مصرف قطر الاسلامي وببطئ تخليص المعاملات

[الـهاجري]

السلام عليكم ورحمه الله وبركاته


صبحكم الله بالخير



اليوم ابي اثير نقطة عانيت منها وهدفي الاول من أثاره النقطة ان يرتقي المصرف بانجاز المعاملات في أسرع وقت لأرضاء العميل.


أنا من عملاء المصرف منذ سنة 2003 وللأسف في الفترة الحالية أذا مريت مصرف قطر الإسلامي فرع الريان او فرع الستي او السد او الغرافة لإجراء أي معامله سواء كانت إيداع أو سحب نقدي من موظف الكاشير أو أي معاملة عن طريق خدمة العملاء للأسف تاخذ من وقتك على الاقل ساعه أذا ما طالت المده.


سؤالي الحين مصرف قطر الإسلامي تم تأسيسه سنة 1982 يعني صار له في قطر 30 سنة يعني جذب اكثر أهل قطر بما أنه من أوائل المصارف الاسلامية في قطر ويوجد لديه 29 فرع فقط يعني نقدر نقول أنه كل سنه يفتح فرع واحد فقط، أما من الجانب الاخر فمصرف الريان اللي هو مصرف في بداياتة تأسس سنه 2006 يعني ما صار له 6 سنين وعنده 10 أفرع والمعاملة عنده مهما كانت ما تاخذ من وقتك نص ساعه بالكثير.



سؤالي الحين الى مجلس أداره مصرف قطر الإسلامي والمسؤلين هناك فلوسكم وأستثمارتكم الداخلية والخارجية ليش ما تكبرون أفرعكم وتزيدون موظفينكم؟




ليش ما يكون الموظف ينتظر العميل بدلا من أنه العميل ينتظر الموظف؟


أتمنى أنه يتطور المصرف ويكون فعلا من أحسن المصارف في قطر ويكون في تنافس بين المصارف الاسلاميه كلها في قطر.

[Rider]

كلام صحيح 100 %

[فويرط]

انا معاك اخوي في كل شي قلته

أتمنى لهم الافضل دائماً

وشهادة لله ، انا اشوف عندهم ميزه حلوه ،
انك اذا بغيت تسحب فلوس او إيداع ، على طول تروح الصندوق وتسحب او تودع فلوس ، بدون ورقة ، اما في بعض البنوك لازم تعبي ورقة قبل لاتروح ، وهذه الميزة احس فيها لما ازور البنوك الثانية مع أحد الاصدقاء او يكون عندي شيك مسحوب على بنك آخر غير المصرف ، وانا واحد من عملاء المصرف

وبصراحة مواعيد المصرف فرع الستي وايد ممتازة

من 9 لين 2.30
ومن 3.30 لين 9

والجمعة بعد يفتح من 4 لين 9

واتمنى للفروع الثانية يداومون مثل اوقات الستي ، او فتح فروع ثانية في المجمعات بنفس أوقات فرع الستي سنتر

وإلى الامام دائماً يالمصرف

[سهم طايش]

الله يرحم ايامك يا البنك التجاري

يا ليته مهب ربوي

يعاملونك يا دهينه لا تنكتين بكل رقي و احترام و اذا كنت من فئة الصدارة ما تنتظر الدور

من نقلت المصرف عن الحلال و الحرام و الله متلته وياهم و الدولي اردى منه

[سهم طايش]

ليش ارتبط سوء الاداء بالبنوك الاسلامية ؟؟؟

[تاجر كشخة]

انا اقولكم ليش وهااااي عن تجربه في ناس وايد تشجح دورها يعني وحد صار له ساعه ينطر رقمه يجي ويجيك واحد على طول من برع وياخذ دور غيره والموضفين الله يهديهم يستحون يطلبه الرقم علشان يتاكدون انه هاي دوره ولا لاء واذا ماحد مصدقني يروح فرع الريان ويجلس على الكراسي ويراقب الناس يعني العيب من الناس

[qatara]

وغير ذالك الكول سنتر

خدمة العملاء

كان في السابق تتعامل ويرد عليك الكمبيوتر في التحويل بين الحسابات
او سداد فواتير الهاتف وكانت الخدمه جيده جدا


الان الغي التعامل مع الرد الالى الكمبيوتر واصبح التعامل مع الموظف
والغي تسديد فواتيرالهاتف ووووو

بصراحه تراجعت بعض خدماته المميزه

[bo_s3ood]

عندهم مميزات وعندهم سلبيات

ليتهم بس يطورون خدمة النت عندهم

سالفه عشان تسجل فيها وتفعل صار لي اسبوع كل يوم ادور لي رقم احطه باسورد

ولا براضي يقبل وطنشته

ياريت يسون مثل البنك الوطني او البنوك الاخرى عندهم خدمة النت سهله وفي المصرف تطلع عينك بس عشان تسوي باسورد

[qatari 111]

هذا هو عيب المصرف قلة عدد الموظفين .. المفروض لكل خدمة يكون فيها مب اقل من 5 موظفين

واتمنى يوصل الموضوع لمجلس الادارة المصرف الاسلامي

[الروقي]

صار اخس بنك في قطر تاخير وتسيب ولاتخلص كثير من المعاملات الا بعد الزور وخاصة فرع سلوى اخس فرع تجي تبي تستلم البطاقه الي المفروض ماياخذ 5 دقايق لازم تاخذ رقم اخر مره طلع القم 65 يعني ساعه او ساعه ونص لازم انتظر وكل مره كذا يعني تعيس بمعنى الكلمه
انا طلبت منهم فيزا وحسابي عندهم من 30 سنه تصدقون طلبوا مني شهادة راتب وانا راتبي عندهم يتحول من اول ماافتحو يعني من 30 سنه ماعندهم تقدير للعميل ابدا ومره واحد من الموظفين في فرع سلوى غير قطري تجرا وتكلم علي واشتكيت عليه ولاعبروني وحاولت اكثر من مره اني انقل حسابي منه ولكن للاسف يرفضون طلبي لان علي اقساط بس ان شاء الله اول ماتخلص الاقساط بانقل حسابي منه
خدماته كل يوم ترجع للوراء

[قرنقووش]

اي والله ياخوي يأخرون البني ادم ساعه .. لا ولين يوصل رقمك تلقى واحد قاعد مكانك مادري مزرق من وين .. والموظف يخلص له بعد :s

ياليت يسوون خدمه مصرفيه على الايفون عن طريق برنامج .. التجاري والوطني عندهم هالبرامج .. ويقولون ليش الناس تتجه للبنوك الربويه
البنوك الإسلامية مب راضيه تطور من مستواها وتواكب التطور والتكنلوجيا
هذا مب عذر عشان اروح بنك ربوي .. لكن فعلا محتاجين يرقون من مستوى الخدمه .. لين متى اوقف طابور شطوله

[م. عبدالعزيز]

المصرف أفضل البنوك لكن عيبه واحد وهو قلة فروعه مقارنة بالناس اللي يجونه

المفروض تكون فروعه أكثر من فروع الوطني وتكون موزعه بطريقة معقوله، مثلا فرع طريق سلوى ما في حوله ولا فرع آخر للمصرف ، المفروض مثلا يفتحون فرع في السيلية او بوهامور او الوعب او فيلاجيو علشان تخفف الضغط على فرع سلوى...

او يزيدون عدد الموظفين في خدمه العملاء والصرافين علشان يخلصون الاجراءات بسرعه
الوطني حاليا فروعهم موزعه بطريقة ممتازه

بالنسبه لأحد الردود عن خدمه الانترنت، اعتقد زمان كان التسجيل يحتاج باسورد من الفرع اما الحين ببطاقة الصراف تقدر تسجل، وعلى الكول سنتر حاليا الخدمه موجوده وما انشالت وأقدر استخدم خدمات الهاتف المصرفي بدون اي مشكله...

[.خالد]

المصرف له حق يسوي ما بدا له ، دام انه بدون منافس خصوصا بعد اغلاق البنوك السلامية الاربعة

[ANONYMOUS]

المصرف من افضل البنوك

بس يبي له يتطور حبتين .. ترا عادي لو يشوفون ايش تقدم البنوك الأخرى ويقلدونهم

حتى لو بنوك اوروبيه واسيويه طابعا في اطار الشرع اقصد الخدمات والكاستمر سيرفيس

اعتقد يحتاجون لموظفين واصحاب قرار اكثر جرأه للتطوير للأفضل

[qatara]

كانت خدماته متطوره وسابقه للبنوك الاخرى

لاكن كل فتره يتراجع للخلف وخاصه بخدمة الهاتف المصرفي وتعقيد الانتر نت البنكي

[الخزرجي قطر]

كلامك صحيح ولاغبار عليه
خدمات المصرف بطيئه جدا
المنافس الحالي مصرف الريان

[ms-qtr]

ذكرتني بمعاناة فرع الدوحة الديثة قسم النساء
الفرع صغير وما فيه غير ثلاث موظفات وحده تخلص اشغال الناس ووحده استقبال ومسؤولتهم
والحريم يتكدسون على هالموظفة المسكينة
لازم يا يفتحون افرع زياده او يزيدون عدد الموظفين

[قطري 55]

بالفعل حتى سلفية سيارة معاملاتهاا تمت عندهم فوق الشهر هذا في فرع الستي !!!!!

الشكوى لله

[لمعة الالماس]

هو كل شي تمام

الا خدمة الانترنت بصراحه تسجيل الدخول معقد

[ضوى]

بأمانة والله ماعمري تعطلت معاهم بشي

[ضوى]

هو كل شي تمام

الا خدمة الانترنت بصراحه تسجيل الدخول معقد

معاج حق

معقدة وايد وخليتها تولي

[الـراسي]

ليش ارتبط سوء الاداء بالبنوك الاسلامية ؟؟؟

لقلة الناس ولله الحمد في البنوك الربويه

[khalid Qtr]

تعتمد على الفرع

للاسف فرع سلوى ومعيذر انتظر عندهم مدة طويلة

الريان سريع سريع

[الـراسي]

انا والله من عملاء المصرف من سنة 2004 لين 2011

وبعدين طلعت من المصرف ورحت لمصرف الريان لعدة اسباب منها :

1- سوء الخدمة للعملاء.
2- قلة المواقف فرع الريان اقرب شي عندي
3- التأخير في المعاملات.

والحين انا في مصرف الريان راحة نفسية لأبعد الحدود

اهم شي عندي خدمة العميل وراحته

فرع وذنان فاتح من 9 الصبح الى 9 بالليل

وعنده 10 فروع والسنه هذي بيفتحون كذا فرع

مع انه بنك جديد

[الـقـاسـي]

عيب المصرف قله فروعه المفروض في كل مطقه عندهم فرع على الاقل ومايكون فرع صغير لازم يكون فرع كبير ..

انا اتعامل وياهم من سنين طويله بس ماقدرت اخلي راتبي يطول وهو ينزل عندهم نقلت على بنك قطر الوطني الاسلامي وحسيت فعلا بالفرق وبعد ماسكروه نقلت على مصرف الريان ولا اروع بصراحه ..

المصرف اذا ماتعرف موظف فيه ولا امورك ماتمشي كلش ..

انا اتمنى انقل للمصرف لكن على وضعه الحالي مستحيل ,, لما تصير خدماتهم بنفس جوده مصرف الريان اللي ماصار له كم سنه ذاك الوقت بنقل لهم ..

[الموضوعي]

المصرف بنك زاهد في تعامله مع العملاء وكأنه يقول العملاء شوفوا اللوحة برى مكتوب مصرف قطر الإســــــــــــــلامــــــــــــي يعني الحق معنا احنا بس واللي مب عاجبه يطق راسه في الطوفة عقلية من يعتقد انه معه الحق المطلق في التعامل مع الاخرين اللي الباطل معاهم

[Hamad-7]

كلامك صحيح 100%

انا صرت اكره اروح المصرف بسبة الزحممممه
والله العالم ينطرون عند الباب من الساعه 4 ونص قبل لايفتح بعد
وضرب مضارب ولين يجيك الدور خلاص يكون وقتهم خلص 7 ونص

[BUHASSEN]

والله المصرف مشاكله مشاكل ان خدمه العملاء بالتلفون يرفعون ضغطي

اذا بغيت شي كل موظف يكون عنده رد

قبل كم يوم رفعت اللمت مال الفيزا اتصلت الموظف قالي مايصير قلتله اوكي صكرت واتصلت مره ثانيه ارفعولي اياه بدون اي مشكله

والله حاله خدمه رايحه فيها

[الزلزال]

سبحان الله

[ANONYMOUS]

المصرف من افضل البنوك

بس يبي له يتطور حبتين .. ترا عادي لو يشوفون ايش تقدم البنوك الأخرى ويقلدونهم

حتى لو بنوك اوروبيه واسيويه طابعا في اطار الشرع اقصد الخدمات والكاستمر سيرفيس

اعتقد يحتاجون لموظفين واصحاب قرار اكثر جرأه للتطوير للأفضل



اسحب كلامي اللي بالاحمر

سقط من اول اختبار


سلام عليكم

[مبتدئة]

العيب اللي أشوفه في المصرف هو الكسافه -_-

بمعني،، اغلب فروعهم حدّه بدّه

أول ما فتحوا فرع السيتي مسويينه قرقوووور !! بـ موظِفين بس!

وله بابين وناس قاعدين داخل ومافي مكان نوقف حق المعاملة..

وساعات يفتحون بس باب واحد ومكينة الأرقام ما تشتغل ويوصل الطابور لين بره

وتصير الذبحة

استبشرنا لما كبروه .. بس بعد صغير .. 2 كاشير و 2 عملاء !! ليش!!!

فرع الدفنة الحديثة قسم الحريم نتفه! موظفة 1 كاشير و 1 عملاء !! شدعوة


ليييييييش هالكسافة .. الحمدلله ربي مبارك لكم .. وسعوا على العملاء

[O N E]

الصراحة أحسن ما فيه هو إسمه

أما الخدمات منتهية بل منتهية الصلاحية

وبدائي جداً جداً ، حتى معاملة الموظفيين للعملاء بخياس نفس

كأن الواحد يطر منهم !


تجربة عملية:

أنا عندي حساب في بنك قطر الوطني

وأيضاً حساب في مصرف قطر الإسلامي

جربت أسوي معاملة في كلا البنكيين على حده وهي عملية تحويل مبلغ


المعاملة في بنك قطر الوطني لم تأخذ مني مع الإنتظار سوى 5 يمكن أقل بعد

وطلعت وأنا مرتاح


وفي مصرف قطر الإسلامي أخذت مني ساعة ونصف وطلعت وأنا منرفز


بنهاية الأمر قررت إغلاق حسابي بمصرف قطر الإسلامي بلا عودة

[رذاذ]

الزين والله فنشوه وانهو خدماته ..
اعرف لي مدير بالمصرف سابقا جدا راقي بتعامله وسهل بسياسته بس للأسف اخر مره اتصلت سالت عنه قالوا لي انهيت خدماته .
محمود نجم

[محمد]

واضح من جميع الردود .. ان المصرف مشكلته تتلخص في " غباء " في التعامل مع الزباين ..

انا صارلي اكثر من سنتين في الدولي الاسلامي .. والي قد يجمع الكل انه اسوء من المصرف او في نفس مستواه .. لكن مع هذا ما اقدر اذمه !!

لان ببساطة ما واجهت مشكلة وياهم من قبل .. ولا احتجت اروح فروعهم ولا اي شي ثاني .. لسبب بسيط .. انهم تعاملوا مع العملاء بـ "قليل" من الذكاء ..

اعرفوا حجمهم .. وان فروعهم قليلة "15 فرع اظن " وان عملاءهم عددهم كبير جدا فهم ثاني بنك اسلامي في قطر .. فاعتمدوا على نظامهم الي في النت !

اول شي سووه ان التسجيل فيه سهل جدا ولا ياخذ حتى دقيقتين تحط رقم الاي تي ام والبن كود وتسويلك اشتراك وتدخل على حساباتك .. وبعد انشاء الحساب .. مبروك عليك .. ما راح تحتاج للبنك اصلا ولا راح تحتاج تتصل فيهم ولا تروح لهم ..

لان ببساطة خدمة النت عندهم تقدر تسوي فيها كل الخدمات الي تحتاجها .. لدرجة ان حتى بياناتك في البنك من رقم تلفون و صندوق بريد تقدر تغيرها من النت ! .. تقدر تطلب رفع سقف فيزا من النت .. تقدر تقدم على فيزا جديدة من النت .. تقدر تشيك لو عندك اي سلفيه عندهم شنو وضعها وكم قسط باقي ومتى تنتهي وكم المبلغ المتبقي .. تحويلات بين الحسابات بكل سهولة ..كل شي تقدر تسويه من حسابك الخاص .. بالتالي ما راح تحتاج تروح لفروعهم اصلا ..

ايضا اضافوا من كم شهر دفع الفواتير الي حسب ماعرف ان المصرف وقفها ..

شهادة حق تقال ايضاً .. الدولي كانوا يعانون جدا من خدمة الكول سنتر كانت سيئة بامتياز .. جنك متصل على معصرة يرن محد يشيله .. لكن مؤخرا غيروا السستم بالكامل و ردهم صار سريع جداً ..

الخلاصة .. احنا حالياً في عصر التكنولوجيا .. و البنك الذكي هو البنك الي يعرف اشلون يقلل الاعتماد على فروعه .. الدولي انا مقتنع انه بنك سيء كخدمة .. لكن خدمة النت تخليني اقول والله اني مرتاح عندهم ولا واجهت معاهم مشاكل .. هالمشاكل بواجها طبعا لو توقفت خدمة النت :tease:

[الزعفراني]

كلامك صحيح أخوي ، ومن صور التأخير عندهم أو سوء التعامل في تنفيذ الإجراءات الخاصة بالعميل التالي :

انتهت صلاحية بطاقة الصراف الآلي ولما حان موعد التجديد يطرشون لك مسج عشان تراجع فرع فنار اللي صوب سوق واقف وفقط خلال الايام من الاحد لين الاربعاء وفقط من 4 لين 8 المساء !!!!!!!!

يعني البطاقة ذي الله يرحم كانت اتسلم للعميل وهو في مكتبه في الدوام مع موظف البريد الممتاز .

الناس اتقدم في الاجراءات والتنفيذ وهذيلا يتأخرون للخلف .

[ANONYMOUS]

العيب اللي أشوفه في المصرف هو الكسافه -_-

بمعني،، اغلب فروعهم حدّه بدّه

أول ما فتحوا فرع السيتي مسويينه قرقوووور !! بـ موظِفين بس!

وله بابين وناس قاعدين داخل ومافي مكان نوقف حق المعاملة..

وساعات يفتحون بس باب واحد ومكينة الأرقام ما تشتغل ويوصل الطابور لين بره

وتصير الذبحة

استبشرنا لما كبروه .. بس بعد صغير .. 2 كاشير و 2 عملاء !! ليش!!!

فرع الدفنة الحديثة قسم الحريم نتفه! موظفة 1 كاشير و 1 عملاء !! شدعوة


ليييييييش هالكسافة .. الحمدلله ربي مبارك لكم .. وسعوا على العملاء




تقصد البخل

الصراحه مش عارف وش يسوون بالارباح


سوبرماركت السعوديه اللي هو سوبرماركت السعوديه تطور وهذيلا البخل ذابحهم مايبون يصرفون على التطوير

[ANONYMOUS]

كلامك صحيح أخوي ، ومن صور التأخير عندهم أو سوء التعامل في تنفيذ الإجراءات الخاصة بالعميل التالي :

انتهت صلاحية بطاقة الصراف الآلي ولما حان موعد التجديد يطرشون لك مسج عشان تراجع فرع فنار اللي صوب سوق واقف وفقط خلال الايام من الاحد لين الاربعاء وفقط من 4 لين 8 المساء !!!!!!!!

يعني البطاقة ذي الله يرحم كانت اتسلم للعميل وهو في مكتبه في الدوام مع موظف البريد الممتاز .

الناس اتقدم في الاجراءات والتنفيذ وهذيلا يتأخرون للخلف .




هذي بروحها حكايه من الف ليله وليله

[" فـارس قـطر "]

يازين مصرف الريان بس والله
وجاري نقل الحساب من المصرف الاسلامي الى مصرف الريان

[مواقف النجادة]

الخدمات الالكترونية عندهم سيئة جدا جدا جدا

ما يعلنون عن خدمة الكترونية الا واشترك فيها .. واكتشف بعد التجربة انها مليئة بالعيوب وغير قابلة للتطبيق.

عندي حسابات في بنوك اخرى و خدماتهم عبر النت سلسة و مافيها اي عقد .. الا المصرف .. عمري ما استفدت من خدماتهم عبر النت.

نصيحة يا ادارة المصرف ..

انقلوا موظفين قسم تكنولوجيا المعلومات عندكم الى اعمال اخرى.. و جيبوا ناس تفهم.

[┋أَجِوَدًيّ┋]

امحق بنك الواحد يدخله كأنه في العصر الحجري

أحسن ما فيه إسمه بس

[LiL iNVe$ToR]

يازين مصرف الريان بس والله
وجاري نقل الحساب من المصرف الاسلامي الى مصرف الريان

+ مع مصرف الريان :)

من بعد اغلاق الوطني الاسلامي عملت بحث عن مصرف/بنك اسلامي يقدم خدمات نفس الوطني او قريب منه، ومريت البنوك شخصياً وسالت عن كل كبيره وصغيره.

فالاخير مصرف الريان نال على رضاي وصرت عميلهم ومرتاح معاهم اخر راحه.

[Abdullah_89]

انا من رايي في خدمه العملاء احسن 3 بنوك في قطر هي

الوطني - التجاري - الدولي الأسلامي

اما في سرعه المعاملات وعن تجربه شخصيه :


التجاري - مصرف الريان - بنك بروه (ماجربت الوطني الا في سحوبات الشيكات وماكانت تاخذ معاي وقت )


اما بالنسبه للدوامات المسائيه فكل البنوك تداوم مساءا من 3 الى 9

واللي برع المجمعات اعتقد من 5 - 8

جربت مصرف قطر الاسلامي فرع الشافي سحبت رقم عشان اسوي ايداع في الحساب ووقف تقريبا اكثر من ساعه ونص وآخر شي موظفين في الكاشير مو ملحقين

[Laffan]

السلام عليكم ومبروك عليكم الشهر مقدماً

انا من عملاء مصرف قطر الاسلامي من سنة 2003و وفعلا اغلب الملاحظات ألي وردت بهاي الموضوع صحيحة, وضع المصرف من اسوأ الى أسوأ.

ملاحظة: طرشت لينك الموضوع على ايميل الشكاوي مال المصرف بالاضافه الى ايميل الكول سنتر, اتوقع كل الملاحظات راح يقرونها وان شاءالله عاد يطورنها.

انزين خلونا نعطي اقتراحات لتطوير مصرف قطر الاسلامي او انت/انتي كعميل بمصرف قطر الاسلامي وين تشوف التقصير او الشي ألي يبيله تطوير. من وجهة نظري المتواضعة:

1) تطوير خدمة المسجات مالت الفيزا في حالة الخصم يجيك مسج بس اذا ردوا المبلغ بحسابك مايجيك مسج لازم تتصل عشان تتأكد :telephone:
2) يسون ابلكيشن حق التلفونات الذكية اسوة بباقي البنوك المطورة.
3) تدريب وتأهيل موظفين الكول سنتر, كل واحد يعطيك معلومة متناقضة عن الثانيةcrazy
4) زيادة عدد فروع المصرف بالذات في المجمعات التجارية.
5) زيادة عدد فروع المصرف في الفترة المسائية.
6) تطوير خدمة الانترنت البنكي واضافة خدمات جديدة تسهل على العميل مثل زيادة لمت الفيزا او تنزيل اللمت.
7) زيادة عدد ماكينات الصراف الآلي للايداع سواء كاش او جيك.
8) توفير خدمة الحصول على جيك بنكي عن طريق مكينة الصراف الألي.
هاذي بعض المقترحات وكل واحد يدلو بدلوه.. وان شاءالله يفهمون ويطورون ولا ترى البنوك الثانية مشرعه بيبانها.