه:nice:
ههههههههه:telephone:

اليحصبي
21-02-2012, 12:57 PM
يوم أبل ستور احذفوا الواتس اب من ستورهم ؟
المشكلة حسب ما سمعت كانت متعلقة بالنسخة الأصلية،،
لأن ماركت الأبل مستحيل يبيع نسخ مهجنة ......> هذا اولا ،،

ثانيا: اما بخصوص اعداد مستخدمي الفيس بوك يؤكد حتمية تشفيره
اشوف ماله خص ،،
احنا ما نبي نركن للأعداد لتثبيت الحقائق ،، احنا نبي نتأكيدات تقنية
تؤكد ان كانت مشفرة او لا ،،

تغديت ولله الحمد....> وفيه العافية لك


الحمد لله على كل النعم ، الله يعافيش
بخصوص الابل ، للحين مادشينآ بعآلمهم ، يمكن كان فيه خطا او ثغره او اي خلل
اما اعداد المستخدمين له علاقه مب بالتشفير نفسه لكن بحمآيتهم
كيف يكون مملكه عظيمه ومايقدر يحميهآ هاي الي اقصده
من فتره يمكن سنتين يوم ان الامارات والسعوديه قفلوا خدمه البلاك بيري بسبب تشفيرتهم القويه
والي ماقدروا وزاره الاتصالات من فكهآ من البديهي تشفير البلاك بيري وتشفير الفيس بوك طبيعي مشفر تشفيره قويه ، هذه تحليلاتي وماعندي اي كلام تقني رسمي
والتشفير نفسه لازم يكون سر عشآن لحد يتعبث

اليحصبي
21-02-2012, 12:59 PM
اللي يبي نجرب عليه
حياه يجي يشبك على الوايرلس عندي واموره طيبه:nice:
ههههههههه:telephone:


مابي اجرب بعدين بلغلط ادش عالراوتر بالروت http://www.shooq4.com/vb/images/bb/26.png http://www.shooq4.com/vb/images/bb/16.png

يراعٌ فراتي
21-02-2012, 01:12 PM
فعلا تشفير البلاك بيري قوي جدا وعقد الحكومات فالعالم لدرجة انهم وقفوها في الهند والامارات وغيرهم
مع ان الهنود يعتبرون من الدول القوية في المجال التكنولوجي
فشركة ان موشن سيرفراتها مستقلة وتشفيرها مختلف
ولا تخضع لاي رقابة
وهذا يعتبره البعض مساسا بالامن القومي
وهذا ما جعل البلاك بيري تتنازل وتعطي فك التشفير لهم
بس مو مشكلة اذا الحكومة تشوف لانها بايدي امنه
الخوف من الناس العاديين

يراعٌ فراتي
21-02-2012, 01:13 PM
مابي اجرب بعدين بلغلط ادش عالراوتر بالروت http://www.shooq4.com/vb/images/bb/26.png http://www.shooq4.com/vb/images/bb/16.png

حياك
بعطيك الباسوورد والادمن لو تبي
اهم شي تشبك :nice:

محمد
21-02-2012, 11:25 PM
في اشياء لازم توضح للجميع ..

مافيه شي اسمه نسخة واتس اب هجينة اول مره اسمع بهالشي ..
يوم الغوا الواتس اب من الاب ستور كان فيه ثغرة تغيير الستاتس بدون ما يدري صاحب الجوال و حلوا الثغرة و رجع للاب ستور ..

اما بخصوص الواتس اب فالشركة نفسها اعترفت ان المعلومات مب مشفره وهذي ماتعتبر ثغرة هذا شي عادي في برامج كثيرة مب مشفره .. السكايب مشفر لكن مب بالكامل .. الفيديو فيه مشفر

بالنسبة للـ vpn نعم يستخدمونه الهاكرز ويستخدمونه ناس لاغراض اخرى ايضا حاله حال اي تقنية فيه ناس تستخدمها صح وتستخدمها خطأ انا عن نفسي استخدمه عشان ادخل سيرفرات الشغل لو احتجت عبر اتصال آمن .. فالفي بي ان اساس اختراعه زين لكن فيه ناس تستخدمه غلط .. :)

وللعلم اي مؤسسة محترمة ماتخلي مهندسين الاي تي يدخلون سيرفراتها من برا الدوام الا بـ vpn لانه يأمن الاتصال و يخليه مشفر

واستخدام هالتقنية على الجوال ايضا تشفر كل شي على الجوال مب بس الواتس اب .. يعني الي بيستخدم الواتس اب عبر في بي ان لا يمكن اعتراضه ابدا وانا اتحمل كلامي في هالجانب ..

بالنسبة للفيس بوك و تويتر مجالهم مختلف قليلا .. لانهم يستخدمون الويب بعكس الوتس اب وبعض البرامج الاخرى .. الفيس بوك مب متأكد منه لو مشفر او لا .. اما تويتر نعم مشفر لانه يستخدم SSL وكان هالشي اوبشن اختياري يحدده المستخدم من خياراته لكن الان صار اجباري والموقع بالكامل صار تحت SSL يعني https:// وعلى فكرة الـ SSL يمكن اعتراض الباكتس الخاص فيه من قبل شركات الاتصال .. لكن بعد اعتراضه من المستحيل فك شفرته ! .. بالتالي آمن بنسبة 100%

على فكرة تطبيقات فيس بوك و تويتر على الايفون مشفرة ..

النقطة الاخيرة هي البلاك بيري وهي ترجعنا لنقطة الـ VPN نظام شركة البلاك بيري مشابه لتقنية الفي بي ان او البروكسي .. فكل باكت يطلع من المستخدم يصل للمستقبل عبر سيرفر البلاك بيري في اتصال آمن .. تماما مثل الـVPN بالتالي مستحيل فك شفرته ..
لذلك البلاك بيري يعتبر اكثر الهواتف امناً والمعترف به من قبل الدوائر الحكومية ..

هذا بشكل عام كل مافي الموضوع :nice:

ام السعف
22-02-2012, 08:48 AM
في اشياء لازم توضح للجميع ..

مافيه شي اسمه نسخة واتس اب هجينة اول مره اسمع بهالشي ..
يوم الغوا الواتس اب من الاب ستور كان فيه ثغرة تغيير الستاتس بدون ما يدري صاحب الجوال و حلوا الثغرة و رجع للاب ستور ..

اما بخصوص الواتس اب فالشركة نفسها اعترفت ان المعلومات مب مشفره وهذي ماتعتبر ثغرة هذا شي عادي في برامج كثيرة مب مشفره .. السكايب مشفر لكن مب بالكامل .. الفيديو فيه مشفر

بالنسبة للـ vpn نعم يستخدمونه الهاكرز ويستخدمونه ناس لاغراض اخرى ايضا حاله حال اي تقنية فيه ناس تستخدمها صح وتستخدمها خطأ انا عن نفسي استخدمه عشان ادخل سيرفرات الشغل لو احتجت عبر اتصال آمن .. فالفي بي ان اساس اختراعه زين لكن فيه ناس تستخدمه غلط .. :)

وللعلم اي مؤسسة محترمة ماتخلي مهندسين الاي تي يدخلون سيرفراتها من برا الدوام الا بـ vpn لانه يأمن الاتصال و يخليه مشفر

واستخدام هالتقنية على الجوال ايضا تشفر كل شي على الجوال مب بس الواتس اب .. يعني الي بيستخدم الواتس اب عبر في بي ان لا يمكن اعتراضه ابدا وانا اتحمل كلامي في هالجانب ..

بالنسبة للفيس بوك و تويتر مجالهم مختلف قليلا .. لانهم يستخدمون الويب بعكس الوتس اب وبعض البرامج الاخرى .. الفيس بوك مب متأكد منه لو مشفر او لا .. اما تويتر نعم مشفر لانه يستخدم SSL وكان هالشي اوبشن اختياري يحدده المستخدم من خياراته لكن الان صار اجباري والموقع بالكامل صار تحت SSL يعني https:// وعلى فكرة الـ SSL يمكن اعتراض الباكتس الخاص فيه من قبل شركات الاتصال .. لكن بعد اعتراضه من المستحيل فك شفرته ! .. بالتالي آمن بنسبة 100%

على فكرة تطبيقات فيس بوك و تويتر على الايفون مشفرة ..

النقطة الاخيرة هي البلاك بيري وهي ترجعنا لنقطة الـ VPN نظام شركة البلاك بيري مشابه لتقنية الفي بي ان او البروكسي .. فكل باكت يطلع من المستخدم يصل للمستقبل عبر سيرفر البلاك بيري في اتصال آمن .. تماما مثل الـVPN بالتالي مستحيل فك شفرته ..
لذلك البلاك بيري يعتبر اكثر الهواتف امناً والمعترف به من قبل الدوائر الحكومية ..

هذا بشكل عام كل مافي الموضوع :nice:

شكرا لك ولمشاركتك،،

محتاجين مركز قومي دجتلي للأخذ بيدنا الى عالم معلوماتي رقمي بحت :shy:

يراعٌ فراتي
22-02-2012, 10:58 PM
اختي ام السعف

في عندج كيوسيرت تابع للمجلس الاعلى للاتصالات

وفي عندج قسم مكافحة الجرائم الالكترونية
تابع لوزارة الداخلية

تقدرين تتصلين فيهم وتستفسرين

وهذي طريقة ابلاغ عن حادثة

اضغط هنا (http://www.qcert.org/AR/ReportIncidents/Documents/%D8%A5%D8%B1%D8%B4%D8%A7%D8%AF%D8%A7%D8%AA%20%D8%A 7%D9%84%D8%AA%D8%A8%D9%84%D9%8A%D8%BA%20%D8%B9%D9% 86%20%D8%AD%D8%A7%D8%AF%D8%AB%D8%A9.pdf)

يراعٌ فراتي
22-02-2012, 11:03 PM
في اشياء لازم توضح للجميع ..

مافيه شي اسمه نسخة واتس اب هجينة اول مره اسمع بهالشي ..
يوم الغوا الواتس اب من الاب ستور كان فيه ثغرة تغيير الستاتس بدون ما يدري صاحب الجوال و حلوا الثغرة و رجع للاب ستور ..

اما بخصوص الواتس اب فالشركة نفسها اعترفت ان المعلومات مب مشفره وهذي ماتعتبر ثغرة هذا شي عادي في برامج كثيرة مب مشفره .. السكايب مشفر لكن مب بالكامل .. الفيديو فيه مشفر

بالنسبة للـ vpn نعم يستخدمونه الهاكرز ويستخدمونه ناس لاغراض اخرى ايضا حاله حال اي تقنية فيه ناس تستخدمها صح وتستخدمها خطأ انا عن نفسي استخدمه عشان ادخل سيرفرات الشغل لو احتجت عبر اتصال آمن .. فالفي بي ان اساس اختراعه زين لكن فيه ناس تستخدمه غلط .. :)

وللعلم اي مؤسسة محترمة ماتخلي مهندسين الاي تي يدخلون سيرفراتها من برا الدوام الا بـ vpn لانه يأمن الاتصال و يخليه مشفر

واستخدام هالتقنية على الجوال ايضا تشفر كل شي على الجوال مب بس الواتس اب .. يعني الي بيستخدم الواتس اب عبر في بي ان لا يمكن اعتراضه ابدا وانا اتحمل كلامي في هالجانب ..

بالنسبة للفيس بوك و تويتر مجالهم مختلف قليلا .. لانهم يستخدمون الويب بعكس الوتس اب وبعض البرامج الاخرى .. الفيس بوك مب متأكد منه لو مشفر او لا .. اما تويتر نعم مشفر لانه يستخدم ssl وكان هالشي اوبشن اختياري يحدده المستخدم من خياراته لكن الان صار اجباري والموقع بالكامل صار تحت ssl يعني https:// وعلى فكرة الـ ssl يمكن اعتراض الباكتس الخاص فيه من قبل شركات الاتصال .. لكن بعد اعتراضه من المستحيل فك شفرته ! .. بالتالي آمن بنسبة 100%

على فكرة تطبيقات فيس بوك و تويتر على الايفون مشفرة ..

النقطة الاخيرة هي البلاك بيري وهي ترجعنا لنقطة الـ vpn نظام شركة البلاك بيري مشابه لتقنية الفي بي ان او البروكسي .. فكل باكت يطلع من المستخدم يصل للمستقبل عبر سيرفر البلاك بيري في اتصال آمن .. تماما مثل الـvpn بالتالي مستحيل فك شفرته ..
لذلك البلاك بيري يعتبر اكثر الهواتف امناً والمعترف به من قبل الدوائر الحكومية ..

هذا بشكل عام كل مافي الموضوع :nice:

اخوي محمد انت يمكن تدري بس غيرك مايدري

يعني لو وحدة مثلا تبي ترسل رابط او صورة او اي شي عن طريق الواتس اب
اكيد بعد ما قرت هالموضوع بتعيد حساباتها وبطرشها على البي بي
او باي طريقة اخرى غير الواتس اب
وخصوصا اذا شابكة وايرلس

اما اذا شابكة على شبكة الجي اس ام مثلا التابعة لشركة الاتصالات سواء كيوتل او فودافون حتى الواتس اب بيكون صعب اختراقه

ام السعف
23-02-2012, 03:43 PM
اختي ام السعف

في عندج كيوسيرت تابع للمجلس الاعلى للاتصالات

وفي عندج قسم مكافحة الجرائم الالكترونية
تابع لوزارة الداخلية

تقدرين تتصلين فيهم وتستفسرين

وهذي طريقة ابلاغ عن حادثة

اضغط هنا (http://www.qcert.org/ar/reportincidents/documents/%d8%a5%d8%b1%d8%b4%d8%a7%d8%af%d8%a7%d8%aa%20%d8%a 7%d9%84%d8%aa%d8%a8%d9%84%d9%8a%d8%ba%20%d8%b9%d9% 86%20%d8%ad%d8%a7%d8%af%d8%ab%d8%a9.pdf)

ابلاغ عن حادثة ..............> مب مركز تثقيفي تعليمي :(

((ام خالد))
23-02-2012, 07:40 PM
السلام عليكم
:(
أخوي يراع مشكور وما قصرت ع الموضوع
بس بغيت اسئلك ,, انا جوالي ايفون3 ضاع من اسبوعين تقريبا يوم اتصل ع الرقم يعطيني مصكر ,, للاسف الشديد جوالي فيه فوق ال500 صورة :( :( كم انا مقهوورة
لكن كنت حاطه كود سألت اخوي قال ما ينقتح الجوال الا اذا سوه له فورميت واثنا الفورميت راح تنمسح الصور لكن مازلت خايفة مادري صج ولا

_____________________

يراعٌ فراتي
23-02-2012, 10:30 PM
ابلاغ عن حادثة ..............> مب مركز تثقيفي تعليمي :(

ام سعف شكلج ما تصفحتي الموقع عدل :anger1:


السلام عليكم
:(
أخوي يراع مشكور وما قصرت ع الموضوع
بس بغيت اسئلك ,, انا جوالي ايفون3 ضاع من اسبوعين تقريبا يوم اتصل ع الرقم يعطيني مصكر ,, للاسف الشديد جوالي فيه فوق ال500 صورة :( :( كم انا مقهوورة
لكن كنت حاطه كود سألت اخوي قال ما ينقتح الجوال الا اذا سوه له فورميت واثنا الفورميت راح تنمسح الصور لكن مازلت خايفة مادري صج ولا

_____________________

شفتي شلون فائدة الرقم السري

ولو ما حفظتي الصور على الجوال كان احسن

لكن كلام اخوج صحيح

غالبا اللي لقى الجوال ما يقدر يفتحه الا بيفرمته ويستخدمه لانه ما يهمه محتوى
هو يبي جهاز
ومجرد مايستخدمه ويبدا يصور راح تكون اسماء الصور الجديدة نفس اسماء الصور القديمة

وهني راح تصير عملية انه يرجع الصور اكثر صعوبة


واذا عندج الرقم التسلسلي بلغي على الجوال وان شاء الله يجيبونه لج لو حط فيه شريحة داخل الدوحة

ام السعف
25-02-2012, 12:05 PM
يراعٌ فراتي

اي والله ما تصفحته كلش ،، اصلا مافتحته ،،

اعتذر منك بس بفتحه في اقرب فرصة وبرجع لك ان شاءالله اعقب على مشاركتك

شمعة الدوحه
03-03-2012, 07:30 PM
جزاك الله الف خير اخوي

ام السعف
07-03-2012, 06:28 AM
يراعٌ فراتي

اي والله ما تصفحته كلش ،، اصلا مافتحته ،،

اعتذر منك بس بفتحه في اقرب فرصة وبرجع لك ان شاءالله اعقب على مشاركتك

بعد الضغط على الرابط والدخول له ،، مالقيته يوفي الكلام اللي كنت اتحدث عنه

احنا يا اخوي الأمر عندنا مب مقتصر على الاختراقات فقط ،،

احنا عندنا جهل معلوماتي في التكنالوجيا الحديثة لدرجة اللي عنده
معلومتين يصير باشا علينا وممكن يظللنا اكثر مما يفيدنا ،،

وبالتالي احنا محتاجين مواقع رسمية توعوية بالدرجة الأولى
فاشلون تبي اللي ما يفهم شنهي مكونات الطبخة يسأل عن مقاديرها ؟
:(

متاجين تكثيف اكبر من انتظار اتصال من المتضررين
على الأقل المتضرر لما يتصل يعرف اشيبي يقول :(

Qatar Knight
09-03-2012, 08:21 AM
يعطيكم العافيه