بخصوص العمال في الجهات الحكوميه ؟؟؟

[المحاميه]

السلام عليكم

الموضوع باختصار الله يسلمكم
انا موظفه في جهه حكوميه وفكرت استخدم الدري كنوع من الحركه لان القعده المتواصله تتعب الظهر .. المهم لما فتحت باب الدري وبغض النظر عن ان الدري كان صغير وضيق يعني مكان مش ولابد .. لكن مب هذا اللي لفت نظري .. اللي خلاني اكتب هالموضوع ان شفت عاملين قاعدين هناك .. واحد عامل نظافه .. اللي ينظف الحمامات ويغير الزباله الله يكرمكم والثاني لابس ازرق مادري شنو وظيفته بالضبط .. كل واحد قاعد في صوب .. وقاعدين يتعبثون في جوالاتهم (اكيد جوالاتهم نوكيا يعني مافيه شي من التسليه) ..

الحين بقولكم شنو ابي اقول من هالموضوع ..
يعني هالعمال مب بشر ويحسون نفس مانحس؟ يعني ليش مالهم مكان مخصص ان شاء الله غرفه صغيره يقعدون فيها .. مب كفايه شغلتهم مش ولابد والراتب على قدهم .. حتى مكان ماعندهم يقعدون فيه .. قاعدين فأخس مكان .. منعزلين .. حتى سوالف مافي .. حتى تلفونهم اللي قاعدين يطالعون فيه مافيه شي يسلي انا متأكده انهم بس جي ماسكينه ويفرفرون فيه ولا عندهم شي يخفف عنهم .. يعني شلون بتكون نفسياتهم .. والله حرام ..

يعني هم متغربين وتاركين اهاليهم .. وجايين اهني يشتغلون بالساعات .. ووظايفهم على القد .. واقل شي .. اللي اشوفه شي من حقوقهم ماعندهم .. ليش ؟؟؟ لو احنا كموظفين نقصنا اقل شي قومنا الدنيا وقعدناها .. زين وهم شنو ؟؟ ليكون بس احنا البشر اللي نحس وهم اطوف .. وماعرف اذا يستخدمون المطبخ ولا لا وماعرف اذا يستخدمون الحمام الله يعزكم ولا لا ..


اتمنى من كل قلبي ان حد يحط حل حق هالمشكله ..
:( شي يكدر الخاطر الصراحه ...

[بوعلى 1]

احساس من قلب كبير يا المحامية يليت كل الناس يفكرون مثلج اللة يكثر من امثالج هذة العمالة اختي المسؤل عنها الشركة التي اتت بها وهي الي تتكفل برعايتها او تركها كما رايتي ولا حل لهل الا عند كفيالها

[الاجوديه]

.
.



جزاك ِ الله خير الجزاء

ويكفي احساستس الطيب والانساني بهالفئة اللي فعلا ً تتعب ولها دور مع انه بسيط بس ضروري ..!



واعتقد هالاشياء اللي طلبتيها المفروض شركتهم تحطها من ضمن الشروط فالعقد مع الجهه اللي تتعاقد معاها ..!



ويعيطتس العافيه يالغاليه ويكفي احساستس الطيب









.
.

[شبح الصمت]

أأرحم الله والديج وبيض الله وجهـج

هم دوم كذا عندهم أماكن يقدرون يجلسون فيها مثل المطابخ التابعه للعمل بس هم طبعهم يحبون الخصوصيه ويتجمعون مع بعض او كلاً لاهي في تلفونه

نقدر لج هاللفته الجميله

[الغالي!]

جزاج الله خير على هالاحساس والله يكثر من امثالج فعلا والله كلامج ليش مايكون له مكان استراحه او مكتب وين حقوق الانسان عن هالنقطه ولا بس في الخراب

[شبح الصمت]

ولفته ثانية أأختي

نحسن التعامل معاهم لانه الأغلبية من عمال النظافة في الوزارات والمؤسسات والجهات الحكومية يستقدمون المش مسلمين يقولج مش مسلم بيشتغل (استغفر الله العظيم) فلربما نكون سبب في هداية أحدهم

أخلاقنا هي التي سوف تبين لهم معنى دينا الكريم وكرمنا واحترامنا للبشر

الله يكرمنا فالدنيا ويرزقنا بجناته الفردوس

[jassim_007]

قسم بالله لو في مجال كنت بطرش لج رسالة شكر صجية

نادر مانحصل ناس في هل الزمن يحسون بمعانات غيرهم

نعم التربيه والله ،،،جزاج الله الف خير و الله يعينهم :/

[R 7 A L]

ماقلتي غير الصدق

المشكلة هالفئه الكل مستخسر فيهم حتى علبه الماي

[barod]

جزاج الله خير وان شاء الله كل كفيل ومسؤول يحس بهل عمال

[ريماس الغلا]

كفو يالقطريه



ورحم الله والديج

[المحاميه]

الله يجزينا الخير وياكم
والله انا اقول هالكلام لان احس في أي شخص كانسان بغض النظر عن شنو اصله ولا شنو دينه ..

وصاج ياللي قلت وين حقوق الانسان والاعلانات الدوليه ولا بس في الخراب =(

والله العظيم شي يحزن ..

وماكنت ادري ان الكفيل هو المسؤول عن هالنقطه .. الله يسامحهم على هالذل .. غربوا الناس وذلوهم .. جان زين نقدر نسوي شي ..

ياريت لو في حل ..

[NeverLand]

كل مره اشوفهم عالدري لكن ولامره حسيت ان قلبي عورني عليهم كثر الحين بعد ماقريت الموضوع .. يزاج الله خير يا المحامية والله فتحتي عيونا على هالفئة المسكينه اللي نشوفهم كل يوم بالشغل واللي بدون مساعدتهم لنا احنا مانسوي شي .. فعلا لازم يشوفون لهم مكان يقعدون فيه .. مو مثل القطاوه نحصلهم محذوفين عالدري او الارض بأي مكان ..

[درر قطر]

من حقهم يكون لهم مكان خاص يرتاحون فيه والكلمة الطيبة والمعاملة الحسنة مطلوبة

[Scout Sniper]

ياليت الكل فيه هذي النفحه الانسانيه مثلش

[المحاميه]

المشكله مو بس المكان اللي قاعدين فيه مب عدل ,, المشكله حتى مافي شي يطير عليهم الوقت ..

اتمنى الكل يحس فيهم واتمنى من الجهه المسؤوله ايجاد حل جذري ..

[ANONYMOUS]

http://www.nhrc-qa.org/ar/nhrc.aspx?page=36

وصلوا الملاحظه لحقوق الانسان واكسبوا اجر في هالمساكين

وترا الجماعه هناك يهتمون

[تحداني]

بدون هالعماله الوافده ما يقدرون يتحركون شبر بعض الناس الراقيه واصحاب المكاتب
وفوق هذا ينظرون لهم نظره دونيه ما اعرف على ايش
صادقه .. ومعاج حق والله يجزيج كل خير
يحق لهم اشيا كثيره .. بس البعض الاكثر يستهبل في معاملتهم
ويضيق عليهم حقوقهم وهم وعليه عليهم عشان هالألف ولا الألفين ساكتين


جملك الله برضاه

[Abdulraman]

الله يساعدهم ان شاءالله
فعلا في ناس تشوف العمال كأنهم حشرات وين الانسانيه وين الرحمن
المفروض يخصصولهم مكان في كل وزاره او مؤسسه
عندنا نفس الشي في الدرج تلقاهم مجتمعين وكل واحد ماسك جواله والسبب ماعندهم مكان يرتاحون فيه

[ahmaaaddd]

يزاج الله خير يالمحامية

وياليت كل المسلمين تكون عندهم هذه النظرة الانسانية الاسلامية في نفس الوقت

وأسأل الله أن يثبج على إنكارج لهذا المنكر وأن أي تغيير للأحسن والأفضل يكون لج مثل أجر اللي غير

أو سن قانونا أو أوجد لهم مكانا خاصا بهم مراعاة لانسانيتهم وحاجاتهم

[الزلزال]

كلامج كله حلو ومنظقي
بس هل عرفتي الوقت الي كانو فيه ضمن وقت العمل ؟
واذا كان وقت عمل ليه منخشين ؟
اعتقد لهم وقت راحه والشركة الي مشغلتهم اكيد موفره لهم مكان للراحه او الغداء ..