استفسار لاهل الخبره بخصوص الخرائط

[مرحوم قطر]

السلام عليكم و رحمة الله و بركاته


يا شباب ولا عليكم امر بغيتكم في خدمه

اول شي المكتب الهندسي الي يسوي الخرايط شنهو دوره بالضبط ؟.؟

يعني يرسم الخريطه و بس ولا بعد يسوي شي ثاني

واذا في شي ثاني وشهو هلشي ؟.؟



و الموضوع الثاني كم اسعار الخرائط ؟.؟

يعني لو بنتكلم عن بناء فله من دورين 800 متر

كم بيكون تكليفها ؟.؟

واذا كان في مقاييس ثانيه لحساب الخرائط اذا امكن اعرف هلمقاييس

او اعرف بعض الاسعار الي ممكن تكون حق خرائط الفلل

[معماري قطري]

إخوي باعطيك الحساب بإختصار

كل مكتب يحدد قيمة إستشارات حسب تقديرة لميزانية المبنى ولتكلفة إنشاؤه بناءً على الطلب الأولي وحدود التصميم، يعني إذا كان بس تصميم واستخراج رخصة البناء مع كافة الموافقات بيكون له سعر معين والغالبية تخلي التصميم لهالدرجة في حدود ما تزيد عن 2% من قيمة البناء التقديرية، وممكن تقل لحد حتى 1% إذا كان نسخ ولصق، وفيه مكاتب متخصصة بس تصميم معماري، وعرفت دكتور مهندس يسوي نماذج من الخشب والكرتون بس سعره كثير غالي وما يخلص الا الموافقة الأولية، يعني يبقى عليك تاخذ شغله لمكتب ثاني يحسب لك الخرسانات والكهربة وباقي التفاصيل.

بعض المكاتب المتخصصة والناصحة للعميل تقترح عليه كافة الخدمات وتسعيراتها مبدئياً، وهذي مكاتب تشتغل صح وتضمن حق المالك وحق مهندسينها، فمن غير المعقول مكتب مثلاً يسوي لك دراسات أرضية متكاملة لحساب قوة الأرض عندك وبُعْد المياه الجوفية، وهي تكلف في حدود 20 ألف وممكن على ضوءها يصمم لك أساسات مدروسة توفر عليك هالعشرين ألف اللي دفعتها في التصميم أو توفر عليك عناء عمل طابق تحت الأرض والمياه الجوفية مرتفعة وبتدخل في ماساة مستقبلاً لو عملت هالطابق، فينصحك على ضوء الدراسة بعدم جدوى عمل هذا الطابق تحت الأرض.

عندك شيء مهم وأساسي ومكلف إذا انعمل صح اللي هو حساب الكميات والعقد والمناقصة والإشراف المتواصل حتى نهاية فترة الصيانة، والتسليم المبدئي والتسليم النهائي للمشروع، فكل هذي الأُمور مجتمعة تكلف في حدود 5% من قيمة البناء التقديرية، ولازم تتفصل جيداً في عقد الإستشارات بالكامل، وانت ممكن تلغي أي شيء منها لكن الأساسيات اللي هي إستخراج الرخصة والإشراف مع المرحلة الوسطية اللي هي المناقصة من الأفضل أن تكون في عقد واحد واضح ومع استشاري.. جيد ومختار بعناية.. واحد، وحالياً مع تكنولوجيا التصوير والمراسلات الإلكترونية إطلب أن يتضمن العقد عمل تقرير مصور أُسبوعي بحالة البناء والحلول الإشرافية وأن يُرسل على إيميلك.

وحساب الكميات هو عبارة عن توصيف متكامل للعمل وللمواد مع تكلفة سعر كل مادة وكل عملية على حده، ومنه يستطيع المقاول تعبئة الجدول بواقعية أكثر ويستطيع أن ينزل لسعر معقول، هذا مع العلم أن أكثر المقاولين قليلي الخبرة سيستصعبون تسعير هذا الجدول وسيعتمدون حساباتهم، وهذا الجدول يربط المقاول بسعر معين وفي حالة إلغاء بند معين يمكن توفير هذا المبلغ أو الإضافة عليه بنفس التسعير المسبق، ويُعتمد حساب الكميات في الدفعات فمثلاً مع انتهاء مرحلة معينة وحسب حساب الكميات قد يستحق المقاول مبلغ معين قد يكون كبير نسبياً، ومرة أُخرى يكون هذا المبلغ صغير حسب الأعمال وتكلفتها المحددة مسبقاً، فبهذا يكون عندك علم مسبق عن سير الأعمال وعن تكلفتها وعن المواد المطلوب شراؤها من قبلك، وكذلك يعطيك أريحية في تنظيم دفعاتك المالية للمقاول، وقد تكون دفعت دفعة مقدمة كبيرة، فهذه تكون كمخزون مالي للمقاول في حالة طلب دفعة تعتبر 10% مثلاً مُسددة من هذه الدفعة، وتُخصم 10% للدفعة المؤمنة للصيانة والمستحقة بعد 400 يوم من تسليم المبنى النهائي حسب المواصفات القطرية للبناء، فلو طلب المقاول 100 الف دفعة وكانت مستحقة فلا يُعطى الا 80 الف، لأننا نقتطع منها مبلغ 10 الاف كضمان لفترة الصيانة، ونفترض أن 10 الاف استلمها في الدفعة المقدمة، وأعلم أن هذا النظام صعب فهمه لكن هو ضمان للمقاول وللمالك لحسن سير المشروع وكثير من المقاولين لن يرضوا به.

[معماري قطري]

نسيت اتكلم عن التصميم الداخلي بواسطة مختصين مب دجالين وهذا له حسابات ثانية ويفترض اللي يبي يسوي شيء متكامل ومميز يحطه في حساباته، وكثير من المكاتب ما عندها هالتخصص وممكن يسوون لك إتفاق مع مكتب خاص وبإشرافهم من البداية وهو الأفضل للي يبون شيء مميز وغريب.

[Bozizoo]

مرحبا اخوي معماري قطري
ترى الرجاال يبني فيلا يسكن فيها
مب برج 75 دور ولا مجمع من 250 فيلا بخدماتها
الرجااال ضاع من توصيفك هذا الي تتكلم عنه كله صح ولا فيه غلط ابدا
بس للمشاريع الكبيرة
اما الفلل الي عندنا ومثل ما انت عااارف اكثرها كوبي بيست
او معيار الامن عااااالي جدا يعني مايتعب نفسه الاستشاري في حسابات الحديد و الخرسانات
اخوي معماري قطري خبرتك كبيرة ماشاءالله وانا ما اقلل منها ابدا بل اثني عليها
وانا دائما متابع لمشاراكاتك و مداخلاتك و اتعلم منها
و تحياتي لك

[معماري قطري]

مرحبا اخوي معماري قطري
ترى الرجاال يبني فيلا يسكن فيها
مب برج 75 دور ولا مجمع من 250 فيلا بخدماتها
الرجااال ضاع من توصيفك هذا الي تتكلم عنه كله صح ولا فيه غلط ابدا
بس للمشاريع الكبيرة
اما الفلل الي عندنا ومثل ما انت عااارف اكثرها كوبي بيست
او معيار الامن عااااالي جدا يعني مايتعب نفسه الاستشاري في حسابات الحديد و الخرسانات
اخوي معماري قطري خبرتك كبيرة ماشاءالله وانا ما اقلل منها ابدا بل اثني عليها
وانا دائما متابع لمشاراكاتك و مداخلاتك و اتعلم منها
و تحياتي لك


هههه الله يسلمك ويخليك

يمكن شوي انا أبالغ وأقول اللي المفروض يكون، وصدقني هالإجراءات كلها أسويها دوم وبالعكس المشروع الصغير يكون سهل وتسهل إجراءاته، حتى مكاتب تسوي لك عدد بسيط من الرسومات وكلها نسخ بس تغيير الإسم ومبالغ مبالغة كبيرة في الخرسانات وأحياناً يكون تقصير كبير في موضع معين أو حماية معينة يحتاجها مشروعك وموقع مشروعك، فتطلع لك بعض المشاكل اللي انت في غنى عنها.

سامحني قلبي على كل واحد يبني وعندنا مكاتب كثيرة ما عندهم نسخة من قوانين البناء القطرية، وعندنا مكاتب كثيرة كل اتفاقياتهم كلام يطير مع الهوا والمفروض كل شيء موثق وموقع ومؤكد قبل، وهذا غير عن التعامل من تحت الطاولة وسرقة من يبني عينك عينك بواسطة معدومي الضمير .. بعضهم .. من مقاولين همهم الربح الكبير واستشاريين ياخذون المشروع برخيص ويطلعون ربحهم من العمولات.

انا أهتم لواحد يتعب ويتحرك في كل إتجاه ويسوي شغل الإستشاري اللي واقف محايد، ولا ينصح حتى في جماليات المبنى ومعروف ان المبالغة في التزيين قبح ... حتى سوقنا فيه من المواد الغش الكثير من معدات ووايرات كهربية مثلاً ومن بايبات نحاس تصدي لخلطها بالحديد ومن بايبات بلاستك صناعة غير ويقولون ألمانية.. ما ادري وين مختبر المواد عنهم ولا حماية المستهلك ... كثرت الحرايق والأسباب معروفة عازل محطوط على بيت شعر ومسوينه عمال عرب يتعلمون فينا، وكلها مواد سريعة الإشتعال ولا حد يحاسب هالهواه بمشاكلهم والمفروض ينسجنون ويتحاسبون ما يدعون الجهل ويسوون شغلات غش تضر الناس ويصدرون فلوس بلادهم واحنا نلوم نفسنا.

وتأكد يا اخوي لو الشخص المحتاج لبيت وما اضطر يبني الا لأنه معتبره مشروع العمر، لو هذا الشخص عرف انه لو بيدفع شوي أكثر بيحصل شغل مضمون بيدفع، ولو عرف يتصرف يمكن يوفر ويحصل شغل مضمون، والمعرفة ما تجي بالحظ والبركة وهي صحيح توفيق من رب العالمين بس سعي الإنسان لها واجب، وانا واحد من كثيرين يحاولون نقل الصورة الواضحة للإخوان المحتاجين حق هذي المعرفة، ووالله أحاول جاهد إني أرتقي بهذه المهنة اللي أصبحت وضيعة بسبب ممارسات البعض.

أذكر مره رحت بيت واحد من الإخوان ويبنيه له واحد قريب فدرنا حول البيت اللي كان طابق وشفت العمود من الخارج منتفخ وكنه محطوط عليه بلاستر، فأخذت حديدة وضربت مكان الإنتفاخ وانفتح وطلع الحديد يبين غير مشبوك مع حديد العمود .. يعني تخيل العمود شبه مفصول عن قاعدة العمود ... وهناك شلوخ بزاوية 45 درجة في بعض الحوايط ومكسره حتى البلاط، وهذي معروفة انها شلوخ خطيرة وسببها ضعف الأساسات أو التربة أو خطأ في البناء وقلت رايي بصراحة، وإستشاريه يقول له "لأ دي الأرض بتريح" .. يعني توصل بنا المواصيل نصدق هالداجلين ونكذب الواقع والعلم والمنطق ... فلازم نحتاط لأمثال ذيلا من البداية، والمفروض يكون عندنا نظام حماية من الممارسات هذي ونظام قضائي سريع يعطي صاحب الحق حقه وبسرعه.

وباقي كثير ما قلت وسامحوني على الإطالة.