مطلوب مقاول لبناء نص طابق ثاني رخيص

[kaafy]

سلام عليكم ورحمه الله وبركاته

ابغي احد يعرف لي مقاول عدل وسرييع و رخييص < اهم شي

لاني درت على مقاولين الى قالي 140 الف و الي قال لي 350 :anger1:

وانا طامعه في اقل من 100 :eek5:

وملحق الى ابغية متكون من غرفتين ومطبخ و صاله مع درج الى ابغية اصلن حديد بس مسكر عليه يعني مسلح

ابغي اي اشي اهم شي استقل وافتك من زحمه الى عايشة فيها :weeping:

وبليز لاحد يقول مافيه رخيص ارخص شي انا ابغية :secret:


ومشكورين :shy:

[MAZEN37]

نصيحتي دوري اسيويين

[kaafy]

لو البلدية مهي ناشبة لي

كان انا بنيت لنفسي وافتكيت ^^"

يعني سوالف بابو من شارع مافيه


لازم عقد وخرابيط

[kaafy]

نسيت اقول بناء بيكون كيربي لانه اخف


وشي ثاني ابغي اسئل اهل الخبره عن شي

الاستشاري حاط لي خرسانات , و المقاولين الى جيتهم يقولون لي احسن حديد



وش الاحسن حق البيت الى تحت اخاف يطيح بالغلط -_-"

[بن غيث]

البيت جديد او قديم
وهل مبني ع اساس طابقين
ونصيحة ابتعدي عن الكيبربي
حتى لو أوفر

[افاميا]

فيه مقاول مصري رخيص سعر 1200 المتر مسلح على الفتاح

[abdulla889]

شوفي شركة الفارسي للتجارة والمقاولات شغلهم نظيف ومرتب قاعدين يبنون دور ثاني حق واحد من الشباب 44600494

[بن غيث]

اختي. .
حاب اقول شئ
ان سعر المتر بيكون اقل بوايد من الي سمعتيه
لانه طابق ثاني
بدون اساس
مجرد توصيلات للطابق
واكيد بتحصلين شباب في المنتدى يفيدونك اكثر مني
الله المستعان

[ضوى]

حبيبتي لا تدورين الرخيص دوري الجودة

[كبير المتداولين]

كم مساحه البناء ولو تعطينا مواصفات الي تبيها ممكن نفيدك

[kaafy]

البيت مبني سنه 2003 اظن تصميم 23 بس مغيرين فيه

فالحكومة ماعطتنا نبي الا الى ماصار فيه تعديل عن تصميم الاصلي

مقاول الى بناء البيت كان يبني على اساس طابقين بس مافيه فوق اساسات طالعه مثل البيوت الجديدة


مساحة تقريبا نص بيت الاصلي يعني مطبخ و غرفتين وصالة + درج


وشكرا على مروركم الكريم

[kaafy]

ونصيحة ابتعدي عن الكيبربي
حتى لو أوفر



ممكن اسئل ليه؟ يعني وش فيه الكيربي

[ولد المنصور]

على حسب علمي الكيربي مايستحمل ولا يعيش وااايد .. وحار .... ويخر

[راعي المها]

عندج رساله على الخاص فيه رقم شخص اعرفه انشاء الله مابقصر معاج

[آلملآزم]

ممكن اسئل ليه؟ يعني وش فيه الكيربي

الكيربي الله يسلمج يدخل غبار وفي الصيف حار لو تحطين فيه مكيف 10 طن يبقى حار وفالشتاء بارد + يخر ماي ويتهالك بسرعه يعني حتى لو كان أرخص أنصحج تتجنبينه :victory:

[الـراسي]

توي مخلص خرايط البيت ولله الحمد

والاسبوع الجاي راح ابدى بالبنيان مع المقاول

طبعا بناء دور ثاني في بيت الوالد لاني توي مخلص الفله

وبادي في بيت الوالد نفس المقاول طبعا السقف خرسانه جاهزة عليها ضمان 40 سنة

وهي اخف من الخرسانه العادية

[معماري قطري]

إذا دور ثاني وعلى بنيان موجود المفروض الإستشاري يكون موجود ويحط تفاصيل كافية في العقد وفي الرسومات، وبالنسبة للكيربي أنا أعرف مباني كيربي موجودة في قطر من فوق 30 سنة وللحين محد يشتكي منها بس بانيتها شركات انجليزية، والحين في قطر ينتج مصنع الحديد نوع فيه عازل حراري في الوسط بسمك 5 سم وعملي وقوي وما يهتز ولا يسوي صوت، وبعدين مهم انه يتم عزل الأطراف عن الجو الخارجي وتغطيتها بحديد، ومن داخل يتركب جبس وإناره وديكورات اللي تبين، ولا حد يلاحظ لا من برا ولا من داخل إذا سووه بطريقة صح، وما فيه اي داعي حق عمل أعمده خرسانية، لكن عن الشقوق الشلوخ لو يسوون الحايط دبل وبينه عازل 5 سم الفلين الأبيض ولا الأزرق بيعطيج عزل جيد وبيحمي الحايط من الشلوخ بس مهم الحايط ينبني عدل ويكون فيه سيخ حديد واحد ولو أقل سمك مسافة كل متر في تجويف الطابوق وينملي بالخرسانه وعند النوافذ والأبواب كذلك، وفي الإتجاه الطولي ممكن وضع شبك بلاستر حتى يربط الحايطين مع بعض وحتى يمنع أي شلوخ مستقبلية، ويكون كل متر ، والمفروض يكون الإرتفاع كبير في حدود 4 متر حتى تاخذون راحتكم في عمل الجبس على إرتفاع 3 متر وتكون عندكم مسافة ميلان مناسبة للسقف ومسافة فاضية لعزل حراري وصوتي أفضل.

والله ولي التوفيق

[kaafy]

ماشاء الله تبارك الله عليك يامعماري

انا تخطيط و كلام الى تقوله حق الهندسه بس حلو يبغي له ساعتين على شان افهم وش سالفه بس معليه

بسوي قص ولصق عند الاستشاري


وعلى العموم انا شكلي بوقع مع ابو 140 الف لاني ماحصلت ارخص منه ارخص واحد قالي 160 الف


وبالتوكل

وشكرا على مروركم

[فارس قطر]

احسن طريقة وارخص شي بين 50 - الى --70 بنا عظم و على حسب مواد البناء

اولا جهزي خارطة الكروكي للبنيان الجديد

وشوفي بكستاني مقاول باطني وتفقي معاة على بنيان عظم

وكملي البيت على راحتك وعلى حسب الميزانية.

ملاحظة
ولاتنسين عمل مدخل خاص للعمال

وبالتوفيق.

[خبير صيانة]

الجوده والامانه والدقه في المواعيد وايضا السعر الرخيص
مقاول تركي 25سنه في الدوحه لاكن اذا فاضي حظك اذا تبي ادز رقمه لك

[معماري قطري]

ماشاء الله تبارك الله عليك يامعماري

انا تخطيط و كلام الى تقوله حق الهندسه بس حلو يبغي له ساعتين على شان افهم وش سالفه بس معليه

بسوي قص ولصق عند الاستشاري


وعلى العموم انا شكلي بوقع مع ابو 140 الف لاني ماحصلت ارخص منه ارخص واحد قالي 160 الف


وبالتوكل

وشكرا على مروركم

تسلمين إختي

إحنا هنيه علشان نتعلم ونستفيد من بعض، بس عندي نصيحة لتطالعين السعر وتركزين عليه كثر ما تطالعين وشي التفاصيل اللي بيسويها لج، وعندج موضوع الكهربه هل هي كافيه ولا يبي لها تقوية، ووين بيتم توصيلها ، والحمامات تكرمين ركزي انها تكون في نفس مستوى الأرضية أو تكون أوطى 2 إلى 5 سم عن تسرب المياه للغرفة المجاورة، وأفضل شيء نفس المستوى وحاجز رخام على عتبة الباب، وبحيث تكون حواف الرخام ربع دائرية، يعني زاوية الرخام عبارة عن قوس حتى ما تنكسر ولا تخرطف الواحد.

أتمنى لو فيه طريقة أشوف الرسومات والعقد، بس إن شاء الله إذا كان كل شيء محسوب حسابه صح والإستشاري إشتغل بضمير، والمقاول وضح كل البدائل وتم الإتفاق عن طريق الإستشاري وبحيث يكون فيه إشراف وموافقات من الإستشاري وإختيار من المالك بيتم الشغل حسب الأُصول الهندسية وبيكون بنيان العمر.

فيه ملاحظة أخيرة أرجو تبرزينها للإستشاري، ولا بيدج انتي تختارينها اللي هي ممكن لو ركبتي أرضية صلبة تأثر من ناحية حتى صوت مشي أو جري الأولاد فوق على الساكنين تحت، وهذي لها حل بسيط اللي هو بدال السيراميك والبورسلان أو الرخام والجرانيت تركبين بلاط شعبي أردى الأنواع مب مهم، وفوقه تحطين الآندر لي الخاص اللي ينحط تحت السجاد بس حطي نوعية جيدة، وسجاد بعدين ... بيكون البيت مريح وبتخف الأصوات والضجيج على من هم تحت.

وسلامتكم.

[kaafy]

شكرا على مروركم

وشكرا لك معماري لاني صدق مانتبهت حق مشكلة نقل الصوت الى الدور الارضي

[معماري قطري]

طول يومي وانا أفكر في تفاصيل تركيب السقف بدون ما يبين الحديد من فوق، ووصلت لحل انا سويته قبل بحيث تبنى الجدران وبعدين قبل البلاستر يجي عامل الحديد يركب كرسي على شكل زاوية ببراغي على الحائط، وفوقه يلحم تيوبات مربعه يركب عليها السقف المعزول مثل السندويش يسمونه Sandwich Panel
وهذا يتركب داخل على عوارض الحديد اللي تكون مثبتة على كراسي شكل زاوية قائمة حديد، وينعمل له عزل مياه أما بالصبغ الايبوكسي الأبيض على شبك الفايبر أو بعازل المياه التقليدي، وتعمل له فتحات وبايبات لتصريف ماي المطر، وبطريقة نظيفة ومخفية بالكامل، وللطابوق ممكن إستخدام الطابوق الإسفنجي وهو طابوق أبيض وزن 3 طابوقات منه يعادل وزن طابوقه عادية، ويعطي عزل حراري وصوتي خيالي ... بس شوي غالي ومب كل مقاول يعرف له، وهذا موجود يستورد من السعودية ودبي والكويت وكانت فيه نية لشركة العلي للمشاريع لعمل معمل انتاج لهذا الطابوق.

وبالتوفيق إن شاء الله لكل واحد يبني ولكم

[kaafy]

يعطيك العافية معماري

على الافكار لتحسين بنيان

ان شاء الله يطبقها الاخ الاستشاري