قطري ومنحرج اكتب الموضوع بس مافي اليد حيلة

[قانوني متميز]

السلام عليكم ورحمة الله
موضوعي عادي جدا والصراحة و أنا اكتب الموضوع منحـــرج أو يمكن مستحى بس الاكيد اني متـــــحطم يعني أقدر أقول خلطة من الاحراج والقهر واليأس والتحطم

المهم بدخل في الموضوع
تخرجت من الجامعة تاريخ 2012/1/18 بعد فترة دراسية مدتها 6 سنوات
سنتين البرنامج التأسيسي
أربع سنوات تخصص
طبعا هالفترة كانت كانت الاصعب كل شي اصار بالانجليزي حتى المتطلبات العامة بس الامل كان موجود والعزيمة عالية أن احنا دفعة التميــــز الدفعة اللي راح تلقى كل الاهتمام والتقدير واحسن الوظائف وللاسف كنت انتظر بلهفــة ظهور افادة التخرج

الخلاصـــــــة

اني لن اليوم قاعد في بيتنا عاطل عن العمل
من شهر يناير وانا اقدم ومافي رد
وبعضهم يقولون مر علينا المعرض المهني
وجا المعرض المهني وماتم مكان ماقدمت فية

شركات البترول =
قطر غاز , راس غاز , فافكو , قابكو , كيوكم , شل , دولفين للطاقة , قطر للبترول
محد رد علي

البنوك = محد رد علي

وزارة الخارجية :

على كثر ما اتصل اسال مرة بس ردت على موظفة في الموارد البشرية وقالت لي اذا يبونك بيتصلون لك :telephone:

الامانة العامة لمجلس الوزراء المكان غامض والمقابلة كانت غامضة والاسئلة كلها شخصية
ولا سؤال في مجال التخصص

قــــطر فونديشن :
قابلني مصري مدير الشوؤن القانونية ومدحني ومدح القطريين بس في الاخير قال الوظيفة محتاجة خبرة 3 سنوات على الاقل زين اقرا السي في انا كاتب حديث التخرج وفوق هاي كلة يقولي اشلون اوراقك جاتني هههه يحسب واسطة

شركة الريــــل للقطارات : قدمت في المعرض , وقدمت بالايميل , ورحت هناك وقدمت في الموارد البشرية , ولا حياة لمن تنادي كلها اجانب ولبنانيين وناس وناس مع انه في نقص بس مب عارف ليش مايبون الا ناس معينين

النيابة العــــامة : مافي رد وكلة بنكلمك

وزارة العدل : اتنظر الارقام الوظيفية

وزارة التجارة والاقتصاد : من 3 شهور مقابلهم محد رجع اتصل

شركة قطر ستيل : نجحت في المقابلة وترجمة العقد و بعدها قابلت الموارد البشرية وليما اللحين محد دق

مركز قطر للمال : قابلتهم و التوظيف اذا تمت الموافقة شهر 9 الله يحينا لين ذاك الوقت

المركز الثقافي للطفولة : قابلتهم وقالوا بنكلمك قريب وصار لي شهرين

مركز قطر الوطني للموتمرات : مسؤولة التوظيف كلة مسافرة والموظفةاللي ترد علي فلبينية

مركز صلتك : طرشت ايميل ومحد رد

الجزيرة للاطفال : محد رد

الجزيرة الرياضية :

حولني مدير الموارد البشرية على الشوؤن القانونــية عشان يقابلوني لانهم محتاجين موظفين . لين اليوم محد كلمني والمدير كله مسافر . زين هو مسافر انا ايش ذنبي تتوقف اموري عشان حضرتة مشغول .

وفي اماكن وايد قدمت فيها قبل المعرض المهني وخلال المعرض وبعد المعرض وناسيها وهم نسوني الظاهر ,يمكن ماتوظفت لين اللحين لان اغلب اللي قابلوني أجانب
واغلب مسوؤلين التوظيف أجانب بس الله كريم


أنا ما اطلب أعانة , ولا أطلب راتب بدون عمل كل اللي اطلبة وظيفــــة
أي نعم وظيفة تناسب مؤهلي الجامعي

بس مب عارف ليش صار التوظيف صعب جدا بالنسبة للقطريين اللي عددهم مايتعدى ال700 الف نسمة لو قلنا مثلا

وتفضلوا بقبول فائق الشكر والاحترام

قانوني متميز

[ريماس الغلا]

وينهم القطريين ؟؟؟

[Rashid554]

للتصحيح اخوي عدد القطريين 250 الف فقط شاملة ( الشباب والكبار والاطفال )

واتمنالك التوفيق والحصول على وظيفة
ومن صبر نال ان شاء الله
وماتدري يمكن خيره لك

[المسك1969]

ربي يعينك وييسر لك الصعب أخي الصغير

حسبنا الله ونعم الوكيل... أتمنى من الله العلي القدير أن ييسر لك أمر التوظيف وخصوصا الشباب لأنهم في حاجة للمال للزواج وخلافه

بس ممكن اقتراح لين تتوظف ولا تزعل من أختك الكبيرة: ليش ما تشتغل من البيت؟ والله يا أخوي أن في مصري نعرفه يشتغل في سفريات شيء جذيه ويشتغل بقضايا الناس من البيت ويربح فيها... بس يكتبها لهم ويفهمهم عليها

هو اقتراح أو أحد يبي منك استشارة وعسى ربي يفرجها عليك قريبا عاجلا لا آجلا آمين

[قانوني متميز]

للتصحيح اخوي عدد القطريين 250 الف فقط شاملة ( الشباب والكبار والاطفال )

واتمنالك التوفيق والحصول على وظيفة
ومن صبر نال ان شاء الله
وماتدري يمكن خيره لك

الله يجزاك خير

[قانوني متميز]

ربي يعينك وييسر لك الصعب أخي الصغير

حسبنا الله ونعم الوكيل... أتمنى من الله العلي القدير أن ييسر لك أمر التوظيف وخصوصا الشباب لأنهم في حاجة للمال للزواج وخلافه

بس ممكن اقتراح لين تتوظف ولا تزعل من أختك الكبيرة: ليش ما تشتغل من البيت؟ والله يا أخوي أن في مصري نعرفه يشتغل في سفريات شيء جذيه ويشتغل بقضايا الناس من البيت ويربح فيها... بس يكتبها لهم ويفهمهم عليها

هو اقتراح أو أحد يبي منك استشارة وعسى ربي يفرجها عليك قريبا عاجلا لا آجلا آمين

مشكور اختي على الرد وبالعكس كلامج صح بس الخريج الجديد يبحث عن الخبرة

ولازم عشان يكتسب خبرة يكون العمل في جهة حكومية او خاصة

[فلتة زمانها]

يا اخوي الكريم ثق تماما انه رزقك الذي قسمه الله لك لم يحن بعد
وماعليك غير الاستمرار بالسعي والتوكل على رب العباد والدعاء
خلك دائما متفائل وان شاءالله تلقى احلى وظيفه

[ريم 28]

باذن الله بتلقئ الوظيفه التي تناسبك يارب

الله يوفقك

ولا تنحرج بالعكس

انت تسعئ والله يفرجها عليك

[kitmat]

حسبي الله ونعم الوكيل الحين صارو الاجانب هم اللي يوظفون القطريين وين القطري صار مايحصل وظيفة في بلادة

[طبيب قطري]

حسبي الله ونعم الوكيل الحين صارو الاجانب هم اللي يوظفون القطريين وين القطري صار مايحصل وظيفة في بلادة

جيت ع الجرح فعلا صار الأجانب هم المسؤولين عن توظيف القطريين

[طبيب قطري]

ايش تخصصك اخوي لو سمحت ؟

[طموحي عالي]

احمد ربك انت 6 شهور
للأسف غيرك سنوات مديده
ربي يعينك ويوفقك ويفتح لك باب الرزق

[intesar]

الله يوفقك.. عليك بالدعاء وبالإستغفار حتى يفرج الله عنك..

[.خالد]

الله يوفقك وتنال الوظيفة اللي تناسبك ، ٦ شهور مدة مب طويلة اهم شي الاصرار في البحث حتى في الاماكن اللي قدمت فيها من قبل لان هذا من حقوقك ...
والاهم انك تحاول تعرف ليش ما وظفوك بالرغم من ان الجامعي مطلوب هالايام ، حاول تتذكر شلون كانت طريقتك في الانترفيو هل في اخطاء ارتكبتها ، اقرا في مواضيع مقابلات العمل (انترفيو) عشان تعرف شنو الاشياء المفروض تسويها او ما تسويها .. والله يوفقك

[خيالة قطر]

الله يعينك اخوي

واصبر ان الله مع الصابرين
وانا صارلي سنه وشوي وللحين ما حصلت ولأرد

الله كريم

[..er..]

فيه واحد حاط موضوع طالب موظفين بمدرسه اعداديه ..

نكه الحمادي .. وطالب جامعيين :)

والله يوفقك

[..er..]

http://www.qatarshares.com/vb/showthread.php?t=515663

هذا رابط موضوعه

والله يوفقك ان شاء الله

[قانوني متميز]

ايش تخصصك اخوي لو سمحت ؟


تخصصي قانون

[قانوني متميز]

الله يوفقك وتنال الوظيفة اللي تناسبك ، 6 شهور مدة مب طويلة اهم شي الاصرار في البحث حتى في الاماكن اللي قدمت فيها من قبل لان هذا من حقوقك ...
والاهم انك تحاول تعرف ليش ما وظفوك بالرغم من ان الجامعي مطلوب هالايام ، حاول تتذكر شلون كانت طريقتك في الانترفيو هل في اخطاء ارتكبتها ، اقرا في مواضيع مقابلات العمل (انترفيو) عشان تعرف شنو الاشياء المفروض تسويها او ما تسويها .. والله يوفقك

الله يجزاك خير

بس اخوي 6 شهور او سنتين وايد
وبعدين مب فرض الواحد لازم يتخرج وينتظر طول هالفترة في بلاد خيرها واصل اخر الدنيا

[شموع قطريه]

وين ايام زمان اللي كان الخريج يتخرج والوظيفه تنطره والاولويه له لانه قطري .. الله يرحم ذاك الزمان ..

[طبيب قطري]

قانون ، ماشاءالله تخصصك وايد حلو
اخوي هل جربت انك تدرب في مكاتب محاماه عندك مثلا مكتب المحامي المعروف احمد المهندي ، تري هالاشياء راح تضيف للسي في مالك وايد اكثر مما تتوقع

[مستجدة]

بس الجماعة يقلون مافيه بطالة والقطري وظيفته محجوزه قبل التخرج بسنه !!!!!

[ms-qtr]

غريبة اخوي يمكن معدلك نازل او تخصصك مب وايد مرغوب

جرب قدم على كهرماء يبون قطريين وردهم سريع

والله يوفقك

[sweet qatar]

قانون ، ماشاءالله تخصصك وايد حلو
اخوي هل جربت انك تدرب في مكاتب محاماه عندك مثلا مكتب المحامي المعروف احمد المهندي ، تري هالاشياء راح تضيف للسي في مالك وايد اكثر مما تتوقع

نفس الراي..
حاول تشتغل في مكاتب محاماة لين الله يكتب لك الوظيفة الي تتمناها..

شي غريب..القانون تخصص مطلوب في كل مكان..


لاتنسى الصدقة والتحصن والدعاء..
الله يوفقك في مسعاك ويرزقك الوظيفة عاجلا غير آجل..

[قانوني متميز]

غريبة اخوي يمكن معدلك نازل او تخصصك مب وايد مرغوب

جرب قدم على كهرماء يبون قطريين وردهم سريع

والله يوفقك
معدلي جيـــد مرتفع وتخصصي قـــانون وأكثر من 55% من دراستي بالانجليزي

[لاجل QT]

الله يسهل امورك انشالله وتلقى مرادك

[قانوني متميز]

الله يسهل امورك انشالله وتلقى مرادك


ارحــــم الله والديك وجزاك الله خــــير

[al-sadd]

اخوي قدم في اسباير !!
انا مبتعث عن طريقهم
و واحد من الشباب موظف عندهم
صحيح فيه نسبه اجانب ولاكن بيني وبينك وعلى كلام الشباب الي هناك ان عدد القطريين قاعد يزيد كل سنه
وكل المسؤلين تقريبا قطريين
وان شاءالله بتيسر امورك هناك
جرب منت خسران شي

[مواقف النجادة]

اخوي قدمت في ديوان الخدمة المدنية ؟

اخبر مكانهم في برج برزان على الكورنيش ..

العادة تقدم عندهم وهم يوزعونك عل وزارات الدولة..

هذا اللي كان يصير على ايامنا ..

[امـ حمد]

ربي يفرجها عليك وتحصل على الوظيفه

وفي السماء رزقكم وما توعدون

[السهم الشمالي]

أخي الكريم
الله يوفقك
أنا ماعرف عنك شخصياً لكن باتكلم بشكل عام .
كثير من الناس يتقدم لأمر ما ولكن لايتلتف لأهم شي عندما ينوي الأنسان لعمل وهو الدعاء والطلب والإلحاح من الله سبحانه وتعالى ولابد من اليقين بأن التوظيف سوف يكون بيد الله وليس بيد فلان وغيره فنصيحة لاتغفل عن الدعاء والإلحاح والطلب من الله وإختار أفضل أوقات إستجابة الدعاء الثلث الأخير من الليل وأثناء السجود في الصلاة وبين الأذان والإقامة وكن على يقين لو طلبت الله أنك إتوظف في المكان الفلاني ولم يكتب لك نصيب فهو خير لك .

والله الموفق .

[بوحمد111]

اخوي العزيز

اتمنى من الله لك التوفيق والنجاح والتوظف بأسرع وقت ممكن وللأسف اغلب من يستلم ادارات التوظيف في قطر هم الاجانب وبكل اسف اقولها ان بعظ الاجانب قلوبهم على الاجنبي قبل القطري ولو ما عندك واسطه او احد يتدخل في امور توظيفك فالله يعينك وينصرك على من عاداك وهذا اللي حاصل في بلادنا للأسف القطري يحس انه اجنبي في بلاده والاجانب هم من يتحكم في توظيفنا وللعلم فقط اغلب الاجانب وليس الكل

اكثر من الاستغفار وان شاء الله ستفرج ونشوفك موظف لك مكانه في المجتمع

تحياتي

[العربية نت]

اولاً: نتمنى من الله لنا ولك التوفيق
ثانياً اخوي ارى ان مدة 6 شهور ليست بتلك المدة الي تجعلك تشعر بالقلق ومادامك تبحث وتسعى فتأكد إن الله بكتب لك الي فيه صالح لك الصبر مطلوب تراى فيه ناس تموا سنه واكثر واقولها وانا عند الله صادق إن شاء الله
وبعدين لا تنسى ان حن الان في موسم اجازات فأغلب متخذي القرار في اجازات ورمضان قادم الله يبلغنا اياه ان شاء الله فأنت كل ما عليك اسعى وتوكل على الله وحاول تستثمر وقتك في اخذ دورات تدريبية تدعم اوراقك مثل لغة كمبيوت روخلاف ذلك فهي تأثر في السي في للموظف :weeping:

اما بالنسبة لشغلى الاجانب فكلامك صحيح وزارة الاقتصاد والمالية الي يقابل فيها مصري اظنه سكرتير بعد ويسمونه خبير :eek5:

وفيه ادارة من ادارات وزارة العمل من فترة شفت سكرتير مدير هناك مصري سكرتير يعني وظيفة عادية المفترض ان يكون فيها مواطن بالراحة ولا اعلم ان كان لا زال موجود او لا بس انا شفته بنفسي يعني ماحد قاله لي يجب على الجهات المعنية مراقبة تنفيذ قرار التقطير الذي لازال حبرعلى ورق :omg:

بالتوفيق

[عاهد بن علي]

الله يوفقك ويفرج عليك

[عازف]

أخوي ماعليك امر بغيت أعرف شنهو تخصصك

[غيمة مطر]

حالي من حالك اخوي ...

انا مهندسه وخبره ونفس حالتك ...

قدمت بكل الاماكن اللي ذكرتها وماجاني منهم اي خبر ... الله المستعان

[شبح الصمت]

الله يوفقك ياخوي ويسهل لك امورك

تخصصك من التخصصات الجميلة ماشاء الله ما عليه كلام

اخرج صدقة جاريه في الغيب

والله بيوفقك

ترى مش مقصدي من صدقة انك ما تتصدق بس الانسان يكون لاهي وسبحان الله يمكن في يوم يخرج صدقه ويأتيه رزق من رب العالمين لا يعلمه

[nym]

اخوي طرش لي رقمك على الخاص

[eXpert*]

نصيحة لكل خريج جديد

أول خطوة تسويها بعد التخرج أسعى وراء الخبرة أولاً وليس وراء شركة ذات أسم اللامع . الشركات الكبيرة دائماً تبحث عن الخبرات . وبالأمانة ماعندها وقت تطور خريج جديد يمشون علي قاعدة (time is money)

بحكم أنك قانونيّ ،، قدم في مكاتب محاماة (كـ متعاون) أو مكاتب قانونية ،، وخذ خبرة سنة فقط وشوف كيف الشركات بتتهاتف عليك .

بالتوفيق إن شاء الله .

[اليحصبي]

http://www.shooq4.com/vb/images/bb/36.png
صباح الخير
توكل على الله وقدم بكل مكان وقبل لاتطلع من اي جهة قدمت فيها لازم تاخذ رقم تواصل
عشان تقدر تراجعهم فيه وكل اسبوع تتصل فيهم ،
لان لو مايعطونك رقم تتواصل من خلاله يعني ماعندهم مصداقية
ثانيا اكثر من الدعاء والالحاح من الله سبحانه وتعالى
ثالثا شوف لك احد من الي تعرفهم يشوف لك واحد او كلم ربعك لو يعرفون اي واسطه
اخيرا خلك على يقين انه دام انك توكلت على الله وبحثت ان الله سبحانه وتعالى واتخذت الاسباب لن يضيعك

و كما جاء في الحديث
لو أنكم توكلون على الله حق توكله ، لرزقكم كما يرزق الطير ، تغدو خماصا ، وتروح بطانا
http://www.shooq4.com/vb/images/bb/31.png

[Yaas]

شيك الخاص

[بورصواوي]

نصيحة لكل خريج جديد

أول خطوة تسويها بعد التخرج أسعى وراء الخبرة أولاً وليس وراء شركة ذات أسم اللامع . الشركات الكبيرة دائماً تبحث عن الخبرات . وبالأمانة ماعندها وقت تطور خريج جديد يمشون علي قاعدة (time is money)

بحكم أنك قانونيّ ،، قدم في مكاتب محاماة (كـ متعاون) أو مكاتب قانونية ،، وخذ خبرة سنة فقط وشوف كيف الشركات بتتهاتف عليك .

بالتوفيق إن شاء الله .

اسمحلي ارد عليك الصراحه انت وايد مثالي هذي الاشياء في البلاد الي عندها اكثفاء من الخريجين وفي منافسه كبيره

احنى في قطرغير المكان الي بتشتغل فيه بما انك خريج جديد هم مسئولين عن تدريبك


للعلم الحين صيف وبعده رمضان ارتاح فيهم ترى اخس شي توظف هذي الوقت

[كبير المتداولين]

وانت الصاج مب 700

300

[فلتة زمانها]

اخوي اقرا هالكلام الجميل اللي يشعرنا بالتفاؤل من كتاب لا تحزن

لا تحزن على تأخر الرزق , فإنه بأجل مسمى
د .عائض القرني

الذي يستعجل نصيبه من الرزق , ويبادر الزمن
ويقلق من تأخر رغباته , كالذي يسابق الإمام في
الصلاة ويعلم أنه لا يسلم إلا بعد الإمام ! فالأمور
والأرزاق مقدرة , فرغ منها قبل خلق الخليقة
بخمسين ألف سنة ،وتذكر قول الله تعالى:
( أتى أمر الله فلا تستعجلوه )
( إن يردك بخير فلا راد لفضله )

[AL-MAYSTRO]

الرزق على يد رب العالمين

واسعا انت وان شاء الله رزقك المكتوب بيوصلك

وكل تأخيره فيها خيره

[العملة النادرة]

الله يوفقك اخوي
التوظيف ما ايي بسهوله حتى لما يكون عندك شهاده لان الخبرة تلعب دور بس اذا الله كتب وتوظفت وصار عندك خبره سنه الي سنتين تقدر تحصل وظيفه بمميزات احلى الله يوفقك وتتوظف بعد العيد وتكون احلى عيديه لان اتوقع بعد العيد هو الوقت المناسب حاليا للوظيفه
ولا تنسى تقدم عن طريق وزاره العمل في برج برزان .

[أسير الاسهم]

الله يرزقك من حيث لا تحتسب

[الكونتيسه غلا]

السلام عليكم ورحمة الله وبركاته

اخوي قانوني متميز ،، كل تأخيره فيها خيره ،، ان شاء الله بعد الصبر تتوفق بوظيفه في مجال تخصصك،،
بخصوص شبكة الجزيره السبب عندهم اعادة هيكله ،، وان شاء الله اول مايفتحون باب التوظيف بخبرك :)

[عوآآآآشـي]

الرزق على يد رب العالمين

وكل تأخيره فيها خيره

[هارودز]

يارب الله يوفقك انشاءالله وتحصل ع الوظيفة المناسبة لك و من كل قلبي أتمنى لك التوفيق

[fadthebad]

welcome to the club my brother
اهلا بك الى النادي يا اخي (الترجمه)

خريج 21/07/2011 هندسه كيميائيه من بريطانيا
الى الان عاطل:victory:

[غيور]

الله يعينك واسف اقول المشكلة ليس فيك ولكن في الزبالة ( الله يكرمكم) القطريين اللي شغالين في ادارة الموارد البشرية اللي قدمت عليهم .

انا حاصل على ماجستير من امريكا ومريت في نفس الظروف . والعقبة في طريقي كان القطريين اللي كانوا ماسكين قسم التوظيف .

والله عيب عليكم واستحوا والمفروض توقفون معاه وليس ضده !!!!!!!

عفوا : لا اشمل جميع القطريين الموظفين في ادارات التوظيف . ولكن خلينا نقول القلة منهم اللي يحملون شخصيتين متناقضتين اقصد شخصية مدعوس على راسه في البيت ولا له كلمه ابدا (مريض). وشخصية الانتقام في العمل من القطريين.

باالمناسبة انا قطري ولكن عندي حميا لابناء جلدتي واخاف عليهم واحب اساعدهم ولا عندي شخصيتين متناقضتين.

الله يكون في عونك.

[المحاميه]

غريبه .. ليش مايردون .. يعني اللي اعرفه ان هالتخصص مطلوب ..

اصلا اغلب الاماكن عندها نقص في القسم القانوني بس مادري ليش الاجراءات تعبانه ..

بقولك ..
لاتعتمد على التلفون لان التلفون عمره مابيحل شي .. لازم تروح بروحك وكون حريص ان تقابل مسؤول قطري .. عشان يعطيك كلمه اكيده .. يعني لو مسؤول التوظيف القطري مسافر او محد دور غيره بس يكون قطري وله كلمه عشان تمشي امورك ..

اظاهر لازم تعطيهم من الكلام الزين عشان يردون عليك ويوظفونك :secret:

[المحاميه]

الله يعينك واسف اقول المشكلة ليس فيك ولكن في الزبالة ( الله يكرمكم) القطريين اللي شغالين في ادارة الموارد البشرية اللي قدمت عليهم .

انا حاصل على ماجستير من امريكا ومريت في نفس الظروف . والعقبة في طريقي كان القطريين اللي كانوا ماسكين قسم التوظيف .

والله عيب عليكم واستحوا والمفروض توقفون معاه وليس ضده !!!!!!!

عفوا : لا اشمل جميع القطريين الموظفين في ادارات التوظيف . ولكن خلينا نقول القلة منهم اللي يحملون شخصيتين متناقضتين اقصد شخصية مدعوس على راسه في البيت ولا له كلمه ابدا (مريض). وشخصية الانتقام في العمل من القطريين.

باالمناسبة انا قطري ولكن عندي حميا لابناء جلدتي واخاف عليهم واحب اساعدهم ولا عندي شخصيتين متناقضتين.

الله يكون في عونك.


صااااادق
الموارد البشريه وايد تعبانين .. وهالشي معروف .. الاجراءات والخدمات اللي يقدمونها تعبانه ..
اصلا مافي حد مايشتكي من هالقسم بغض النظر عن المكان ..

[المحاميه]

welcome to the club my brother
اهلا بك الى النادي يا اخي (الترجمه)

خريج 21/07/2011 هندسه كيميائيه من بريطانيا
الى الان عاطل:victory:


:eek5::eek5::eek5:

[ولد ازغوى]

تخصصك قانون قدم في جهاز امن الدوله

[روز باريس]

صحيح اخوي لازم تروح بنفسك وقول لهم متى اراجعكم
وخلك وراهم
والله يوفقك

[لمعة الالماس]

الله يوفقك وتلقى الوظيفة المناسبة

قدم في ميرسك ووزارة الداخلية وجهاز الاحصاء وجرب البنوك الاسلامية وان شاء الله خير

بس اسئلهم ليش الرفض !! عشان تعرف شنو يبون

وانا مثلك تميت سنتين وشوي لين توظفت وحتى الواسطات ما مشت !!

[المواطن]

أفتكر لو تروح الهند أو الفلبين تقدم من هناك يكون احسن

[alfaisaly]

للاسف هذي الحاله مستمرة ولكن الى متى الله العالم

وعيالنا قاعدين واللي مادخل جامعه تحطم وقال مابدش لان التوظيف بعد صعب

الله يوفقك وجميع اخوانا الشباب

[الخزرجي قطر]

الله يوفقك وتحصل الوظيفه المناسبه لك
لاتياس من رحمة الله وبيجيك الفرج ان شاءالله
عليك بمواصلة البحث والدعاء والاستغفار.....

[AL.SHMOKH]

قسمن بالله حرام أهل قطر بالبيوت مع احترامي للأجانب ماختلفنا لهم الحشيمة والكرامة يشتغلون بس أهل البلاد لهم حق بعد بالتوظيف والله حرام انشاء الله اخونا يشتغل باقرب فرصة وعليك اخوي بالاستغفار بالاستغفار تفتح الاقفال

[قانوني متميز]

ِشكرا على تفاعلكم في الموضوع
وجزاكم الله الف خير على الدعوات الحلوة

[ابوالكلام]

خذ جواز أوربي أحسن لك وتعال

[المحقق كونان]

مرحبا اخوي قانوني

انا بعد قطري خريج والحمدلله ولكن قعدت سنتين عاطل عن العمل في دولة غنية

قدمت في اماكن وايد ..سوو لي مقابلات وايد .. مع قطرين ومع اجانب هنود ولبنانيين

والحمدلله بعد سنتين توظفت

[M S A]

الله ييسر أمرك و يذلل صعبك إن شاء الله

[قانوني متميز]

خذ جواز أوربي أحسن لك وتعال


اتصدق عاد جات في بالي هالفكرة كم مرة
بس قلت ماتسوى علي :weeping:

بلادي وإن جارت علي عزيزة **** وأهلي وإن جارو علي كرام

[الجني]

welcome to the club my brother
اهلا بك الى النادي يا اخي (الترجمه)

خريج 21/07/2011 هندسه كيميائيه من بريطانيا
الى الان عاطل:victory:

مستحيل

ارسل لي أوراقك و أنا أوظفك في قطر للبترول بدون واسطة

[الجني]

اخوي قانوني ارجو الرد على الأسئلة التالية

من اي جامعة متخرج :

كم عمرك :

جنسيتك :

[ANONYMOUS]

اعتقد في ٣ اعضاء كانوا متحمسين في المعرض

خبرهم وان شالله يضبطونك في وظيفه مناسبه

[vip-30003]

الشيخ المدارس المستقله صج ازعاج طلاب ومشاكل بس متعه

انصحك قدم في المجلس الاعلى او مباشرة في المدارس

وراسلني على الخاص بفيدك

[ريم المدينة]

يمدحون الرشاوي دامهم اجانب....

[نجمة سهيل]

أخوي نصيحة دور لك واسطـــــــــــة :(

[captin]

حاول اذا قدرت تشتغل وتتدرب ولو براتب بسيط تتعلم في أحد مكاتب
المحاماة المشهورة لمدة سنة او سنتين وبعدها أفتح لك مكتب خاص فيك
واشتغل في القطاع الخاص واترك القطاع الحكومي العام اللي ما منه فايده

بالتوفيق في مساعيك ان شاء الله

[ولد شرق]

راسلني على الخاص اخوي
ابغي اوراقك

[المحاميه]

حاول اذا قدرت تشتغل وتتدرب ولو براتب بسيط تتعلم في أحد مكاتب
المحاماة المشهورة لمدة سنة او سنتين وبعدها أفتح لك مكتب خاص فيك
واشتغل في القطاع الخاص واترك القطاع الحكومي العام اللي ما منه فايده

بالتوفيق في مساعيك ان شاء الله

ايوه افتحلك مكتب محاماه وكون من اصحاب الملايين وعيش حياتك ..

بس المحاماه عوار راس + ذمه وضمير

[O N E]

هذا واحنا كم ألف ويصيير فينا هشكل


زين لو كان عددنا مليون أو أكثر ، شنو بيصير فينا ؟

[قانوني متميز]

ايوه افتحلك مكتب محاماه وكون من اصحاب الملايين وعيش حياتك ..

بس المحاماه عوار راس + ذمه وضمير

المحتماة تحتاج تدريب في مكتب محاماة لمدة سنتين
او
5 سنوات عمل في القطاع الحكومي

[eXpert*]

اسمحلي ارد عليك الصراحه انت وايد مثالي هذي الاشياء في البلاد الي عندها اكثفاء من الخريجين وفي منافسه كبيره

احنى في قطرغير المكان الي بتشتغل فيه بما انك خريج جديد هم مسئولين عن تدريبك


للعلم الحين صيف وبعده رمضان ارتاح فيهم ترى اخس شي توظف هذي الوقت

هذه مب مثالية ،، هذا تفكير إيجابي.

الرجال من شهر يناير في البيت !! أليس من الأولى أن يتدرب خلال هذه الـ 7 أشهر حتي بدون مقابل في أحد المكاتب القانونية ؟

الله المستعان .

[بنت المطر]

اسال الله لك التوفيق والنجاح ..

الله يسهل امورك يارب

وبشرنا اذا توظفت :)

[mariamaziz]

أخوي ..

سهام الليل لا تخيب .. عليك بالدعاء و السعي ..

و لا تسمع كلام يزيد من حزنك و جرحك .. ترى موضوعك بعد شوي بينقلب هواش و ردود ضد الأجانب مثل ما انقلبت مواضيع وايد قبل موضوعك و المحور الأساسي اللي تتكلم عنه و تطالب فيه بيضيع ..

اخوي الرزق بيد رب العالمين لا هو بيد القطري و لا المقيم ...

لا تحااتي رزقك لنك مكتوب فالسما عند الله .. و دعائك ان شاء الله بيقربه لك ..

الله يرزقك من فضله ..

[bu 3li]

الله يعينك ويصبرك اخوي .. بس شنقول الشكوى لله
القطري وظيفته جاهزه ومب محتاجه الا شي واحد ( مؤهل ثانوي فقط لا غير ) ماشاء الله ربعنا يبون قطريين لكن للوظايف الغير تخصصيه مثل البنوك على سبيل المثال ( صراف او خدمة عملاء ) ويخلونه مكانه 5 ولا 6 سنين وعقب يفكرون يرقونه اشوي (( لا وفالفرع نفسه مايروح مكان ثاني ))

اما الوظايف التخصصيه واللي اصحابها جامعيين .. يا انهم يستعينون بـ اجانب ( والعذر محتاجين خبره 5 سنين وفوق ) او انهم يعطونها لـ ربعهم اللي عندهم اقدميه فالشركه او المؤسسه ( عقب حب خشوم ومصالح مشتركه على مر السنين ) وناااااااااااااااااااااااااااااادر مانشوف كفائه قطريه في منصب معين لانه الشخص يستاهل وفيه الخير

للأسف .. الوضع صار صعب وبعض الناس يرضون بـ اي وظيفه وخلاص بس عشان الراتب وتسهيل المعيشه وعشان الواحد يشيل نفسه


مثال ( فرش جديد وحصري هههه )

امس كنت فـ مقابله في احد البنوك .. قعدت مع مسؤول التوظيف وقال لي الوظيفه اللي محتاجين فيها قطريين حالياً والمتاحه عندنا هي ( تاجر ) !! استغربت وسألت عن نوع الشغل
قال لي تقعد جدام الكمبيوتر وتستثمر فلوس البنك فالبورصه !!!
يعني خريج ادارة اعمال وجامعي وخبره 5 سنوات في مجال الاداره وتبيني حق وظيفه ممكن اي شخص مع التدريب البسيط يشغلها ؟؟ انزين شنو مستقبلي دام هاي شغلتي الحين ؟ وين باوصل ؟؟ الصراحه كانت صدمه لي .. حتى ماتوقع ان هالوظيفه لـ كبار الموظفين

حرام والله بدال لا يرفعون اهل قطر يخلونهم في وظايف مايتحركون منها وفالحين فالجرايد يحطون عناوين تاخذ نص الصفحه (( نسبة التقطير في المكان الفلاني 60 و 70 % .. اي عاد كم مسؤول فيهم وكم رئيس قسم وشنهي الخطه التطويريه لهم ؟؟

مانبي كلام فاضي نبي الشخص عقب سنتين ثلاث يكون مؤهل انه يمسك مكان مسؤوله الاجنبي عطوه دورات عطوه اشياء تفيده .. مب تخشون الفلوس وتقصرون وتقللون من الدورات والكورسات وتقولون الميزانيه ماتسمح واخر السنه تقادير تعبانه وتقييم يجيب المرض للموظفين الصغار والكبار كل واحد حاط حق عمره احسن تقييم ومتقاسمين البونس بينهم وبين بعض !! الله بيحاسب كل شخص قادر انه يساعد ويعطي غيره لكن بخل على غيره وحب نفسه اكثر .. الذمه ثم الذمه ثم الذمه ثم الذمه

[fadthebad]

مستحيل

ارسل لي أوراقك و أنا أوظفك في قطر للبترول بدون واسطة

يا ريال فيك الخير بس اشرايك اني توني طالع من عندهم وهذه ثاني مره اقدم في كيو بي وقالوا ما لقينا لك وظيفه

[Bo abdulaziz]

الله يوفقك انشالله بالوظيفة اللي من خلالها راح تنسى معاناة جامعة قطر *

[الصغيره]

اجل الاعلانات عن طلب وظايف لمن

ياناس وش صاير اللي بالثانويه ما يبونه

والجامعي مايبونه

والهندي وغيره صاير مدير

[burjalburoj]

السلام عليكم ورحمة الله وبركاته
أخي الكريم انصحك تشوف مجال غير العمل الحكومي
جرب تروح كيوانفست ماعندهم قطريين واكيد بيرحبو فيك
جرب شركات مركز قطر للمال والاعمال
هوكتيف
بروة وبنك بروة
الديار
الاسمنت
شركات التأمين
المدارس المستقلة
في كتير مجالات انصحك ما تحصر نفسك بالعمل الحكومي
وبالتوفيق للجميع ان شاء الله

[ام حمد ومحمد]

والله اخوي ماادرى شاقول لك
مالك غير الصبر انا هلكت ماخليت مكان ماقدمت وانا زوجة قطري وفى الاخير يقولون لى الاولية للقطريين اسكت لانى ادري اقولة دارسه بس يقهرنى اروح مكان فى اجانب ويقولولى يوم تتجنسين تعالى
لاتحزن الله فرجه قريب
انا سلمت امري لله والله ماصرت اقدم

[فـيـراري قطر]

اخوي ماعليك من كلام الناس واسمعها مني نصيحه ( صل الفجر فالمسيد لمدة شهر بس) دامك قاعد وقاعد وصدقني صدقني صدقني بتلقى وظيفة احلامك (مجرب) ..

دامك قاعد وقاعد روح المسيد وصل الفجر لاتصل فالبيت روح المسيد وبعد شهر الوعد

[OREO]

اخوي ماعليك من كلام الناس واسمعها مني نصيحه ( صل الفجر فالمسيد لمدة شهر بس) دامك قاعد وقاعد وصدقني صدقني صدقني بتلقى وظيفة احلامك (مجرب) ..

دامك قاعد وقاعد روح المسيد وصل الفجر لاتصل فالبيت روح المسيد وبعد شهر الوعد

اشدعوة عاد شهر !!! ليكون امام المسيد اللي بيوظفه ،،

ياخي المسلم واجب عليه كل الفروض في المسيد و لين يوم مماته الا لو عنده عذر شرعي ،،

اما سالفة هذا بوشهر اول مره اسمعها ،،


انزين اذا بغيت اصير وزير كم شهر لازم اروح المسيد !! :shy:

[Qa10]

اشدعوة عاد شهر !!! ليكون امام المسيد اللي بيوظفه ،،

ياخي المسلم واجب عليه كل الفروض في المسيد و لين يوم مماته الا لو عنده عذر شرعي ،،

اما سالفة هذا بوشهر اول مره اسمعها ،،


انزين اذا بغيت اصير وزير كم شهر لازم اروح المسيد !! :shy:

لازم تصلي الوتر كل يوم في مسجد عشر سنين واخر سنه تصليهم فالحرم :)

[Qa10]

اخوي عسى ان تكرهوا شيئا وهو خير لكم ، وان شاء الله تلاقي المكان اللي يسرك ويطيب خاطرك

[طبيب قطري]

اشدعوة عاد شهر !!! ليكون امام المسيد اللي بيوظفه ،،

ياخي المسلم واجب عليه كل الفروض في المسيد و لين يوم مماته الا لو عنده عذر شرعي ،،

اما سالفة هذا بوشهر اول مره اسمعها ،،


انزين اذا بغيت اصير وزير كم شهر لازم اروح المسيد !! :shy:


استغفر الله العظيم

ايش المشكله انه يتعود يصلي الفجر في المسجد ???!!!!!

[بنت المطر]

لازم تصلي الوتر كل يوم في مسجد عشر سنين واخر سنه تصليهم فالحرم :)



القصد منه كلامه ان يلتزم في صلاة الفجر جماعة مب لمدة معينة ولكن عشان يحس بفرق في حياته وراحة وراح يحب صلاة الفجر في المسجد ويقوم لها مب يتكيسل ويإخرها

لان وقت الفجر وقت تقسيم الارزاق وان شاء الله بيجيه الرزق

:) واسالوني انا مجربة الحمدلله

احيان اتثاقل عن قومت الفجر للصلاة

وسبحان الله اذا قعدت وصليتها في وقتها الله يبارك لي في يومي وتجيني اخبار حلوة

القصد من كلامي ان الواحد يحافظ عالصلاة في اوقاتها

[Bin Hood]

اخوي متميز
عندي وعند اصدقائي تجارب عن البحث عن وظيفة
عندما تتأخر الوظيفة عن شخص يبدأ يشعر باليأس وكره المجتمع وبعضهم تسيطر عليهم الكآبة والحزن بمرور الوقت , ويزداد الشعور عندما يسألك احد "ها ما حصلت شغل للحين" سؤال يسبب نرفزة
احد الاصدقاء يقول اصبحت لا اخرج من المنزل كي لا يسألني احد هذا السؤال
صديق اخر كان يأتي يوميا المجلس قبل ان يتوظف وكل يوم يسأله احد الاصدقاء الم تجد عملا حتى الان ؟؟!
للاسف ان البعض يسأل ولا يعرف مرارة هذا السؤال على المتلقي!
وهذا الشخص الان اصبح في وظيفة حساسة جدا , واصبح واسطة للتوظيف بحكم قربة من مناصب قيادية!

شخصيا اشوف وضعك ممتاز وفوق الطبيعي على الاقل في مقابلات واخذ ورد
انا احتجت ثلاث سنوات علشان اغير وظيفتي

اعتبر جلوسك في البيت راحة ورمض مع البيت
وبعدين ان شاء الله امورك بتتسهل وتتيسر
ولا تنسى نفسك من الدعاء ولا تنسانا كذلك

[قانوني متميز]

مكشوووووووووووورين على الدعاوي الطيبة والله يجزاكم خير

[روح الاطلس]

بشر ان شاء الله توظفت؟

[طبيب قطري]

بشر ان شاء الله توظفت؟

[مشاكل]

بشر ان شاء الله توظفت؟

[طبيب قطري]

ليش ما يرد ؟ يمكن توظف ومشغول بالدوام؟

[ديار الخير]

بإذن الله هو في أحسن حال ....،


ليش ما يرد ؟ يمكن توظف ومشغول بالدوام؟

:d

عذراً، لكن الجملة أضحكتني ....،

[BoAof]

الله يوفقك

بس ما عندك ( و)

[بوسالمين]

قدم على قناة الريان، قناة تابعة للدولة وميزانيتها من الديوان الاميري .. رواتبهم زينه ..

يحتاجون موظفين، قدم هناك والله يوفقك يارب ..

وان توظفت لا تنساني من صالح الدعاء

[CH Engineer]

مسوين معرض للتوظيف (اليوم المهني مصغر) في جامعة قطر
روح قدم وبالتوفيق

[روح الاطلس]

ههههههه طبيب قطري

ان شا الله يكون مشغول بالدوام

[alnoida]

تخصصي قانون

هل ترغب في التدرب في مكتب محامي وبتالي تستطيع فتح مكتب

[طبيب قطري]

بإذن الله هو في أحسن حال ....،



:d

عذراً، لكن الجملة أضحكتني ....،

:nice:
ياخي والله انه احاتيه
:shy:

[ميلاف]

http://www.************/watch?v=HfZ59H4yHJs&feature=related

شوف الفيديو عسى الله يحقق مرادك

واكثر من الاستغفار والصدقه

[kawkawii]

لحد ما تصير "موظف" اتجه حاليا للتجاره فالرسول بارك في التجاره

[حميداني]

الله يوفقك , الحين ارضى بوظيفه لو هي تحت مستواك بشوي حتى لو دخلها بسيط
وابقى قدم وحاول مع الوقت هذا المكان اللي تشتغل فيه راح يعتبر خبره في مجال معين وخذلك دورات اكثر
حاول تعلي درجاتك العالميه بالانقليزي والحاسب الالي بعد ونوع والله يفرجها لا تاكل هم

اصعد السلم درج درج على هداوه

[باراكودا]

التوظيف معاناة للخريجين القطريين أفضل حل تقطير وظيفة مدير الموارد البشرية
وجميع الموظفين في الموارد البشرية يجب أن يكونوا قطريين بقرار ملزم لكافة
المؤسسات الحكومية والشبه حكومية والشركات المساهمة ويجب سن قوانين تمنع توظيف الاجنبي منعا باتا في الموارد البشرية
وجميع الاعمال الادارية .

[(الفيصل)]

تخصص القانون مطلوب في كل مكان (الحكومي والخاص) ، وأنا أستغرب حقيقة إلتجاء الاخ للمنتدى لبث شكواه!!

فقبل أيام فقط وجدت أعلانات بالجرائد المحلية لطلب توظيف (قطريين فقط تخصص قانون)

أحس الموضوع فيه إن !!

عموماً
إذا (ولدنا قطري وهو فعلاً كما يقول) فليراسلني على الخاص ويتواصل معي (ويبشر بسعده ان شاء الله)

[الصغيره]

كلونا

مسؤسسه طبيه السكرتاريه كلهم اجانب وعرب

سكرتير مدير عربي مقيم
الله يرزقه بس ولد البلد وبنت البلد وين يروحون

ولا مقيم موجود بوظيفه الا حد من عايلته متوظف على بعد 50 متر منه

عجيب وحنا وين نروح نشرب بحر

او نشتغل ببلادهم وهم يشتغلون ببلادنا تبادل خبرات لا وشهاداتهم اللي احنا نبي مثلهم انتساب احنا مرفوض وهم مقبول

[ديار الخير]

:nice:
ياخي والله انه احاتيه
:shy:


بلا أدنى شك طبيبنا الفاضل ....،

وجزاك الله خيراً ،

:d


تخصص القانون مطلوب في كل مكان (الحكومي والخاص) ، وأنا أستغرب حقيقة إلتجاء الاخ للمنتدى لبث شكواه!!

فقبل أيام فقط وجدت أعلانات بالجرائد المحلية لطلب توظيف (قطريين فقط تخصص قانون)

أحس الموضوع فيه إن !!

عموماً
إذا (ولدنا قطري وهو فعلاً كما يقول) فليراسلني على الخاص ويتواصل معي (ويبشر بسعده ان شاء الله)

الحمد لله، بارك الله فيكم ....،

[ابوالكلام]

نا من رايي بان الحكومة تغلق الجامعات مامنها فايدة خلاص ايذا المتخرجين مايحصلون شغل ويساهمون في بناء بلدهم