صور خطيرة وعالية الدقة(طيب الرقدة) أين الأسرةقضية خطيرة جدا

[عنزي قطر]

في طيب الرقدة تحدث هذه المشاهد الخطيرة التي تمثل جريمة ونحن بدورنا
نسأل اين دورة الأسرة .





والسؤال الأن للاخوة الاعضاء .


بماذا تصف هذة المشاهد



1_هل تراها جريمة؟

2_هل تراها هواية ومتنفس لطاقات الشباب؟

3- هل تؤيد عقوبة السجن على مرتكب هذه الممارسات؟

4_هل تتكفي بالغرامة والمخالفة ؟

5_ هل تؤيد سحب السيارة لمدة عام؟

6_ هل تؤيد مصادرة السيارة

7_ ومن هو المسؤل الاول

8_ ماهو الحل برأيك لحل المشكله



شارك معنا برأيك


اليكم اخطر الصور والاستهتراء
والاعمار للاسف الشديد جدا بين 15 _24




طيب الرقدة التاريخ 25/5/2012

http://www.enazi.org//uploads/images/enazi.netfd6b4748ca.jpg



http://www.enazi.org//uploads/images/enazi.netcd8efe60ab.jpg




http://www.enazi.org//uploads/images/enazi.net784df74689.jpg

http://www.enazi.org//uploads/images/enazi.netdc369e2270.jpg (http://www.enazi.org/)


http://www.enazi.org//uploads/images/enazi.net0dd60d0c1b.jpg


هنا نشاهد صاحب السيارة الهوندا يشاهد ولايستطيع المرور من الخوف وعلامة التعجب
http://www.enazi.org//uploads/images/enazi.netcab38b116b.jpg




واخيراً البعض يقول لماذا كثرة الوفيات اين دور الاسرة وهو الدور الأساسي



المصدر مرور الخليجي التطوعي


http://www.almror.net/vb/showthread.php?p=885

[عس عس]

والله يحق لهم الشباب الصراحه

عندنا حلبه مايفتحونها الا في كاس الامير او في شهر رمضان

اشدعوه ولا حد ينقز ويقولي ان كل ويكند مفتوحه

وتسلم ياراعي الموضوع

خشمك ><

[الأغر]

مشكله اهل الفتاوي الباطله :) .. يعطيك العافيه يا عنزي

[قطري !]

أأأمحق أمه اسلاميه هذا جيلها




لاحد يقول لي هذولا بتشوفهم وووو الخ ..




عز الله ماتربوا عدل ..



كلش ولا ابو عصاقيل اللي يركض على القااار مالت عليك

[الزعفراني]

حركات يابلفيت يقلدون السعوديين ، ظاهره جديدة ذي ، تستدعي تدخل الجهات الأمنية لوقف مثل هالمهازل .

وبالنسبة للي في الصورة اتمنى سجن أولياء أمور هالمبزره لمدة شهر أقل شي :)

وأقل القليل استدعائهم وعرض هذه الصور عليهم .

[شبح الصمت]

كل ما تحكر لهم يزيدون

خط طيب الرقده تصير فيه مطاردات الدوريات وقاموا يعرفون حق الدوريات

يبيلهم كمين ويصيدونهم ويجرونهم كل واحد من علباه

يخلونهم يصبغون هالشوارع ويرتبونها وتنحجز مواترهم ولياسنهم تنسحب منهم لمدة سنه كامله

وولي امره يوقع على تعهد لجل يعقل ولده ويحترم شيبته مسكين بس كتخويف ولجل يحشم لحيته

اذا بعضهم يحشمون لحى شيبانهم استغفر الله العظيم

الله يحفظهم ويستر عليهم

[بوجاسم566]

1_هل تراها جريمة؟

نعم . لانهم في سن المراهقـة ومايدرون شنو بيكون وضعهم اذا صار حادث لا قدر الله يذبحون نفسهم

ويذبحون خلق الله معاهم

2_هل تراها هواية ومتنفس لطاقات الشباب؟

اذا كانت هوايـة عندهم ساحة الصناعيـة خل يروحون اهناك في اسعاف و في مطافي وكل سبل السلامة
بس تلقاهم يهال وماعندهم لياسن وهاي مب خطأهم خطا اولياء امورهم الى يخلون عيالهم في الشوارع
او يعطونهم مواتر

3- هل تؤيد عقوبة السجن على مرتكب هذه الممارسات؟

اذا كان ١٨+ انا أويد وبشـدة لكن اذا كان اقل من العمر اتمنى انهم يسجنون ولي امر الى ماعطة الموتر

4_هل تتكفي بالغرامة والمخالفة ؟

لا .. المخالفة بتطيح عن الى عندهم واسطات للاسف يعني محد بيفتكر فيها

5_ هل تؤيد سحب السيارة لمدة عام؟

نـعـم مع دفع رسوم الحجز ضعف العادي

6_ هل تؤيد مصادرة السيارة

وبشــدة

7_ ومن هو المسؤل الاول

اوليـاء الامور نفس ماوضحت في الاسئلة السابقـة او رفاق السوء

[فابريغاس]

متطوع !! السؤال وين إدارتك عن المهازل ولا بس جاهزين للمخالفات عند الإشارات

[intesar]

1_هل تراها جريمة؟

نعم

2_هل تراها هواية ومتنفس لطاقات الشباب؟

لا

3- هل تؤيد عقوبة السجن على مرتكب هذه الممارسات؟

نعم

4_هل تتكفي بالغرامة والمخالفة ؟

الحبس

5_ هل تؤيد سحب السيارة لمدة عام؟

نعم

6_ هل تؤيد مصادرة السيارة

نعم

7_ ومن هو المسؤل الاول

الأهل

ودمتم بحفظ الرحمن..

[تحداني]

صباح الخير على الجميع

المراهقه وطيش الشباب يلعب دور كبير في هالسلوكيات
الشباب من صغرهم يحبون السيارات والسرعه والاستعراض ما نقدر نفسرها سلوك خاطئ
كثر ما نقول انهم في مرحله عمريه خطره والله يصلحهم ويهديهم ويلهيهم في شي مفيد



جملك الله برضاه

[Mr. H]

أعرفهم

[super jet]

غريبه توايرهم مهيب بالوووون !!! يعني اللي يبي يحفص ويضر العالم
مهوب لازم تواير بالون ياللي منعتوه وعفستو سوق التواير كل شي صار
سعره دبل ايش استفدنا من قرار لجنتكم الموقره !
على فكره من اسبوع رحت ابي اركب تواير لموتري ( شواهين ) كانوا ينباعون
على 450 ريال تدري بعد قرار منع القنبله الموقوته ( بالون ) بكم صار تاير شاهين
بــ 900 ريال طبعا من بركات ادارة الخرجي واللجنه الموقره وطبعا قلت حسبي الله ونعم الوكيل
فيكم كانكم بتحدوني اسافر واقبض خط ولا احس اني مغفل وينلعب علي بالسعر الغير مبرر هذا !!
عفستوا سوق التواير الله لا يسامحكم !!

اقول سلم على الخرجي وقوله
هذا هو صميم عملك ثبت دوريات هناك دامكم تعرفون الامور هذي واحجزوا السيارات
هذي وخذوا عليهم تعهدات ترى المجرم لين مسكوه ما يقولون له هات ابوك وامك !
اذا كانوا صغار دون 18 سنه ومن غير لياسن استدعوا اولياء امورهم وحملوهم الخطأ
كامل وخذوا عليهم تعهدات ,, الية القضاء على هالظاهره عندكم مهيب عندنا ولا في مواضيع
تنشر انتوا جهه جزائيه وتنفذ القانون اتمنى مدير المرور يكثف اهتمامه على ها لفئه ويكثر
المطبات في شوارع الفرجان بين البيوت لان العالم تسرع بين البيوت يعني بالعربي اتمنى الاهتمام
بأمور السلامه اللي مامن وراها فلوس مخالفات !!!!!!!!!!!!!!!!!! لانكم مهتمين في الامور اللي فيها
مخالفات وفلوس وهذا شي واضح للعيان !!!!!

[تمون]

والله مب هين الهايلوكس هههههههه شكلة عليه مكينة زد هههه

الله يهدي هالشباب والله العقل نعمة

[ضوى]

فضاوة + عقل فارغ + روتين حياة عقيم + عدم وجود توجيه من الاهل = التهور اللي نشوفه

[عنزي قطر]

والله يحق لهم الشباب الصراحه

عندنا حلبه مايفتحونها الا في كاس الامير او في شهر رمضان

اشدعوه ولا حد ينقز ويقولي ان كل ويكند مفتوحه

وتسلم ياراعي الموضوع

خشمك ><


شكرا اخوي على التعليق بارك الله فيك وصوتك وصل ان شاءالله

[قطري !]

والله يحق لهم الشباب الصراحه

عندنا حلبه مايفتحونها الا في كاس الامير او في شهر رمضان

اشدعوه ولا حد ينقز ويقولي ان كل ويكند مفتوحه

وتسلم ياراعي الموضوع

خشمك ><



ياربهم يفتحون التجنيد للشباب احسن لهم



بدل الخرابيط اللي مالها داعي




شوف حوادث الاستعراض ويش سوت في السعوديه اخرها يوم الجمعه الصبح وفي اليوتيوب

[عنزي قطر]

شكرا للجميع على الردود

ارجو من الاخوان والاخوات عدم الخروج من صلب الموضوع حتى تحقق الأستفادة الكامله من طرح الموضوع .

وردك أمانه



وسنعيد الأسئلة مرة أخرى



بماذا تصف هذة المشاهد



1_هل تراها جريمة؟

2_هل تراها هواية ومتنفس لطاقات الشباب؟

3- هل تؤيد عقوبة السجن على مرتكب هذه الممارسات؟

4_هل تتكفي بالغرامة والمخالفة ؟

5_ هل تؤيد سحب السيارة لمدة عام؟

6_ هل تؤيد مصادرة السيارة

7_ ومن هو المسؤل الاول

8_ ماهو الحل برأيك لحل المشكله



شارك معنا برأيك

[ريتويت]

والله يصلحهم ويهديهم

يارب اسالك حسن الخاتمه

[بوخالد2]

لمسكين راعي العراااوي ههههههه

نرجع للموضوع

الدور الكبير و الاهم هو دور الاسره اين هم من تربيه اعيالهم

يعني اشوف سيارتي ولدي بالشكل هذا ولا اكلمه ؟؟؟

ليش عمي الاخو مايشوف شكل السياره البشع

بس فالحين يقطون اللوم على المرور و المسكين الخرجي مدير المرور

انتوا اللى اللوم عليكم يااولى الامور

[عزووز قطر]

كلنا مرينا في هالمرحلة وهذه هواية اغلب شباب الخليج
والتحفيص في الصور الموجودة مب بسرعات عالية مثل الاخوة السعوديين ،،،

ومن وجهة نظري الحل يكون بفتح ساحة الصناعية طول الوقت مب في اليوم الوطني ونهائي كأس الامير !!!

والشي الثاني اشوف ان مكانهم بعيد عن الناس والمناطق السكنية ووضعهم افضل من الشباب اللي يستعرضون في الفرجان

وفي النهاية كل شاب عنده طاقة ووقت فراغ ومن وجهة نظري يمارس هواية الاستعراض احسن من بعض الشباب اللي يضايقون العايلات والبنات في المجمعات أو يدمر حياته بالمخدرات والحشيش مثل اللي نشوفه في الدول المجاورة....

[R 7 A L]

متطوع !! السؤال وين إدارتك عن المهازل ولا بس جاهزين للمخالفات عند الإشارات



نعم السؤال الذي نطرحه

نتمنى نلقى إجابه شافيه و وافيه بدون لف أو دوران


هالمكان على مستوى قطر الكل يعرف انه للاستعراض

معقوله رجال المرور مايعرفون !!!


شنو بيضر لو دوريتين توقف هناك !!!


وين دور التحريات الى كنا نشوفها في التسعينيات !!!

[Dana’1]

يعني الي افهمة ان كل الرجال الي هنا ما قد سوها في مراهقتهم سوا هم او مع ربعهم؟!!

صحيح الي يصير غلط،،،وممكن الواحد منهم يخسر نفسة او احد من الشباب الي حولة ويقطع قلب اهلة
الله يهديهم ويحفظهم
لازم يصير في مراقبة للطرق او يحطون لهم مكان يطلعون كل الي براسهم مو شوي ويطلع

ويكون على طول مفتوح حالة حالة النوادي الرياضية

ولا تدخلون السعودية بالســــالفة..ههههه

والسلام ختام

[UAE-SOUL]

الي قاعد يصير غلط واكبر غلط
لكن لازم نشوف ليش الشباب يسون جي يعني في حد يسوي جي 24 ساعه اكيد لا لان عندهم طاقه ويفرغونها بالي يسونه لو في شي ثاني يفرغون في طاغتهم جان ماسوو جي ولا عالاقل مارح يكون عندهم وقت وايد

والاهل بعد مايهملون عيالهم الي ماعندهم لياسن ويخلونهم يركزون على مستقبلهم ابرك اللعب في الشوارع

[شبح الصمت]

نعم السؤال الذي نطرحه

نتمنى نلقى إجابه شافيه و وافيه بدون لف أو دوران


هالمكان على مستوى قطر الكل يعرف انه للاستعراض

معقوله رجال المرور مايعرفون !!!


شنو بيضر لو دوريتين توقف هناك !!!


وين دور التحريات الى كنا نشوفها في التسعينيات !!!



يقولك يجون الدوريات شله تدعس متوجه شمالي الخط ويطيحون بعضهم ينصادون صوب الزروع

وشله ترد مواجهة الدوريات وهذولي الخطر كلهم يعني يجونك في وجه الدوريه ويكونون البعض منهم مقشع اللوح ما تقدر

وراعية الدوريه ما يقدر يطارده لانه يمكن يسبب حادث له والا شيء والا يقدر يسجل الرقم !!!

فعطني الحل اذا المستهتر مقلوع وانت خايف تلحقه ويصير فيه شيء وانت تتحمل مسؤوليته لا قدر الله ..


ترى يا كثر الخطوط بتصيدهم في خط بيطلعون لك الف خط وخط وما يطرون على بالك هالخطوط !!

التوعيه والوالدين

يعني اشلون موتر يدخله البيت كذى !!!!


اشلون ابوه والا اخوه والا احد من عيال عمه يشوف موتره ويسكت !!

[ألعب بعيد]

انا واحد من اللي يستعرضون هناك


بطلو لنا الحلبة الموقرة اللي صايرة في اي بي ذيك الساعة بنقول اوكي احنا غلطانين
لعلمكم المواتر اللي في الصورة كل واحد فيهم عمره فوق 18 ويداومون بعد مب اطفال

رفيجي منقلب هناك قبل كم يوم وبغى يذبح ربعة لخويا ماقصرت فديتها انا حفت الشارع عشان اي واحد يطلع حصا وموتره شايح ياكل قلبة سريعة واسال مجرب

بررررب

[R 7 A L]

يقولك يجون الدوريات شله تدعس متوجه شمالي الخط ويطيحون بعضهم ينصادون صوب الزروع

وشله ترد مواجهة الدوريات وهذولي الخطر كلهم يعني يجونك في وجه الدوريه ويكونون البعض منهم مقشع اللوح ما تقدر

وراعية الدوريه ما يقدر يطارده لانه يمكن يسبب حادث له والا شيء والا يقدر يسجل الرقم !!!

فعطني الحل اذا المستهتر مقلوع وانت خايف تلحقه ويصير فيه شيء وانت تتحمل مسؤوليته لا قدر الله ..


ترى يا كثر الخطوط بتصيدهم في خط بيطلعون لك الف خط وخط وما يطرون على بالك هالخطوط !!

التوعيه والوالدين

يعني اشلون موتر يدخله البيت كذى !!!!


اشلون ابوه والا اخوه والا احد من عيال عمه يشوف موتره ويسكت !!



اخوي شبح
خلنا نكون واقعيين كوننا في مجتمع صغير ونعرف أكثر الأمور

الى يمتلكون سيارات مثل اشكال السيارات الى في الموضوع
مستحيل يكون له ولي أمر يقدر يسيطر عليه
يا أنه يتيم
أو أبوه مغلوب على أمره ( مسيكين )
على شأن كذا الحكومة الله يطول بعمرها إنشأت قسم خاص ( سجن الأحداث ) ينحذف فيه على شأن يربيه القانون .


تحياتي

[شبح الصمت]

اخوي شبح
خلنا نكون واقعيين كوننا في مجتمع صغير ونعرف أكثر الأمور

الى يمتلكون سيارات مثل اشكال السيارات الى في الموضوع
مستحيل يكون له ولي أمر يقدر يسيطر عليه
يا أنه يتيم
أو أبوه مغلوب على أمره ( مسيكين )
على شأن كذا الحكومة الله يطول بعمرها إنشأت قسم خاص ( سجن الأحداث ) ينحذف فيه على شأن يربيه القانون .


تحياتي





اش رايك انه مثل ما قال العب بعيد

انهم موظفين !!!

تصدق بس المخ في الباي باي

ربشه وطيش وفلان راعي الدتسون شوفه

وانا واستعرض وهالامور كلنا مرينا على هالمرحلة بس نفس هالشباب ربي يحفظهم لا

اخبر من وعيت على هالسوالف على كثر ما كنت اسوي اسوي كنت اشل وبعد في اماكن خاليه لجل لي صادني شيء لا قدر الله ما يصيد احد معاي ..

اما ذولي شوفهم بشر وجمعه وبرودكاست وتجمع و 505 وشرشور 007 و ما يهزك ريح واسماء كثيره

وين تقدر توقفهم اذا اهم ما وقفوا نفسهم محدن راح يوقفهم صدقني

وبقولك الي بيجي متعني ترى لاحظ النمره ملصقه بستيكر يعني تحثيله

خلاص دورني لو قدرت تمسكني

الله يستر عليهم

:nono:

[BIG-VEGA]

أأأمحق أمه اسلاميه هذا جيلها




لاحد يقول لي هذولا بتشوفهم وووو الخ ..




عز الله ماتربوا عدل ..



كلش ولا ابو عصاقيل اللي يركض على القااار مالت عليك

(كنتم خير امه )

مهما وصلنا من فساد ...راح انضل احسن امه

[بودحوم]

لوالآمر بيدي ستكون العقوبات كالتالي :



1- مصادرة سيارة المستهتر وبيعها لصالح علاج المصابين في الحوادث .

2- مصادرة سيارات المتجمهرين في أماكن الأستعراض .

3- سحب الرخصة لمدة سنة في المرة الأولى وسحبها نهائياً في حالة العودة .

4- السجن مع النفاذ لفترة لاتقل عن 6 شهور لأصحاب السيارات ومرافقيهم والمتجمهرين للتشجيع .
ومضاعفة العقوبة في حالة التكرار

[Paydayyy]

والله يا اخوانى القصور من اليهل موب من الشباب.
الشباب يبون من يتابعهم, من يهتم فيهم, من يحسون انه فاهم اى شيى يعملون, بس المشكله هون ان الاهل يتركوهم ويخلوهم يعملون اللى بكيفهم.

الحديث: كلكم راع وكلم مسؤل عن رعيته.

والله الهادى

[fifa 2022]

1- هل تراها جريمة؟
نعم وجريمة كبيرة جداً

2- هل تراها هواية ومتنفس لطاقات الشباب؟
لا .. بل استهتار وقله فكر وعقل محدود، وعدم تربية .. وقله الوازع الديني .. والدليل الي يشوفهم يقول عنهم ((((( عيال شوارع )))))


3- هل تؤيد عقوبة السجن على مرتكب هذه الممارسات؟
واولهم هل اربعة الي داخل السيارة والي يركض في الشارع .. سجن خمس شهور .. مع مصادرة السيارة خمس شهور عشان الاب يصحى من النوم
(( البيات الشتوي الي هو فيه ))

دائماً الكف الي يعور يصحي .. وهذه الفئه يبيلها تصحى ، بكف يعور وايد عشان الباقي يصحون


http://www.enazi.org//uploads/images/enazi.netfd6b4748ca.jpg


4- هل تتكفي بالغرامة والمخالفة ؟
لا لا لا .. سجن خمس شهور .. مع الدراسة الشاقة اذا كان طالب .. واذا موظف دراسات عليا او كورس لغه انجليزية في السجن

والمتجمهرين للتشجيع 100 جلده لكل واحد

والله بجوفون الشوارع فاضية هههههه ههههههه هذا احسن عقاب وحل لهم


5- هل تؤيد سحب السيارة لمدة عام؟
نعم


6- هل تؤيد مصادرة السيارة
نعم


7- ومن هو المسؤل الاول
اهمال التربية من الصغر من قبل الاهل وقله الدين وترك المساجد


8- ماهو الحل برأيك لحل المشكله
ارجع رقم 4



الي قاعد يصير حرام المقابر انترست شباب في عمر الورد

http://upload.up3.cc/uploads/images/up313381183691.gif (http://upload.up3.cc/)

[بوعلي2]

هالمكان قديم على ايام جيلنا ولحد الان ماشي شدعوه وين الشرطه عنه؟

سنيييين هالمكان متوارث

الله يهدي الجميع يارب لما يحبه ويرضاه امين

[حسن]

الحل معاهم سكتون ام دربيل في التواير وعقب صيدهم مثل الفيران وقطهم سجن بدون مكيفات واللي يسئل عنهم يدخل معاهم لان يخيس معقوله محد يقدر يرد ذا الهمل

[R 7 A L]

الحل معاهم سكتون ام دربيل في التواير وعقب صيدهم مثل الفيران وقطهم سجن بدون مكيفات واللي يسئل عنهم يدخل معاهم لان يخيس معقوله محد يقدر يرد ذا الهمل


لايسمعونك اخوي حسن
أصحاب التربية الحديثة الى محتمين بالفلسفة وعلم النفس والخرابيط
ويقولون لاتعقد الاجيال الجايه وتجيهم عقد نفسيه :mad:

[العميد الركن]

المسؤل الأول الربع

الأهل وشدراهم ان ولدهم يطلع يقاحص مع ربعه في الشوارع

يبغيلهم هوز على ظهورهم


رفعت ضغطي ياراعي الموضوع

[al-buainain]

والسؤال الأن للاخوة الاعضاء .


بماذا تصف هذة المشاهد



1_هل تراها جريمة؟

نعم في حق انفسهم ولكن...............
2_هل تراها هواية ومتنفس لطاقات الشباب؟

نعم ولكن........
3- هل تؤيد عقوبة السجن على مرتكب هذه الممارسات؟

مؤيد في حالة اذا كانت في مناطق سكنية ومأهوله ولكن .....
4_هل تتكفي بالغرامة والمخالفة ؟

نعم ولكن ..........
5_ هل تؤيد سحب السيارة لمدة عام؟

لا ولكن........
6_ هل تؤيد مصادرة السيارة

اكيد لا ...........ولكن ......
7_ ومن هو المسؤل الاول

اكيد الاسرة وما في حد غيرهم ولكن ......
8_ ماهو الحل برأيك لحل المشكله


ايجاد البديل

الحل واحد ما في غيره استحداث ساحات جديدة للشباب باشراف المرور والاسعاف ودخولها بسعر رمزي جدا مهب مثل الساحه الحالية لانها عالمية واشلون ايخلون الشباب يدخلون

اذكر من زمان كنا انتجمع نشوف اشرطة استعراض الكويت يعني هم فكرو صح واقدرو يلملمون الموضوع


واذا توفر البديل عقب حطو المخالفات الي تبونها

وهذا رائي الشخصي

وتحياتي


والسؤال الان هل البديل موجود ؟؟؟؟؟؟

[المؤشرالاخضر]

اخوي شبح
خلنا نكون واقعيين كوننا في مجتمع صغير ونعرف أكثر الأمور

الى يمتلكون سيارات مثل اشكال السيارات الى في الموضوع
مستحيل يكون له ولي أمر يقدر يسيطر عليه
يا أنه يتيم
أو أبوه مغلوب على أمره ( مسيكين )
على شأن كذا الحكومة الله يطول بعمرها إنشأت قسم خاص ( سجن الأحداث ) ينحذف فيه على شأن يربيه القانون .


تحياتي


والله الشيخ هالايام ما عاد فيه شي اسمه سجن الاحداث، حسب ما سمعت اسحبوها من الداخلية وعطوها وزارة الشؤون الاجتماعية يابلفيت ما يبون يضرون نفسيته وغيروا سن الحدث اللي كان من 7 لين 16 وخلوها 18 ، على عيني وراسي انه طفل بس مرات التربية محتاجة شدة وصرامة واذا بنعاملهم على اساس يادهينة لاتنكتين ما نستغرب اذا بينا هالاشكال

[رآعي موآجيب]

1_هل تراها جريمة؟

نعم جريمه

2_هل تراها هواية ومتنفس لطاقات الشباب؟

بتاتاً ، مجرد شوفوني أعرف اسوق وصرت رجال :nono:

3- هل تؤيد عقوبة السجن على مرتكب هذه الممارسات؟
لا ، بل يحكم عليه بألزامه بخدمة المجتمع في اماكن عامه ، ويشهر به مع السجن في حال التكرار

4_هل تتكفي بالغرامة والمخالفة ؟

لاتكفي وليست رادعه

5_ هل تؤيد سحب السيارة لمدة عام؟

سحب السياره لا يكفي

6_ هل تؤيد مصادرة السيارة

نعم ، تصادر السيارات وتوزع على بعض الوزارات مثل البلديه والبيئه ويوضع على جوانبها ملصق يوضح بأنها مصادره من متهور وتعمل هذه السيارات مثل سيارات الحكومه تماماً كي ترى في الشوارع دائماً
7_ ومن هو المسؤل الاول

( سن المراهقه ) ماراح اقول الأسره لأن هالفئه العمريه لديها هواية السيارات في جميع انحاء العالم ، حتى لو كانت الأسره حريصه على هذا الأمر ، مصير هذا الشاب ان يعمل ويستقل بسيارته الخاصه ، وبالتالي سيفرغ كبت سنوات حرص الأسره في سيارته الخاصه
8_ ماهو الحل برأيك لحل المشكله

تشديد العقوبات ، القضاء على الواسطه في أخراج السيارات من الحجز او عدم المصادره ، تكثيف نقاط التفتيش ، إصدار الرخصه ( الليسن ) بعد الـ 20 سنه ، المصادره الفوريه للسياره مع الحكم على قائدها بخدمة المجتمع اول مره ، مصادرة السياره مع السجن والحرمان من الرخصه لمدة 5 سنوات وغرامه تفوق 50 الف ثانيه مره ، مصادرة السياره مع غرامه تفوق 100 الف والسجن والحرمان من الرخصه مدى الحياه ثالث مره

هذا النوع من الشباب لن يكفوا عن هذه الأفعال إلا بقوانين وأحكام صارمه و غرامات كبيره

وأتمنى أن يكون للخويا دور كبير في هذه الأمر

[رآعي موآجيب]

يعني الي افهمة ان كل الرجال الي هنا ما قد سوها في مراهقتهم سوا هم او مع ربعهم؟!!

صحيح الي يصير غلط،،،وممكن الواحد منهم يخسر نفسة او احد من الشباب الي حولة ويقطع قلب اهلة
الله يهديهم ويحفظهم
لازم يصير في مراقبة للطرق او يحطون لهم مكان يطلعون كل الي براسهم مو شوي ويطلع

ويكون على طول مفتوح حالة حالة النوادي الرياضية

ولا تدخلون السعودية بالســــالفة..ههههه

والسلام ختام



لا و الله سويناها ويمكن اخس منهم

جيلنا كان جيل يروع وماكان عندنا قلوب

ولولا السحى والفشيله وخوف من تشجيع بعض المراهقين وإلا كنت بنزل بعض الصور لنا مستحيل حد يصدق اللي نسويه

لكن وش اللي صار ؟

بعد ما استفحل الوضع وصارت الوفيات شبه يوميه ، وقف لنا الشيخ عبدالله بن خالد الله يطول بعمره ويجزاه عنا كل خير على كل اللي سواه

وكثف دوريات المرور ، واستحدث قسم جديد وخاص ولا يتبع إلا مكتبه شخصياً وكان معروف هالقسم عند الشباب بأسم ( تحريات الوزير ) أو ( تحريات عبدالله بن خالد )

كان بالنسبه لنا رعب بمعنى كلمة رعب

الموتر اللي ينصاد يسابق أو يستعرض يصادر ومصيره ينقط في البحر بأمر من الشيخ عبدالله بن خالد شخصياَ

هذا غير السجن ، واللي امه داعيه عليه اللي بيصيده يسابق هو الشيخ عبدالله بنفسه

هذا اصلاً ننساه ونشيله من الميموري

الين تبنا من هالسوالف غصب عنا ، صحيح كنا زعلانين من الشي اللي كان يصير ، لكن بعد ما كبرنا وعقلنا فهمنا ليش كان يضيقون علينا

وجزاهم الله خير كلهم

لكن الحين كل الموضوع حجز شهر وغرامه الف أو الفين ريال !!!

هالكلام مايصير ابد

[قرنقووش]

غجر الحمد لله والشكر

[الواعد]

اسم الشارع ( طيب الرقدة ) اسمه يعني عند الشباب فقط ؟؟؟

وينه بالضبط ؟؟؟

[دانوو]

اعرف اثنين في الصورة
والله لا يرويكم
لا اخلاق ولا احترام
وتوهم من اسبوعين مسوين حادث في طيب الرقدة

[واقعي وصريح]

اعتقد زيادة التوعية عن طريق المدارس وخطبة الجمعه وعمل زيارات للطلاب في مستشفى حمد حتى يروا ماذا يحصل لمصابي الحوادث
وعمل زيارات لاقسام وزارة الداخلية المعنية بالحوادث
مع اقتراحي المتواضع بعدم منح رخصة القيادة لما دون عمر 21 وذلك حفاظا على سلامة ابنائنا

[ريم 28]

شكرا للجميع على الردود

ارجو من الاخوان والاخوات عدم الخروج من صلب الموضوع حتى تحقق الأستفادة الكامله من طرح الموضوع .

وردك أمانه



وسنعيد الأسئلة مرة أخرى



بماذا تصف هذة المشاهد



1_هل تراها جريمة؟
نعم جريمه للن ناس ما لها ذنب اتروح فيها
2_هل تراها هواية ومتنفس لطاقات الشباب؟
اي هوايه هذا طيش وضياع ولابد من الحزم والعقاب
3- هل تؤيد عقوبة السجن على مرتكب هذه الممارسات؟
لا السجن لن يغيرهم انما دورة تجنيد الزاميه عقوبات الزاميه تصلح من حالهم وتكون رجال لابد من حلول ناجحه افضل من الحبس
4_هل تتكفي بالغرامة والمخالفة ؟
لا طبعا
5_ هل تؤيد سحب السيارة لمدة عام؟
سحب السياره لحماية الناس منهم
6_ هل تؤيد مصادرة السيارة
نعم
7_ ومن هو المسؤل الاول
الاب نعم الاب هنا ياتي دور الاب ان مان بصحة والسلامه عليه مراقبة ابنه وتوجيه ابنه
8_ ماهو الحل برأيك لحل المشكله
عقوبة مثل دورات الزاميه لا رجعة فيها لمدة معينه تجنيد وغيره حتئ يكونوا عبره للجميع عليهم او منعهم من اي امتيازات في المستقبل حتئ يفكروا بجدية ولا يضروا انفسهم وثم غيرهم

لابد من وضع قوانين صارمه وتطبيقها


شارك معنا برأيك


موضوع مهم

[سعادة الوزير]

معظم الي كتبوا رد على هذا الموضوع ، كتبوه من وجهة نظرهم هم كونهم في سن اكبر من سن الي يستعرضون ، وهذا في حد ذاته خطأ كبير ، عشان نعرف ليش هم يسوون هالحركات ، لازم ننزل لمستوى تفكيرهم ونفهم وجهة نظرهم.

هذا اول شي ، وثاني شي والي هو المهم ، معظمنا حفص في الشارع بطريقة او بأخرى لما كنا صغار وفي سنهم ، ولحد يكابر ويقول لا ، انا عايش في البلاد وعارف ، انا الحين عمري 45 سنة بس ايام الثمانينات سوينا مثلهم ، ومب بس جذي ، الا معظم (ان لم يكن كل) سواقين الراليات في قطر والخليج كانوا من اكبر اصحاب المشاكل مع المرور ، انا اعرف سعيد الهاجري ومبارك الهاجري وعباس الموسوي وجابر المري كلهم معرفة شخصية ، كانوا كلهم يحفصون بمواترهم يوم كانوا صغار!

خلاصة الكلام ، هالناس الي ذكرت اساميهم كانوا يحفصون ويستعرضون ايام الشوارع فاضية ، والدولة ماكانت تعرف رياضة السيارات ، لذلكم هم كانوا معذورين ، بس الحين ، على الدولة بشكل خاص انها تهتم برياضة السيارات ، وانها ترعى هالفئة وتطور من قدراتها ، وانا متأكد انه هالفئة راح تنتج ابطال في سباقات الرالي والحلبات على مستوى العالم ، لكن طول ما احنا نواجه العنف بالعنف ، صدقوني ماراح نوصل لنتيجة ، لانه لما نكلمهم بلغة القانون والمنطق ، اكيد ماراح يفهم عليك بسبب صغر سنة ، الدولة مسؤولة عن احتواء هذه الفئة في نوادي متخصصة (وخلونا من نادي السيارات الي في الصناعية والي مستحوذين عليه مجموعة امريكان يسرحون ويلعبون فيه ابلاش وبفلوس الدولة!!) ، والاهل مسؤولين عن توعية اباءهم ايضاً وبنفس الاهمية.

ارجوا من الاخوان استيعاب كلامي بشكل سليم ، والا يأخذوه بشكل آخر ، فانا لا اشجع على التحفيص والازعاج اطلاقاً.

[الدوحة 2010]

مسخرة والله مفروض تكون دوريات متواجدة هناك او التحريات وتصوريهم

[هبوب الكوس]

بالعربي ما في قانون صارم ومحدد

يتم حجز السياره اسبوع ولا شهر وفيها حب اخشوم الامور طيبه

المشكله ان هذي النوعيه سببت حوادث للغير ماشيه في حالها وتوفوا

سبحان الله صاحبه يموت قدام عينه من اثر حادث ولا يعتبر

همسه

السبب الرئيسي من الاسره اعطاء الولد سياره من غير ليسن

[طير حوران]

وين الصلاه ؟؟؟؟؟؟؟؟

لووجدت الصلاه كان صلح حالهم

بس محد يسألهم عنها

[النهار]

وتلمون المرور فيهم المرور موقصرين

1_هل تراها جريمة؟

نعم جريمه بكل المقايس تعتبر شروع في قتل

2_هل تراها هواية ومتنفس لطاقات الشباب؟

لا الدوله مش مقصره معاهم لويريد ينفس عن نفسه ولطاقاته في مجالات كثير

3- هل تؤيد عقوبة السجن على مرتكب هذه الممارسات؟

نعم وبشده ويصدر فيها قانون مشدد ( لا للواسطات )

4_هل تتكفي بالغرامة والمخالفة ؟

الحبس والمخالفه والسجن + لايعطي تصريح للعمل الابعد مضى 3 سنوات من تاريخه واذا كان طالب يحرم من الدراسه لعام كامل

5_ هل تؤيد سحب السيارة لمدة عام؟

لا

6_ هل تؤيد مصادرة السيارة

نعم والسجن 3 سنوات

7_ ومن هو المسؤل الاول

الأهل ثم الاهل ثم الاهل + رفقاء السؤ

[النهار]

معظم الي كتبوا رد على هذا الموضوع ، كتبوه من وجهة نظرهم هم كونهم في سن اكبر من سن الي يستعرضون ، وهذا في حد ذاته خطأ كبير ، عشان نعرف ليش هم يسوون هالحركات ، لازم ننزل لمستوى تفكيرهم ونفهم وجهة نظرهم.

هذا اول شي ، وثاني شي والي هو المهم ، معظمنا حفص في الشارع بطريقة او بأخرى لما كنا صغار وفي سنهم ، ولحد يكابر ويقول لا ، انا عايش في البلاد وعارف ، انا الحين عمري 45 سنة بس ايام الثمانينات سوينا مثلهم ، ومب بس جذي ، الا معظم (ان لم يكن كل) سواقين الراليات في قطر والخليج كانوا من اكبر اصحاب المشاكل مع المرور ، انا اعرف سعيد الهاجري ومبارك الهاجري وعباس الموسوي وجابر المري كلهم معرفة شخصية ، كانوا كلهم يحفصون بمواترهم يوم كانوا صغار!

خلاصة الكلام ، هالناس الي ذكرت اساميهم كانوا يحفصون ويستعرضون ايام الشوارع فاضية ، والدولة ماكانت تعرف رياضة السيارات ، لذلكم هم كانوا معذورين ، بس الحين ، على الدولة بشكل خاص انها تهتم برياضة السيارات ، وانها ترعى هالفئة وتطور من قدراتها ، وانا متأكد انه هالفئة راح تنتج ابطال في سباقات الرالي والحلبات على مستوى العالم ، لكن طول ما احنا نواجه العنف بالعنف ، صدقوني ماراح نوصل لنتيجة ، لانه لما نكلمهم بلغة القانون والمنطق ، اكيد ماراح يفهم عليك بسبب صغر سنة ، الدولة مسؤولة عن احتواء هذه الفئة في نوادي متخصصة (وخلونا من نادي السيارات الي في الصناعية والي مستحوذين عليه مجموعة امريكان يسرحون ويلعبون فيه ابلاش وبفلوس الدولة!!) ، والاهل مسؤولين عن توعية اباءهم ايضاً وبنفس الاهمية.

ارجوا من الاخوان استيعاب كلامي بشكل سليم ، والا يأخذوه بشكل آخر ، فانا لا اشجع على التحفيص والازعاج اطلاقاً.

ياخوي الله يرحم والديك من 45 سنه الي كانوا يمتلكون سيارات على اصابع اليد يومها لما نسمع في حادث سياره بسيط كل الفريج طالع يبي يشوف هذه الكارثه نعم اول بدايتنا كانت السرعه هي السائده اما تفحيص وتخميس وشل على تايرين هذه ماشفناها ولاسمعنا عنه تربيتنا كانت غير حدك تكون برع البيت لين بعد صلاة العشاء انا ماتكلم عن نفسي اتكلم عن المنطقه كامله هذه حياتنا الحين الاب مايدري متى الولد طلع او رجع البيت واحد من الربع اسأله اش اخبار ولدك مع العلم انه الثالث ثانوي يقول ماشوفه الايوم الجمعه على الغداء اي تربيه هذي تقولون فراغ بعض الاسماء الي استشهد فيهم ليسوا مقياس لذلك الزمن الجميل وانا اتحدي اي واحد يقول انه يسون مثل الشاباب اليوم

[الدوحي7]

توه الناس ترا صيف بعد،، وخل المسئول الكبير ينفعه قرار منع البالون، وخل الحلبه الى مسكره طول السنه ماتفتح الا في السنه مره تنفعهم،،
وعندي كلام ترا طيب الرقده خط بعيد عن الناس وخالي من السيارات وراعي الهوندا ترا جاي يتفرج ،، وسلم على حلبه قطر ،،

[نيساني]

مب صاحيين بس ماينلامون لو الساحه مفتوحه كل ويكند يستاهلون السجن ومصادرة المركبه

اما مصكره ومايفتحونها الا اذا فيه مناسبه او رمضان ماسوينا شي!

وافضل مثال دولة الامارات اكثر من ساحه اللي يبي يستعرض حياه واللي يبي يتسابق بعد حياه

وشكراً ياخوي عنزي

[النهار]

توه الناس ترا صيف بعد،، وخل المسئول الكبير ينفعه قرار منع البالون، وخل الحلبه الى مسكره طول السنه ماتفتح الا في السنه مره تنفعهم،،
وعندي كلام ترا طيب الرقده خط بعيد عن الناس وخالي من السيارات وراعي الهوندا ترا جاي يتفرج ،، وسلم على حلبه قطر ،،

الدوحي مساك الله بالخير اشوف مطعم حمود قاعد يسوي ديكورات شكله بيرفع الاسعار :yes:

[الدوحي7]

الدوحي مساك الله بالخير اشوف مطعم حمود قاعد يسوي ديكورات شكله بيرفع الاسعار :yes:

ككككككككك،، مساء النور لك طلعات حلوه هههههههه،،الاسعار رتفعت من يوم ذاك المسئول الكبير منع البالون تقول حمود مسكين خخخخخ،،

[قطرية مثقفة]

استغفر الله هاذي كأنها ساحة حرب :mad::mad: الله يهدي الأهالي قبل العيال

[الشلهوب]

لاحول ولا قوة الا بالله الله يهديهم انشاالله والحمد الله رب العالمين

[دنيا الاسهم]

يكسرون الخاطر يستحقون الشفقة شكلهم صغار يبيلهم توعية من المرور والاهل والله يحفظهم

[Bin Hood]

1_هل تراها جريمة؟

نعم

2_هل تراها هواية ومتنفس لطاقات الشباب؟

لا طبعا

3- هل تؤيد عقوبة السجن على مرتكب هذه الممارسات؟

نعم وبقوة

4_هل تتكفي بالغرامة والمخالفة ؟

لا

5_ هل تؤيد سحب السيارة لمدة عام؟

انظر جـ 6

6_ هل تؤيد مصادرة السيارة

بما انه مستهتر في حياته وسيارته وشكله ما يبغي الاثنين
اايد سحب السيارة وبيعها
والمبلغ يروح للداخلية او لمرضى من حوادث او جهة خيرية

7_ ومن هو المسؤل الاول

الاسرة بس ما يقع كل اللوم عليهم
الداخلية يجب ان تضرب بيد من حديد

8_ ماهو الحل برأيك لحل المشكله

قانون صارم جدا ومحرج



وشكراً

[الجوكر90]

السلام عليكم
انا كنت مراهق بس الحمدلله تعلمت ان التدخين والشيشه والاستعراض والمسابق حرام
وانا كنت اسوق يوم عمري 16 بس ماكنت اسوي جي
شوف لو ماعندنا واسطات وحب خشوم جان ستعدلو
لو تلاحظ بس فالخليج عندنا هالشي ولا شوف باقي الدول العربيه مافي

لو الولد ينسجن اذا سوا شي غلط كان بيتادب
والله اعرف واحد كان يتسابق وقالوا له السباق حجز موتر وسجن
الموتر انحجز شهر وطلع وهو بواسطه طلع لان ابوه رتبه

لو يجينا وزير نفس عبدالله بن خالد اي واحد يغلط ياخذ جزاه واذا كان صغير ابوه يتحاكم بداله عشان الولد ينذل ويعايرونه بابوه
لان قبل لا يسوي شي غلط راح يفكر فابوه وبيقول لو سويت هالشي وصادوني ابوي الي راح ينسجن او يتعاقب مب انا هني راح تشوفون كل شي تغير

لاتقولون الاهل والتوعيه
قول الوزير والخرجي هم مب قد الشغله وهم الي اسمحوا للواسطات ويقدرون يلغونها
بس لان مصالحهم راح تتوقف اذا لغو الواسطه

اسكت احسن ولا الكلام ضايع مع المرور

[بوحارب]

العتب على إدارة المرور اللي سأكتين عن هالمهزلة !!!

[ابوالكلام]

الفراغ القاتل

[مشتاقة لقطر]

كل الشباب يمرون بهالرغبة بالاستعراض والخطورة


فترة وتعدي

[عنزي قطر]

مشكله اهل الفتاوي الباطله :) .. يعطيك العافيه يا عنزي



الله يعافيك واتمنى واقفة جادة من الاهل الاول وجميع الجهات في الدولة

[شبح الصمت]

الله يعافيك واتمنى واقفة جادة من الاهل الاول وجميع الجهات في الدولة




اخوي عنزي

ابي اسالك كم سؤال وترد علي !!

انتو وشو دوركم !!!

في هالمواقف يوم تمسكونهم شنهي الاجراءات والا عليك امر تذكرها لنا من الى !!

نبي نعرف اجراءاتكم هل منها فايده في صالح هالطيش وإلا بس تخويف !!

[عنزي قطر]

اخوي عنزي

ابي اسالك كم سؤال وترد علي !!

انتو وشو دوركم !!!

في هالمواقف يوم تمسكونهم شنهي الاجراءات والا عليك امر تذكرها لنا من الى !!

نبي نعرف اجراءاتكم هل منها فايده في صالح هالطيش وإلا بس تخويف !!



ألاخ شبح الصمت. حياك الله
احب اعرفك اني عضو مثلك تماماً وكل دوري هو تبادل الافكار والمعلومات والاقتراحات مع الاعضاء للوصل الى حلول فعالة للحد من ظاهرة الحوادث المرورية التي يعاني منها الشباب
فكلنا مسؤلين عن هذه الحوادث .
اما اذا كان لديك اي استفسار يمكنك التواصل مع موقع وزارة الداخلية أوعلى ايميل المرور وتاكد الرد سوف يكون رسمي وهذا افضل


ايميل وزارة الداخلية
http://www.moi.gov.qa/site/arabic/feedback/index3.html


ايميل المرور

traffic@moi.gov.qa

ملاحظه لي عوده للجميع القضية الجميع مسؤلين عنها

قال رسول الله صلى الله عليه وسلم : "بلـّغوا عني ولو آية"

محبكم عنزي قطر

[موضي قطر]

غجر الحمد لله والشكر

مب اكثر غجرية من ردك الغجر معروفين في وين ؟؟

بعض المواضيع تبين مايخفى في الصدور :yes:

عنزي قطر انت متأكد انه مافيه غير طيب الرقده ؟!!
يمكن اقل شهره واقل مستوى في الاستعراض؟!

[نسناس]

انا ايد ان يدخل دوره عسكريه يخدم وطنه وتكبح جماح مراهقته

[قطري !]

ترا طيب الرقدة مقبرة بوهامور



لاحد يرقد فيها على طول

[سعادة الوزير]

السلام عليكم
انا كنت مراهق بس الحمدلله تعلمت ان التدخين والشيشه والاستعراض والمسابق حرام
وانا كنت اسوق يوم عمري 16 بس ماكنت اسوي جي
شوف لو ماعندنا واسطات وحب خشوم جان ستعدلو
لو تلاحظ بس فالخليج عندنا هالشي ولا شوف باقي الدول العربيه مافي

لو الولد ينسجن اذا سوا شي غلط كان بيتادب
والله اعرف واحد كان يتسابق وقالوا له السباق حجز موتر وسجن
الموتر انحجز شهر وطلع وهو بواسطه طلع لان ابوه رتبه

لو يجينا وزير نفس عبدالله بن خالد اي واحد يغلط ياخذ جزاه واذا كان صغير ابوه يتحاكم بداله عشان الولد ينذل ويعايرونه بابوه
لان قبل لا يسوي شي غلط راح يفكر فابوه وبيقول لو سويت هالشي وصادوني ابوي الي راح ينسجن او يتعاقب مب انا هني راح تشوفون كل شي تغير

لاتقولون الاهل والتوعيه
قول الوزير والخرجي هم مب قد الشغله وهم الي اسمحوا للواسطات ويقدرون يلغونها
بس لان مصالحهم راح تتوقف اذا لغو الواسطه

اسكت احسن ولا الكلام ضايع مع المرور

اي بالله تسكت احسن!! ، عيل اذا الولد خالف الابو ينسجن ها؟ ، في ذمتك هذا منطق الي تتكلم به؟؟ تعرف الايه (( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))؟؟ وانت بنفسك وبعظمة لسانك قلت انك كنت تحفص وتستعرض ، يعني بالمنطق الي تتكلم به كانوا المفروض يسجنون ابوك ، صح؟

والايام الي انت تترحم عليها وعلى الي كانت في عهده ، ياما ناس انظلموا بدون اي ذنب ، والقصص معروفة والكل يدري عنها.

محد رجعنا لورى الا هالتفكير.

[رايق البال x]

ما سر حب المراهق الخليجي للسيارات والتحفص وكل شي يضر صحته ؟
معقولة الكل ،، مافي احد عنده هوايه عدلة ،، سبحان الله ،،، من صغرهم وابوهم يربيهم بجيب لك سيارة تحفص فيها ؟ وهالكلمات التي يكبر على حبها وعشقها ،، نصيحة ربوا عيالكم على اشياء تفيده في حياته

[آلملآزم]

بذمتك أخوي عنزي قطر هل شكل السياره اللي في أول صوره شكل سياره مرخصه وتمشي في شارع عام فيه دوريات وفيه تحريات وفيه قوانين رادعه
فيه شي أكبر ولا أعظم من اللي قاعدين نشوفه !!!!!
قسم بالله لو أنه مايدري أنه وراه سند بيطلع سيارته أذا أنحجزت ولا بيطلعه أذا أنسجن أنه مستحيل يسوي هاللي قاعدين نشوفه فالصور
لكن لو كانت السياره تتصادر بدون أي تدخل من أي طرف كان والشخص ينسجن ويشهر به فالجريده الرسميه وغرامه ماليه تكسر ظهره وظهر ولي أمره
100 % راح تخف هالحالات أن لم تنتهي بالمره وأولياء الامور المتهاونين في تربية عيالهم راح يشدون عليهم أكثر وياخذونهم معاهم للمجالس والاماكن اللي منها فايده بدال التسكع فالشوارع وأشغال رجال المرور في سوالفهم التافهه

[مستر بن]

راعي الهلي البيج ولد خالي .. وانا كنت موجود وقتهاا ..

بسس اكثرية اللي يكونون هناك محببين ويطلعون باسسلحه ..

مجانين:yes::eek2:

[اليحصبي]

مواليد الخليج لا اراديا بعد الولاده تشوفه يقحض - يسوق سياره وهميه هههههه - على
اساس انه يسوق وماشاء الله عليه يقلد حتى صوت القطعه لا ويسوي انه تبنشر التاير ... الخ
يعني الي بالصور شيء طبيعي ماشوفه شيء غريب

[BosaiF_774]

بأختصصآر شديد ؟
افتحوا ساحات ؟ ولا يصير فيها واصطات ؟ ولا برسوم ؟ ولا بأستمارة استعراض داخل الحلبه ؟

[اليزوة]

التوعيه ودور الاهل بمراقبة الابناء

[qatara]

حركات يابلفيت يقلدون السعوديين ، ظاهره جديدة ذي ، تستدعي تدخل الجهات الأمنية لوقف مثل هالمهازل .

وبالنسبة للي في الصورة اتمنى سجن أولياء أمور هالمبزره لمدة شهر أقل شي :)

وأقل القليل استدعائهم وعرض هذه الصور عليهم .

اوايد رايك بسجن ولي الامر سواء اب او ام
ليحس هذا المتهور انه جنى على
اهله قبل ان يجني على الناس الابرياء

ولما يسجن والي امره راح يحس هو وولي امره
بروح المسئوليه وان ارواح الناس ليست لعبه

ولما يشوف امه ولا ابوه بالسجن
اهون بكثيرمن شوف الناس لعائلها في المشرحه

[السكين]

والله اللي يشوفها يقول بالسعودية لانهم اوائل المستعرضين مثل هالصورة لا لوحة ولا صدام وسيارات مدعومة وستيكًرات واسامي غريبة هجولة وتفحيط وطارة وخشات ووقفات ورفع والقاب وعداك العيب يا شنب كفووو حبتين الخ

فيه حادث صار قبل 3 ايام اتمنى من يشجع هالظاهرة يشوفه

ادخلوا اليوتيوب واكتبوا حادث الجمعة الفجر او اكتبوا حادث دايري الدخل يوم الجمعة

المقطع غير مناسب للبنات وضعاف القلوب لانه فيه يد السواق تطير وتزل على الارض بنص الشارع

اتمنى لكم الهداية وانا ضد الحلبات ومع مدارس الراليات وسباق الراليات او مضامير السباق بالمعايير العالمية

شغل حرق السيارات وتقطيع التواير والدخان المؤذي هذا شغل ما منه فايدة

[لقمان]

1_هل تراها جريمة؟

نعم

2_هل تراها هواية ومتنفس لطاقات الشباب؟

لا

3- هل تؤيد عقوبة السجن على مرتكب هذه الممارسات؟

نعم

4_هل تتكفي بالغرامة والمخالفة ؟

الحبس

5_ هل تؤيد سحب السيارة لمدة عام؟

نعم

6_ هل تؤيد مصادرة السيارة

نعم

7_ ومن هو المسؤل الاول

الأهل

ودمتم بحفظ الرحمن..

سحب السيارة لمدة عامين
السجن اقل شى 18 شهر

[qatarshark]

راعي الهلي البيج ولد خالي .. وانا كنت موجود وقتهاا ..

بسس اكثرية اللي يكونون هناك محببين ويطلعون باسسلحه ..

مجانين:yes::eek2:

اخي مستر بن
بما انك كنت موجود ليش ماتكون مواطن صالح وتنصح الشباب الي محببين على قولتك وعندهم اسلحة بعد ليش ما تبلغ عنهم شدعوة وين قاعدين في شيكاغو
على فكرة انا ما احمل ولي الامر ولا الشرطة ولاولاولاولا
الكل مشارك في هذه الظاهرة ويجب اتخاذ اقصى العقوبات ولا تتدخل الواسطات من اجل اصلاح هؤلاء الفئة الطائشة من الشباب اللذين ليس لهم ذنب لانهم لم يجدوا المرشد الناصح
مجرد رأي

[ميك أب]

الله يهدي الشباب ادعوكم لرؤيه فيديو على اليوتيوب بعنوان
(( حادث كامري 2012 فجر يوم الجمعة في الرياض 4-7-1433))

ولشناعته عُرض بقناة ال إم بي سي في الأخبار
الحمدلله انه ماحصل بالطريق المزدحم بالسيارات وللطف الله بعباده انحرفت السياره تجاه الرصيف و حدث ما حدث
نسأل الله السلامه آمين

[النهار]

العتب على إدارة المرور اللي سأكتين عن هالمهزلة !!!:nice:

خير الكلام ماقل ودل

[عنزي قطر]

أأأمحق أمه اسلاميه هذا جيلها




لاحد يقول لي هذولا بتشوفهم وووو الخ ..




عز الله ماتربوا عدل ..



كلش ولا ابو عصاقيل اللي يركض على القااار مالت عليك



بالعكس اخوي الامه بخير وادعو لهم بالهدايه بارك الله فيك

[Class - Qtr]

الخطا فردي ,,

يتم وضع قانون بموجبه تتم مصادرة السيارة نهائيا للجهه المختصه وبيعها لصالح الموسسات الخيريه

في قطر بالاضافه الي غرامه ماليه في حدود 25 الف ريال وحبس لمدة لاتقل عن شهر كامل

بالاضافه الي توقيع صاحب الواقعه على تعهد بعدم تكرار الواقعه والا تم مضاعفه

الحبس لمدة لاتقل عن سنه ميلاديه

[يحفظك ربي]

حسبي الله عليهم والله اليوم شفت واحد صوب المدينة التعليمة عرواي ماخذ الدوار عكس وبس قعد يفرفر في هالموتر يعله الـ........ قسم بالله رفع لي ضغطي
خففت سرعتي خفت اقرب منه يهف لي الموتر لان الكلب ماشي ولا عليه من حد والله كان بيهف اجنبي مسكين في تيدا
ويوم خفف الاستهبال حاولت اني الخقه عشان اسجل رقمه بس شرد لان حس فيني اني ياي له
حسبي الله على هالاشكال اللي يتسببون على غيرهم ولا عندهم ادنى حس للمسؤولية
لحد يقهرني ويقولين صغار مايفهمون والله كل واحد بغل شكبره اسمحولي عالاسلوب بس والله قهرني وكان الظهر يعني الشوارع بتكون مزحومة الله ينتقم منهم كانهم متسببين على غيرهم !

[جمايكا1]

1_هل تراها جريمة؟

نعم في حق انفسهم وفي حق غيرهم
2_هل تراها هواية ومتنفس لطاقات الشباب؟

لاتنم للهواية بصلة........
3- هل تؤيد عقوبة السجن على مرتكب هذه الممارسات؟

السجن ليس حل الا في حالة تضرر الغير .....
4_هل تتكفي بالغرامة والمخالفة ؟

لا الا اذا كانت رادعه ..........
5_ هل تؤيد سحب السيارة لمدة عام؟

لا ........
6_ هل تؤيد مصادرة السيارة

في المرة الثانية في نفس المخالفة نعم نعم نعم ......
7_ ومن هو المسؤل الاول

كل شخص يعرفه مسسؤول ......
8_ ماهو الحل برأيك لحل المشكله

الحل بدلا من قولنا فتح ساحات استعراض الذي لا ارى انه حل( من وجهة نظري) تنمية الهوايات الاخرى لدى الشخص وبدلا من تركه للانتحار وتعريض حياة الاخرين للخطر ولانكتفى بردع الاب او ولي الامر للشاب الزامه ببرنامج تدريبي او مهني يعود عليه بالنفع وهناك عدة انشطة مفيدة تغير من تفكير الفرد ولكن قبل هذا كله نخاف الله في انفسنا فلا نظلم انفسنا او نظلم الغير ..

وهذا رائي الشخصي




والسؤال الان هل البديل موجود ؟؟؟؟؟؟

ارى ان الاغلب يرون البديل فتح ساحات استعراض جديده واكرر ليس هذا حلا ودام هناك وقت فراغ فلابد من ملئ هذا الوقت بشئ يعود بالنفع والاقناع يكون من كل شخص تربطه علاقه بالشخص من قريب او بعيد

[عنزي قطر]

حركات يابلفيت يقلدون السعوديين ، ظاهره جديدة ذي ، تستدعي تدخل الجهات الأمنية لوقف مثل هالمهازل .

وبالنسبة للي في الصورة اتمنى سجن أولياء أمور هالمبزره لمدة شهر أقل شي :)

وأقل القليل استدعائهم وعرض هذه الصور عليهم .



ادعو لهم بالهدايه وجهة نظري الشخصية الدور الاساسي هو دور الأسرة

[عنزي قطر]

كل ما تحكر لهم يزيدون

خط طيب الرقده تصير فيه مطاردات الدوريات وقاموا يعرفون حق الدوريات

يبيلهم كمين ويصيدونهم ويجرونهم كل واحد من علباه

يخلونهم يصبغون هالشوارع ويرتبونها وتنحجز مواترهم ولياسنهم تنسحب منهم لمدة سنه كامله

وولي امره يوقع على تعهد لجل يعقل ولده ويحترم شيبته مسكين بس كتخويف ولجل يحشم لحيته

اذا بعضهم يحشمون لحى شيبانهم استغفر الله العظيم

الله يحفظهم ويستر عليهم

جزاك الله خير اخوي على الرد

وجميعاً مسؤل عن تلك الظاهره والنصيحه مطلوبه للشباب ودور الأسرة مهم جدا بالقضية

ودور الجهات المسؤله ايضاَ

[الدوحي7]

اليوم في تنظيم حق استعراض من الشباب وحاطين جوائز للي استعراضه افضل، الاول 2500وكاس والثاني 1500والثالث1000 والله ماشاء الله عليهم مجتهدين لارضاء الشباب،،وخل حلبه قطر يحطون فيها دجاج يفرخون افضل على الاقل ناكل شي وطني،،، بتوفيق للجميع،،

[السكين]

صباح الخير على الجميع

المراهقه وطيش الشباب يلعب دور كبير في هالسلوكيات
الشباب من صغرهم يحبون السيارات والسرعه والاستعراض ما نقدر نفسرها سلوك خاطئ
كثر ما نقول انهم في مرحله عمريه خطره والله يصلحهم ويهديهم ويلهيهم في شي مفيد



جملك الله برضاه

صباح النور

كلنا كنا نحب السيارات وكانت متاحة لنا الأمور أكثر من شباب اليوم لا رادار ولا دوريات بهالصورة الحالية ولا قوانين رادعة بس ما كنا نشوف هالسلوكيات !

هذا يعتمد بالأساس للتربية السليمة ، رجل شنب ولحية وشكله أكبر من أبوه واللي بعمرهم عنده أولاد ونقول مراهقين ؟؟
صحيح المراهق يمر بمرحلة عمرية خطرة بس لو ما لقى توجيه من الأهل والضرب بيد من حديد على هالتصرفات فالنتيجة ستكون هذا ( المنتج ) اللي شفناه بالصور !

[بنت مريخ]

وين مكانه طيب الرقده؟؟؟؟

[بريق الماسه]

وين مكانه طيب الرقده؟؟؟؟


احتمال في السعوديه

[QatarSafety]

هذا والله من الدشارة الزايدة
هم بصوب والاهل بصوووب
والقهر على ايام الديك والدجاجة
حلاتة والله تجيب لهم ثيران اسبانيا
وتخليهم يتناطحون وجة لوجة ثور و بقرة
قانون اي واحد يمسكونة من الديك والدجاجة.

وبصراحة اذا نبي نرحمهم شوي الحل يخدمون
بالجيش صاعقة مغاوير زحف ركض نغز بطة اي
شي فية تعذيب دروس قران كريم زيارة الرميلة
قسم الحوادث فبصراحة اشوفة حل واتمنى
من الحكومة تنفيذة.
وبصراحة انا مستغرب من الي يطالبون
بفتح الحلبة والله العظيم انا مرة شفت
للاسف مقطع بتلفزيووون قطر والله حسيت
ان هالشباب هاذولا ماعندهم هدف احس
انهم اصلن ماهم عارفين ليش انخلقوا اصلن.
تفحيط وحرق تواير ومئذين خلق الله في الحلبة
وخارجها انا من شفت سياراتهم ونا غاسل ايدي
والله ان بعض الشباب عندنا عملة نادرة وشجاب لجاب
عسى الله ايهديهم ولا ياخذ و ........ .

[ms-qtr]

كل ما تحكر لهم يزيدون

خط طيب الرقده تصير فيه مطاردات الدوريات وقاموا يعرفون حق الدوريات

يبيلهم كمين ويصيدونهم ويجرونهم كل واحد من علباه

يخلونهم يصبغون هالشوارع ويرتبونها وتنحجز مواترهم ولياسنهم تنسحب منهم لمدة سنه كامله

وولي امره يوقع على تعهد لجل يعقل ولده ويحترم شيبته مسكين بس كتخويف ولجل يحشم لحيته

اذا بعضهم يحشمون لحى شيبانهم استغفر الله العظيم

الله يحفظهم ويستر عليهم


:nice::nice::nice:

اتمنى يكون في عقوبة مادية كبيرة على ولي الامر تخليه يمسك عياله
زائد ان عقوبة الشباب تكون باعمال تطوعية اجبارية تخليهم يفكرون شوي في اللي يسوونه

[كود نمبر]

احتمال في السعوديه

لالا على طريق سلوى بالقرب من محطة بو نخله


المفروض قانون المرور يكون صارم ولا يجوز فيه الواسطات والتجاوزات

مش الموتر ينحجز اليوم وبعد اسبوع يطلع المفروض القانون يكون على الجميع ويكون صام

[عنزي قطر]

شكرًا للجميع على الردود المفيدة

لي عودة

[QA2008]

ياحظ محلات التواير

[مضارب دوسري]

سؤال
هل المنتحر تقام عليه صلاة الجنازه ؟
واذا كان الجواب نعم لا تقام عليه صلاة الجنازة
اذن هم منتحرون وكثير منهم ماتوا بنفس هالطريقه
ف كيف نصلي عليهم الجنازه ؟

[عنزي قطر]

قبل غلق الموضوع

الف شكر للجميع على الردود

والله يحفظ الجميع من كل شر

محبكم

عنزي قطر

[مستر بن]

ليش ما يفتحوون مكان نفسس ساححه المطار والعويرض ف السسعوديه ..
وتكوون مفتوححه للاستعراضض ,,

[مستر بن]

اخي مستر بن
بما انك كنت موجود ليش ماتكون مواطن صالح وتنصح الشباب الي محببين على قولتك وعندهم اسلحة بعد ليش ما تبلغ عنهم شدعوة وين قاعدين في شيكاغو
على فكرة انا ما احمل ولي الامر ولا الشرطة ولاولاولاولا
الكل مشارك في هذه الظاهرة ويجب اتخاذ اقصى العقوبات ولا تتدخل الواسطات من اجل اصلاح هؤلاء الفئة الطائشة من الشباب اللذين ليس لهم ذنب لانهم لم يجدوا المرشد الناصح
مجرد رأي


والله الشيخخ يكبسسوون دوريات اوقات وتحريات يجوون بالخشش يشللوون اللزقات من الارقام ..
وانت تكلم ثوروو فييكك..:weeping:

[almaha a]

اللي أستغرب منه يعتبرون أن هذي هواية ويريدون فتح حلبة استعراض!!

هذي جريمة في حقهم

لكن أولادكم ان لم تشغلوهم بالحق شغلوكم بالباطل

انتبهوا لهم وعلموهم ما ينفعهم من سن 4 الى 12 لكن اللي يجي في سن المراهقة ويبغي يربي !!

أقوله راحت عليك

[نسناس]

هذه نعمة الغنا والامن اللي ماراح يحسون فيها الا الى افتقدوها نسال الله العفيه لو يحسون بالعالم اللي حولهم احد يموت جوع وحد في كوارث وحد ارهاب وحروب وحد امراض الله لايؤاخذنا بما فعل السفها منا هذولا مفروض يطبق عليهم النضام الصارم

[عاهد بن علي]

الله يسترعليهم
ويهديهم

[عنزي قطر]

1_هل تراها جريمة؟

نعم . لانهم في سن المراهقـة ومايدرون شنو بيكون وضعهم اذا صار حادث لا قدر الله يذبحون نفسهم

ويذبحون خلق الله معاهم

2_هل تراها هواية ومتنفس لطاقات الشباب؟

اذا كانت هوايـة عندهم ساحة الصناعيـة خل يروحون اهناك في اسعاف و في مطافي وكل سبل السلامة
بس تلقاهم يهال وماعندهم لياسن وهاي مب خطأهم خطا اولياء امورهم الى يخلون عيالهم في الشوارع
او يعطونهم مواتر

3- هل تؤيد عقوبة السجن على مرتكب هذه الممارسات؟

اذا كان ١٨+ انا أويد وبشـدة لكن اذا كان اقل من العمر اتمنى انهم يسجنون ولي امر الى ماعطة الموتر

4_هل تتكفي بالغرامة والمخالفة ؟

لا .. المخالفة بتطيح عن الى عندهم واسطات للاسف يعني محد بيفتكر فيها

5_ هل تؤيد سحب السيارة لمدة عام؟

نـعـم مع دفع رسوم الحجز ضعف العادي

6_ هل تؤيد مصادرة السيارة

وبشــدة

7_ ومن هو المسؤل الاول

اوليـاء الامور نفس ماوضحت في الاسئلة السابقـة او رفاق السوء


جزاك الله خير
وصباح الخير :)

[QtrGate]

بماذا تصف هذة المشاهد

مشهد قليل عليه كلمة جريمة


1_هل تراها جريمة؟
جريمة بحق الدولة بترويع الامنين
وجريمة بحق المواطنين والمقيمين بتعطيلهم او قتلهم
وجريمة بحق نفسه اذا مات او اصاب

2_هل تراها هواية ومتنفس لطاقات الشباب؟
نعم انها هواية لاكن اذا استخدمت في اماكنها الخاصه

3- هل تؤيد عقوبة السجن على مرتكب هذه الممارسات؟
السجن مع الشغل والتنفيذ

4_هل تتكفي بالغرامة والمخالفة ؟
نعم مع السجن

5_ هل تؤيد سحب السيارة لمدة عام؟
بل سحب السيارة للابد واستخدامها في الاماكن المناسبه للدولة

6_ هل تؤيد مصادرة السيارة
نعم
7_ ومن هو المسؤل الاول
الاول وزارة الداخلية وبالخصوص المرور
لاصدار الكجه وهو المجعذر الوحيد لدى الشباب

الكجه : نفسها نفس الليسن بس بدون اختبار السواقه
بس يكون معاه واحد عنده ليسن
وهذه المشكله اذا كان زميله عنده ليسن يعلمه على التفحيط
ومرات يطلع بدون مرافق

8_ ماهو الحل برأيك لحل المشكله
السجن ومصادرة السيارة للابد

[دااانة قطر]

انا واحد من اللي يستعرضون هناك


بطلو لنا الحلبة الموقرة اللي صايرة في اي بي ذيك الساعة بنقول اوكي احنا غلطانين
لعلمكم المواتر اللي في الصورة كل واحد فيهم عمره فوق 18 ويداومون بعد مب اطفال

رفيجي منقلب هناك قبل كم يوم وبغى يذبح ربعة لخويا ماقصرت فديتها انا حفت الشارع عشان اي واحد يطلع حصا وموتره شايح ياكل قلبة سريعة واسال مجرب

بررررب



الحين انت تطاالب بفتح الحلبه
وتقول واحد من ربعك انقلب
:rolleyes2::rolleyes2::rolleyes2:

طيب وين الونااسه وشنهي الونااسه ؟؟!!



عندكم طاااقه فرغوها في شي مفيد الله يهدااكم

[QtrGate]

قضت المحكمة العامة في محافظة عنيزة على مفحط بالقتل تعزيراً، لتسببه في وفاة شابين سعوديين عقب أن صدمهما أثناء قيامه بالتفحيط.

والمفحط - الملقب بمطنش - في العقد الرابع من عمره وعاطل عن العمل، وكان يمارس التفحيط في أحد الطرق بمحافظة عنيزة، حين صدم اثناء ممارسته التفحيط شاباً من الجمهور والذي سقط بشكل قوي من شدة الصدمة على احد الحضور، ما ادى الى وفاة الاثنين.

وتشير تفاصيل الحادثة الى ان الجاني هرب مباشرة من موقع الحادث دون إسعاف المصابين، واستمر هارباً الى ان تم القاء القبض عليه وانتهى التحقيق معه بتوجيه الاتهام له وإحالة أوراق القضية إلى محكمة عنيزة وصدر الحكم عليه بالقتل.

الجدير بالذكر أن المتهم نفسه كان مطلوباً قبل القاء القبض عليه بقضية مماثلة، حيث تسبب في وفاة شاب سعودي آخر اثناء ممارسته التفحيط وهروبه من الموقع دون إسعافه

اللهم احفظ شباب الأمة

[عنزي قطر]

متطوع !! السؤال وين إدارتك عن المهازل ولا بس جاهزين للمخالفات عند الإشارات


حياك الله اخوي اعتقد وجهة نظري الشخصية ادارة المرور ماقصرت لكن محتاجين ايضاً حلول للشباب .

والمهازل كم ذكرت جميعاً مسؤل عنها :)

[الصغيره]

اخوي العزيز الصوره ما طلعت معي ؟؟

ياليت اشوفها

واكيد شي خطير

[خــالــد]

تخلف والشرها على الكديش ابوة الي مهملة

[خــالــد]

قبل لما اسمع انة توفى فلان بحادث احزن

لكن الحين اقول زين ذلف وريح العالم من شرة تراء خلونا واقعين اكثر حوادث الشباب والوفيت بسبب استهتارهم واهمالهم وهذا لو تم بالشوارع يمكن يحشر الناس زين يذلف يموت ويريح العالم منة ويليت اهل الاستعراض يطبق عليهم القصاص لنهم قتلة

[عنزي قطر]

1_هل تراها جريمة؟

نعم

2_هل تراها هواية ومتنفس لطاقات الشباب؟

لا

3- هل تؤيد عقوبة السجن على مرتكب هذه الممارسات؟

نعم

4_هل تتكفي بالغرامة والمخالفة ؟

الحبس

5_ هل تؤيد سحب السيارة لمدة عام؟

نعم

6_ هل تؤيد مصادرة السيارة

نعم

7_ ومن هو المسؤل الاول

الأهل

ودمتم بحفظ الرحمن..



شكرا على المرور والتعليق بارك الله فيك

[بيانو]

كيف الاهل يرونا مثل هذه السياره بالبيت ويسكتون

السياره باين عليها استهتار الولاد جدا وشقاوتهم اللى مكتوبها عليها كمان

اكيد العتب الاول والاخر على الاهل اللى معطينهم سياره بهذا السن

[عنزي قطر]

شكرا للجميع على المتابعه والردود
والموضوع مهم والله يكفي الجميع شر الحوادث والسرعه

[عنزي قطر]

مبارك عليكم الشهر جميعاً
واسف على التاخير لظروف خاصه

والله يكفينا شر الحوادث

[ساس الوفا]

الكل يتكلم ما بين مؤيد ومعارض ..

انزين تقدرون تقوليون لي الشباب وين يروحون ( وين يقضون وقت فراغهم ) ؟

المجالس .. سلمنا وتقهوينا وطلعنا . ( طبعاً ما نقدر كل يوم لان الروتين يذبح ) .
المجمعات والكوفي .. انزين لين متى .. وان طيحنا هناك قالوا فلان يغازل وفلان يتسكع فالمجمعات ..
كل مكان ممنوع او ممل ..

انا مب مؤيد للمهزلة اللي في الصور .. بس المرور والدوريات اهم اللي يبون هالاشياء تصير ..

افتح الحلبة وبرسوم بشكل يومي للي عنده طاقة ويبي يفرغها .. مب شرط في الاعياد او في رمضان او في المناسبات او على حسب المزاج ..

هالجيل صعب تسيطر عليه وجيل مندفع وبقوة .. لازم تسايسهم ( مب تخضع لهم تسايسهم ) عشان نحقق الاهداف المرجوة وهي المحافظة على سلامة الارواح ..

لكن نسال الله العفو والعافيه والهداية لمثل هؤلاء الشباب ..

تقبل مروري ,,

[عنزي قطر]

عدنا اتمنى مشاركة الجميع

معاً للحد من حوادث الطريق


1_هل تراها جريمة؟

2_هل تراها هواية ومتنفس لطاقات الشباب؟

3- هل تؤيد عقوبة السجن على مرتكب هذه الممارسات؟

4_هل تتكفي بالغرامة والمخالفة ؟

5_ هل تؤيد سحب السيارة لمدة عام؟

6_ هل تؤيد مصادرة السيارة

7_ ومن هو المسؤل الاول

8_ ماهو الحل برأيك لحل المشكله

[احمد1]

اكيد جريمه يشترك فيها ولي الامر قبل الولد ... للعلم شفت قصاص لصبي في السعوديه الله يرحمه يسمونه مطنش طبعا اسم مستعار يعني ... شاقول مستهتر يعني لانه دعم ناس وذبحهم تقريبا هذا لازم يكون الجزاء اذا تسببو في قتل حد