تخصص الهندسه الكهربائيه هل يناسب البنات؟؟

[فيدراليه]

اخواني وخواتي ابيكم تشورون علي من خلال تجاربكم لتخصص الهندسه الكهربائيه
هل طبيعة العمل بعد التخرج تناسب البنت؟؟
انا طالبه في كلية الهندسه وحابه اغير تخصصي من هندسه صناعيه الى هندسه كهربائيه او هندسة الكمبيوتر ياليت تفيدوني بطبيعمة عمل الهندسه الكهربائيه ولكم جزيل الشكر

[قلبي الطيب]

والله تبين الصج اذا انتي مستعدة تشتغلين في مصانع او كهرماء أدرسي لكن اذا لا روحي هندسة كمبيوتر في كل مكان مجالها وهذا رأيي وانتي اللي تقررين بالنهاية وان شاء الله تتوفقين في قرارج

[حواي الفريج]

كمبيوتر انسب لطبيعة المرأة

رأي شخصي فقط؟

[eXpert*]

(كلا ميسر لما خلق له)

لا تغرنكن التخصصات والمسميات الرنّانة .

بالتوفيق إن شاء الله .

[ماريسا]

بيقولون لج ماتناسب المرأة بس اذا انتي حابة الشغل و اهلج موافقين فليش لأ ؟؟

[abdo222]

ما انصح,,
في الدراسه بالجامعه:
هندسه الكهرباء فيها معامل "لابات" كثير وشغل يد وحركه,

في الشغل:
الشغل يكون "سايت" ومحطات ومصانع ولازم الاحتكاك ويا العمال والهنود والمهندسين, وروحه من مكان لمكان,, والشغل المكتبي شوي (كمهندس)
الا لو تخرجتي هندسه كهرباء و حصلتي لج شغل على الكمبيوتر (شغل مكتبي) هال الشيء ممكن تحصلينه بس نادر لانه اساس شهادتج تكون شغل كهرباء,,

فلو لج القابليه على هندسه الكمبيوتر الله يوفقج,,

[silver stone]

اختي انا مهندس كهرباء ومجال شغلي في المقاولات

نصيحتي لك انك تتخصصين في هندسه الكمبيوتر لأنه مجال العمل للبنات في هالتخصص اكثر
واذا انتي حابه هندسه الكهرباء وتقدرين تأمنين وظيفه في مكاتب الديزاين والأستشارات الهندسه بيكون زين بعد .. لأنه شغلك بيكون عالكمبيوتر وبس

نصيحه بس خليها سرررر .. ترى هندسه الكهرباء صعبه واااايد :-)

[الدوحه1]

اخواني وخواتي ابيكم تشورون علي من خلال تجاربكم لتخصص الهندسه الكهربائيه
هل طبيعة العمل بعد التخرج تناسب البنت؟؟
انا طالبه في كلية الهندسه وحابه اغير تخصصي من هندسه صناعيه الى هندسه كهربائيه او هندسة الكمبيوتر ياليت تفيدوني بطبيعمة عمل الهندسه الكهربائيه ولكم جزيل الشكر
خريج الهندسه الكهربائيه ممكن ان يشتغل في عدة مجالات منها على سبيل المثال:
1- شركات الاتصالات(كيوتل وفودافون)
2- الشرطه والجيش(ادارة الاتصالات والرادار)
3- المطارات
4- الاذاعه والتلفزيون وهو مجال تخصصي الحالي ونعاني من قلة المهندسين القطريين(المؤسسه القطريه للاعلام وشبكة الجزيره) تخيلوا ان عدد المهندسين القطريين اقل من 5% !!!!!! مع ان تلفزيون واذاعة قطر صار لهم اكثر من 40 سنه!!!!

[روح الاطلس]

هندسة كهرباء مدري ليش فاتحينه عند البنات!!! يا تختارين كمبيوتر او كيميائية أفضل اذا كنتي تفكرين بفرص العمل الاكثر

اما الكهرباء مجالها محدود وتقني

[qatarman8008]

كدراسة نعم ... كشغل لا .. !!
دراسة الهندسة الكهربائية جدا شيقة .. لكن طبيعة و مكان العمل ما تصلح لبنت ...
عمل فني ... لازم بلاسوت او كفرول .. وكلهم رجاجايل وانتي البنت الوحيدة ... احرااااااج ...
اكاهم عندنا في الشركة ... كل وحدة منهم غيرت القسم وراحت شغل اداري ...

[الكونتيسه غلا]

السلام عليكم ورحمة الله وبركاته

اختي الهندسه الكهربائية ،، هالتخصص يناسب الشباب :)

انصحج بتخصص هندسة الكمبيوتر :nice:

[vtc-4800]

اختي الهندسة الكهربائية اصعب تخصص بالجامعة واكثر تخصص بالهندسة في اختلاط لان اللاب مشترك
انا رايي خليكي صناعية او حولي كمبيوتر

[Abdelrahman]

الصراحه مب متأكد بالنسبه للجو الدراسي
بس ولد عمي مخلص هندسه كهربائيه ويشتغل في موقع كله عمال
وأيام يشتغل بيده
فـ ما أعتقد انه الجو يناسب بنت :secret:

[ahmed jasim]

إختاري تخصص إنتى ترتاحين له وتحبين دراسته وفهمه وتبدعين فيه
ولا تشغلين بالك عن توافق التخصص مع الوظيفة
لأن مهندس أى حاجة يركب على أي وظيفة وفى أي شركة أو وزارة

[اوف ليميت]

بسم الله

توكلي على الله وكملي في اي قسم فالهندسه
صناعه، كهربا، اتصال، ميكانيكا... اللي تبينه

لاتحاتين ... بعض الشركات تقوم بارسال البنت لمناطق بعيده مثل راس لفان او مسيعيد
وتكون زياراتج للمصنع نفسه قليله فقط تاخذين خلفيه وتشوفين الموجود

لكن معظم الوقت فالمكتب تتعلمين ولو ان المكتب ايضا فالمناطق الصناعيه البعيده

لكن بشكل عام..بامكان البنت انها بعد سنه او سنتين من وجودها في هالمناطق..انها تطالب بالتحويل من راس لفان او مسيعيد الى مكتب تابع للشركه فالدوحه

وشي آخر ..

الشركات الاجنبيه مثل اكسون موبيل..شل..اوكسي..توتال..ماعندها مصنع لها في لفان..مجرد شراكه ع شركات في اشياء معينه ان كان نسب ربح او اداره او نقل او تصدير..وينعدون عالاصابع اللي منخرطين منهم بالتشغيل ك استملاك خاص بهم
ف يعني .. بهالشركات الاجنبيه بامكانج اتحصلين وظيفه في ابراجهم ومكاتبهم اللي فالكورنيش 90%

وشكرا

ملاحظه: ك مهندسة لا يستوجب انج تشتغلين في لفان ومسيعيد وشركات البترول
المهندس او المهندسه يستطيع العمل في اي مجال واي مكان
وفي شركات فالدوحه اتوظف مهندسين فوظايف لها علاقه بالهندسه بما ان المهندس عنده البيسكس
مثل..
قطر فاونديشن
قنوات الاعلام والتلفزه
الاذاعه والراديو
المجالات الاخبارية
(واي وزاره حكوميه او اي شركه في قطر) لابد من ان لها قسم بالبرمجه والاتصال والكمبيوتر والتقنيات وغيره وغيره

ممكن في الpublic relations
ممكن في اقسام تابعه للدراسات والبحوث
الIT
التشغيل والtechnical affairs
الprogramming
الauditing

وهكذا

وشكرا

[Qt.1]

اشوف الكمبيوتر احسن لج , كبنت بعي احسن لج عن الشغل اليدوي لانه للرجال مهب للمراه مش تقليل في المراه ولكن سبحان الله كل شي له شي ,,

[م. عبدالعزيز]

اختاري التخصص اللي تحبينه ، لانه هو التخصص الوحيد اللي راح تبدعين فيه

وعلى الوظايف، فيه وظايف لمهندسات كهربائية مكتبيه ، وخصوصا بالقطاعات الحكوميه

[بحرقطر]

عندنا في القسم مهندسة كهربا توها متوظفه
اشوفها تنزل السايت من الصبح وتعود الظهر
ولازم تلبس كفروول وهلمت فوق الحجاب والله يعزكم السيفتي بوت
وتركب الباص الي يوصل الموظفين من موقع لين موقع وشمس وحر
انا اشوف انها شغله صعبه شوي الا اذا انتي حابه هالتخصص شي ثاني
والله يوفقج ان شاءالله
*

[Q A T A R]

وش لك بالكهربه واهوالها ورزق الله في البيت

[سفير الدوحة]

انصحكم بتخصص الهندسة الكيميائية
أو علوم البيئة
لأن الدراسة فيها سهله، و معاملها سهلة و فرص عملها ممتازة

[al_jo0ory]

^^^^^
!!!!!!!!!!!!!
بالنسبه لي كان أصعب شي عندي الكيميا ومعاملها الغثيثه

علشان جي أختي شوفي اللي يناسب ميولج واختاريه ... واذا عالشغل ان شاء الله ماتتعطلين وتحصلين الوظيفه المناسبه لج وفالمكان اللي تبينه

[فلتة زمانها]

وانا ابي اعرف شنو مجال العمل حق الهندسه الكيميائيه وهل فيها اختلاط ودواره في المصانع

[ms-qtr]

عادي انا ادرس هالتخصص وحابته
وشغلي في المستقبل ما راح يكون فيه مصانع
التخصص مرغوب واغلب مؤسسات الدولة تبيه

اغلب الناس يخربطون ما بين كهربجية ومهندسة كربائية

[قطري متواضع]

مهندس الكهرباء عندنا في الدوحه

مايشتغل على مكتب وويوقع على التقارير والريبورتات

واموره تمام واتمنى لك التوفيق

[elders]

أنا لو رجع في الزمن بدرس صناعي الكهربا حلوة بس صعبة الكمبيوتر ممتع بس مجالو واسع وبتخلصي وبتحسي حالك ما تخصصتي بشي. بالتوفيق

[al_jo0ory]

وانا ابي اعرف شنو مجال العمل حق الهندسه الكيميائيه وهل فيها اختلاط ودواره في المصانع


اللي أعرفه إن هالتخصص هو له النسبه الأعلى لنزول المواقع والعمل فالمعامل وأعتقد إنه له علاقه بهندسة البترول ...

[مرتبش]

فيه وظائف مناسبة للنساء والمجال واسع مثل ماتفضلو الاخوان خصوصا " اوف ليمت" و " الدوحة١"
وبالتوفيق