مطلوب مقاول كامل الزيادات

[bntqtr]

مرحبا اخواني...

ابي مقااااول ضروري حق بيت العمر ما يلعوزنا ويبني بسرعه وسعرة حلو حق مساحة بنيان 1000 وشي ابي اشوف البيوت اللي بانيها وانتو مجربينه ولالا.لانه بيتنا في حركات نبغي نسوي العظم والكهربا والماي عنده وعقب احنا بنشطب على راحتنا وانتظر ردودكم ان شاء الله .. وشكرا

[راشد محمد]

بالتووووووووووووووفيق

[بومحمد86]

هههههههه عجبتني كامل الزيادات...
ان شاء الله يفيدونج الاخوان

[كبير المتداولين]

الكامل الله

الله يقويج عالبنيان

[معماري قطري]

صدقيني مقاولينا مرقعين يمكن كلهم حتى شركات كبيرة توقع عقد على أساس الشغل كله عليها ووقت الصج تجيب مقاولين بالباطن ويمكن كل المشروع يتم بالباطن إلا مع القليل.

انا خذتها كسياسة عمل إني أسوي تصميم متكامل وبحساب كميات، وبعدها أسوي مناقصة وأختار لها الزينين من المقاولين وعن طريق مكتب إستشاري محترم.

بعدها تجي مرحلة دراسة المناقصة وردود المقاولين والتعديلات وبس ما انصح أي حد يسوي بنيانه ويخلي التشطيبات عليه، المفروض المقاول الرئيسي يكون مربوط بالمشروع للنهاية، فهو يهتم بالموقع وينسق الأعمال ولو حتى انتوا بيكون شيء عليكم بيكون معروف وتقدرون تخططون له مسبقاً وتشترونه حتى بالدفعات لين يجي وقت تركيبة مثل الحمامات تكرمون والبلاط، وحتى الأبواب والدرايش لكن المفروض فيه شروط ان المقاول مسؤول عن ترتيب إحتياجات هذي الشركات اللي بتتفقون معاها خاص وعن حماية موادهم والموقع ككل، ويبقى في النهاية التشطيب النهائي ومن رايي حتى ذيه مهم يسويه المقاول الرئيسي أو بإشرافه، بس كله يتسجل من بداية العقد ويتفصل في حساب الكميات حتى لو حبيتوا تغيرون بند معين يكون سهل الإلغاء أو الإضافة، وبعدين مهم من كل دفعه يستحقها المقاول نستقطع مبلغ لدفعة الصيانة ولو يكون 5% من كل دفعة، فهذي تكون للمقاول بعد إنتهاء فترة الصيانة اللي عادةً تكون 400 يوم حسب المواصفات القطرية، وانا خليتها حول سنتين عندي و ما طلبت المقاول الا مره و جاء بسرعة لانه ضبط الشغل كله، وكان باقي له 10% من مبلغ العقد.

ودايماً شيء مهم في أي تعاقد تتعاقدون مع شركة محترمة ولها تاريخ طيب وفيها موظفين ومهندسين كفاية ومتمكنين من تغطية كل التخصصات، والتخصص اللي غير موجود يحددون مسبقاً مع أي شركة بيتعاونون، ويتسجل كل شيء في العقد، ومهم التعامل بالطيب والمرونة مع المقاول وإفهامه كل شيء في العقد فبعضهم مساكين ويستغلهم المكتب الإستشاري بالغش وبعض الملاك يحسبونها شطاره، وفي حالة إن الواحد يشوف المقاول ماشي صح ويشتغل بهمة يتعاون معاه ويساعده حتى بدفعات قبل إستحقاقها، فبعض المقاولين يتورطون بناس ما يدفعون ويحتاجون لكل ريال في المشروع وحتى يقدرون يوفرون المواد,،

وشيء أخير للملاك عليهم إنهم يهتمون بحلالهم ويتابعون البنيان بصفة شبه يومية ويتعاملون بكل طيب مع العمال وبهالطريقة يضمنون كسب تعاطفهم وتفانيهم في الشغل، فمثلاً يمر عليهم الواحد بماي أو بيبسي وينصحهم بعدم العمل في الحر والإستراحة ويتقي الله فيهم مهما كانت جنسيتهم أو ديانتهم، وإن شاف غلط ينبه المكتب الإستشاري ويخليه يتصرف بطريقة رسمية ومكتوبة، ودوم يسئل ولا يتحرج ويستشير ولا يبالغ وايد في الزينة وفي البذخ فالوسطية أفضل شيء.

[الشلهوب]

اغلب الشركات حتى الكبيرة فيهم ياخذون عمال من شركات اخري بالعقود مثلا الحدادة والنجارة من شركة وصف الطابوق من شركة والكهربا والبايب فتير من شركة لحد مايخلص شغلة

[alfahad1]

اخوي يمدح مقاول بنقالي مسويله فيلا كبيره

[bntqtr]

ابي اسامي شركات وارقام خل نشوف عرض سعرهم ونسال عن الشركة اكثر

[ولد المنصور]

الولايه ,,, سوق غرناطه ... وحياك الخيسه اول لفه يمين واول لفه يسار وشوف الفلل واحكم

[راشد محمد]

ابي اسامي شركات

[king999]

نصيحه ابعدي عن المصري والسووري نصيحه لوجه اللة واشتغلي مع جنسيه اسيويه .

بس لفت انتباهي كامل الزيادات
بس نسيتي تذكرين اي موديل :)

وبالتوفيق

[بن غيث]

هذا على اساس ان الاسيوي افضل ...
اختكي مثلكي

[king999]

هذا على اساس ان الاسيوي افضل ...
اختكي مثلكي


من واقع تجربة فرق شاسع وين اختكي مثلكي اللة يهديك ما لتهنا الا هالجنسيتين ومو الكل انشاء اللة بس الشر يعم والخير يخص

[ولد المنصور]

انا واحد بنيت فلتي عند سوري ,, بس اخلاق والتزام واحترااام ,, والحمدلله ومن اجيبله حد الا يمدح فيه الحمدااه بيض الوجه والحين شغاال مع اخوووي

[[vip]]

شركة إبداع الخليج بانيه بيتي في 8شهور مع البلاستر والعازل وتشطيب الكهربا والماي

وسعر هم مناسب اذا تبين رقم المهندس حاضر

ويعلم الله انه مريحني حتى التعديلات مأخذا عليها فلوس إضافيه

[بومحمد55]

شيكي عالخاص أختي

[بونـ ايف]

في مقاول قــطري انصحج فيه شيكي الخاص

[معماري قطري]

ما شاء الله كثرت الخيارات وتعددت الآراء وبيصعب القرار

انا أكرر واعيد إنه أهم شيء العقد يكون متكامل والرسومات واضحة ومحدده كل شيء، وبعدين إختيار المقاول على أُسس صحيحة وبعد مفاوضات وتعديلات على العقد والمواصفات، فنكون بذلك عقلناها وتوكلنا.

[bntqtr]

تعددت الخيارات انا لازم اشوف الشغل عالطبيعه والمشكله اخطاء البنيان ما تبين الا بعد السكن

[al asalah]

مرحبا اخواني...

ابي مقااااول ضروري حق بيت العمر ما يلعوزنا ويبني بسرعه وسعرة حلو حق مساحة بنيان 1000 وشي ابي اشوف البيوت اللي بانيها وانتو مجربينه ولالا.لانه بيتنا في حركات نبغي نسوي العظم والكهربا والماي عنده وعقب احنا بنشطب على راحتنا وانتظر ردودكم ان شاء الله .. وشكرا

مرحبا الله يوفقج في المقاول الزين بس لازم تحطين في الإعتبار انه لازم يكون الإستشاري من طرفج حتى المقاول ما يلعب بزيله وتقولين ها الشي حق المقاول ان في استشاري وتتفقين مع الإستشاري والتنفيذ يكون حسب الخرائط او حسب التعديلات الي بتسونه في البيت ويكون اجتماع بينكم المقاول والإستشاري والمالك المنزل اذا مشيتو على الطريقة مافي مقاول يقدر ياف بزيله بس وقت اي التغيرات في الخرائط لازم تقولين حق المقاول والإستشاري مع عقد بالتغيرات التي عملت على الخريطه والتوقيع هما

[سهم طايح]

عندي مقاول كامل الزيادات بس بدون فتحة وونش

اذا يهمك كلمني على الخاص
حاليا هو اجازة وبيرجع اخر الاسبوع

[bntqtr]

انا محصلة الاستشاري ومتفقة معاه بس المشكله المقاول ابي شيء ما يعور الراس

[al asalah]

انا محصلة الاستشاري ومتفقة معاه بس المشكله المقاول ابي شيء ما يعور الراس

في ناس يمدحون شركة سالم حسن الأنصاري شوفي معاهم

[al asalah]

شوفي موقع لجنة المناقصات ومنها صفحة التصنيف المقاولين فيها درجات الإولى والثانية والثالثة المعتمدة من الدوله والله يوفقج ان شاء الله

[باتريوتP]

سلام عليكم ورحمة الله وبركاته
اختي احنا شركه متخصصه بالمقاولات وعندنا مهندسين وعندنا عماله فوق 100 عامل كلهم على كفالة الشركه
وقبل كل شي تقدرين تشوفين شغلنا فله فله
وقبل كل شي احنا شركه مصنفه
واصلا اختي الشغل يتوقف نجاحه على ثلاث اشخاص ( المقاول + الاستشاري + المالك)
لازم تعاون الثلاث اشخاص لان بتعاونهم كلهم مستفيدين
وقبل كل شي العقد لازم يكون مفصل بند بند لان الدنيا حياه وموت ولان هاي فلوس
بالتوفيق لنا لكم ان شاء الله

[معماري قطري]

سلام عليكم ورحمة الله وبركاته
اختي احنا شركه متخصصه بالمقاولات وعندنا مهندسين وعندنا عماله فوق 100 عامل كلهم على كفالة الشركه
وقبل كل شي تقدرين تشوفين شغلنا فله فله
وقبل كل شي احنا شركه مصنفه
واصلا اختي الشغل يتوقف نجاحه على ثلاث اشخاص ( المقاول + الاستشاري + المالك)
لازم تعاون الثلاث اشخاص لان بتعاونهم كلهم مستفيدين
وقبل كل شي العقد لازم يكون مفصل بند بند لان الدنيا حياه وموت ولان هاي فلوس

بالتوفيق لنا لكم ان شاء الله



أُؤيد كلامك 100%

وصراحة قليل نحصل مقاولين ينصحون بالحق، وصحيح مهم العقد والرسومات والمواصفات وحساب الكميات إن وجد،،

فهذه الأُمور تعتبر خطة عمل تربط ثلاث جهات أو أكثر، والدقة مطلوبة والمتابعة ولازم المالك يكون دوم مسيطر ومتخذ خطوات للأمام ومستعد لتأدية واجباته المالية والتنسيقية على حسب العقد.

[kawkawii]

في شركه اسمها "القصر" شغلهم اهو الي يجيب زباينهم ماشاء الله الشغل عالي الجوده والفنشنق ممتاز
وسريعين .. واسعارهم حلوه .. اذا حاب ببعث لك الرقم
ويرونك شغلهم اذا حبيت ..لان عليهم طلب

[باتريوتP]

أُؤيد كلامك 100%

وصراحة قليل نحصل مقاولين ينصحون بالحق، وصحيح مهم العقد والرسومات والمواصفات وحساب الكميات إن وجد،،

فهذه الأُمور تعتبر خطة عمل تربط ثلاث جهات أو أكثر، والدقة مطلوبة والمتابعة ولازم المالك يكون دوم مسيطر ومتخذ خطوات للأمام ومستعد لتأدية واجباته المالية والتنسيقية على حسب العقد.


اخوي قطري معماري على راسي والله
شهادتكم بكلامي فخر لي
بالتوفيق يارب لي ولك وكل الناس