بلاط للسطح

[wadha-qa]

السلام عليكم

الله يعطيكم العافيه يا خبراء البناء

انا ابي احط بلاط بعد العازل اللي فوق السطح بس مادري اي نوع احسن ومن وين اخذه لو سمحتوا ابي الرد ضروري :nice:

[MAZEN37]

حسب معلوماتي انه وزن على السقف وممكن يسبب مشاكل
ان شاء الله الاخوان يفيدونج

[ولد المنصور]

بلاط على السطح ..!!!!!! ليش ,, وش الحكمه ...

[معماري قطري]

الله يسلمج البلاط يستخدم كعازل للماء وحتى للحرارة وفكرة جيدة إذا بتستخدمين السطح، وحتى كحماية إضافية، انا سويت صبغ إيبوكسي أبيض على شبك فايبر من حول 3 شهور وشفته قبل بس الحين لي فتره ما ركبت السطح.

ركبوه لي صباغين من شركة وبإتفاق مع فورمان الشركة في فترة 4 أيام، وسطح بيتي مساحته قريب 440 متر مربع، وهو لونه أبيض يعكس النور ويستوي يابس وما يتشقق ويحمي ضد المطر، وصراحة للحين ما عطيت الفورمان فلوسه كل ما اسئله كم قال بحسب لك بعدين لكن شغل يد العمال 400 ريال وتكلفة المواد ما اتوقع وايد، إحتمال ما يوصل كل الشغل 1500 في تقديري.

بالنسبة للبلاط مستخدم البلاط الشعبي أرخص الأنواع في طريقة العزل في بيوت العراق، بحيث يصبغون السطح بأساس من البيتومين " القار" وبعدها يركبون فوقه البلاطة والبلاطة تكون مقطوعة بقص حافتها 2 ملم بالعرض وبعمق من 5 ملم إلى 10 ملم، وتُصَف البلاطات جنب بعض وطبيعي تكون بينها فراغات بسيطة والكسرة اللي عملناها فوق تسوي فراغ أكثر من تحت بأربعة ملم، وبعد ما تُصف البلاطات ممكن إستخدام أي مونة قوية وفعالة، وهم هناك يستخدمون القار العادي بس انا أشوف لو انملت نص الفتحات بالقار والطبقة العلوية استخدمنا ماستك رصاصي بيكون شكل أحلى وتناسق ألوان غير، وليش ما نستخدم الصبغ الإيبوكس الأبيض؟ بس ما ادري إذا فيه خاصية المرونة للتمدد والإنكماش بدون شقوق تسرب الماي، فالأضمن القار أو الماستك الرصاصي وإذا فيه ألوان غير عن الرصاصي للماستك بتكون أفضل في رايي خصوصاً الأبيض.

أتمنى أوضحت ما فيه الكفاية، لكن تبقى منطقة فتحات تصريف المياه، وهذي على حسب تفصيلها عندج تحتاج عناية وطريقة خاصة لتسبب تسرب في المستقبل، والحواف لتنسون تسوون نعلات حتى لو نوعية بلاط غير، وفيه مادة لاصقة عند فورسكو تخلي البلاط يلزق على حتى الخشب ولا ينشال حتى لو بالقوه الا مكسور للنعلات ذي.

وبالتوفيق دائماً بمشيئة العزيز الحكيم.

[معماري قطري]

حسب معلوماتي انه وزن على السقف وممكن يسبب مشاكل
ان شاء الله الاخوان يفيدونج



إخوي وزن البلاط تافه، وبيحمي السطح بس بيكلف شوي لازم تكلفة تركيب وتكلفة شراء، وإن كان السطح شكل ما قالت الأُخت جاهز وبطبقات العزل المطلوبة، فهذه الطريقة ضمان إضافي وشكل جمالي لإستخدام ونظافة السطح، وحساب كمياتها سهل، فهي لن تحتاج إلى مونة إسمنت وتحتاج لتفاصيل الطريقة اللي ذكرتها والبيتومين بيكون كفاية للصق البلاطات وكمونه بين البلاطات تضمن عدم وصول الماء لتحت البلاطة وطبعاً فيه ميلان جاهز بيخلي الماي يمر بسهوله للتصريف، وهذي المونة قابلة للإنضغاط وللتمدد ولا تحتاج لعمل فواصل تمدد لأنها موجودة بين كل بلاطة وبلاطة.

شيبقى بعد حتى لو الواحد حب يزيد شوي ممكن يزرع السقف صدقوني حتى بعشب إن عمل لكل شيء حسابه، وعندنا في قطر شركة تجيب مواد بلاستيكية يُزرع فوقها للسطوح وتجمع الماي تحت وتعيد إستخدامه لسقي الزراعة، وفيه بلوكات تتركب فوق الحايط على كامل البيت، وهذي البلوكات تنحط داخلها تربة خاصة وتزرع، ومرشات الماء تكون من فوق أعلى الحايط وتنزل وهي تسقي جذور الزراعة، يعني تخيلوا واجهة بيت مزروعة أو خلوا نقول جزء من واجهة مزروعة بنباتات مزهرة وخضراء وبدون ضرر على البيت، وبكميات مياه قليلة جداً، وهذي تكنولوجيا زراعية موجودة في قطر.

[wadha-qa]

مشكورين ما قصرتوا
بس ابي اعرف البلاط الشعبي اي نوع افضل وبكم المتر
و الطريقه هذي شفتها في بيوت اهل الامارات انظف و احسن

اخوي معماري قطر فكره الزراعه شفتها في المعرض الزراعي اللي صار وعجبتني وان شاء الله بنطبقها ومافي احلى من جلسه السطح للتشمس الصبح ياليت الناس يطولون طوف السطح و يستمتعون بهالمساحه ما يخلونها مهجوره

[معماري قطري]

مشكورين ما قصرتوا
بس ابي اعرف البلاط الشعبي اي نوع افضل وبكم المتر
و الطريقه هذي شفتها في بيوت اهل الامارات انظف و احسن

اخوي معماري قطر فكره الزراعه شفتها في المعرض الزراعي اللي صار وعجبتني وان شاء الله بنطبقها ومافي احلى من جلسه السطح للتشمس الصبح ياليت الناس يطولون طوف السطح و يستمتعون بهالمساحه ما يخلونها مهجوره

الله يوفقج إن شاء الله

انا عني سويت بنتاهاوس وله باب قزاز كبير وكنت ناوي أحط برغولا خشب جدامه للتشمس، والبنتاهاوس قلت جزء مكتبه وجلسة تلفزيون وجزء صالة رياضية ... بس صدقيني محد يركب فوق الا إذا فيه العاب نارية في استاد خليفة، لا والأرضية بعد ما صبغتها إيبوكسي طلعت حلوه حق المشي ما يكون عليها الا شوية غبار ,,, معاج في فكرة التشمس والباربيكيو وحتى والله النوم فوق لو الجو هادي بعض الأيام

[ريان]

انا ركبت بلاط شعبي

من شركة سمسمه المتر 18ريال

والتركيب 15 ريال للمتر

وبدون دفان بالمونه لان السطح كان مستاوي ومافيه انخفاض

[معماري قطري]

انا ركبت بلاط شعبي

من شركة سمسمه المتر 18ريال

والتركيب 15 ريال للمتر

وبدون دفان بالمونه لان السطح كان مستاوي ومافيه انخفاض

ما قصرت يا إخوي بس نبي تفاصيل وصور لو ممكن ومهم نعرف شاستخدمت للتركيب .. ويعني لو الواحد دور أرخص نوع شعبي بيحصل ممكن ب 15 وممكن التركيب يطلع أقل وخل نفترض في أسوأ الإحتمالات 30 ريال إجمالي التكلفة، ونفترض مساحة السطح 500 متر مربع بيكلف التركيب مع سعر البلاط حول 15000 ريال بس ان شاء الله بيكون عندنا راحة بال وعزل جيد حراري ومائي... بس انا مع هالمقاول الطيب تكلفة العمال طلعت علي 400 ريال والمواد للحين ما قال لي صار له فوق 3 شهور وانا كل ما سئلته يقول لي بعدين ومتوقع توصل كإجمالي 1500 ريال وما شاء الله السطح أبيض بدون شوائب وأقدر أمشي عليه حافي بس في الشمس أكيد بيعكس الحراره وبيكون حار.

[شموع قطريه]

اخوي معماري ممكن رقم اللي صبغ لك ارضية السطح

[حسن الاحمد]

ماشفت احد بقطر يبلط السطح
كنت دايما اشوفه بسورية ولبنان والاردن والدول اللي يجيها مطر كثيرر
يبلطون السطح ببلاط شعبي رخيص مع صبة ميلان خفيفة باتجاه المرازيم

بعدين اذا تم عزل السطح وطلعوا العمال فوق يبلطون يمكن يجرحون او يخدشون العزل ؟؟؟ ويبدأ يسرب ماي بالمستقبل

هذا رايي

[معماري قطري]

اخوي معماري ممكن رقم اللي صبغ لك ارضية السطح

ما ادري مب ممنوع أحطه هنيه حسب قوانين المنتدى؟
انا يديد وخايف انطرد، وفضيحه خاص ما اعرف شلون باحاول على العموم

[مساهم الشبكه]

اسئلي عن الارضيه اللي تستخدم في المجمعات والمستشفيات الطبيه تجي طبقه بلاستيكيه سميكه وغير قابله للتسرب نفس ارضية مستشفى حمد ومستشفى الاهلي وغيرها اتوقع انها خامه فوق الممتازه

[معماري قطري]

اسئلي عن الارضيه اللي تستخدم في المجمعات والمستشفيات الطبيه تجي طبقه بلاستيكيه سميكه وغير قابله للتسرب نفس ارضية مستشفى حمد ومستشفى الاهلي وغيرها اتوقع انها خامه فوق الممتازه

صحيح اخوي فوق الممتازة وعملية وتكون بعضها ما تسوي شحنات كهربائية، بس لو تحطها فوق السطح سنة يمكن ما تطول بسبب حرارة الشمس والبلاستك فيه أنواع كثيرة منه تيبس من الشمس وتتكسر، وهذي بس للإستخدام الداخلي، وإذا الواحد يبي عازل عملي ورخيص بعد فيه عندك رولات سعودية خشنة من فوق جهة اللي تنداس وهي سودا وتنلحم بالنار وممكن تنحط بسهولة على كامل سطح البيت وفوق العازل الموجود وفوق صبية الميلان الإسمنتية، وتسويها الشركات المعروفة في العزل مثل المسند وتدمر وتعطيك عليها ضمان 10 سنين، ومره سويتها حق بيت مساحة سطحه 250 متر مربع بس من زمان كلفتني 4000 ريال وللحين حول 10 سنين ما سرب ماي مع انه قبل تشوف خطوط ماي تتسرب منه.

[معماري قطري]

معليش نسيت أذكر فوق إن سبب التخشين وضع مادة تعكس أشعة الشمس علشان العازل يعمر وما يتأثر من الشمس، والعازل الأساسي ينحط تحت وتنحط فوقه طبقة إسمنت بعد لهذا السبب، وإنتبهوا يا إخوان لمواصفات العازل من الإستشاري واللي مذكورة في العقد، مرات يصير فيها غش كبير، فمثلاً لو الرسومات التفصيلية تبين إنه يكون سلوب أول بعدين ينحط عازل الماي وبعدين يجي الحراري وبعدين طبقة اسمنت ثانية هذا تكلفته وشغله غير عن العازل المائي سيده على السقف وبعدين الحراري وآخر شيء صبية اسمنت خفيفة تغطية وسلوب أي كلام.

[حسن]

ما ادري مب ممنوع أحطه هنيه حسب قوانين المنتدى؟
انا يديد وخايف انطرد، وفضيحه خاص ما اعرف شلون باحاول على العموم

مافيها شي ياخوك بعدين عندي لك واسطه بونهاد:victory:

[معماري قطري]

مافيها شي ياخوك بعدين عندي لك واسطه بونهاد:victory:

ما تقصر إخوي حسن بس تعلمنا شوي شوي وما ادري أوقات عقليات البشر تترجم كلمة على إنها دعاية أو إساءَة، وانا والله من حبي للمهنة ذي صدقني أتعلم كل يوم منكم ومن كل عامل وشخص أشتغل معاه ومن الكتب التخصصية اللي أقراها، والحمد لله حكومتنا ما قصرت مخليتنا مرتاحين ونشوف أشغالنا براحتنا الله يديمها علينا نعمة.