][ إستفسار عن المواد والسعر قبل توقيع العقد ][

[مريش]

السلام عليكم ورحمه الله وبركاته

أخيراً كتبت موضوع هني بعد متابعه لهذا القسم سنه تقريبا :app:


حاب إستفيد من مشورتكم قبل توقيع العقد مع الشركه

فيلا عظم بلاستر + كهرباء وماء + تمديدات صحيه وصرف صحي

فيلا أرضيه مساحتها 580 متر

مواصفات أو موارد البناء والأعمال بأختصار
حديد اسود عادي - طابوق إسمنتي - اسمنت بورتلاندي
وايرات دوكاب اماراتي - البنالات مواصفات انجليزي والسكوتات نوع mk انجليز
التمديدات الصحيه : البيبات لون اخضر صنع الماني - بيبات الصرف الصحي
نوع بحرين ... وغيره + قاعده البيت وزياده حديد للمستقبل في حاله بناء دور ثاني
الحديد زياده وهذا الكلام من الأستشاري والمقاول بحيث بالمستقبل لو بابني طابق ثاني

وتقريباً مع العوازل أيضاً = راح يسويه لي بـ 800,000 الف بعد ماكان زايد 10,000
بدون عوازل = 780,000


رأيكم أخواني بالسعر معقول أو مناسب أو مبالغ !!

إنتظر رأي أخواني الخبراء

[شموخ دائم]

,

,


مرحبا


ما دام اسمك مريش مافي مشكله

هههه


اخوي الكريم

الله يوفقك يارب

اخوي بالنسبه للسعر تدخل امور كثيره فيه لو كانت شركه معروفه ومصنفه وسمعتها طيبه
وفيها مهندسين ومعدات وعمال مهره بقولك السعر ممتاز جدا
وبيتك فية ديكور خرسانه بالسطح زي الكورنيش ...الخ

اما اذا شركه صغيره وفيها فورمن وكم عامل بقولك السعر زايد
لان تقريبا بالنسبه للمساحه طالع عندك العظم بحدود 1300 تقريبا
وباقي المبلغ للسور وسعر السوق الان للعظم بحدود 1000 الى 1100

لكن مثل ما قلت لك اذا هي شركه معروفه وطيبه السعر هذا مافيه مشكله
لانك تشتري راحتك

المواصفات هي نفسها المتعارف عليه بكل البيوت تقريبا

بس عندي ملاحظه

العازل لاتوافق يسويه لك بعماله لازم شركه معروفه بالاسم
اما المسند او تدمر والموضوع هذا مهم جدا

بالنسبه للبيب فيتر لازم تحط بالعقد عمل اختبار ضغط لمده 24 ساعه
تحت اشراف الاستشاري

استخدام النايلون على اقواعد والجسور قبل الدفان
وايضا عمل صبيه خرسانه فوق الدفان مع شبك حديد
هذي الامور من الواجب انها تنعمل في كل بيت بس ذكرتها للعلم
لان شفت بيوت كثيره بالفتره السابقه مافيها هذي الامور واستغربت احنا في 2012
والاساسيات البسيطه ما تستخدم !!



موفق اخوي


اخوك


شموخ دائم

[مريش]

شموخ دائم :app:

أحييك أولاً على مساعده أخوانك في المنتدى
والله يجزيك خير على كل مساعدتك وملاحظاتك

بخصوص إني مريش :cry2:
الله يسمع منك والحمدلله على كل حال
مريش :cry2: هالكلمه كنا نقولها يوم هالحزه
لما الشيبه ولا العيوز يعطونا 5 ريال يقولون ربع الفريج
فلان مريش اليوم :app2: هههههههههه

الشركه بانيه لرجال أعرفه وراعي الشركه أعرفه
لكن كبنيان الرجال قالي أرقد وآمن أمورك سليمه
والمقاول ممتاز ومايلف ولا يدور والادوات وكل شيء ممتاز
وفوق هذا سألت عن المقاول تبع الشركه وسمعت عنه أمور طيبه
وبنيانه معرووف وسمعته طيبه ان شاءالله

بخصوص ملاحظه العازل ملاحظتك بمكانها
وأنا سألته وبأكد عليه إذا مو من شركه معروفه باعمل بدون عازل معاه
بس أخوي لو عمل عازل ونجحت تجربه الماء فوق السطح
هل تعتبر الشركه ناجحه مثلا ,,, وأقصد غير المسند وتدمر

بخصوص ملاحظتك للبايب فيتر والضغط إن شاءالله تنضاف للعقد


اما ملاحظتك الاخيره بسبب خبرتي البسيطه جداً لم أفهمها كثير
لكن بالعقد موضح طريقه البنيان مثل : - يتم صب جميع الخرسانه ماعدا صبيات
النظافه يتم عمل بلاستك عازل للقواعد بعد الانتهاء من بناء الطابوق ثم عمل بيتامين
للاساسات قبل عمل الدفان !!!

مادري هاذي النقطه الي تقصدها أو غيرها

وجزاك الله خير
ونستفيد من خبرتك الكبيره

[ميلاف]

نفس السؤال بخصوص العازل

لو سووو تست على العازل ولا نزل ماء فيه مشكله اذا كانت شركه مب معروفه ..

[wadha-qa]

ركز على كل التفاصيل في العقد عشان وقت التشطيب ما تقعد تزيد على الاسعار وتدفع الفرقيه
شوف من الحين شتبي تركب و اسعار السوق شلون عشان ما يحط لك في العقد اسعار مستحيل تحصلها بالسوق
بالتوفيق

[معماري قطري]

سو مواصفات مفصلة أكثر وحساب كميات وحط تفاصيل العازل صح وعدل، لأن فيه كم طريقة لعمل العازل ولازم تتوضح كرسم وكتوصيف، وأي شغلة الشركة غير متخصصة فيها أو غير مرخصة للعمل فيها لازم يوضحون قبل التوقيع من بيكون المقاول بالباطن، ودرجة تصنيفه وخبرته حتى تبعد عن المشاكل المستقبلية، وحساب الكميات المفصل أشياء كثير منه بتخليها عليك وبتكون عارف متى وقت توريدها وشكثر الكمية اللي تحتاجها، وبيكون كجدول تمشي عليه.

وبالتوفيق لك ولنا وللجميع إن شاء الله

[مضارب دوسري]

انا اشوف السعر مرتفع 100000
لو فرضنا ان العظم وبلاستر ب ١٠٠٠ المفروض يكون ٥٨٠٠٠٠
وهذا يعتبر سعر معقول
الكهربا لو قلنا حسبها ٧٠٠٠٠
والبايب فيتر لو كان الحساب مثلا ٢٥٠٠٠
بيطلع كله 675000
يعني زايد عليك السعر ١٠٠٠٠٠ وهذا سعر يكفي يخلص لك شرا البورسلان وبلاط الحمامات والاطقم بعد مع تركيبهم

[مضارب دوسري]

عازل الحمامات خله يسويه لك لان اوردي لازم يعبي الحمامات بالماي اسبوع لاكتشاف اي تسرب للماي
بس عازل السطح انصحك تروح لشركة تدمر او المسند
المسند للسطح سعرهم 80 للمتر وشركه معروفه
وتدمر اسعارهم من ٨٥ الى ١٢٠ وشركه معروفه بعد

[مضارب دوسري]

ركز على كل التفاصيل في العقد عشان وقت التشطيب ما تقعد تزيد على الاسعار وتدفع الفرقيه
شوف من الحين شتبي تركب و اسعار السوق شلون عشان ما يحط لك في العقد اسعار مستحيل تحصلها بالسوق
بالتوفيق

هلا اختي
صاحب الموضوع يتكلم عن عظم بلاستر وعازل
مب تسليم مفتاح الاخطاء اللي ذكرتيها دايم تكون في تسليم المفتاح

[مريش]

ميلاف
سوال مهم لكن بصراحه لو تفكر فيها تقول ليش اوهق عمري بشركه غير
معروفه ,,, اجيب شركه معتمده وقويه واطمن قلبي


ودها
مشكوره أختي بس الحمدلله ماني حاط تشطيب
ولو حطيت تشطيب راعي الشركه اعرفه
وقال الي تبيه بيصير :app: ( على فكره الشركه تم تغييرها )


معماري قطر
الشركه الحاليه الي انا بابني عندها ماتعمل العازل وقالي راعي الشركه
ان تتعاقد مع شركه معروفه افضل لك ولنا

مضارب دوسري
فعلا والله كلامك صحيح وتم تغيير الشركه الى شخص أعرفه
وأثق فيه كثير ... عطاني 640 ألف مع كهرباء وصرف صحي كامل

الحمدلله على كل حال

وشكراً للجميع والله يوفقنا وياكم

[معماري قطري]

بالتوفيق لك ولتتعاقد في العازل الا مع المسند أو تدمر

وخلك دوم خطوه جدام علشان تضمن بنيانك يكون بطريقة ترضى عنها وينتهي بسرعة

[مريش]

معماري قطر

شكراً لك على إهتمامك ونصايحك
وووالله ودنا بنصايحك أكثر لنستفيد أكثر
وبعد نتجاوز الاخطاء الي يخطأها أي شخص بنى بينه سابقاً

مشكور على الاهتمام

والله يقدرنا ونبني بيت يرضينا وحتى لو مارضانا
الواحد يقول الحمدلله بيت يضم العائله أغلى من أي شي
خصوصاً بالوقت الحالي :nice:

[الكنج]

فرق 160 الف تكفي حق الابواب والدرايش والسراميك والبورسلان اذا تبي .... بالتوفيق اخوي .

[رآعي موآجيب]

انا اشوف السعر مرتفع 100000
لو فرضنا ان العظم وبلاستر ب ١٠٠٠ المفروض يكون ٥٨٠٠٠٠
وهذا يعتبر سعر معقول
الكهربا لو قلنا حسبها ٧٠٠٠٠
والبايب فيتر لو كان الحساب مثلا ٢٥٠٠٠
بيطلع كله 675000
يعني زايد عليك السعر ١٠٠٠٠٠ وهذا سعر يكفي يخلص لك شرا البورسلان وبلاط الحمامات والاطقم بعد مع تركيبهم


الرجال يقول فله ارضيه طال عمرك

يعني مساحة الفله الـ 580 كلها حفر وخرسانه

هذا اللي رفع السعر

لو كانت الفله دورين كان وفر حوالي 150 الف ويمكن اكثر