ايش الحل في فك عقد ( كهربائي وفيتري ) ؟

[Chambray]

السلام عليكم

عندي شركة تعاقدت معاها لعمل الكهرباء والماء في الفيلا ..
بقيمه اجماليه قدرها 145 الف

وعطيته الدفعه المتفق عليها وهي 45 الف

ومدد لي بيبات الماي في جميع الحمامات مع عمل تصريف في الحمامات السفليه

والكهربائي مدد لي وايرات السقف وماخلص شغله صراحة ..

فقررت افك العقد معاه لان العقد الي وقعته معاه من سنه ونص تقريباً وهو انسان بارد
واحس ان يجيب ناس من برع يشتغلون لا خبره ولا شئ

ولوع جبدي وايد انتظرت عليه ووايد استحملته

ومستعد ابتدي شغلي من اول وجديد ولايكمل معاي خلاص والله زهقت منه ومن تأخيره


عموماً حصلت كهربائي وفيتري ..
ولا راح اكمل معاه


الي ابغي اعرفه

احين كم قيمة الشغل الي اشتغله .؟؟ مع شغل يده ؟؟
مابي يكون شئ في ذمتي

واذا في شئ عنده لي بابهدله لين يرجع الي لي مع اني ادري ان مب مرجع لي شئ

بس كيف وماهي الخطوات الصحيحه لمثل هالامور ؟؟؟

كيف اعرف التكلفه وتكون موثقه
علشان اذا ابغي اشتكي عليه تكون الشكوى موثقه بدلائل وبراهين ..


اتمنى تدلوني على الطريقه الصحيحه ..

وشكراً وجزاكم الله خير مقدماً ..

[معماري قطري]

إخوي نظامنا القضائي معقد كثير في هالأُمور ويشوفون بعين وحده بس

يعني على حسب عقدك الأصلي وتفاصيله .. إذا نفترض فيه شروط جزائية وكل شيء واضح ممكن يطلع لك حق على أساس التأخير، وإذا العقد ملخبط ومب واضح بيطلعون حق المقاول وانت كل شيء بيقلبونه عليك،،

لي يا اخوي صديق عمل مجمع سكني من 21 فييلا، وطلعت وايد مشاكل من ناحية المقاول وتسرب ماي من 8 فلل، ورفع قضية وعين محامي شاطر يتابع في القضية، وفي النهاية دفعوه فلوس وخسر وقت وتعب ووجع راس على لا شيء،،

ومره أذكر قضية مشهوره دخل فيها بنك إسلامي ممول مجمع سكني بعد، وموظفي البنك على حسن نية مشوا بند يشترط إن البنك يبدأ في أخذ الأقساط بعد تأجير المجمع بالكامل، وفي بند ثاني إن المسؤول عن تأجير المجمع هو المالك، والمالك مخططها قبل بهالطريقة قلة ذمه وتعطيل مصالح البنك،،

المهم المالك خلى بيت واحد ما أجره، وكل ما يجي حد يبيه يوزعه واستوت قضية خذت فترة طويلة وما اذكر شإنتهت عليه بس البنك طلع خسران بسبب النظام القضائي.

والله يعينك على هالمقاول حاول تتخالص معاه بالطيب وقبل لتتخالص بالكامل جيب المقاول الجديد خله يشوف الشغل اللي سواه ويقدر لك كم يسوى ووصلوا لحل وسط، ومنه المقاول الجديد يؤكد لك إنه إستلم كل شيء صح واللي يبي تصحيح بيكون كذا وكذا وكتابياً على أساس يتضمن العقد بينك وبينه هذي الملاحظات، ويحدد كل اللي بيسويه من شغل ومواصفات مواد ولو ممكن تستلم منه عينات يتضمنها العقد، ويحدد لك الفترة الزمنية والدفعات وكل شيء، وتوكل على الله كمل شغلك وانت متطمن بعد هذي الإجراءات.. ولا تنسى دور الإستشاري الشاطر في كل هالعملية، لأن الإستشاري يكون لك سند قانوني وفني ويسد أي ثغرة في تنفيذ الشغل، ويجهز العقد والرسومات أو يعدل عليها.

وبالتوفيق إن شاء الله

[بن غيث]

فيه مثمن موجود عن طريق المحاكم .. بس نصيحة والراي لك .. الموضوع بيطول
حاول تتفاهم معاهم افضل ويقيمون شغلهم او التقييم يكون عن طريق استشاري محترم

[شموخ دائم]

,

,



مرحبا


الله يعطيك العافيه اخوي الكريم

بسيطه ان شاء الله هذي الامور تحصل عاده في البناء
وتنحل

الاخوان ما قصروا بالشرح وعاده هذي الامور تنحل خطوه خطوه

انا بتكلم من النواحي الثانيه وهو التفاهم بطريقه قويه

مثل ما يقولون بالسياسه

القوى الناعمه
:)

اذا هو شخص عادي ( نعصره ) واذا هو شخص قوي ( نكسره )
:)


1
نجيب شركه
تقيم لك ما تم انجازه بالبيت وتعمل تقرير فيه تكتب المواد وقيمتها التقريبيه
وتكتب شغل اليد وقيمته التقريبيه ويكون مكتوب وموثق في ورق
ومكتوب ( عرض سعر تكمله الاعمال ) من الشركه الجديده

ويكون عندنا سعرين
سعر الشغل القديم
وسعر العرض الجديد

يطلع مبلغ وقدره
ونشوف الدفعه الي استلمها كم
اذا كان متقارب خير وبركه نوقف العقد بسبب ( التاخير ) واذا في شرط جزائي ( نعصره فيه ونطبق البنود ونضيف القيمه ) ونطالبه بالشرط الجزائي و فصخ العقد ونكتب ورقه فيها ( مخالصه )

اذا هو مو متعاون نكسره ناخذ التقرير ونقدم شكوه رسميه فيه بالعاصمه على طول وما نضيع الوقت

ونصبر كم يوم الى ان تتصل فيه الشرطه ( بالحل الودي ) عاده هذا يحصل

هنا راح تشوفه ( صار لين اكثر ) وعنده استعداد للمخالصه

نعمل جلسه ثانيه معاه والاحسن ما يكون في ( مكتبه ) لا نعمل له استدعاء في مكتب تبعك
حتى يحس انه جاي الى مشكله وهو الي متورط


ونتوصل الى اتفاق معين وراح تلاقيه متعاون لان اصبح الموضوع جد
وفي طرف قانوني بالموضوع 90% من المشاكل تنحل هنا

واتمنى ينحل هذا الخلاف بدون الذهاب الى المحاكم فقط عند تقديم الشكوى
يظهر حل ودي بينكم

,

,


بالتوفيق لك



اخوك


شموخ دائم

[Chambray]

جزاك الله خير يا اخوي شموخ دائم

اليوم جاني مقاول الكهرباء الجديد
وقالي ماقدر اعطيك سعر معين
لان الحبيب في كل غرفه منزل وايرين بس ! يعني شغله مب كامل !

[Chambray]

معماري قطر
بن غيث

جزاكم الله خير يالغاليين على المساعده

[(محمد)]

اعانك الله اخي العزيز

الذي عمل لك الكهرباء من الواضح انه افسد حتى العمل للشركة الجديدة ... لأن على الشركة الجديدة التأكد من جميع الخطوط قبل اكمال ما تبقي منه


وفقك الله ويسر امرك

[معماري قطري]

معماري قطر
بن غيث

جزاكم الله خير يالغاليين على المساعده

الله يسلمك ويجزيك كل خير

والأخ شموخ دايم عطاك الحل كامل ومفصل وما قصر

وتوني والله من شوي أتناقش مع مقاول كهربه وصحية في هذا الموضوع وقال المشكلة لو أي واحد يغير مقاول شغال عنده يطلع عليه السعر كبير والكل يستغله،،

والخطأ اللي لازم الكل ينتبه له انه لياخذ هالامور ببساطة ويخليها مذكورة في العقد مع المقاول الرئيسي وتخليصها يكون عن طريق المقاول الرئيسي الا إذا ضامن مقاول كهربه جيد وبيشتغل له بإخلاص، رفيجي هذا يبني بنيان خاص له وهو مقاول كهربه فما عنده مشكله يخلي هالشغلات اللي هو يجيدها عليه.

[متفائل وايد]

لو بغيت افيدك واجيب لك حد يكمل لك الشغل كلمني ع الخاص