:: عيالنا جابو العلامة الكامله في الفيزياء وبعدين::

[قطر دزاين]

السلام عليكم

الحمدلله سبحانه على ما اعطى

انا ولدي نسبته فوق 90 والعلامة الكامله في الفيزياء وهو من ضمن الاسامي اللي طلعت في جريده الرايه

سؤالي هل سوف يتم تبني ها الطلاب او سوف يهملون كا العاده
ونجيب يعيون زرق ويادلي

اتمنى من الجهات المختصه ان تهتم بهولا الطلبه



دعواتكم لهم بالتوفيق

وجزاكم الله خير

[qtr qtr]

اولا الف مبروك بنجاح ولدك والله يوفق ولدك ان شاءالله بالشهادات العليا .. ودام انه جايب العلامه الكامله بالفيزياء خله يشوف له تخصص هندسة فيزياء سواء فالخارج او عندنا فالجامعات ..

[ريتويت]

ماشاء الله لا اله الا الله محمدا رسول الله

[فلتة زمانها]

ماشاءالله الف مبروووك
دامه شاطر في الفيزياء انصحه يدرس تخصص هندسة بترول ويختار بعثه من الشركات
المعلنه

[رُفق المجنّا]

ما يبيلها واحد اثنين

ابو عيون زرق أكيد


مبروك :)

[روح الاطلس]

قدم له على البترول

[BoYousuf]

مبروك أخوي نجاح ولدك وما شالله عليه يستأهل التفوق

خل ايقدم على الشركات الي تبعث ويقدم الامتحانات الي يطلبونها الجامعات مثل التوفل والسات وشركات الابتعاث ماراح ايقصروون لانه ماشالله عليه نسبته حلوه وماشالله عليه درجاته ممتازه في المواد ألعلميه واكثر الشركات حاليا يطلبون تخصصات علميه نفس الهندسة بالاغلب
الله ايوفقه ان شالله ويسير أموره

[.خالد]

اولا الف مبروك منها للاعلى ، لا اكيد راح يهتمون فيه اهتمام قوي وراح يبعثونه الى اعرق الجامعات الغربية ، وراح يجتهد ويتخرج ...وعقبها ... بيشتغل مراسل عند بوعيون زرق :)

اهم شي في هالمرحلة اخوي توصي الولد يشد حيله ويدور هو بنفسة عن افضل فرصة لا يقعد وينتظر ويصيده الغرور ، لان الشهادة الثانوية هي اول واصغر خطوة في مشواره العملي والله يسهل له جميع اموره ...

[بصمة قطرية]

ماشاء الله
تبارك الرحمن
الله يحفظه ويوفقه
الف مبروك ..

[قطر دزاين]

الله يبارك فيكم ويفرحكم بعيالكم ان شاءالله
راح اخذ بنصايحكم ان شاء الله

[Al-Kuwari]

الشيخ

اول شي بالمبارك على نجاح الولد وتفوقه ما شاء الله

كم درجته فالانجليزي ؟
ونصيحه خل يقدم الايلز ويحاول يجيب ٥.٥ او ٦

وبعدها يقدم على جامعات بريطانيا تخصص هندسه ميكانيكيه او كهربائية بحكم ان التخصصات مطلوبة وبشده ( خل يقدم على بريطانيا لان قبول التأسيسي فيها سهل والشركات يبعثون تأسيسي لبريطانيا بس )

وبعدها خل ياخذ اوراقه كلها (صورة من الشهادة / صورة من نتيجه الايلز / صورة من قبول الجامعه / صورة من البطاقة الشخصية / السيرة الذاتية ويفضل انها تكون بالانجليزي ) ويفتر على شركات البترول والغاز ( قطر للبترول / راس غاز / قطر غاز / اوكسي / اوريكس / دولفين ) وان شاء الله بيحصل له بعثه خارجية ويرجع مهندس واموره طيبه ومستقبله مضمون

طبعا لاتنسى ان الجامعات اللي يقدم عليها تكون ضمن الجامعات الثمان المعترف ببرنامجهم التأسيسي في المجلس الاعلى


بالتوفيق

[م. عبدالعزيز]

ما شاء الله الله يحفظه
خلوه يختار التخصص اللي يحبه
وافضل مجال للفيزياء هو الهندسه