مع او ضد بيع المنتجات المقلدة [الأرشيف] - منتديات شبكة الأسهم القطرية

رآعي موآجيب

30-03-2012, 01:14 PM

بورش2008

30-03-2012, 01:17 PM

تسلم على الرأي الشيخ

دبلوماسية

30-03-2012, 01:41 PM

ضد وضد وضد

عندي فلوس باخذ ماركة غالية ...
ماعندي باخذ اي ماركة اصلية بس تكون على حسب امكانياتي ...
بس اكشخ بشي تقليد ....لا

وبالنسبة للألكترونيات ...افضل اخذ ماركة معروفة ...اخاف من اي شي له علاقة بالكهرباء اذا ما كان اصلي...

شكرا على الموضوع ..:nice:

بصمة قطرية

30-03-2012, 01:55 PM

اخبر مره سمعت فتوى تحرم هالشي ...
عااد مادري ...

اذكر مرة سمعت هالشي ..
ان بيع المقلد حرام ..
بحاول اجيب الفتوى ..

بصمة قطرية

30-03-2012, 02:04 PM

مؤيد وبقوه لسببين

الأول هو ان الله خلقنا درجات ، ممكن انت الله منعم عليك ورازقك وتقدر تاخذ تلفزيون 46 بوصه اصلي بـ 7000 الأف ، وأنا ممكن اكون رجال بسيط و وضعي مايسمح ادفع هالمبلغ كله ، فأروح اشتري تلفزيون 46 بوصه تقليد بـ 2500

ولك ان تقيس ذالك على جميع السلع

الأمر الثاني هو الأحتكار وجشع التجار

تدري لو ماكانت السلع المقلده تارسه السوق كان صار الوضع يروع

عادي انك تلاقي مكينة حلاقه يابانيه او المانيه بـ 1000 ريال

لكن بسبب توفر مكينة الحلاقه الصينيه والتايوانيه بسعر 50 ريال صار عند التاجر قلق كبير

فيحاول تكون اسعاره مقاربه للتقليد مع كتابة كلمة أصلي بالبنط العريض

يعني احنا المستفيدين في النهايه :nice:

يفضل ان الواحد يعيش على قده ..
بدون لا نفكر في التقليد
في ماركات اسعارها معقولة ..
حالياً اللي نشوفه تقليد درجة أولى ..
يعني الأصلية بعشرة والتقليد 1500
في نفس الوقت في ماركات أصلية بـ 1500
ليش الواحـد ياخذ التقليد ..!!
انا من وجهة نظـري كل شخص يعيش على قده ..
الله خلقن مستوياات فحلاته نعيش على مستوانا ..
و ما نلبس ثوب مب ثوبنا ..

بورش2008

30-03-2012, 02:28 PM

بصمة ودبلوماسية شكرًا على وضع الرأي وانا أرجح او مع بصمة في الرأي ليش اكشخ بشي تقليد وفي أشياء ثانيه وأصلية وبسعرها المعقول وننتظر باقي الاعضاء

بوعلي2

30-03-2012, 02:44 PM

ارجح رأي بصمه

كلام سليم

أسد الجزيرة

30-03-2012, 03:02 PM

مدام ما في فرق بين الاصلي و التقليد في الشكل و الجودة اجل ليش ينباع الاصلي غالي بس عشان الاسم

ذيب ازغوى

30-03-2012, 03:06 PM

انا معاا اخوي لاكن بشرط التوضيح انها مقلد فانت مب على كيفك تحرم بيع الشيء دامه زباينه موجودين

بس لازم التوضيح

airbus

30-03-2012, 03:17 PM

في شي شايفه من زمان انه في ناس بنسبة 85 في المية في قطر ماتعرف تفرق بين الاصلي والتقليد او ماتعرف تفرق انه هدا المنتج دو جودة عالية او لا

لي هدا السبب زادت نسبة التقليد بدرجة كبيرة في البلاد حتى في المحلات الكبيرة تبيع تقليد وتقول عليه اصلي وطبعا الناس ماتعرف او ماتفرق انه اصلي او تقليد

jeep-srt8

30-03-2012, 03:28 PM

ايييييييه وبقووووووووة

علشان مو كل الفئات تقدر على الاصلي الله يكون بالعون

ولكن مع مصداقيه تبين انه هذا اصلي وهذا تجاري مو هذا اصلي ويطلع تجاري هذه اهم نقطة

الدوحة قطر

30-03-2012, 03:58 PM

هل تجوز التجارة بمواد مقلدة ونوعية التقليد درجة أولى كالعطور أو الملابس "على سبيل المثال عطور شانيل أو أديدايز الأصلية قيمتها 350 دولار والمقلدة قيمتها 20 دولار" وأكثرية المستهلكين يعرفون أنها مقلدة من خلال سعر الشراء لأنها رخيصة. فهل يجوز التجارة بها علما بأن الشركات الأصلية لم تعط تراخيص للتجارة باسمها؟
الإجابــة

الحمد لله والصلاة والسلام على رسول الله وعلى آله وصحبه، أما بعـد:

فقد بينا في الفتوى رقم: 76793، أنه لا يجوز الاعتداء على العلامة التجارية أو الاسم التجاري الخاص بتلك الماركات بغير إذن من أصحابها، وإلا فهو تزوير واضح، وهو حرام شرعاً لأنه تعد على حق الشركات في العلامة والاسم التجاريين، وهما حقان ماليان معتبران، وللشركة صاحبة العلامة التجارية متابعة ومقاضاة من يقلدون شعارها إن لم تكن أذنت لهم في ذلك.

ولا تجوز المتاجرة في مثل تلك المواد المقلدة، لئلا يكون شريكاً لأصحابها في الإثم وعوناً لهم على الباطل، كما أن كثيراً منها لا تراعى فيه الجودة وأسباب السلامة فيضر الناس.

وبناء عليه فلا تجوز المتاجرة فيها ولو لمن يبين كونها تقليداً، وقد نص أهل العلم على أن الآخذ من الغاصب أو السارق أو المعتدى مثلهم ما دام يعلم أنهم قد اعتدوا على حق غيرهم، وللفائدة انظر الفتوى الموضحه أعلاه.

والله أعلم.

المصدر

http://www.islamweb.net/fatwa/index.php?page=showfatwa&lang=A&Id=130568&Option=FatwaId

-------------------------------------

اشتريت شنطا نسائية لماركات عالمية مقلدة، فهل يجوز لي المتاجرة بها، وبيعها لزبائن يعلمون بأنها مقلدة، مع العلم بأنني لا دخل لي في تصنيع هذه الشنط، أي أنها تباع في بلد آخر وأنا أذهب فقط وأنتقي الموجود، مع العلم أيضاً بأن الكويت تمنع المتاجرة بالبضائع المقلدة وتحترم الحقوق الفكرية؟ وشكراً.
الإجابــة

الحمد لله والصلاة والسلام على رسول الله وعلى آله وصحبه، أما بعـد:

فإذا كان المقصود بالتقليد هنا أن يكتب على هذه الشنط العلامة التجارية أو الاسم التجاري الخاص بتلك الماركات بغير إذن منها، فهذا تزوير واضح وهو حرام شرعاً لأنه تعد على حق الشركات في العلامة والاسم التجاريين، وهما حقان ماليان معتبران، كما تقدم بيان ذلك في الفتوى رقم: 73512.

وبالتالي لا يجوز لك الاتجار فيها لأن الاتجار فيها والحال ما تقدم مشاركة في الاعتداء، سواء علم الزبائن بحقيقة ذلك أم جهلوا، وسواء أجازت الدولة هذا العمل أو منعته ما لم تجزه الشركات صاحبة هذا الحق.

والله أعلم.

المصدر

http://www.islamweb.net/fatwa/index.php?page=showfatwa&Id=+76793&Option=FatwaId

الخزرجي قطر

30-03-2012, 04:07 PM

كل واحد على قدر امكانياته الماديه
ليش الاصلي اذا كان التقليد يؤدي نفس
الشي تدفع مبالغ كبيره بس علشان الاسم
ايش ينفعني الحين الشركات العالميه تنتج من
الصين وبنجلادش ويحطون العلامه التجاريه للماركه
الأيدي العامله ارخص التقليد منتشر بشكل عام في كل شي؟؟

بورش2008

30-03-2012, 05:02 PM

الشكر لكل الاعضاء الكرام الي قالوا آرائهم وننتظر المزيد لكن أنا ضد فكرة أنا التقليد نفس الاصلي والسموحة بالكلمة ذي مب عشان الاسم لا اصلا التقليد مافي جودة ولا هو الي بيتم معاك هذا رأي وننتظر الرأي الاخر بعد

بورش2008

30-03-2012, 06:44 PM

ننتظر باقي الاعضاء

منهم وفيهم

30-03-2012, 06:56 PM

..

ضد..

بورش2008

30-03-2012, 07:03 PM

يسلمواااااا

رآعي موآجيب

30-03-2012, 08:18 PM

يفضل ان الواحد يعيش على قده ..
بدون لا نفكر في التقليد
في ماركات اسعارها معقولة ..
حالياً اللي نشوفه تقليد درجة أولى ..
يعني الأصلية بعشرة والتقليد 1500
في نفس الوقت في ماركات أصلية بـ 1500
ليش الواحـد ياخذ التقليد ..!!
انا من وجهة نظـري كل شخص يعيش على قده ..
الله خلقن مستوياات فحلاته نعيش على مستوانا ..
و ما نلبس ثوب مب ثوبنا ..

ايس فيه !! :omen2:

اخبرش ذكيه وتفهمينها على الطاير يابصمه

انا ماتكلمت عن الكماليات ، اتكلم عن الضروريات والسلع اللي نحتاجها

واتفق معش طبعا بخصوص الكماليات

لكن في النهايه سوق التقليد يحافظ على اسعار السلع الأصليه بشكل او بأخر

دام مثال التلفزيون ومكينة الحلاقه ما فهمتي مقصدي منها ، بعطيش مثال على شي من الكماليات

في التسعينات كانت ساعة الرولكس الديتونا بحدود 35000 واليوم نفس الساعه بنفس هالسعر تقريبا او يمكن اغلى بشوي

تتوقعين ليش ما زاد سعرها !! :)

ولي العهد

30-03-2012, 08:41 PM

أنا مع بيع المنتجات التقليد لان الاصلي معروف انه غالي وفيه أشياء تحتاجها مش شرط أتكون أصليه وممكن التقليد يكون البديل ولكن تخيل لو كل شي عندك اصلي وسعره نار وشو وضع اصحاب الدخل المحدود ...

درر قطر

30-03-2012, 08:51 PM

أنا ضد التقليد وبشدة لأن البضائع المقلدة ليست الحل المناسب لإرتفاع الأسعار وبعدين مصانع تقليد الماركات بدال ما تقلد خل تنتج بضائع بماركات جديدة
وهالمصانع الي تقلد الماركات المشهورة لازم تغلق وتدفع غرامات للماركات الأصلية

بورش2008

30-03-2012, 09:37 PM

نحترم راي الجميع وننتظر الاخوة الكرام لان الموضوع مهم ومنتشر في السوق القطرية والتقليد ما منه خير براي مستحيل اخذ او اصلح سيارتي من التقليد ومستحيل اركب شي خاص بالكهرباء من التقليد ونفس الشي البضائع اللبس والساعات والتيلفونات وغيرها بس ننتظر الكل وكل واحد رايه على العين والراس وهذي وجهات نظر

درر قطر

30-03-2012, 10:02 PM

ما أدري شنو شعور البنات الي يشترون تقليد الماركات ويقولون أصلي ويكون باين إنه تقليد
الحمد لله والشكر أحس ما عندهم ثقة بأنفسهم ليش ما يشترون ماركات عادية أصلية أحسن من التقليد والكذب على الناس

doha2012

30-03-2012, 11:23 PM

,,

بعيداً عن المثاليه ... رايت بام عيني من تأخذ التقليد وتدّعي غير ذلك .. !!

هناك متميزون في بيع التقليد ولهم زبائن كثر ... وهناك من رأيت يشتري منهم لم اتوقع فعلاً ذلك ..

ليس للكثير القدره على شراء الاصلي .. ل غلا اسعاره وندرتة البعض وعدم تفوره !

كل ن يمد رجله على قد الحافه ..

اللي عنده يشتري عليه بالعافيه واللي مايقدر لايكسر نفسه ! ويدعي غير الصحيح !

امانه الان لا ارى الا فروق بسيطه تفصل الاصلي عن التقليد .. وتفرق الجوده بالطبع .

سبحان الله هناك من يحب ان يلبس ويتجمل وقد لايملك قوت يومه وهناك من يملك ولا يتجمل خوفاً من الصرف والحسد .

R 7 A L

30-03-2012, 11:26 PM

مالي لا في الماركات ولا التقليد

بس الى بقول
ان أصحاب الملايين والمشهورين لو يلبسون تقليد مارح يبين
مقارنه بذوي الدخل المحدود حتى لو لبسوا أصلي ماراح يبين وبيعتقدون انه تقليد

وشكراً

sweet qatar

30-03-2012, 11:26 PM

الي اعرفه ان شرعيا ما يجوز..

شاللي حادني اخذ من هذي الماركة بالذات..

ان قدرت على سعرها كان بها.. واذا ما قدرت اخذ شي يحقق الغرض من ماركة ارخص..

واشوفه كذب.. تقليد طبق الأصل.. عشان الي يشوفني يقول هذي شايلة الماركة الفلانية..

المفروض تكون عندي قناعة بنفسي وبذوقي..

يعطيك العافيه..

دنيا الاسهم

30-03-2012, 11:53 PM

ضد المنتجات التقليدية بانواعها
ياليت هيئة المواصفات يقطعون ويمنعون منعا باتا الاشياء والمواد التقليدية لانها خطيرة ومضيعة للمال وعلى الصحة والامن والسلامة

السحابة

31-03-2012, 01:40 AM

مع بس يكون اسعار معقوله موجنطة أصلي 4000والتقليد2000اشتري الاصلي افضل

ضوى

31-03-2012, 01:45 AM

اعرف واحدة ابوها تاجر مجوهرات كبير ، كل قطعة يجيبها يقلدونها لها وتلبسها وطبعا محد يقدر يقول ان اللي لابسته تقليد 

بورش2008

31-03-2012, 04:14 AM

الشكر لكل اعضاء المنتدى اللي شاركوا في الرأي وننتظر المزيد والواضح الاكثر ضد التقليد وانا اشوف هالشكل بعد والاحترام لكل رأي

لاجل QT

31-03-2012, 05:05 AM

ومن قالكم ان الاصلي الموجود عندنا اصلي اغلبة تقليد يباع بسعر الاصلي...من كم سنة في محل ماركات معروف في فيلاجو صوب الماركات اغلق...لان الشناط اللى يجيبها تقليد درجة اولى..

والتقليد اذا كان متقن مايفرق لاشكلا ولا مضمونا انا معة..ليش اخسر نفسي وفي بديل ارخص

نسمية البديل الارخص وليس تقليد لان هو هو نفسة في كل شي

تقبلو مروري

Mohammed2

31-03-2012, 06:59 AM

انا مع بيع المنتجات المقلدة لكن بشرط ان البائع يخبر المشتري بن هذا المنتج تقليد

لأن في ناس ولله الحمد يقدرون يشترون المنتج الأصلي مهما كان سعره
وفي البعض مايقدرون يشترون المنتج الأصلي وفي نفس الوقت محتاجين لهالمنتج

R 7 A L

31-03-2012, 07:05 AM

اعرف واحدة ابوها تاجر مجوهرات كبير ، كل قطعة يجيبها يقلدونها لها وتلبسها وطبعا محد يقدر يقول ان اللي لابسته تقليد 

أرحم الله والديك
هذا الى أقصد

رآعي موآجيب

31-03-2012, 07:27 AM

مالي لا في الماركات ولا التقليد

بس الى بقول
ان أصحاب الملايين والمشهورين لو يلبسون تقليد مارح يبين
مقارنه بذوي الدخل المحدود حتى لو لبسوا أصلي ماراح يبين وبيعتقدون انه تقليد

وشكراً

اعرف واحدة ابوها تاجر مجوهرات كبير ، كل قطعة يجيبها يقلدونها لها وتلبسها وطبعا محد يقدر يقول ان اللي لابسته تقليد 

هالكلام صحيح

بعض الأثرياء لهم سياسه خاصه في هالموضوع

قصه واقعيه

يسولف علي واحد من الربع ، يقول كنا مسافرين مجموعة شباب ومعنا واحد من الأثرياء ولابس ساعة ماركه معروفه وغاليه ، يقول واحد من الربع حالته لا بأس بها لكن مهوب ثري بس وضعه تمام ولابس ساعه نفس ماركة ساعة الثري بس اصليه ومتكلف عليها

ركز الأخ اللي حالته جيده على ساعة الثري واكتشف انها تقليد ، قاله يافلان ترى غشوك ، ساعتك تقليد ، طالعة الثري وابتسم له وصد عنه ، يقول توقعنا كلنا بأن الثري كان يبتسم ابتسامة استهزاء ، وكرر الأخ كلامه للثري اكثر من مره ، يقول فجأه انفجر الثري على الرجال

قاله أنا معروف اني فلان الفلاني وأني املك ثروه ، لو لبست ساعه تقليد مهوب قايلين ان ساعتي تقليد لأن الكل يعرف وضعي المادي عدل ، لكن انت انا ادري ان ساعتك اصليه ، لكن الأغلبيه يعرفون وضعك المادي بأنه عادي ، تتوقع بيقولون ان ساعتك اصليه !!؟

تتوقع لو بيشوفوني انا وياك بيقولون ساعتي تقليد وساعتك انت اصليه :)

يقول سكت الرجال ولا عاد قال برررم :secret:

على العموم موضوع الكماليات ما يهمني حيل ، ولانيب من هواة التقليد واني اتفشخر بشي اكذب فيه على نفسي قبل غيري ، لكني بعد مقتنع بأن وجود السلع المقلده لها دور ايجابي في حركة السوق والأسعار وتوفر جميع الدرجات ، وكلن وأستطاعته ورغبته الخاصه

قريت كم رد فيه امتعاض وانتقاص للي يشترون ماركات معروفه وغاليه بس تكون مقلده واكيد بأسعار رخيصه

ليش هالزعل ياجماعه ؟ تبغون تحتكرون الغالي والنفيس ؟

لازم محد يلبس او يشتري الماركات غيركم ؟

ترى كلكم نفس الشي ونفس الطينه

اللي يشتري ماركه مقلده يبغي الناس يشوفونه لابس ماركه ويتفشخر بها
واللي يشتري ماركه اصليه بعد يبغي الناس يشوفونه لابسها ويتفشخر بها

لو الموضوع مجرد امتعاض من الكذب في اللبس ، كان زعلتوا على كذبات لا تغتفر ابد

مهوب تزعلون على كذبة ماركه تقليد كوبي من اصليه !!

ضوى

31-03-2012, 09:30 AM

بالنهاية كلها فشخرة وحب للمظاهر ، موقف حقيقي صار امس

كنت بجلسة بين الاهل من طرف بو عيالي وكنت لابسة تعليقة الماس ، سالتني واحدة فلانة حلوة التعليقة هذي الماس قلت لها ايه قالت بكم قلت لهامدري هدية من بو عيالي ، قاالت ايييه شكلها وايد غالية ، وللعلم هي لابسة اكثر من قطعة والماس يمكن باكثر من ٣٠ الف ريال ،وانتبهت لقطعة صغيرة انا لابستها يمكن ماتتعدى ٤٠٠٠ ريال ، شي غريب

لي فلسفة معينة في التقليد ، ماحبه من موقف صار لي هنا في المنتدى ، اخذت شنطتين بمبلغ ١٥٠٠ ريال ديور وال في ،اول ماوصلوا طاحوا من عيني مبينين تقليد بشع وزعتهم وقررت ابدا ماشتري تقليد خاطري بشي اجمع كم شهر واشتريه ، وعالعموم مب كل شهر الواحد يشتري له شي غالي

اما بالنسبة للاجهزة والسيراميك وهالاشياء الاستهلاكية فافضل اخذ شي اصلي وراقي مب اخذ شي تقليد وصيني وكل شوي مبدلته

بورش2008

31-03-2012, 10:03 AM

الشكر لكل من ساهم برأيه وبعد نبي الاراء المختلفة لان موضوع مهم وضوى انا معاج بكل اللي كتبتيه

بورش2008

31-03-2012, 11:25 AM

ننتظر الاخواااااااان الباقيين

كلنا قطر 1981

31-03-2012, 01:23 PM

انا مع التقاليد

الي يبي يسلبس تقليد كيفه و الي يبي الاصلي بعد كيفه بس لولا وجود التقليد كان طارت اسعار

الاصلي سما و الاثنين يقومون بنفس الوظيفه انا مع التقليد بكل شي الا شيئن بس الي هم

النظاره الشمسيه عشان العين غاليه و التقليد يضرها و الجوتي الله يكرمكم او النعال لانه

بيعور القدم استخدامه ولكن بالنسبه للملابس او الاشياء الثانيه اشوف انه التقليد يعطي

الانسان فرصه انه يغير و يبدل و يشكل في ملابسه و كشخته لانه الي اعرفه انه لكل لبس او

اكسسوارات يكون لها موديل يعني في ملابس سواء رجاليه او نسائيه للفصيف او للشتاء او

موضه 2010 و 2011 تخلتف و هكذا فا الاصلي بسبب سعره الغالي ما يخلي الانسان قادر

على التغير الدايم و العكس صحيح و ان كان على مبدأ الي ما عنده ما يلزمخ انه يشتري

عيل بقول اتمنى انه هالمبدأ يكون حق كل شي مب بس في الكشخه لانه بعد السيارات الي ما

عنده كاش يشتري فيه موتر خله يشتري موتر على قد نفسه احسن من انه ياخذ موتر اقساط

و لا في السيارات رائي ثاني ؟؟؟:)

الزلزال

31-03-2012, 01:31 PM

كل واحد على حسب مزانيته
أتنوع زين حتا لو كان تقليد
فيه ناس ماتقدر تشتري الاصلي فليش نحرمهم ؟؟
وهذا شي ايجابي مش سلبي
واناس واعيه اتعرف الاصل من التقليد
تحياتي

khaldoon

31-03-2012, 01:32 PM

لو المحل مصرح انه ببيع بضاعة مقلده و يعترف انها مب اصليه و جودتها كبيره و سعرها مناسب و عليها ضمان فما اشوف فيها شي

مع اني ما احب اشتري شي مقلد

بورش2008

31-03-2012, 04:06 PM

اراء وايد حلوه وننتظر المزيد من الاخوان الكرام

khaldoon

31-03-2012, 04:15 PM

الحين يا اخوي لو جاك المقاول و قالك هذه بضاعة صينية اصلية مب اوروبي تقليد خخخ و اعطيك نفس الضمان و بعدد السنوات اللي يعطيك اياها المنتج الاوروبي و ما تتغير خصائص هالمنتج من ناحية فيزيائية و كيميائية و ما في عندك بالمواصفات الخاصة بالمشروع الزام المقاول انه يجيب المنتج من بلد معين و المشروع value engineering فراح تقبل و الا ترفض؟!!!

MAZEN37

31-03-2012, 04:23 PM

ان كان سؤالك على قانونية العرض بالمنتدى فسؤالك للاداره في المنتدى وننتظر جوابهم
وان كان راءي الجمهور فانا ضد اي شيء تقليد لسببين
اولا هضم حقوق الشركات الاصليه واستغلال منتجها
ثانيا لرداءة التتصنيع والغش بالجوده

بورش2008

01-04-2012, 01:04 AM

يسلمواااااااااااااا للكل وننتظر وصراحه الاراء حلوة ومختلفة

بورش2008

01-04-2012, 05:15 AM

ننتظرررررر المزززززززيد

ام السعف

01-04-2012, 06:08 AM

ما عندي مشاكل .....> خاصة اني ما اركض وراها

وحكم بيعها يتحمله التاجر نفسه
لكن بنفس الوقت ممكن اروج لها للي يبي يشتريها ....> بس ما ادري عن حكم الترويج لها ،،

Scout Sniper

01-04-2012, 08:19 AM

مع
بشرط التمييز

مرتبش

01-04-2012, 01:22 PM

ترى
في ادوية تقليد واجهزة كهربائية تقليد وقطع غيار
وهذي مافيها غشمرة ..

كازانوفا

01-04-2012, 01:46 PM

برائي يكون في تقليد لان مش الكل يقدر على الاصلي والماركه

ام السعف

01-04-2012, 02:32 PM

ترى
في ادوية تقليد واجهزة كهربائية تقليد وقطع غيار
وهذي مافيها غشمرة ..

كل شي في منه التقليد بالفعل كلامك صح ،،

بس الأهم الأدوية التقليد الواحد يبتعد عنها لأنها مضرة
وتؤدي الى المهلكة،،
واحنا نطمح الى ان السلام والصحة يعمان ارجاء المعمورة :shy:

khaldoon

01-04-2012, 02:36 PM

ترى
في ادوية تقليد واجهزة كهربائية تقليد وقطع غيار
وهذي مافيها غشمرة ..

يا اخوي خايف اروح الصين يسووا واحد مثلي بس بدون ضمان لو فرط

قطريه أصيله

01-04-2012, 02:37 PM

إذا التقليد في حدود الملابس والاحذيه والامتعه والشناط انا مع هالشي

لكن يقولك تقليد ادويه واشياء فيها حياه او موت لا طبعاً ضد ضد ضد وبقوه

ام السعف

01-04-2012, 02:42 PM

يا اخوي خايف اروح الصين يسووا واحد مثلي بس بدون ضمان لو فرط

تدري يا خلدون

الصينين لما بيقلدون درجة التقليد تختلف بأختلاف المواد الداخلة في الشي اللي بيقلدونه

تلقى الساعة مثلا ما ينقصها شي ابدا ،، الا برغي واحد مب محترم فيه
وما تدري هالبرغي اشكثر وفر عليهم مبالغ :telephone:

فتحمل تروح الصين ويسون منك نسخة بس مع برغي مضروب :weeping:

بوحارب

01-04-2012, 04:48 PM

مع البيع وبقوة وش فيه التقليد زين وجودة ؤرخيص

مب الكل يقدر يشتري الأصلي وخل عنك الهياط ياللي في بالي هههههههههههههههه:eek5:

بورش2008

02-04-2012, 12:10 AM

يسلموااااااااااا للكل واراء حلوة

ريم 28

02-04-2012, 12:26 AM

انا وجهة نظري ان الذي لا يستطيع شراء الماركه الاصليه فلماذا يلجا الى الماركه المقلده لما ليشتري ماركه اخرى وبسعر اقل وسيجد الكثير والكثير بنفس سعر المقلد

ولكن ما هو الهدف لديه غير ان يخدع الناس بان الماركه اصليه وانه دفع فيه المبلغ ......

الافضل ان لا يلجا للتقليد طالما لا يستطيع شراء الاصليه

الاصلي اصلي والتقليد تقليد

بورش2008

02-04-2012, 01:27 AM

ريماس انا معاك وبقوة في الراي

كبشينو

02-04-2012, 02:13 AM

انا اشوف شي طبيعي وبالعكس احسن بعد ادا انت تقدر تاخذ لاصلي غيرك مايقدر والدين ماحرم لان بس علشان اسمه ماركه .... على ماعتقد في تلفونات واجهزه صينيه ليش الشرع ماحرمهم مثل اي فون واي باد طيب يعتبر صناعه صينيه ودرجه اولى ؟؟

khaldoon

02-04-2012, 06:46 AM

تدري يا خلدون

الصينين لما بيقلدون درجة التقليد تختلف بأختلاف المواد الداخلة في الشي اللي بيقلدونه

تلقى الساعة مثلا ما ينقصها شي ابدا ،، الا برغي واحد مب محترم فيه
وما تدري هالبرغي اشكثر وفر عليهم مبالغ :telephone:

فتحمل تروح الصين ويسون منك نسخة بس مع برغي مضروب :weeping:

فعلا كلامك صحيح 100% و اتفق تماما معاكي .... بالصين تختلف درجة التقليد بسعر المنتج ....يعني مب كل البضاعة الصينية تعبانه بل بالعكس....في بضاعة ممتازة بس المشكله اغلب اللي يجينا هو التعبان لان التجار اللي يجيبون من الصين ما يبون يدفعون مبالغ كبيره و الا ما راح يقدرون يسوقون بضاعتهم لانه معروف انه البضاعة الصينيه بشكل عام low quality

باختصار كم تدفع بالصين بتحصل على المنتج الراقي و الزين

الصين هي مصنع العالم فكيف كل بضاعتها راح تكون low quality ....مستحيل

بخصوص البرغي المضروب ...انا بتفق معاهم بالاول ايش الشي اللي ما راح يركبونه من براغي و اكسسوارات و باخذ لسته فيه و بكمله من بره....ما تنسي انه في سكراب و في محلات ثانية و في تجاري:tease:

رجوان

02-04-2012, 10:32 AM

مع لانه ناس تقدر تشتري كل شهر ماركه اصليه لكن في ناس ماعندها القدرة

بلوتنيوم

02-04-2012, 10:38 AM

هالكلام صحيح

بعض الأثرياء لهم سياسه خاصه في هالموضوع

قصه واقعيه

يسولف علي واحد من الربع ، يقول كنا مسافرين مجموعة شباب ومعنا واحد من الأثرياء ولابس ساعة ماركه معروفه وغاليه ، يقول واحد من الربع حالته لا بأس بها لكن مهوب ثري بس وضعه تمام ولابس ساعه نفس ماركة ساعة الثري بس اصليه ومتكلف عليها

ركز الأخ اللي حالته جيده على ساعة الثري واكتشف انها تقليد ، قاله يافلان ترى غشوك ، ساعتك تقليد ، طالعة الثري وابتسم له وصد عنه ، يقول توقعنا كلنا بأن الثري كان يبتسم ابتسامة استهزاء ، وكرر الأخ كلامه للثري اكثر من مره ، يقول فجأه انفجر الثري على الرجال

قاله أنا معروف اني فلان الفلاني وأني املك ثروه ، لو لبست ساعه تقليد مهوب قايلين ان ساعتي تقليد لأن الكل يعرف وضعي المادي عدل ، لكن انت انا ادري ان ساعتك اصليه ، لكن الأغلبيه يعرفون وضعك المادي بأنه عادي ، تتوقع بيقولون ان ساعتك اصليه !!؟

تتوقع لو بيشوفوني انا وياك بيقولون ساعتي تقليد وساعتك انت اصليه :)

يقول سكت الرجال ولا عاد قال برررم :secret:

ههههههههههههه
هذا الى حالته لا باس فيها لازم يجيب حق نفسه الكلام :secret:

بورش2008

03-04-2012, 12:07 AM

ههههههه نقاش حلو بعد نبي راي الكل في الموضوع

بورش2008

03-04-2012, 07:24 AM

صباح الورد والنور

ام السعف

03-04-2012, 07:25 AM

صباح الورد والنور

صباح التقليد للي ما عنده للأصلي :nice:

قطرية كشخه

03-04-2012, 11:13 AM

اكيد ضد التقليد اقووووى شي

لانه ببساطه يبين انه تقليد وحتى لو كان درجه اولى انت من داخلك ما تكون راضي ولا مرتاح من التقليد !

لان مع الوقت بينفضح امره وبتطلع حقيقته المزيفه فضلا عن انه نوع من انواع الغش :eek5:

" من غشنا فليس منا " :victory:

بورش2008

03-04-2012, 07:51 PM

قطريه كشخه يسلموا وانا معاج في الرااي وننتظر المزيد

QTR93

03-04-2012, 08:55 PM

بخصوص الي قاعدين يفسرون نوايا الناس ع كيفهم و يقولون ان الي يلبسون التقليد يبون يخدعون الناس:omen2:، ترى لو حد يبي يفوشر ولا يروي الناس انه لابس ماركة ما بيلبس التقليد و يفضح عمره لأن أصحاب الماركات و أغلب الناس صارت تميز التقليد من الأصلي، و هاذا يدل على ان أغلب الي يلبسون التقليد يلبسونه حق نفسهم و لأنهم محتاجينه و ما هموهم الي حولهم .. أما (بعض) الي يشترون الأصلي الغالي معنه في بديل بجوده زينه هم الي ممكن نقول عنهم يبون يستعرضون.. أستغرب من البعض الي يبون الخيارات -شي- أو -لا شي- مافي وسط!:rolleyes2:
أنا عن نفسي مع، بس طبعاً في أشياء معينة أجوف ان الاحسن نتجنب فيها التقليد:)

بورش2008

03-04-2012, 08:56 PM

يسلمواqtr93 ورايك على راسنا

QTR93

03-04-2012, 08:58 PM

و لو صج اصحاب الشركات مب راضين عن الي يقلدونهم جاان من زمان وقف بيع التقليد في كل هالبلدان ولا ما عندهم لسان يدافعون عن حقهم.

بورش2008

06-04-2012, 07:16 PM

يسلموا للكل ونبي مزيد من الاراء

تحداني

06-04-2012, 09:11 PM

" مع " في ناس تلبس لذوقها .. ولنفسها
وفي ناس تلبس للناس وللزبو ولإتعاب النفس بالنظر لهذا وذاك
وفي الي عنده خير والله منعم عليه و500 الف ولا 900 الف ولا شي في حساباته ما يرضى بالتقليد ابدا

حر الشخص يلبس اصلي ولا يلبس تقليد
انا شفت " احلام المطربه " في المعرض التجاري خمت اكسسوارات الركن التركي خم وكانت اتصور مع الناس .. والله لو إلبست شي واحد من هالاشياء كان قالوا "ااااالله مليان ألماس "

خلوا الناس ابراحتهم

جملكم الله برضاه

بورش2008

06-04-2012, 09:33 PM

يسلموااااااااااااا تحداني الزمن

ريم 28

07-04-2012, 12:53 AM

حدث العاقل بما يعقل

كيف الواحد يشتري تقليد ماركه علىى اساس ذوقه ويدري انه تقليد ويدري ان يبين عليه غريبه الصراحه

انا كل اللي حواليني يدورن الدرجه الاولى واحسن من الدرجه الاولى علشان ما يبين انه تقليد

وموضوع الذوق بعيد جدا جدا من منا ذوقه ان يكشخ بتقليد

اليس الدرجه الاولى غاليه ايضا

اليس الشنطه الدرجه الاولى في الصين ب200 وتباع لدينا ب1200
1200 اجيب لها احلى شنطتين ومب تقليد ومب شرط ماركه ايضا

باختصار ان كان حب التكشخ بالتقليد وان عادي الناس يدرون ان تقليد فليما يتم البحث عن الدرجه الاولى حتى لا يكون فرق بين الاصلي والتقليد

ان كنت استغرب من الذي يشتري شنطه مبالغ في سعرها استغرب اكثر من اللي يشتري تقليد ويخدع وينخدع

بورش2008

12-04-2012, 10:16 PM

يسلموا ريماس وننتظر المزيد

fhd4

12-04-2012, 11:00 PM

ضـــــد

بوNasser

13-04-2012, 08:27 AM

السلام عليكم ورحمة الله

سين سؤال:

على فرض ان فيه ساعة اجنر وعاجبني شكلها، بس ما اقدر اشتريها بسبب السعر
هل احرم نفسي واخليها في خاطري لو حصلت مثلها تقليد، بس علشان الناس ما يقولون لابس ساعة تقليد ؟؟؟؟؟ والا اكشخ بالتقليد و ومالي شغل بأحد؟؟؟

الناس نوعين ، فيه ناس تلبس لنفسها وللكشخة وفيه ناس تلبس للناس والزبو والمفوشر، وهذا الكلام ينطبق على الاثنين اللي يشتري اصلي واللي يشتري تقليد.

الخلاصة اهم شي اني اعرف الشي اللي اشتريه هل هو اصلي او تقليد ، يعني محد يغشني، والباقي يرجع لاختياري ومالي شغل بالناس.

تحياتي للجميع