بخصوص المقابله في السفاره الامريكيه ارجوووكم ؟؟؟

[jojo]

السلام عليكم

اخواني اليوم رحت للمقابله لي انا وزوجتي وابني عشان الفيزا

والغريب في الامر وافقوا علي وعلى ابني وقالولي بالنسبه لزوجتك

فالسيستم ماقبل طلبها لازم تنتظر اسبوع او اسبوعين للطلب

حاولت اتفاهم مع موظف السفاره او انه يكلم القنصل قالي مايصير هذي من وزارة الخارجيه

الامريكيه ؟؟؟

قالي شوف الموقع لانزل رقم الطلب في الموقع تعال قدملها ؟؟

هل حصل معاكم هذا الشي وهل هو يتأخر لاني فعلا دفعت للتذاكر الاسبوع الجاي

وتورطت لازم ااجل ومااعرف كم بأجل السفر بالضبط لانهم مااعطوني موعد دقيق

اتمنى اتفيدوني ارجوكم

[قطرية كشخه]

ان شاءالله تكون مسأوله وقت لا اكثر

بالتووفيق ان شاءالله

[Aaziz]

الي حصل معاك هو مشكله بسيطه في اسم زوجتك (اسم الاب و الجد او العائله) الي راح يصير هو انهم راح يرسلون طلبها الى واشنطن لزياده التدقيق و التحري . يكون الاسم او العائله متشابه مع حد من الاشخاص غير المرغوبين بالنسبه لامريكا .
بالنسبه للوقت الي بتنتظره لين تجي الموافقه بصراحه مابي احطمك بس اتوقع مش اقل من ٣ اسابيع او شهر او شهرين

[jojo]

اوووف شهرين ؟؟؟

مع انه الموظف قالي خلال ايام يعني يوم الاحد شيك على الموقع واخذ رقمي وراح للقنصل وطبع الطلب

وقالي بيتصلي استغربت منه بصراحه وافق علي وعلى وليدي وزوجتي قالي انتظر الموقع ؟؟

والموقع فيه ارقام طلبات موجوده بس مااعرف متى محتار شكلي بروح اكنسل التذاكر لحد ماتوصل

الموافقه بس مااعرف لاكنسلت التذاكر مع انها بزنز راح ياخذون شي مني غرامه ؟؟

[Aaziz]

والله ياخوي مابي انصحك بنصيحه و اخرب عليك .. لكن الي قلته لك صار مع اخوي و اضن موضوعه اخذ شهر و شوي
يمكن الحالات تختلف و اسباب تاخير الموافقه تختلف .
افضل شي انك تروح لمكتب السفريات تشرح له الوضع و هو بيقول لك افضل حل الي مايخسرك مبلغ اكبر .. سواء الغاء او تاخير الموعد .. و يمكن راعي السفريات يكون مر عليه نفس الموضوع من الزباين و يعرف المده التقريبيه

[vxr]

أخوي زوجتك جنسيتها قطرية ؟ اذا كانت غير قطرية فهذا واحد من الأسباب للتأخير
ثانياً ممكن يكون هناك تشابة في الأسماء وهذا وارد لين يتحققون
ثالثا أنت تقول الموظف قال لك إذا نزل طلبها في النت تروح لهم معنات الشي هذا أنهم ماراح يشوفون طلبها الا إذا جات على التاريخ اللي أنتوا حاطينه لها للمقابلة في النت
وبالنسبة للتذاكر مافية أي مشكلة ترجعها للمكتب وتغير التاريخ للسفر يمكن ياخذون عليك 100 ريال عن التذكرة الوحدة في حال التغيير أو إلغاء الحجز
أتمنى إني أفدتك من واقع خبرتي البسيطة

[jojo]

زوجتي قطريه اكيد

وبالنسبه للتذاكر ماعندي مشاكل مع القطريه عادي اكنسلها وماياخذون شي لانها بزنز

لاكن المشكله في الطيران الداخلي خلاص يروح عليك المبلغ

وثاني شغله ليش مايرسلون فاكس لوزاره الخارجيه في واشنطن يحطون الاسم لهم ويردون عليهم بنفس اليوم

وانتهت المشكله انا راح انتظر ليوم الخميس وبراجعهم بكره لعل وعسى تتسهل الامور بأذن الله

واذا ماتسهلت الله يكون في العون نأجل السفر كم اسبوع او كم شهر

عكروا مزاجنا حسبي الله ونعم الوكيل

[بوجاسم566]

امم اخوي

سبب التاخير ان زوجتك رايحة احد الدول

(( ايران ـ باكستنان - الهند - سوريا - سيريلانكا ))

واحد من الشباب اخروه لهذا السبب الرد بياخذ اسبوعيـن بيتصلون لك هم

او يمقن تشابـه اسماء

الله يوفقـكم وتروحون وتردون بالسـلامة

[jojo]

هههههه ماراحت لاي دوله راحت معاي لندن والمانيا وماليزيا والنمسا وبس

[مــــلاك]

الله ييسر لكم اموركم
انا وايد متخوفه من سالفة الفيزا في ناس تطلع لهم بسرعه وناس لا

[jojo]

انا توني راجع الحين من السفاره مع زوجتي وطردوني طرد

قالولي ماتدخل دام الطلب قالولك راجع الموقع انتظر لحد مايطلع رقم الطلب في الموقع

والله ان مافيه شي ومتأكد بس هم حبوا يطولون السالفه يعني حرمه شبتسوي يعني بتفجر

ورايحه مع زوجها وولدها وشبنسوي يعني المشكله مايعطونك تاريخ معين للرد انت وحظك لو تقعد سنه

يعني ارسلوا فاكس لامريكا وحطوا الاسم لهم ويردون عليكم بنفس اللحظه او بنفس اليوم وانتهت المشكله

ليش هالتأخير طيب ؟؟

[مزعله النساء]

السلام عليكم ورحمه الله وبركاته

اخـــوي انا رحت سوريا وفيزتي طلعت ثاني يوم لاسوال ولا اي تعـقيدات

[بوجاسم566]

انا توني راجع الحين من السفاره مع زوجتي وطردوني طرد

قالولي ماتدخل دام الطلب قالولك راجع الموقع انتظر لحد مايطلع رقم الطلب في الموقع

والله ان مافيه شي ومتأكد بس هم حبوا يطولون السالفه يعني حرمه شبتسوي يعني بتفجر

ورايحه مع زوجها وولدها وشبنسوي يعني المشكله مايعطونك تاريخ معين للرد انت وحظك لو تقعد سنه

يعني ارسلوا فاكس لامريكا وحطوا الاسم لهم ويردون عليكم بنفس اللحظه او بنفس اليوم وانتهت المشكله

ليش هالتأخير طيب ؟؟

انا اقـول حول التذاكر على اوروبـا ابرك لك من عوار الراس

والله بتكرة السـفرة بسبة الفيزا او روح بروحك :tease:

وحول التذاكر الداخلية حق احد الشباب


السلام عليكم ورحمه الله وبركاته

اخـــوي انا رحت سوريا وفيزتي طلعت ثاني يوم لاسوال ولا اي تعـقيدات

وانا رحت سوريـا وطلعت ثاني يوم :nice:

المشكـلة في تشابـة الاسـماء

[jojo]

الحمدلله على كل حال اليوم انحلت المشكله وقالنا القنصل فيه خلل بسيط واحنى ااسفين وبكره

تستلم الفيزا واعطيتهم الجواز وبنشوف بكره لااستلمناها بنبشركم انتظرونا العصر

[طويل الرمح]

انصحك تريح في واشنطن او نيويورك يوم او يومين و لا تواصل سفر في نفس اليوم وخاصه انت معاك عائلة

[برشلوني قطر]

الحمدلله على كل حال اليوم انحلت المشكله وقالنا القنصل فيه خلل بسيط واحنى ااسفين وبكره

تستلم الفيزا واعطيتهم الجواز وبنشوف بكره لااستلمناها بنبشركم انتظرونا العصر



ننتظرك لين بكره وانشوف اخرتها معاهم :rolleyes2:

واحد من الربع كان بيروح علاج واخوه معااه وافقو عليه واخووه لا:eek5:

حول من امريكا لالمانيا..

الله يسهل امورك

[jojo]

الحمد لله تسهلت الامور واستلمت الجواز اليوم العصر وكل شي تمام

والسفر بعد ثلاث ايام وماقصرتوا اخوانا

وانصح الجميع نصيحه اخويه عشان ماتحبط

قبل لاتحجز بشهر روح سوولك الفيزا اذا بتروح امريكا

يعني لاشفت الفيزا ملصقه في جوازك وهي مدتها عشر سنوات

رووح واحجز تذاكرك وسكنك وانت مرتاح نفسيا انك بتسافر ماتقعد مثلي اتحاتي

تمنياتي لكم بالتوفيق وانشوفكم لارجعت من امريكا توكلنا على الله