صالون نسائي اسلامي

[الصايغة]

السلام عليكم,,,,

مثل ما قريتو من العنوان, صالون نسائي اسلامي,,,,,,,

انا أحب شغل الصالونات وايد ومن لما كنت صغيرة امارس التجميل بس بشكل بسيط لما كبرت توفقت تقريباً بسبب مسؤوليات البيت والعيال مثل ما انتوا عارفين.
والحين بصراحة حابة انطلق في هالموضوع,ايش هي فكرة مشروعي؟؟؟؟
صالون نسائي اسلامي وهذا الشي اللي بيميز صالوني يقدم كل الخدمات المعتادة في الصالونات ماعدا:
1- نمص الحواجب ونستعيض عنها بالتشقير
2- ازالة الشعر في المناطق المحرمة
3- قص الشعر قصير جداً اللي فيه تشبه بالرجال ويعلو أرنبة الأذن
4- الحمام المغربي
5- ما استقبل غير المحجبات بالنسبة لشغل الشعر فقط لأني سألت شرعا قالوا لي انتي تساعدينها على التبرج لكن خدمات ثانية عادي
6- أي خدمة أخرى يكون فيها مخالفة للشريعةلأني أبي رزقي يكون حلال% وانا واهلي واهل زوجي ولله الحمد محد فينا ينمص حواجبه لأن تربينا على ان هذا حرام
المشكلة لما سألت بصفة عامة عن هاموضوع 70% ما أيدوني للأسباب التالية:
1- كثرة هالمشروع في قطر
2- أكثر الزباين يروحون الصالون طلبا للخدمات اللي ما راح اسويها, ولو يبون خدمة ثانية انا موفرتها بعد ما راح ييون لأن ما راح يتعنون لصالونين عشان يخلصون شغلهم أكيد بيروحون مكان واحد متوفر فيه كل الخدمات.

يا ريت تعطوني رايكم وخصوصاً ان راس المال متوفر والحمدلله وتقريبا العاملات موجودات ...
وعندي صديقة دايماً تقول لي: من ترك شيئاً لله عوضه الله خيراً منه.

[ضوى]

توكلي على الله وماعليج من اللي يبي يكسر مجاديفج ، مرة على مرة وبيكونون لج زباينج ، وعلى فكرة صالون برلنت اللي صاحبته زاكو كانت ماتحف الحواجب تقول حرام وماتستخدمه بصالونها ، ونفس الشي الحمام المغربي ماعندها ، ولا عندها ازالة الشعر في المناطق المحرمة ، وماشاء الله مب ملحقة على الطلبات لا وبالحجز بعد ، وفعلا مثل ماقالت لج صديقتج من ترك شيئا لله عوضه الله خيرا منه

رايي توكلي على الله واذا قريب من بيتنا راح اكون اول زباينج :)

كل التوفيق يااارب

[محمد2009]

اولا اختى بارك الله فيج وكثر الله من امثالج الغيورات على الدين ولكن اعرفي ان ولله الحمد ان معظم الصالونات في قطر مطبقه هالامور ولله الحمد الخير موجود ونعم فيه فئه وقليله اهي بس الخارجه عن هالامر وربي يهديهم ويهدينا امين ..



رايي الشخص في البدايه ابدي بدون محل في البدايه وشوفي نفسج وكوني لج قاعده من الزباين وبعدين افتحي المحل بتكونين عرفتي اخطائج واحتياجاتج وبتكون نقطة انطلاقج اقوى لانج بتكونين مع خبره

وبعدين لاتحاتين الرزق ولان محد بماخذ رزق احد ولكن عليج هو تهيئة الاسباب والتخطيط السليم والتسويق الصحيح والموفق الله سبحانه

وكبدايه ظهري لج سجل تجاري واختاري الاسم الي تبينه وخليه عندج جاهز في البيت علشان لو بديتي تكونين جاهزه باذن الله وانا بالخدمه لاي شي اقدر عليه ولاتنسين الاستخاره فهي مهمه والله يوفقج لكل خير

[الزلزال]

توكلي على الله
والله يبارك لك ان شاء الله
والفكره جديده ولها زباين كثيره ان شاء الله

[solyamalenki]

آنا اشوف الفكرة حلوة وجديدة وبالعكس الصالون بيشتهر ويكون له زباين بالهبل توكلي على االله وابدي بتنفيذ الخطط

[الصايغة]

بصراحة اشكركم وايد على ردودكم , ما متوقعة اني بحصل كل هالتشجيع حمستوني وايد والله يجزيكم الخير

[وطن]

توكلي على الله وماعليج من اللي يبي يكسر مجاديفج ، مرة على مرة وبيكونون لج زباينج ، وعلى فكرة صالون برلنت اللي صاحبته زاكو كانت ماتحف الحواجب تقول حرام وماتستخدمه بصالونها ، ونفس الشي الحمام المغربي ماعندها ، ولا عندها ازالة الشعر في المناطق المحرمة ، وماشاء الله مب ملحقة على الطلبات لا وبالحجز بعد ، وفعلا مثل ماقالت لج صديقتج من ترك شيئا لله عوضه الله خيرا منه

رايي توكلي على الله واذا قريب من بيتنا راح اكون اول زباينج :)

كل التوفيق يااارب

بالضبط

والله يوفقج ان شاء الله

[الصايغة]

اشكر كل اللي قرا موضوعي ورد وعليه

[sweet qatar]

وعليكم السلام والرحمة..


اختي في البداية عندي تحفظ على مسمى صالون اسلامي.. بالاصل حياتنا كلها اسلامية :shy:

وكثير من الصالونات في قطر ما تقدم هالخدمات.. صالونات مشهورة و معروفة..


مثل ما ذكروا خواتي واخواني فوق.. توكلي على الله وابتدي المشروع..


حف الحواجب (بالطرق المعروفة) يكلف ماكسيمم = 30 ريال

في الوقت الي التشقير العادي بدون صبغة يبدا من 30 ريال ويوصل لـ 50 ريال

التشقير مع الصبغة يوصل في بعض الصالونات 70 ريال
واعرف وحدة تسويه على 100 و زحمة عندها لان شغلها نظيف..

حف الحواجب ممكن يستمر لشهر وشوي لكن التشقير كل اسبوعين..


حبيت ابين لج ان التزامج وابتعادج عن الحرام فيه مكسب لج..
وانتي ربحانة اكيد برضا رب العالمين..


الأساس عندج لازم يكون قوي.. يعني تجيبين وحدة تعرف تشقر وتصبغ عدل وتعلم باقي الستاف..

حتى لو طلبت وايد معليه في البداية لازم تدفعين عشان تكون لج شهرة وسمعة حلوة بين البنات..

المكونات الي بيستخدمونها لازم تتأكدين انها ما تضر بعميلاتج ولاتسبب حساسية..



خدمات كثيرة ممكن تقدمينها عزيزتي.. بالتوفيق ان شالله..

[pink pearl]

انزين كتبت ردي في ذاك
الموضوع !
خلاص بأنقله هني

[pink pearl]

الله يجزاج خير، والصراحة الله يكثثر من أمثال هالمسلمين الغيورين اللي يهمهم رضى الله قبل الفلوس والربح المادي ،، وأحب أذكرج بحديث الرسول صلى الله وعليه وسلم :

((من كان همه الآخرة جمع الله شمله وجعل غناه في قلبه وأتته الدنيا وهي راغمة، ومن كانت نيته الدنيا فرّق الله عليه ضيعته وجعل فقره بين عينيه ولم يأته من الدنيا إلا ما كتب له))

،، وبالنسبة لفتح الصالون الإسلامي فكرت فيها من قبل لكن أنصحج بالآتي:

1- أول شي عليج بصلاة الاستخارة، ثم الاستشارة من اللي حولج وعلى قولتهم "ما خاب من استشار ولا ندم من استخار" :)

2- أنصحج تدرسين المنطقة للي بتفتحين فيها الصالون، يعني الصوالين اللي جنبج كم عددها؟ قربها من المكان اللي بتسوين فيه الصالون؟ طبيعة خدماتهم؟؟

3- لو كان فيه أكثر من 3 صوالين قراب منج فأنصحج لا تفتحين هالمشروع، أما لو فيه أقل من صالونين فادرسي الوضع زين من ناحية أسعارهم وخدماتهم، وتوكلي على الله.

4- أنصحج تسوين فكرة جديدة في الصالون، يعني أحنا ما نبي copy من أي صالون، مثلاً:
* ممكن تسوين مكان صغير لألعاب الأطفال علشان تكسبين الزبونة وتريحينها،
*ممكن بعد تحضرين داعية تسوي محاضرات "لأن وقت اللي نقضيه بالصالون طويل من ساعتين وفوق"
* تفتحين مكاين عصاير طازجة، ماي بارد، وخفايف للزباين.
* خلي صالونج له ستايل خاص فيه، واللي تروح له ترتاح من الخدمات اللي موجودة.

5- صحيح ممكن تتعبين بالبداية، لكن العبرة تكون بالبداية القوية وشوي شوي سمعة الصالون الطيبة بتنتشر، واستخدمي المنتديات وتويتر وغيرها في الإعلان عن الصالون.

الله يوفقج في مشروعج، وإن شاء الله تنجحين يارب

[محمد الجفيري]

بالتوفيق يا رب

up up up

[الكولونيل]

الله يوفقك

[saryalia4u]

من ترك شيئاً لله عوضه الله خيراً منه



ولا يكون شغلج سيئه جاريه لج



وربي راح يوفقك ان شاء الله
بس ابتدي

[قطري شامي]

ولله اعرف اكثر من واحد كانو يبون يفتحون كوفيره لكن هونو بسبب حرمه نتف الحواجب وهسوالف..وانا واحد منهم كنت بفتح مع واحد من الربع عنده خبره بهسوالف ويعرف كوفيره ثقه....لكن هونت...المهم الله يوفقج...نعم التفكير ونعم الاختيار...و أشد على يديكي...ونعم صدقت صديقتك من ترك شيء لله عوضه..وهذا عن تجربه...وطبعا قبل تجربتي هذا كلام رسولنا الكريم فلا حاجه لخبرتي