بخصوص المقابله في السفاره الامريكيه

[jojo]

السلام عليكم

اخواني انا رحت قبل يومين لسفريات ريجنسي

وسويت الطلبات لي ولاهلي بخصوص الفيزا الامريكيه

واعطيتهم الصور ورحت دفعت في التجاري وعطيتهم الوصل

وكل شي واخر شي عطوني ملف فيه اوراق المعامله

وقالولي ريجنسي ان مقابلتك تاريخ 27

وانا اصلا ابي اسافر تاريخ 29

يعني مستغرب ليش كل هالتأخير

هل بعد ماعطوني الاوراق اروح للسفاره اعطيهم الاوراق ولا اخلي الاوراق عندي

لحد مايتصلون علي واوديلهم هالاوراق في تاريخ المقابله

ياليت احد ينقذنا وهل اقدر اكلم احد يسويلي المقابله بدري اشوي

تحياتي لكم

[وطن]

عندج موعد المقابله والتاريخ
موجود المفروض في وحده من الاوراق

تروحين على الموعد
و الاسئلة بسيطة
بس الاجراءات داخل طويلة

وثاني يوم باذن الله الجوازات جاهزه

بس الغريب ليش الموعد متأخر جذي

وليش ريجنسي ما يروحون هم يخلصون الدفع في التجاري
اذا هم بياخذون عليكم مبلغ للمعاملات اللي سووها لكم على النت المفروض يخلصون كل شي
وعليكم المقابلة بس

[alwahesh]

انت ليش رايح ريجنسي

على فكره الدفع بعد المقابله لان السفاره من حقها ما تعطيكم التأشيره

المقابله سهله وحدها تاخذ 5 دقايق

والصور لازم تكون الاذن مشكشوفه وواضحه من طرف الحجاب

مالك الا انك تأجر السفر كم يوم وامورك طيبه

[jojo]

يعني مافيه واسطه ابداا حد يخلصها بدري المقابله

يعني المفروض القطريين يخلصونهم بسرعه يعني مخلينا تاريخ 27

الله يكون في العون ننطر المقابله شنسوي وعسى بس ماتطلع بعد اوامر جديده جيب لنا وجيب لنا

ونتاخر زياده

[غايه الطواش]

اختي المقابله على حسب توفرها وتقدرين تدخلين موفع السفاره على النت وتشوفين التواريخ ....
ومب شرط تطلع الفيزا في يومين او اسبوع ..
انا هلي طلعت لهم في نفس الاسبوع ...وانا طلعت بعد شهرين ....
ورفيجتي هي وامها طلعت لهم في نفس الاسبوع وابوها بعد ست شهور ...

[ملك المشاعر]

صعبه جدا ان يتم تخليص الفيزا في يومين

الا اذا كان مسافره للعلاج فهذا فيها استثناء من عندهم

وبالفعل شيكت امس واقرب موعد كان بتارخ 27

[nagano]

أنا ومعاي ٥ أشخاص طلعت لنا ثاني يوم بدون واسطه

[قطر70]

اختي الموضع بسيط

انتي لو سويتي المقابله تاريخ 27 بتخلص ثاني يوم لكن اذا انتي مستعجله
تقدرين تمرين عليهم يوم الاحد وتقولين لهم انج مستعجله ويمكن يخلصونج لان اكثر موظفين السفاره الامريكيه عرب وبيخلصونج ان شاء الله

[وطن]

أنا ومعاي ٥ أشخاص طلعت لنا ثاني يوم بدون واسطه

أنا بعد طلعت لي ثاني يوم انا واللي معاي

وموعد المقابله كان قريب على حظنا

[R 7 A L]

ومن خلال هذا الموضوع
أنصح كل قطري يأخذ له فيزا امريكية حتى لو ماعنده سفر
لان المبلغ بسيط ومدة الفيزا طويلة 10 سنوات
ولاقدر الله وجات احد سفرة سريعة أو مفاجأة مايتعطل

[jojo]

طيب يااخوان هل في المقابله يطلبون مني عنوان السكن والحجز

لان انا ماعملت حجز ولا سويت التذاكر

لاني خايف يتأخرون علينا في المقابله او يمددونها وانا بروح بزنز وادفع مبلغ قوي واحجز

وفي الاخير يطلبون طلبات ثانيه وتتاخر الفيزا ويروح علي الحجز

فابي اعرف هل هم يطلبون ورق للحجز في الفنادق او التيكت

[قطر70]

اختي مكتب سفريات تورست يسويلج حجز وهمي على 150 ريال وظروري يكون معاج لان راح يسالونج وين بتسكنين حتى في مطار الولايه اللي انتي بتروحين بيسالونج وين ساكنه ونصيحه مني
جددي جوازج اذا بينتهي قريب لان الفيزا مدتها 10 سنوات

[قطري شايب]

بعض الردود غريبه جدا جدا جدا

عشان الكل يستفيد بعطي الجميع الزبده

اولا السفاره الامريكيه من اسهل السفارات في التعامل بس عندهم مشكله اساسية وهي اذا الشخص اول مره بيروح امريكا ممكن يطول وقت اصدارهم للفيزا يعني ممكن في يوم ممكن في اسبوع ممكن في شهر ممكن في 3 شهور ممكن يرفضون اعطاءه الفيزا بالنسبه للموعد ترا مب رجينسي ولا غيره الي يحدد تدخلون ع اموقع الالكتروني ومن خلاله تقدرون تشوفون الموعد المتاح بس غالبا دامه في 27 عادي ثاني يوم تستلمون الجوازات واموركم طيبه والعضو الي اقترح سالفه الكل يطلع فيزا الصراحه ابرك واسعد من فكره لان بالفعل قيمتها خمسميه تقريبا واتم عشر سنوات بالنسبه لي توني مطلعها اليوم لا طلبوا فندق ولا سكن ولا تذكره ولا غيره الجواز والصوره الشخصية وانقز

[ajabor]

بالتوفيق

[الحجاجي]

اللي ماخذها قبل وانتهت ..

ثاني مرة على طول يسلم جوازه لهم ..

ويستلم الفيزا ثاني يوم ...


/

لكن أذا اول مرة طريقتها كالتالي :-
1- تجهيز الصورة في الأماكن المعروفة للتصوير والخاصة مثل المحل اللي في الاند مارك
ويخزن لكم الصورة على فلاش ميموري ..

2- دفع المبلغ المطلوب عن طريق البنك التجاري واخذ الوصلين ( الوردي والاصفر) .

3- بعدها البدء بتعبئة الطلب الخاص .. وارفاق الصورة
وتكملة الخطوات .
وطباعة الطلب .

4- الدخول من نفس الموقع على رابط اختيار موعد ( ضروري هالشيء )
بعد الدخول تحط رقم الطلب ، والاسم ، ونحط رقم وصل الدفع الخاص ببنك التجاري

بعدها تطلع لنا المواعيد نختار الموعد اللي يناسبنا بالضبط كتاريخ ووقت
ونطبع صفحة تاكيد الموعد ..

/

في اليوم المحدد نروح السفارة قبل الوقت
ونسلم لهم الجواز والوصل ( الاصفر والوردي ) وصفحة تاكيد الطلب وصفحة الموعد .
وبعدها ندخل داخل / ناخذ رقم وننتظر .

بعدها ينادون الشخص ويشيكون على كل شيء ويرجع بنفس الرقم ينتظر المقابلة .

اذا اول مرة

لازم الشخص يكون مجهز كتاب من جهة عمله فيه الراتب والوظيفة والخ .
وكشف حساب 6 شهور من البنك ..

اذا راح امريكا قبل ما يحتاج كل هالشغلات ..

المقابلة تعتمد وتختلف من شخص لاخر .
وبناء على المقابلة وعلى نوعية جواز الشخص يجيه الرد ..

لان ياخذ وقت في الاجراءات الأمنية ..

يعطون كل شخص ورقة فيها رقمه اللي مفروض يدخل الموقع يتاكد ان جوازه تمت الموافقة عليه
من خلال موقع السفارة .

بعدها اذا طلعت الموافقة من الموقع
يروح يسلم جوازه ..


وسلامتكم ..

[the notebook]

الفيزا بتطلع علا طول ثاني يوم من المقابله ،، ومالقيتو موعد قبل لان كل صيف نفس الشي التواريخ القريبه كلها محجوزه