يصير اخذ العربون

[نوت]

أخواني الي عنده فكره يفيدني الله يجزاكم خير
انا دفعت لمحل نوح للخزانات عربون يمكن 20% من المبلغ الأجمالي واتفقت معاه ع التصاميم بس لسا ما أخترت اللون واحنا للحين ماركبنا الأرضيات ولاخلصنا الكرانيش حقت السقف والي أعرفه ان مستحيل يبدأون شغل الا لما تنتهي هذه الأشياء اضف اني مخبرتهم انه فيه مقاسات راح تتغير واللحين ابغي اكنسل معاهم وارد فلوس العربون لأن ماراح اكمل في البيت خبرتهم وارفضوا يردون المبلغ يقولون احنا نزلنا البضاعه للمصنع فكيف استرجع الفلوس وهل من حقي ولا لأ وايش التصرف المناسب معهم من غير دوشه

[شموخ دائم]

,

,


مرحبا


الله يعطيك العافيه

( هل في عقد اتفاق بينكم )

الاتفاق على العمل وعمل تصاميم للمكان يعني اتفقتوا على كل التفاصيل
:)
ودفع المقدم المفروض يكون لشراء المواد

اما مسئله البيت ما جهز فهذا ماله علاقه بالاتفاق لان هذا مسئوليه صاحب البيت
والاتفاق ماله علاقه فيه مع المحل


الموضوع ممكن يكون بشكل ودي مع ( صاحب الشركه ) او المدير المسئول

وليس مع الموظف

وممكن يتفهم الموقف ويرجع المبلغ

وبالتوفيق




,

,


اخوك


شموخ دائم

[diab911]

العقد شريعة المتعاقدين

[نوت]

ألأخوان شموخ دائم
وdiab
شاكرة لكم مروركم الكريم الي اعرفه انه مستحيل يبدأون يشتغلون اذا ماكان المكان جاهز
غير اني ما أقدر اكمل فلنفترض اني ما أقدر اكمله المبلغ خلاص تروح فلوسي بعد المبلغ موب شوي

[بومحمد55]

من حقك أنك تسترجع العربون أذا مابدأ في الشغل ..

[khaldoon]

غريب...يعني اللي اعرفه انه بيجون البيت و بياخذون القياسات و بيفصلون عليها او بناء على الخرايط (بس مب لشروع فيلا واحده)

على العموم في عقد و الا ما في ؟

مكتوب بالعقد انه العربون مسترجع او اي شي بهالخصوص يعني قيمة الدفعة الاولى و مسترجعه و الا مب مسترجعة و الا مب مكتوب؟

حاول تتفاهم معاهم بشكل ودي و لو ما في امل و راحت عليك و مب مرجعينلك المبلغ قلهم عطوني الخشب اللي نزل المصنع و انا صرت دافع حقه....ابي اخذه احرقه و اتدفى فيه...طالما هم ما تنازلوا عن حقهم لو انه لهم حق انت بعد ما تتنازل و المعاملة بالمثل ....تعتقد وقتها يقدرون يرفضون طلبك؟

[خبير ديكور]

هل مكتوب في الايصال عربون ؟؟؟ ام دفعة ؟؟


لان العربون المفروض لا يسترد خصوصا في حال حدوث خسارة او بدء العمل

اما الدفعة فيجوز استرجاعها طالما لم يتم البدء في الاعمال خصوصا وانك للحين ماخترتي اللون

فكيف يكون بدأ؟؟؟
وذوقيا المفروض يرجع المبلغ علشان سمعته ونزاهته

على كل حال لو أل نوح قطر اللي في طريق سلوى انا ممكن اساعد

وبالتوفيق

[نوت]

شاكرة لكم مروركم جميعا الله يجزاكم خير


هل مكتوب في الايصال عربون ؟؟؟ ام دفعة ؟؟


لان العربون المفروض لا يسترد خصوصا في حال حدوث خسارة او بدء العمل

اما الدفعة فيجوز استرجاعها طالما لم يتم البدء في الاعمال خصوصا وانك للحين ماخترتي اللون

فكيف يكون بدأ؟؟؟
وذوقيا المفروض يرجع المبلغ علشان سمعته ونزاهته

على كل حال لو أل نوح قطر اللي في طريق سلوى انا ممكن اساعد

وبالتوفيق

أخوي مومكتوب عربون وهالمبلغ دفعه اولى من القيمه والمحل نفسه أل نوح الي بشارع سلوى
واتمنى كل شي يخلص بشكل ودي وجزاك الله خير وبارك الله فيك

[dream~qa]

بالنسبة أنهم نزلوا البضاعة للمصنع فأعتقد أن هالكلام قالوه علشان ما تلغين العقد معاهم ..

أختي أنا من شهرين ونصف قالي المسؤول أن خلاص احنا نزلنا الطلب المصنع وشغالين فيه ولين هذا اليوم ما شفت منهم غير المراوغة والوعود غير الصادقة ومن اسبوعين بس بعد تهديدهم بالبحث عن مسؤولهم والشكوى عليهم اتصل فيني المسؤول في المصنع وقالي يومين ونخلص الخزاين بس المصيبة أن طلب مني التصاميم لان لا عنده تصاميم ولا شي وكان المفروض ان المهندس مطرش له التصاميم من قال لي ان الشغل نزل المصنع . . وطبعا دخلت الحين في دوامة جديدة من التأخير مع المسؤول اللي في المصنع حتى تصاميمي نسيتها وطرشت له تصاميم بسيطة علشان يخلصوني بسرعة ومع ذلك كل يوم اليوم ولا شفت شي .

يعني لو كانت البضاعة نزلت المصنع للتصنيع كان استلمت الخزاين من شهرين فلا تصدقين انهم بدوا في الشغل .

[بريق الشوق]

القانون المدني القطري 22/2004
المادة رقم 101

((إذا عدل من دفع العربون فقده ، وإذا عدل من قبضه التزم برده ودفع مثله ، ذلك ولو لم يترتب على العدول أي ضرر . ))

يعني إذا انتي هونتي.. راح عليك
واذا هو هون.. يدفع لك الدبل..

بشرط عدم وقوع الضرر

وهذي قاعدة مكملة يجوز تتفقون على خلافها...

اما إذا ما كان فيه عقد أو اتفاق .. فترجعون للأصل العام اللي هو هذي القاعدة
الا إذا تم انهاء الموضوع بشكل ودي بينكم ورجع لك العربون


بالتوفيق

[معماري قطري]

الله يعين الجميع
يعني الحين لو العقد 100 الف ودفع الواحد 20 الف دفعه مقدمه وصارت مماطلة بهالطريقة شالحل؟ هم يقولون شرينا الخشب وهو ينطر دوره علشان يتنفذ ... وهذا شيء مب معقول وأكيد يبون يكوشون على المبلغ من غير وجه حق والله حرام وناس كثيرين يقدرون الظروف ويتسامحون، ما لكم الا مالك المنجرة ولا الإدارة أكيد من اللي يتخيلون كل قطري يتدفى بالفلوس ويحرقها وقت البرد.

[نوت]

الحمدلله مايضيع حق وراه مطاالب تم الاتفاق مع مالك المنجره ابو علي جزاه الله خيروخذنا الفلوس وانهينا العقد والسوداني الي بالاداره ماقصر بس البلا بالبناني المعسر يبغي ياخذ الفلوس غصب