استفسار : فندق كراوان بلازا \ دبي

[همي رضاكم]

السلام عليكم ورحمة الله وبركاته ..

ابي اسالكم عن فندق كراوان بلازا الي على شارع الشيخ زايد ..

لانه عندي دورة ودوامي مسجليني اهنااك ..

ابي اسال عن الغرف ..

واذا كان نظيف او لا ..

وياليته الي سكنه يعطيني خبر عنه ..

وشكرا ..

[alwahesh]

فندق كبير ولكن قديم يمكن من 15 سنه او اقل

بعض الغرف تطل على بركة السباحه

انا اقترح عليك فندق شانقريلا على نفس الشارع وقريب من كراون بلازا

واهم شي يكون الحجز من الدوحه او من مطار دبي

فندق جديد ونظيف و6 نجوم او 7

[عزووز قطر]

مثل ماقال اخوي الفندق قديم بس الميزة الحلوة اللي فيه ان تحت الفندق فيه مطاعم كثيرة
والميزة ان مكان الدورة في الفندق يعني توكل على الله علشان ماتحاتي التأخير وتتوهق مع الزحمة

والله يوفقك

[UAE-SOUL]

نصيحة لا تسكن في الفندق قديم ومايسوى الصراحة مقارنة بالفنادق الثانية شوف لك شي في شارع الشيخ زايد ابرك منة الصراحة

[alwahesh]

وشهد شاهد من أهلها

[وطن]

كراون بلازا وايد قديم
ومدخلهم كئيب

وشانغريلا الغرف اللي في طابق Club حلوين
الغرف العادية مب شي
ما عجبتني


غرف ذا ادرس دبي مول حلوة

[abu ali1]

سكنت فيه اسبوع سنة ٢٠٠٧... وكان الفندق ما عليه كلام ....
واذا سكنت فيه لا تنسى تجرب المطعم الايطالي اللي في اللوبي (هذا اذا كان موجود).. تحياتي.....

[UAE-SOUL]

وشهد شاهد من أهلها

عفوا اخوي بس انا من هل قطر

[Mohammed2]

الفندق قديم بس حلو
وفيه محلات كثيره تحت ومطاعم وسوبرماركت وصيدليه
كل شي قريب

وثاني شي بخصوص اللي قال فندق شانغريلا ٧ او ٦ نجوم !!!!!
اصلاً مافي فندق على شارع الشيخ زايد عدد نجومه اكثر من ٥

[بعيد المرامع]

اهم اثنين اللي اسمهم كراون بلازا ، بس انت تقصد القديم لي بشارع زايد

هو قديم بس مجدد ، وحلو ماعليه خلاف . سكنت فيه مره

لايفوتك مطعم التنور بالفندق ، الاكل طيب ماشاء الله ، بس انتبه لازم حجز ولايكون بايام العوائل

بس نصيحة ، دام دورة العمل هناك مافيه احلا من انك تسكن بنفس الفندق

والله انا على كثر الدورات ، لازم اسكن بنفس الفندق حتى لو كنت ادفع الفرق على حسابي ، تخيل تقوم الصبح قبل الدورة بعشر دقايق تغسل وتنظف وتنزل للقاعة ، احسن ولا تجلس برا الفندق وتشغل سيارتك وهاتك يامواقف واشارات وانت فعلا في غنى عن هالشي

غير انو الحين حزة الصيف والرطوبة والحر ، تخلص دورتك ع الظهر ، تتغدا وتصعد غرفتك تريح

بالتوفيق

[همي رضاكم]

يعطيييكم العافيييه ..

انا ما جربته من قبل .. بس ناس وايد اتقول لي الفندق مب شي ..

فخايفه من هالشي والله ..

[مرتبش]

سكنته مرة وكان مزعج من بعد المغرب بسبب وجود اكثر من ملهى ليلي فيه

[عقار]

كراون بلازا ((((( عفسه من قلب ))))) لا يصلح بتاتا للعوائل
انت بس اتمر قدام بابه ودك تشل عليه بسرعه

[البدر 8]

فندق قديم والغرف الي مطله على الشارع مزعجه لقدم العزل الصوتي فيها

[زعبي]

اصحك تسكن فيه الفندق سيء جدا وبالعربي المختصر مكان للصايعين لأن فيه أكثر من ملهى ليلي والليل ازعاج ومناظر سيئة قدام باب الفندق مراهقين حلاقات شعرهم غريبة ولابسين سلاسل ورقص وتجمعات قدام الفندق.

نصيحة لا تسكن فيه لأنه بالليل ازعاج بمعنى الكلمة, وغير حجزك لو على حسابك