الكهربه لعوزتني

[سكر زياده]

السلام عليكم ورحمة الله وبركاته

يعطيكم العافية يا أخوان

أخواني عندي مشكلة فالبيت اللي ساكن فيه الا وهي الكهربة

السالفة انه كل شوي عندي ليت ينفجر ويفصل الكهربة او اشغل مكيف ما يشتغل اشيك على بوكس الكهربه القاه فاصل ارده مكانه واشغل المكيف مره ثانية يشتغل عادي

ذاك اليوم وانا راد من السفر كان عندي الله يعزكم ليت نيون داخل الحمام خربان وكنت حاط السويج on يوم رديت من السفر لقيته منفجر والسقف اسود وجزء بسيط من البانيو محترق الله ستر ما حترق البيت كامل

فما ادري شالحل الحين للعلم جاني كهربجي وقتله يمكن كهربة البيت تعبانة او وايرات الكهربة رخيصة قالي لا كل الوايرات زينة

ومره نفس الشي فصلة الكهربة وحرقة علي المايكروف والدينمة والبراشر

للعلم البيت قديم والمكيفات عندي 2.5 طن

والله يجزاكم خير ان شاء الله

[معماري قطري]

شوف إخوي لا تتهاون في هالشيء، وبتحصل المشكلة في أغلب الوقت من القواطع ومن التوصيلات إذا الوايرات سليمة، شوف حد نظيف يشيك لك الكهربه، وانا أعرف باكستاني محترم وراعي ذمة وسعره معقول بس الله يعينك تصيده فاضي، وهو ممكن يحط لك قواطع بقوة متناسبة مع الجهاز، وهذي مهمتها إنها تفصل الكهربه بروحها إذا في الجهاز خلل، وتشييكها ياخذ شوية وقت كل شيء على حده، ليت ليت ومفتاح مفتاح لين يضبط لك كل شيء، وإحتمال تكون لوحة القواطع نوعية رديئة فينصحك بإستبدالها، ويمكن إذا إحتاج الوضع عندك تسوي إعادة تخطيط كهربائي عن طريق مكتب إستشاري مختص، لكن توقعي شريف خان ما يقصر فهذا شغله، وتحمل من الجهلة اللي يسوون نفسهم يعرفون كل شيء، والكهربه أمرها هين إن سويتها صح، وبارسل لك رقم شريف خاص إن شاء الله ما تغير بس

[سكر زياده]

يزاك الله خير الشيخ

جاني واحد وشاف البريكر وقالي انه صغير لازم تروح كهرماء وتسوي طلب تقوية الكهربه ( تغير عداد وبريكر )
ما ادري كلامه صحيح ولا شسالفة

[ريان]

كم مكيف عندك فالبيت ؟

وكم قوة البريكر ؟

[سكر زياده]

عندي ١٢ مكيف ٢،٥ طن
البريكر حجمه ١٠٠
والعداد قديم من ٢٥ - ١٠٠
والتوصيل عادي مب سي تي

[معماري قطري]

في التفاصيل الكهربيه والأرقام على بابك يا كريم، والشباب المختصين بيفيدونك وإحتمال كبير راي اللي جبته صح، بس شوف إذا تبي راي مهندس بعد عندي مهندسين من فطاحل مهندسين الكهربه، وواحد عنده شركة صيانه كهربائية فلسطيني وقمة الإحترام، والثاني سوداني بعد خلاص الشيب ملا راسه وخبرته ما شاء الله، هم زملاء عمل سابق وللحين متواصل معاهم وجاوا شافوا كهربة بيتي قبل وقت التنفيذ وطمنوني، وأرقامهم بتوصلك خاص إن شاء الله.

[حسن]

شوف حد من طواري الهرباء اول شي خله يشيك لك بعدين هو بيقولك

[سكر زياده]

اخوي معماري قطر جزاك الله خير ما تقصر

[سكر زياده]

جزاك الله خير اخوي حسن عساك عالقوه

[خالد32]

صارت لي نفس المشكلة و كانت من الكيبل الارضي خارج البيت فيه التماس و صلحوه كهرماء.

[كبير المتداولين]

الافضل لك اخي الكريم استشار كهربائي معتمد يقوم بفحص الكهرباء في البيت بشكل كام من كيابل ووايرات ومجمعات تشوف وين الخلل قد يكون ضعف في الكيبل قد يكون وايرات اتتحمل قد يكون ضغط زائد على الكهرباء راح يفيدك اكثر لانه الكهرباء شي مهم وخطير ولازم تتخذ اجراء بأسرع وقت
وماتشوف شر