خبرتكم الله يجزاكم خير

[نوت]

الي اعرفه انه من الأفضل الحمامات تكون فوق بعض في الفلل وصرفها واحد بس الحاصل ان عندي حمام مافي تحته حمام عل مجلس في الدور الأرضي وخايفين من سالفة التسريب للماي والرطوبه ,وهل فيه حل لتفادي هذه المشكله في المستقبل او طريقه مضمونه للعزل بحيث مايحدث التسريب ,,ودمتم

[معماري قطري]

هلا أخ نوت

معروف إن خط الدفاع الأول للرطوبة هو البلاط، وانا أزيد ان الماي ما يتسرب من خلال البلاط الا إذا بقى مدة طويلة وكان ضغط الماي قوي يعني شكل ما نقول تارس أرضية الحمام، لكن الماي يتسرب من البلاط بطريقتين اللي هم من بين كل بلاطة وبلاطة وفي المونة وخصوصاً إذا المونة إسمنتية أو إسمنتية الأصل أو حتى ما تُسمى " Sandy Grout فهذي معروفة بوجود فراغات مجهرية وإسفنجية الشكل وتسرب الماي شوي شوي، لكن لو إستخدمنا نوعية الإيبوكسي غراوت واللي يجي قطعة وحدة بعد ما نحطه وما فيه أي كسور وما يكون أساس رملي، ننسى مرور الماي من خلاله، وطبعاً لازم يكون فيه ميلان مدروس لكل جهة ناحية الصرف،،

الطريقة الثانية اللي يتسرب بها الماي إلى داخل تحت البلاط هي من خلال الجوانب والتقاء بلاط الجدران ببلاط الأرضية، وكثير حساسين من ناحية يبون بداية بلاطة الحايط فوق بلاطة الأرضية فيحدث فراغ بسيط يمر منه الماي بمحاذاة الحايط إلى تحت البلاط، وتتعبى أرضية الحمام لوجود عازل الماي تحت ولعدم وجود مخرج للماي، ومع الوقت يبدأ الماي أما يرتفع ويبقع حوايط الحمام الخارجية والداخلية أو يشق طريقه في العازل ويحصل منفذ لو قد جزء من الشعرة ويكبر هالمنفذ تدريجياً ويترطب السقف الخرساني، ولحل هذي المشكله ننسى نكون حساسين زيادة ونخلي بلاطة الحائط الأخيرة تكون جزئياً تحت مستوى بلاط الأرضية، وأثناء تركيب بلاط الأرضية نحرص إن المونة تكون عبت كل فجوة بين بلاطة وبلاطة، أو كحل ثاني نستخدم خط من السيليكون على زاوية إلتقاء بلاط الحايط مع بلاط الارضية كما هو معمول به في حمامات الفنادق، حيث يهمهم شكل البلاط كثير ويركبون بلاط الأرضية قبل بلاط الحائط فيضطرون لسد كل فجوة في زاوية التقاء السطحيم بالسيليكون، وذلك لأن هذه الزاوية غير ثابتة ونشوء انفراج بسيط فيها سهل ويحدث مع مرور الزمن فيدخل الماء.

فيه ناس تسوي العازل دبل، بس لو وصل الماي تحت بتستوي الارضية رطبة وبيستوي إنتفاخ ومشاكل ثانية وبيتكسر بلاط الأرضية أما بيخفق أو بيرتفع، ومره تناقشت مع مهندس ميكانيكي اللي هو متخصص بالمياه أكثر مني فقال المفروض يكون فيه بايب ماي بسيط يصرف الماء للخارج لو حصل تسريب فوق العازل، وهذا كله طبعاً مع لصق كل بايبات الصرف الصحي بالطريقة وبالمواد الصحيحة حتى لا يحصل تسريب منها تحت البلاط ومباشر وكذلك بايبات تصريف ماء المكيفات.

[نوت]

أخوي معماري قطر بيض الله وجهك كفيت وفيت

[نوت]

اخوي نوعية الأيبوكسي اذا انا بوفرها للعمال من وين اجيبها

[معماري قطري]

اخوي نوعية الأيبوكسي اذا انا بوفرها للعمال من وين اجيبها



توجد عند أغلب موردي مواد البناء مثل العمودي ومثل نابينا ممكن والمتحدة عندهم نوعية متعددة الألوان بس رملية لكن سعرها معقول وعملية وقوية .. بس مهم للي يسوي هذي النوعيات يكون فاهم وخصوصاً مع الإيبوكسي لأن لازم ينمسح البلاط مباشرة بعد ما تنحط ويتنظف عدل وأي قطعة تبقى على سطح البلاط ما تنشال بسهولة بعد ما تجف .. وبعدين في خلطها يستخدم سائل خاص غير الماء ويستخدم خلاط ميكانيكي خاص مثل الخفاق بس كبير ويخلطها بتجانس وحسب التعليمات الخاصة بها.

[معماري قطري]

أخوي معماري قطر بيض الله وجهك كفيت وفيت



بالعكس إخوي مقصر وجوانب كثيرة ما غطيتها، وكتبت حول هالموضوع قبل وحطيت رسومات توضيحية للعازل وطريقة تركيبه حاول تشوفها في المنتدى،،، ولا تنسى شيء مهم تخطيط حمام فوق حمام صعب إنجازه أوقات وبسهولة تقدر تسويه وين ما تحب بس تحتاط للتفاصيل ولا تهتم كل شيء بيكون سهل،، سويت حمام رئيسي وغرفة ملابس مغلقة وصالة تسريحة بين الحمام وغرفة الملابس وبحوايط كبيرة وكلها فوق سقف غرفة طعام، وبدون أبيام أو أعمدة وسطية، بس خلينا السقف كله نازل 35 سم علشان العزل وكل شيء للحين من أفضل ما يكون بعد قريب من 7 سنوات والحمد لله.