مساعدتكم اخواني

[المرونة]

السلام عليكم ورحمه الله وبركاته

بغيتكم تساعدوني ابغي اشتري ادوات الرش والمبيدات الحشرية بنفسي بس ابي اخذهم من مكان ثقة علشان ارش

[السد]

وليش تشتري وتوهق نفسك في حفظ المبيدات الحشرية
فقط اتصل على البلدية وهم بيجون يرشون لك
ووفر ميزانيتك

[فريج النجادة]

كلامك صحيح أخوي السد

رش البلدية ممتاز عن تجربة

[المرونة]

انا اقصد ابي اخذ قطع صغيرة للحشرات اوزعها حولين البيت من بره خصوصا جنبي محطة كهرب وتطلع منها بلاوي وكل 3 شهور يجون البلدية ويرشون ومافيه فايدة قلت باخذ منتجات اتكون اصلية

[ريان]

فيه محل في سوق الخميس والجمعه

اخر بلوك من جنوب محل زراعي

[معماري قطري]

انا اقصد ابي اخذ قطع صغيرة للحشرات اوزعها حولين البيت من بره خصوصا جنبي محطة كهرب وتطلع منها بلاوي وكل 3 شهور يجون البلدية ويرشون ومافيه فايدة قلت باخذ منتجات اتكون اصلية

ذكرت شيء مهم إخوي

اللي هو محطات الكهرب الفرعية، فهذي بنيانها بيئة مثالية للحشرات والقوارض، وبعض الناس قليلين الوعي يرمون مخلفات طعام هناك،، يعني المشكلة من جهتين، جهة التصميم اللي فيه فتحات كثيرة لدخول الحشرات، وجهة الناس اللي منهم من يضر نفسه بنفسه،،،

ذكرتني بمشكلة راسلت البلدية بسببها وما قصروا في جزئية وقصروا في الحل الكامل.. فوراء بيتي توجد قطعة أرض بعرض مترين ونص أو 3 أمتار ومحاطة بالجدران من أربع جهات وهذي قطعة فاصلة بين أرض حكومية وأراضي مبنية ومسكونة الحين، والمشكلة هذي الارض استوت مكب نفايات وطلعت فيها قوارض وتم القضاء على القوارض طبيعياً بواسطة ثعابين، وأنواع الله لا يراوي مسلم منها من الثعابين،، صدقوني تتسلق الحايط وتدخل البيت في الحوش وما صدقت كنت متعجب من وين تدخل الا بعد مشاهدتي برنامج عنها.

هل وصلت بنا الحال إلى أن يكون مصممي هذه المباني قليلي الخبرة لهذه الدرجة؟ وهل لا توجد حلول جذرية لهذه المشاكل؟

[معماري قطري]

حبيت أضيف إن طول قطعة الأرض الفاصلة يوصل قريب من 400 متر وتسرح وتمرح فيها القوارض والحشرات

[ahmed jasim]

الأخ معماري
نزل موقع baladiya على الأيفون
وإرسل صورة لمكان الثعابين

[معماري قطري]

كلامك صحيح أخوي السد

رش البلدية ممتاز عن تجربة

أي ممتاز يا اخوي جرب رشهم وجرب شركة خاصة،، هم يجون بدون نفس ويرشون من فوق لفوق ولكن الشركة الخاصة ترش المنهولات بعد ما تفتحها وترش كل مكان ويقولون لك 6 شهور ضمان وهم ضامنين قوة مبيداتهم.

[معماري قطري]

الأخ معماري
نزل موقع baladiya على الأيفون
وإرسل صورة لمكان الثعابين


ما قصروا يا اخوي جاو وسووا الواجب المقدور عليه وحتى هم صوروا، بس جذور المشكلة باقية اللي هي هذي الأرض اللي حتى لو حد يبي يسوي جريمة بسهولة يتسلل ورا حول عشر بيوت أو أكثر من ضمنهم مجمع، إنت متخثيل الوضع؟ أرض فاصلة بين بيوت وبين أرض حكومية ومسوينها مثل داعوس ورا البيوت طوله فوق 400 متر وعرضه قريب مترين ونص يعني حتى الشيول قالوا صعب يدخلها علشان يشيل الكشره وبقايا البنيان، والناس ما يقصرون كلٍ يقط فيها كشره.

تكرمون على كلمة تشمئز منها نفوسكم، وسلامتكم.