سؤال بخصوص الطابوق العازل

[شاعر المليون]

سؤال لأهل الخبرة

استخدام الطابوق العازل بالفوم الأرزرق هل يتطلب تعديل الخرايط الأنشائية ( الحديد ).

[شموخ دائم]

,

,


مرحبا


لا اخوي ما يحتاج تعدل شي
امورك طيبه
:)

موفق يارب

,

,


اخوك


شموخ دائم

[معماري قطري]

إخوي إذا قصدك الطابوق اللي في حجم العادي ووسطه عازل وبتركبه علشان العزل الحراري أقول لك مب مسوي لك شيء من ناحية العزل ونصيحة إنساه، كنت مثلك أتذكر في بداية حياتي وبالصدفه مره رايح عند مقاول كبير الله يطول في عمره وقف عن الشغل الحين الله يشفيه، وصدفه سئلت عن هالنوع من الطابوق وكنت مقتنع فيه، لكن الشيبه نادى سكرتيره وقال له جيب الصندوق ذاك وافتحه.. شفت الصندوق خشبي وصغير ومقفول بقفل عادي وفتحه وجابه لي أشوف الا مقطع من خرسانة من الصوبين وفيها الفوم العازل، وبدأ الشيبه يشرح لي إن العازل بعد ما يسوون الحايط ويخلون فيه فراغ يحقنونه بالمادة العازلة وبحيث تغطي الفراغ كامل، وباقي الحايط خرسانة وتنصب في مصنع تحت درجات حرارة مضبوطة وتتركب جزء جزء، وكانت لمباني السكن الخاص بالأسياد قرب مستشفى حمد وأكيد تعرفها كم دور وحوايط جاهزة وعلى درجة عالية من العزل.

الدرس الثاني خذته من خلال مسؤولي الله يذكره بالخير ... قلت باستخدم الطابوق الطيني وهو يعطي درجة عزل زينه قال ما فكرت في المونه اللي بين الطابوق شكثر تسوي جسور حرارية؟ وهذا الواقع الطابوق يعزل لكن المونه تخلي الحرارة تدخل بسرعة ولا تستفيد.

والدرس الأخير خذته عن طريق كورس خاص في العزل الحراري عن طريق دكتور مهندس ممارس في ألمانيا بلاد التكنولوجيا ... ومن خلال هالكورس تعلمت أشياء كنت صج أجلها بس سويتها في بيتي صدفه .. انا بعد دراسة وتخطيط خصوصاً تركيزي ان يكون عندي عزل حراري زين بنيت الحوايط الخارجية بحيث تكون من جهة الداخل طابوق 20 سم عادي، لسهولة التمديدات ولأنه أقوى من الطيني، وطبعاً مع عمل روابط حديد بين الطابوق وأي خرسانة متصلة معاه، وفي نفس الوقت كانت تنحط عليه من الخارج ألواح عازل الأزرق، مع تركيب مراسي حديد خاصة تنشبك في المونة وتنشبك في صف الطابوق الخارجي، اللي سويته طابوق طيني وخليت العازل يغطي العوارض أو الأبيام الخارجية لأنها خرسانة وتنقل الحرارة والبرودة سرعة من الهواء الخارجي للداخل، والبعض لازم لاحظ خصوصاً في الحمامات الأرضية تستوي باردة وقت الشتا والسبب نقل هذي الأبيام للبرودة وتبريد أرضية الحمام، وسويت تفصيل حق الحايط الخارجي يوضح كلامي وحاولت أدرجه بس ما عرفت شلون.

وإن شاء الله قريب بانزل تفاصيل وتوضيح أكثر للعزل الحراري.

[معماري قطري]

وعلى فكرة للنظام ذيه ما تحتاج تعديل إلا تربيط بين الطابوق الخارجي والداخلي ويمكن عارضة وسطية بسيطة تربط الطابوق الخارجي بالباقي وبالأعمدة، وبهالطريقة بتسوي تغطية للأعمدة ولجسور الأرضيات، وبتبعد أي رطوبة بعد عن الخرسانة، وبتخلي أي شلوخ حرارية ما تصير داخل بيتك، بسبب إن الإنتقال الحراري بيكون ضعيف وايد، والمكيفات بتشتغل براحتها بتضطر تقصر عليهم وتبند بعضهم، وفي الشتا بيتك بيستوي دافي ويحافظ على الدفء.

[MAZEN37]

مرحبا معماري قطري
لكن صراحه توهتني ما فهمت شيء
ممكن وحده وحده على وتوضح بتفصيل اكثر
وان في صور افضل وشكرا

[شاعر المليون]

أخ معماري قطري ليش ما يسوي شيء النظام الي سويته ممكن تدعم لنا بالصور .

[almaf1a]

لا يتطلب تعديل لان الطابوقه عرضها 20 سانتي
انصحك باستخدام هذا الطابوق خصوصا في الوجهيه الغربيه والجنوبيه للفيلا

[معماري قطري]

إخواني انا قلت رايي من واقع دراسة وتجربة وخبرة، والتفاصيل شرحها مب سهل هنيه وحاولت أشرح لكن الكثير استصعبوا، واللي يقول اعزل جهات الشمس وخل الباقي أقول له درجة الحرارة توصل 57 في الظل، والإنتقال الحراري بين حيز وحيز يتم أما بسرعة أو ببطء لين تتوازن درجة الحرارة، حتى بين الأرض وأرضية المبنى فيه تبادل حراري، وصحيح حرارة الشمس قوية وتنقل بالإشعاع طاقة حرارية أقوى لكن العزل لازم لكل جدران البيت وحتى أهم من السطح، وإتجاه الحرارة داخل البيت من تحت لفوق لأن كثافة الهوا الحار أقل، فعندما تصطدم بطبقات عزل السقف ما تطلع بسهولة فتبدأ الحرارة في أعلى البيت بالإرتفاع وإلى درجة انه يشتغل المكيف بكامل طاقته ولا يلحق وتنزل هذي الحرارة تدريجيا لدرجة انك لازم تكون مقابل المكيف ومعرض لهواه علشان تحس بشوية برودة... أما إذا ركبت عازل صح بيكون المكيف يشتغل براحته وبتكون الحرارة تتسرب من البيت وما تدخل اليه الا بكميات قليلة يلحق المكيف يخلي بيتك بارد ويشتغل براحته وبتكون مخلي اتجاهه بعيد عنك لأن كل البيت بارد برودة مناسبة.

[معماري قطري]

أخ معماري قطري ليش ما يسوي شيء النظام الي سويته ممكن تدعم لنا بالصور .

يا اخوي إذا تدعيم ما تكفي الصور يبي لنا اثباتات وكتاب كامل .. أنا حاولت اشرح بطريقة مبسطة، وقلت الحرارة تتسرب بقوة وبسرعة من خلال المونة اللي هي الإسمنت اللي بين الطابوق، وتابع شكتبت في هالمجال واستشير متخصصين العزل الحراري، لتستشير مكاتب إستشارية استشير متخصصين عزل وبيفيدونك أكثر

[الزلزال]

استغفر الله

[A.L.I]

,

,


مرحبا


لا اخوي ما يحتاج تعدل شي
امورك طيبه
:)

موفق يارب

,

,


اخوك


شموخ دائم




بالفوم الأرزرق



:nice::nice::nice::nice::nice::nice: