سوال عن المقابلات للوظائف !!

[Mo7a]

بسم الله الرحمن الرحيم

السلام عليكم

يا إخواني الأعزاء أنا خريج جديد (من جامعة ستندن قطر <الهولندية>) تخصصي إدارة أعمال وقدمت في المعرض المهني واونلاين (هل في داعي اقدم باليد ولا اونلاين يكفي ؟!) في عدة اماكن ولقيت كثير ردود بانه لا يوجد اماكن عندنا وفي اماكن ما عبرتني وفي اماكن عملت معاها مقابله وما عبروني ههههه

المهم انا حاب اسال انه لما يسال كم تتوقع راتبك ايش اجاوب والمقابلات اللي رحتها يصر اني اقول رقم فايش الجواب المناسب وايش الراتب المناسب اللي لازم اطلبه كخريج قطري جديد؟؟؟

وشكرا لكم:eek5:

[qews]

بما انك جديد .. اتمنى انك ماتنظر للراتب لانك انت في مرحله التاسيس حاول بقدر الامكان تشوف الاماكن الي تتعلم منها. صحيح كل الامكان بتتعلم منها بس في مراكز وشركات ان تطلع منها يدورونك دواره او اذا تقدم تحصل على قبول بسرعه

لاتركض ورا الفلوس لان مستقبلا الفلوس بتركض وراك ..

كل التوفيق والاحترام
وشكرا

[Mo7a]

اخي الكريم انا سالت السوال لانه ينسال فالمقابله ولا اعرفله جواب !! حابب اعرف ايش اجاوب على هالسوال مب اكثر السالفه مو سالفة فلوس وشكرا لك عالنصيحه :)

[قرنقووش]

اسال موظفين في نفس تخصصك كم كان راتبهم اول ماتوظفوا وقولهم تقريبا كذا ..
او قولهم مايهمني الراتب المهم اتعلم من شغلي والخ من الكلام الحلو
او قوله راتب زهيد مثلا ١٠٠٠٠ .. ان كتب لك في العقد راتب اعلى منه بشوي او مثله خلك على علم انه بخس حقك وارفض العقد على طول .. مادري انا لو مكانك بسويها

[Bin Hood]

بما انك جديد .. اتمنى انك ماتنظر للراتب لانك انت في مرحله التاسيس حاول بقدر الامكان تشوف الاماكن الي تتعلم منها. صحيح كل الامكان بتتعلم منها بس في مراكز وشركات ان تطلع منها يدورونك دواره او اذا تقدم تحصل على قبول بسرعه

لاتركض ورا الفلوس لان مستقبلا الفلوس بتركض وراك ..

كل التوفيق والاحترام
وشكرا

اعجبتني نصيحتك

والي عجبني اكثر " لاتركض ورا الفلوس لان مستقبلا الفلوس بتركض وراك " :nice:

[المحقق كونان]

قول الراتب مب مهم ..المهم الشغل وان الشغل هو الي جيب الفلوس

انت تبي تشتغل في قطاع حكومي ولا شركات؟

[Al-Kuwari]

بالأول اخوي بالمبارك عالتخرج وعسى ربي يوفقك في حياتك ومنها للأعلى ان شاء الله

انا اشتغل في مجال التوظيف وبصراحة المفروض اللي يسويلك المقابلة ما يصر عليك بتحديد الراتب !

المهم ماعلينا اذا تعرف حد في المكان اللي انت مقدم فيه فتقدر تسأله عن رواتب الخريجين الجدد

واذا تبي رايي تقدر تجاوب عليهم بأجابه مثالية صعب انه يراددك بعدها ويصر عليك بتحديد الراتب

تقدر تقول طال عمرك ( انا خريج جديد وفي بداية حياتي الوظيفية , بالنسبة لي التطوير اهم بكثير من الراتب في مرحلتي الحالية , وفرصة العمل في شركة معروفة بالاهتمام بموظفيها والسعي على تطويرهم مثل شركتكم الموقرة يعتبر مكسب لي واهم من الراتب في المرحلة الحالية)

بالتوفيق ان شاء الله

[Mo7a]

شكرا اخواني على المساعده وعالنصائح الحلوه يعطيكم العافيه

[ANONYMOUS]

اصلا اللي يسأل هالسؤال مب صاحي

جاوبه وقول على حسب قوانين الخدمه المدنيه

يعني العلاوات ثابته في كل الجهات

والاساسي بما أنك فريش قراديويت على أول السلم في الجهه المعينه

[الزعفراني]

قوله مليون ريال قطري وابتسم - عشان تكسر حاجز هالسؤال - وانتظر ردة فعله ، اذا شفته بدا في الغشمره روح معاه ، واذا شفته جاد قوله طبعا ما اقصد مليون لكن مافي انسان ما يطمح انه يكون راتبه كبير ، لكن أكيد ما راح أرضى براتب أقل من راتب الوظيفة اللي انا متقدم لها وموجوده عندكم في سلم الدرجات الخاص بجهة عملكم .

وتحمل تقول انك تبي تتوظف عشان انت تحب الشغل وانه الراتب مب مهم واخر شي ممكن تفكر فيه ، خلك عفوي عشان تقنعهم ، وابتعد عن التصنع والمثالية ، لان الانسان اللي يتصنع في المقابلات ينصاد ويعرفون انه ما ينفع للشغل .