لعبة الاسهم

[نايف]

سلام عليكم

اول شي انا عضو جديد معاكم بس متابع منتداكم من زمان وانا من احد الضيوف على سوقكم يعني من الخليجين اللي حواليكم

المهم انا كنت افكر ان انسحب من السوق بسبب اللعبه اللي صايره فيه ولحد يقول لي ذي تصحيح التصحيح معروف من اللعبه

المهم سواء كانت لعبه او تصحيح عشان لانختلف بالراي في لعبه حلوه وخفيفه قولي لي رايكم فيها كنا نسويها في الاسواق اللي نضارب فيها في حال كان وضع السوق متازم لهدرجه

اللعبه الله يسلكم خطيره شوي ويبي لها قلب جامد يعني ماينفع لها حد خواف وطبعا احنا بطبعنا كشباب نحب نخاطر والخساره خسارة الروح

وبعد هالمقدمه سمعوا الطريقه وقولوا لي رايكم فيها

الطريقه الله يسلمكم ان بدل مايلعبون كبار المستثمرين في البورصه يصير العكس :con2:

يعني ان صغار المستثمرين اللي اهم وبكل فخر احنا ماشالله علينا وااايد في السوق مش شويه

اللي يصير بهاللعبه ان اكثر من مضارب واحد يتحدون مع بعض ويشكلون هامور كبير حيث ان نتفق اكثر من واحد على شراء سهم محدد في يوم محدد بسعر محدد ويكون الدعم للسهم بعشره مليون واكثر يعني واحد يخلي نص مليون وواحد يخلي مليون وواحد يخلي مليونين وواحد نص مليون وجذي يعني المهم ان الدعم للسهم يفضل ان مايكون اقل من عشره مليون ويفضل ان سهم عدد اسهمه شويه عشان يصير التحكم فيه سهل وكل ماكان المبلغ المتحد اكبر كل ماكانت الطريقة اضمن

يعني ان يتعاونون مجموعه مستثمرين ويشترون نفس السهم ويدعمونه بقاعده سعريه قويه عشان يرتفع السهم ويتم البيع على سعر محدد ويفضل البعد عن الطمع حتى لو ارتفع السهم بنسبة كبيره

وفي حال سقوط السهم لازم يكون في شي اسمه الستوب لوس اللي لاحظت عليكم انكم ماتستعملونه مع انه يعتبر حزام الامان في عمليات البورصه

وطبعا الخساره وارده عشان جذي انا اسمهيا لعبة الموت :looking:

بس طبعا في اكثر الاحيان يرتفع السهم وبهذه الطريقة صغار المستثمرين يكونون مضارب السهم المستهدف وبهالطريقة نقدر نتحكم بالسهم كصغار مستثمرين لكن يفضل ان اللي يدخلون ناس مايخافون ومضاربين بورصه

عموما للتطمين في النهايه مافي سوق في الدنيا صار فيه تلاعب او انهيار او تصحيح الا لازم يرتفع ولاتنسون انهيار مايو العام في السعوديه وانهيارات غيره بس ذي مش معناها نهاية الدنيا بس كان الافضل الواحد يستعمل الستوب لوس عشان لايتعلق

المهم لعبة الاسهم او لعبة الموت في لها تفاصيل ثانيه عشان محد يتعلق فيها راح نتفق عليها بعدين بس قولوا لي شرايكم نبدا فيها وندعم سهم ونرفعه اذا تشوفون ان في استعداد اووكي

تحياتي :نايف :nice:

[الفيصلي]

مرحبا اخوي نايف اذا ممكن تشرح لي ايش تقصد بالستوب لوس وكيف طريقتها :con2:

[حالي الذوق]

معناتها باختصار : الشرده نص المرجله :eek2:


اي وقف الخساره :looking:

[ابوعلي اليافعي]

اخوي نايف اهلا بك في منتداك ..

بالنسبه للفكره الي ذكرتها فاعتقد ان دخول اي مستثمر فالبورصه يجب ان يراعي اشياء كثيره وقبل كل شيء ان يراعي ضميره قبل كل شيء ويعلم ان اي درهم يدخل جوفه ان لم يكن جاء بالحلال وبدون خداع او غش او وسائل وسبل ملتويه فانه سيكون شاهد عليه يوم القيامه وسيكون نار تحترق في جوفه ويعذب به..

ربما يقول قائل ان هناك من يعمل هذه الطريقه وننا انخدعنا بسبب هذه الطريق الملتويه والتلاعب في الاسهم ..والجواب ان كل انسان سيتحمل نتيجة عمله وانك ستكون مسؤل عن عملك وانه لاتزر وازره وزر اخرى..

ولا ننسا اننا لو قمنا بهذه اللعبه سيتضرر اناس اخرون ليس لهم ذنب وستكون فائدتنا من ضرر الغير ..خاصه ان النيه مبيته للشراء وايهام الغير بالارتفاع ثم بيع الاسهم على المسكين الذي لايعرف اللعبه ويعتقد ان هذا الارتفاع طبيعي..

وماذا بعد اننا كسبنا على حساب ذالك المسكين وضحكنا على احزان الاخرين.. ولا ايش رايك اخوي نايف

[اللورد]

الطريقه الله يسلمكم ان بدل مايلعبون كبار المستثمرين في البورصه يصير العكس :con2:

:nice:

مايسير هالكلام

لأن دائماً لكل سوق صناعه وكبار مستثمرييه وهم الذين يحددون سيناريو التداول ولهم دائماً الكلمه الأقوى في أي سوق مالي :anger2:

ولكن مثل ماذكرت ان أي سوق مهما كان هبوطه حاد سيعاود حتماً الإرتفاع :nice: وهاذي انا معاك فيها 100%

وتسلم اخوي على طرحك للفكره وهي كما ذكرت تنفع لشركه وحده وعدد اسهمها قليل :con2:
واحنا سوقنا غير :anger1: لان في الارتفاع ترتفع كل الشركات وفي الإنخفاض ايضاً كلها تنخفض (سوق تعاوني) :D :D

[الفيصلي]

مايسير هالكلام

لأن دائماً لكل سوق صناعه وكبار مستثمرييه وهم الذين يحددون سيناريو التداول ولهم دائماً الكلمه الأقوى في أي سوق مالي :anger2:

ولكن مثل ماذكرت ان أي سوق مهما كان هبوطه حاد سيعاود حتماً الإرتفاع :nice: وهاذي انا معاك فيها 100%

وتسلم اخوي على طرحك للفكره وهي كما ذكرت تنفع لشركه وحده وعدد اسهمها قليل :con2:
واحنا سوقنا غير :anger1: لان في الارتفاع ترتفع كل الشركات وفي الإنخفاض ايضاً كلها تنخفض (سوق تعاوني) :D :D



لا واذا ارتفع مافي عرض واذا نزل مافي طلب
اي ستوب لوس ينفع معاه :con2:

[qtiger43]

قكرة خطيرة واسلوب متبع من كباااااااااااار المستثمرين

[نايف]

ماشالله تجاوب حلو مع ان الموضوع انطرح في مثل هالوقت المتاخر

اخوي بو علي تسلم على طريقة ردك اللي اكثر من محترمه وعلى وجهة نظرك اللي انا احترمها بعد

بس الله يسلمك احنا ماراح نسوي مثل مايسوون ونخلي الارتفاع الوهمي يوصل لارقام كبيره وثانيا بنطلع قبل الوصول للنسبه يعني العالم كلهم يقدرون يطلعون وثاني شي ماراح يطلعون الا ثاني يوم لان اليوم اللي بتصير فيه هالحركه شي طبيعي ان السهم راح يرتفع 5% لان حد النسبه شويه يعني حتى اللي تعلقوا من حركتنا بيقدرون يطلعون من السهم ثاني بدون اي خساره واكثر خساره تصيدهم ان يطلعون بنفس السعر اللي شروا فيه

يعني ان شالله محد راح ينظلم وخروجنا راح يكون من وقت يعني مابنرفع السهم بطريقة خياليه ونقول للناس بعدين مع السلامه كفايه علينا 3% عشان محدد يتضرر لا احنا ولا اللي كانوا مايعرفون الطريقه

اخوي الفصيلي لاتخاف في استراتيجيه ثانيه اذا مانفع الستوب لوس بعد مابنتعلق
لان الدخول بيكون عن مجموعتين في حال تعلقت مجموعه بتدعمها المجموعه الثانيه وكل مره المجموعات يتبادلون الدور

يعني في استراتيجيات عده للموضوع وان شالله محد يظرر لا منا ولا من باقي المستثمرين

وان شالله نكمل النقاش لين اتفقنا نوصل للطريقة ان محد بينظلم منها نكمل الاستراتيجيات وقوانين اللعبه

[نايف]

ونسيت اقول لكم شكرا على ترحيبكم وماقصرتوا يااهل قطر

وثاني شي ترى الطريقة حلوه ويصير نستعملها في اكثر من سوق مش شرط الواحد يضارب في سوق واحد ويقول انا مابي غيره لاتخلون العاطفه تتحكم بشغلكم

انتوا كمضاربين شوفوا كل الاسواق اللي تكون جيده انا مثلا اتعامل مع بورصة الدوحه والسعوديه ودبي والبحرين وعمان احيانا و ان شالله الكويت بس احس بورصتهم صعبه ومب سهله

اهم شي قوة القلب وعدم الخوف من الخساره

[قناص الاسهم]

انا مالي خص
انا مجرب عضة الهامور وما ودي اجبها مره ثانيه :deal:

[الشراكة]

شكراً يا نايف على هذه اللعبة وأنا من ثلاث سنوات كنت أقول حق الشباب بس سبقتهم وسويت محفظة أستثمارية وفيها 15 مساهم برأس مال مليون تقريباً من ثلاث سنوات والحمد الله على كل حال ماشية أوكية .

[نايف]

قناص انا قايل يبي لها حد مايخاف لان كل شي جايز :)

شراكه يعطيك العافيه فكره حلووه والله وبالتوفيق ان شالله