مشورتكم يالربع وجزاكم الله خير

[عاشق الشهاده]

السلام عليكم ..
الصراحة ناوي أبني فوق بيت الوالد وحصلت مقاول وعطاني سعر .. بس مدري اوكي ولا لا ؟؟؟
السعر 1050 ريال للمتر و يشمل التالي :
1- عظم مع بلاستر داخلي وخارجي والطابوق الخارجي ( عازل ساندويتش يعني فوم )
2- السباكة عليه البيبات الداخلية وبايبات الصرف الصحي وتركيبها وتركيب كل ما يتعلق بالحمامات من سخانات واكسسوارات وغيره بس علي الشراء.
3- الكهرباء علي الوايرات والاكسسوارات وعليه شراء البيبات الداخلية وتركيبها وتركيب كل ما يتعلق بالكهرباء من ليتات وسويتشات وغيره بس علي الشراء.
4- تركيب العوازل للحمامات وعلي الشراء المادة العازلة
5- المدة اربع شهور .

محتاج مشورتكم ... غالي ولا عادي ولا جيد ؟؟؟ بالنسبة لشغله الصراحه شفته في اكثر من مكان شغل زين ومرتب ...

وجزاكم الله خير..

[عاشق الشهاده]

نسيت بعد اقولكم اذا فيه شي لازم اذكره بالعقد ... لا تبخلو علي وبارك الله فيكم ..

وجزاكم الله خير

[naklan]

هلا باخوي
الغالي ابو محمد عاشق الشهادة :nice:

اعتقد اخوي ان سعره جيد وخاصة انك تقول شغله ممتاز ومرتب
احسن من انك تحصل سعر ارخص 100 ريال وتتبهدل مع شخص ما تعرفه
ونصيحتي انك تختار اشياء كولتي لك وللزمن اذا كانت عليك او عليه تشترط
للصرف بيبات قلف بحريني وللبيبات الماي الداخلية في الحائط بيبي ار
الماني وللخارجية نحاس انجليزي ووايرات الكهرباء دوكاب اماراتي
وباقي اغراض الكهرباء انجليزي واذكر ادق التفاصيل في العقد
الي عليك والي عليه افضل

الحمامات تحتاج تشتري دفان وتصعدة فوق للدور الثاني وصبية فوق العازل
والبلاط على من عليك او عليه تحتاج اسمنت ورمل مغسول ايضاً وقراوت تاكد
واذكر جميع التفاصيل علشان تبتعد عن الخلاف وتخلص شغلك وانت مرتاح

موفق اخوي الغالي عاشق الشهادة
اخوك /naklan :)

[عاشق الشهاده]

جزاك الله خير ... وما قصرت
هذا عقد لا يشمل التشطيبات النهائية يعني البلاط مش مشمول ..
بس سؤال ليش الدفان فوق ؟؟؟ على حسب علمي الحمامات بيكون فيها عازل عشان يمنع تسريب الماي ؟؟
وجزاك الله خير

[بودحوم]

السعر ممتاز إذ شغله نظيف مثل ماتقول

بالنسبة للعازل انصحك تجيب لك شركة متخصصه مثل شركة المسند أو غيرها من الشركات المعروفة . أفضل من شرائك للمواد والتركيب على المقاول

[ولد العرب]

توكل على الله انا حسب على ب1000 بدون تركيب السخانات بدون الطابوق العازل بدون تركيب الحمامات يعني نكبة في نكبة
اسمع شوري وتوكل على الله
بس ياليت تكلمه تقول اذا اقدر اخذ نفس سعرك لبيت اخوي ونفس طريقتك بيبني دور الثاني وياليت على الخاص

[naklan]

جزاك الله خير ... وما قصرت
هذا عقد لا يشمل التشطيبات النهائية يعني البلاط مش مشمول ..
بس سؤال ليش الدفان فوق ؟؟؟ على حسب علمي الحمامات بيكون فيها عازل عشان يمنع تسريب الماي ؟؟
وجزاك الله خير



اخوي بومحمد في الفلل الدورين يتم صب مكان دوراة المياه بنزول 10 او 15 سنتي
الى الاسفل يعني مربع الحمام يكون انزل من البيت لذالك في حالتك ستضطر لتعلية السطح
ليتساوا البلاط كامل للارضية ولدورات المياه وستضطر لوضع دفان وايضاً لتغطية
بيبات الكهرباء وتصريف المكيفات السبلت الي ستمدد لنفس الدور

موفق يالغالي :)

[معماري قطري]

السلام عليكم ..
الصراحة ناوي أبني فوق بيت الوالد وحصلت مقاول وعطاني سعر .. بس مدري اوكي ولا لا ؟؟؟
السعر 1050 ريال للمتر و يشمل التالي :
1- عظم مع بلاستر داخلي وخارجي والطابوق الخارجي ( عازل ساندويتش يعني فوم )
2- السباكة عليه البيبات الداخلية وبايبات الصرف الصحي وتركيبها وتركيب كل ما يتعلق بالحمامات من سخانات واكسسوارات وغيره بس علي الشراء.
3- الكهرباء علي الوايرات والاكسسوارات وعليه شراء البيبات الداخلية وتركيبها وتركيب كل ما يتعلق بالكهرباء من ليتات وسويتشات وغيره بس علي الشراء.
4- تركيب العوازل للحمامات وعلي الشراء المادة العازلة
5- المدة اربع شهور .

محتاج مشورتكم ... غالي ولا عادي ولا جيد ؟؟؟ بالنسبة لشغله الصراحه شفته في اكثر من مكان شغل زين ومرتب ...

وجزاكم الله خير..


عليكم السلام ورحمة الله وبركاته
إخوي عاشق الشهاده علشان تقدر تبني وانت مرتاح لازم تسوي تصميم متكامل وتحصل رخصة بناء، وبعدين في حالة إنك تبني فوق بنيان موجود ركز على إن تكون المواد خفيفة، عندك مثلاً الطابوق الأبيض والمسمى بالإسفنجي لأنه يُصّنَع بمواد فقاعية تترك فيه فراغات مما يعطيه خفة وزن بحيث طابوقة عاديه وحده تعادل 3 طابوقات إسفنجية من نفس الحجم، وعلشان سهولة البناء خل يكون السقف عبارة عن سقف خرساني مجوف سابق الصنع، يعني يجيبونه ويركبونه بالكرين في أيام بسيطة وبدون صب خرسانات وعمال وايد ووجع راس.

وتبي الصراحه من قراءتي لإستفسارك كم مره ألاحظ إن المقاول مغامر ومبتديء وحذر في نفس الوقت، ما خلا شيء ما حطه عليك، إسمع نصيحتي سو تصميم متكامل وعين إستشاري مشرف ولتسوي العقد الا عن طريقه، وركز على كم مقاول وسو زيارات لهم شوف كيف شغلهم في موقع الشغل وأُسلوب العمل داخل الشركة، صدقني أوقات تحصل مقاول هو بطل العرض بنفسه one man show وبتحصل مكتبه سيارته ولا حد حوله من العمال، وبعضهم يلقط عمال من الفارين في الشوارع، ولا تنسى إن التصميم والرخصه بتكون ضمان حق تقوية الكهرباء المطلوبه لبيتك، وشيء أخير الطابوق اللي فيه عازل من داخل طابوق فاشل لأنه ضعيف ولأن ما فيه معنى للعازل إذا كانت المونه اللي بين الطابوق 2 سم وأكثر تسوي جسور حرارية وتنشر الحراره داخل بيتك، يعني كنك في عز البرد تلحفت بلحاف فيه فتحات، ولا لحفت جزء وخليت جزء معرض للبرد، وفي حالة الطابوق الإسفنجي يكون العازل بين الطابوق ماده لاصقه وغير منفذه للماء بسمك يقل عن 1مم ولا يكون جسر حراري، يعني حتى تركيبه لازم بواسطة شخص فاهم، وإذا حبيت عزل أكثر ركب ألواح الطابوق الإسفنجي اللي تجيك ألواح كبيره تتركب جنب بعض وتربط ببراغي خاصه بينها وبين بعض

والسموحه على الإطاله وإذا بغيت أي استفسار لشيء غير مفهوم مستعد وحاضر وفي الخدمه

[بوخالد911]

مووفق

[فتى الجود]

السلام عليكم

ياولد العم

السعر مناسب

لكن اذا " عربي " ابعد عنه

خلك مع البتان والله يوفقك