استفسار

[wadha-qa]

السلام عليكم

المقاول معطينا ورقة نوقعها كاتب فيها ان هو عليه التنفيذ بس يعني تركيب البلاط فقط و غير مسؤول عن البلاط او تغييره لانه من اختيارنا

شرايكم انووقع ولا لا لانه شي طبيعي نختار البلاط و هو يركب !!!

اخاف يخربط على كيفه و ما يركبه عدل و بعدين تطلع عيوب يقول مالي خص ؟؟

[أسير الاسهم]

لا توقعون شي .. إذا الاتفاق تشطيب هذا يعني ان البلاط عليه .. اختاروو واذا ما ركبه عدل يبدله ورجله فوق رقبته .. واذا اوك خلاص اختياركم

بس لا توقعون شي طنشوو لا يلزمكم بشي يطلع لوتي

[بونـ ايف]

هلا اخوي اول شئ الله يوفقك وتخلص شغل البيت
ثانيا : لما يقولك انه غير مسؤول عن البلاط هو يقصد ان عليه تركيب البلاط اللي تجيبه وهو مش مسؤول اذا البلاط اللي جبته طلع فيه عيوب او مشاكل من المكان اللي جبته منه . ومش مسؤول عن تغيير البلاط بعد التركيب .
مثلا : انت خلصت تبلط بعدين شفت بالسوق بلاط واعجبك قلت خلاص انا باغير واركب هالبلاط الجديد هنا بيقولك انا مالي شغل اذا تبي اركب لك هالبلاط يعتبر شغل جديد ويحسب عليك زياده .

انا اقول توكل على الله وهذي مور تعاقديه عادية بس اهم شئ تتاكد من البلاط اللي تجيبه ووين بيتركب .
واهم شئ قبل لا تسلمه اخر دفعه تشيك على جودة الشغل اذا حصلت مشكله في شغل التبليط لا تسلمه اخر دفعه الا بعد ما يخلص شغله ويعدل الاماكن اللي فيها مشاكل 100% حسب المتعارف عليه في اعمال التبليط .

وبالتوفيق انشاء الله

[wadha-qa]

اخواني البلاط مقتنعين فيه ومختارين اجود نوعيه صناعه اسبانيه
بس انا شفت بلاط الحمامات اليوم البوردر مركبه غلط وهو مصر انه صح مخلي بين البلاطه و البوردر فراغ كبير اذا تعبا باي ماده بيخرب شكل البوردر و بيشوه الزخرفه اللي عليه من فوق ومب راضي يعدله يقول لا كذا صح بعبيها بماده وبنظف البوردر والمشكله البوردر فيه مثل النحت يعني صعب التنظيف اذا جات عليه مواد البناء
و للاسف توقعت الورقه اليوم :( وانا ماكان ودي تتوقع لاني حاسه انه بيلعب على كيفه

[بونـ ايف]

اول شئ اتمنى انه للحين ما اشتغل الا حمام واحد .
ثانيا المبلط (( ما يهمه الشكل والتفاصيل الصغيره اهم شئ انه يركب ويخلص شغله)) في العاده اذا البلاط فيه زخارف جماليه من الافضل ان الفواصل تكون صغيره علشان الزخارف والنقشات يكون بينها اتصال وبالنسبه للبوردر اهم شى انه يكون مستقيم ومافيه ميلان .
انا اقول انه اخطئ بس اذا هو مبلط تمام بيعبي الفراغات بماده نفس لون البلاط وانتي شوفي بعدين احكمي على شغله .
طبعا اهم شئ تبينين انك فاهمه لانهم اذا شافو الواحد غشيم يمشو رايهم اهم شئ تفرضي رايك واذا كثر كلام قولي له اذا مابتشتغل مثل ماقولك باجيب واحد ثاني بدالك . اول مايسمع السالفه فيها واحد ثاني بيشتغل عدل
لاكن نصيحه في باقي الشغل اهم شئ تقولين له مابي فراغات كبيره بين البلاط خاصه اذا كان فيه نقشات وزخارف واذا شفتي شغله مهب تمام تقدرين تقولين له مع السلامه وتعطينه حق شغله اللي سواه فقط .
لان الورقه اللي وقعتيها مش ملزومه فيها اذا شغله ما كان تمام .
وبالتوفيق انشاء الله .

[شموخ دائم]

,

,


مرحبا

كلام بو نايف ممتاز جدا

دائما في تركيب الحمامات ننصح تكون البدايه في حمام ( الملحق )
حتى نشوف جوده التركيب ونقيم العمال نخليهم يركبون الباقي او نشوف غيرهم

بالنسبه للورقه اعتقد معاه حق والتوقيع طبيعي

يعني لو اخترتي بلاط تعبان ( صيني ) وتغير لونه بعد فتره
هذا اختيارك انتي وتتحملين مسئوليه اختيارك

واذا انتي اخترتي نوعيه ( ممتازه ) ( اسباني ) وواثقه من نوعيه البلاط ليه زعلانه اجل
:)
وقعي ونتي واثقه وتحملي نتيجه اختيارك
المقاول ما يعرف هذا النوع جيد او لا يمكن راعي المحل قالك جيد وهو مو جيد
:)
اذا طلع مو جيد فهو مسئوليه ( المحل الي باعك ) وليس المقاول


اما عيوب ( التركيب ) فهو مسئوليه المقاول مهما كان نوع البلاط
عيوب التركيب معروفه وعيوب البلاط نفسه مختلفه ومعروفه
اكيد المقاول يتحمل مسئوليه التركيب حتى لو وقعتي الورقه ما يعفيه من المسئوليه
والبيت مضمون بالقانون 400 يوم على الامور المهمه والرئيسيه بالبيت


,

,



اخوك


شموخ دائم

[wadha-qa]

جزاكم الله خير على الافاده و بخصوص الورقه احنا عرفنا ليش يبينا نوقعها

اكتشفنا بعد التنسيق مع محل البلاط انه خد من عنده بلاط الحمامات بس لان شكلها مميز و مب موجود في محل ثاني فما قدر يغيره بس النصاب ما خذا النوع اللي احنا اخترناه للصالات و الغرف من بورسلان و سيراميك !!! ماخذ نفس اللون بس مادري من وين زين انه اكتشفنا قبل التركيب

سبحان الله انا ما كنت مرتاحه من هالسالفه لانه من فتره يقول للوالد انه اذا ما يغش ما يربح من يومها مب مرتاحه لشغله و اتصيد اخطاءه