معرض الدوحة التجاري " 2012 م "

[رحال]

تنظم الهيئة العامة للسياحة - انطلاق فعاليات - معرض الدوحة التجاري 2012 في نسخته الجديدة ..
على مساحة 15000 م2

الفترة : 1 /7 – 10 /7 /2012 ( 10 ايام )
الفعاليات المصاحبة : خيمة ترفيهية جانبية لمركز الدوحة للمعارض

اوقات المعرض اليومية :
1/7/2012
الأحد من الساعة 11 صباحا ولغاية الساعة 10 مساءً
الإفتتاح الرسمي الساعة 11 صباحا
2/7/2012
الأثنين من الساعة 10 صباحا ولغاية الساعة 10 مساءً
3/7/2012
الثلاثاء من الساعة 10 صباحا ولغاية الساعة 10 مساءً
4/7/2012
الأربعاء من الساعة 10 صباحا ولغاية الساعة 10 مساءً
5/7/2012
الخميس من الساعة 10 صباحا ولغاية الساعة 10 مساءً
6/7/2012
الجمعة من الساعة 2 ظهرا ولغاية الساعة 10 مساءً
7/7/2012
السبت من الساعة 10 صباحا ولغاية الساعة 10 مساءً
8/7/2012
الأحد من الساعة 10 صباحا ولغاية الساعة 10 مساءً
9/7/2012
الأثنين من الساعة 10 صباحا ولغاية الساعة 10 مساءً
10/7/2012
الثلاثاء من الساعة 10 صباحا ولغاية الساعة 10 مساءً

تقسم المعرض التجاري إلى 4 اقسام رئيسية :
( الأدوات المنزليه – الهدايا والألعاب – الملابس والإكسسوارات – قسم المواد الغذائية ) وذلك لتسهيل الأمر على الزوار للوصول الأسرع إلى البضائع المرادة خلال المعرض

توفير خيمة ترفيه بها مسرح لعرض الفرق الشعبيه والفرق الإستعراضية وتوفير عدد 2 مطعم بالإضافة إلى كوستا كوفي و العاب بسيطة للأطفال

توفير جميع الخدمات الأمنية ( الدفاع المدني – الحراسات العامة – المرور ) بالتعاون مع قسم الأمن بالهيئة العامة للسياحة

توفير الهلال الأحمر القطري لتغطية اي ضرف طارئ قد يحدث

توفير عدد 50 عامل ( حمل الأمتعه للزوار ) بالمجان

توفير فريق مختص بتوجيه السيارات بالمواقف وذلك تجنبا لإزدحام السيارات
كما سيتم الهدايا البسيطة للزوار خلال فترة المعرض .

هناك نقاط بيع بالبطاقات الائتمانية .

علما بأن المعرض بمشاركة " 550 " عارضا ومن 31 دولة و700 مشارك .
ومن المتوقع أن يزور المعرض 200 ألف زائر خلال الفترة المذكوره .

[بوحمد111]

الله يعينا على الزحمة وعارفين متى يفتتحونه مع الراتب

يبي لنا زيارة ان شاء الله

[بن غيث]

غالي بالنسبة لمعرض .. واغلى من سعر السوق

[راشد محمد]

المعروضات نفس العام

[ام جاسم 111]

رحت امس والصراحه مغليين الاسعار جلابيه مغربيه شهر واحد شريتها ب700 ريال امس تبيها ب800 ريال

وجلابيه حلوه تقول لي 2500 ريال وعلشانك ١٨٠٠

المصاروة مغليين الجلابيات من 30 الى 60 ريال

حتى الصينيين نفس الشي

والاتراك لاعبين لعبتهم في اسعار الاكسسوارات

[آنــه]

امس خالتي رايحه تقول جبها ماعون عند الاتراك قالوا لها 19000
قلت لها انتي وين رايحه تقول المعرض التجاري ههههههههههههههههه
صراحه صعقتني بس ما ادري يمكن هي سمعت غلط اذا في احد رايح هناك وشاف هالماعون يقول لنا يمكن غلطانه هي

[العربية نت]

المشكلة ما هي في العارضين المشكلة في هيئة المعارض اكيد رافعه الاجار على المحلات وبالتالي من الطبيعي ارتفاع الاسعار

[آنــه]

وان كان الاجار غالي
ما يرتفع منسوب القطعه الوحده الى 100%
يعني القطعه بـ 100 تنباع في قطر 200
والا في دبي بـ 300 تنباع في قطر 550

يعني اهم خذوا الاجار والربح وفوقهم اجار السنه الجاية وزياده

[راشد محمد]

توفير عدد 50 عامل ( حمل الأمتعه للزوار ) بالمجان

انا على بالي بفلووووووووووووس؟؟

[آنــه]

توفير عدد 50 عامل ( حمل الأمتعه للزوار ) بالمجان

انا على بالي بفلووووووووووووس؟؟


جرب ما تعطيهم فلوس او تعطيهم 10 وشوف الرد

[doha2012]

,



وين اللي يحملون الامتعه ؟ ماشفنا احد



غالي بزياده والله



مواعين زون يبعونها عند السوريين بالالاف ...؟


مستغلينا واجد , الاتراك مواعينهم مو ذاك الزود ب 800 وزياده



الصينيين رافعين الاسعار , السوررين للملابس غالي جدا




شروا وزون كلها نفس البضاعه . وارخص



في دبي والحسا والكويت ماتوصل حتى لنص السعر .



طلعت مامعي الا تمر والحمد لله ,














و

[كازانوفا]

الحمدلله حاطه عليهمx خلي بضاعتهم اتخيسسس
الواحد على ايش والا ايش بيلحق

[الأصيلة]

جلابية كويتية بـ 3 دنانير ونص
في المعرض بـ 170 ريال

[الملا]

اللي استغرب منه

نشتكي من المعرض والغلا في المنتدى وهناك يلا بالعافية اتحصل موقف حق الموتر و٩٩.٩٪ في المعرض من الحريم

[راسي براسك]

خلونا نسوي حمله مقاطعه كل سنه وكلامكم هو نفس الكلام عن المعرض !!

[لاجل QT]

زين حلو..ناطرة يفتونة حق المنكيرات والخراويش

[الزعفراني]

اللي استغرب منه

نشتكي من المعرض والغلا في المنتدى وهناك يلا بالعافية اتحصل موقف حق الموتر و٩٩.٩٪ في المعرض من الحريم

:nice:

[كلنا قطر 1981]

خلونا نسوي حمله مقاطعه كل سنه وكلامكم هو نفس الكلام عن المعرض !!

:nice:

[Hamada-Sama]

استفسار بسيط ... هل المعرض فرض ولا واجب إنا الواحد يروح له ويشتري منه ؟

[رُفق المجنّا]

المعرض كذب وأسعاره مبالغ فيها لنا ( ذوي الدخل المحدود ) وأما اللي ما تفرق معه فالله يهني البياعين بمثله

[رُفق المجنّا]

استفسار بسيط ... هل المعرض فرض ولا واجب إنا الواحد يروح له ويشتري منه ؟


فرض كفاية

اللي يبي يشتري بغالي يروح ، واللي يبي يحفظ دريهيماته يستريح

[CH Engineer]

الي يحذر يدري عنهم ولا يشتري منهم
بس المشكله باللي مايدري
يروح اهناك ويتفاجئ بالاسعار ويستحي من مرته او من هله ويشتري لهم بما ان الناس حوله يشترون
لازم ينزلون هالموضوع فالجريدة عشان الكل يعرف ان المعرض فرصه للتجار للنصب على الناس

[حمودي2]

البضاعة الموجودة غالية وبنسبة كبيرة
احسن شيء بروح آخر يوم ولو لي نصيب في شيء بشتريه لان تقريبا الاسعار بتنزل للنصف نظرا لان التجار عايزة تخلص من اكبر كمية من البضاعة بدل ما يشحنوها تاني ويتكلفوا مصروفات بيبعوها فوق سعر الجملة بشوية
يعني لو عباية 1000 اليوم ممكن اخر اليوم ااخذها بـ 600 اكثر من مرة اشتري في اليوم الخميس واستفاد جدا من الاسعار

[ابوالكلام]

خلونا نسوي حمله مقاطعه كل سنه وكلامكم هو نفس الكلام عن المعرض !!

صح كلامك

[نتفـه]

كل سنه اخس من قبل هالمعرض ومع ذلك نروح ونشتري !!!
انا ابي اروح راسي داير بس بحاول امسك نفسي لين اخر يوم هههههه هاي اذا تم شي اصلا ..

[سان سيمون]

أنا غير الزعفران ما أخذه منهم والأسعار هالسنة غالية بالمره حتى سألتهم ليش غالي الإقبال قليل بسبب السفر والخوف من التهديدات الي مثلكم يقلل علشان يربح بس من تكلم ومن تحكي تصدقون سعر الجلابية بسعر قطعة ذهب. ولا ساعة اقنر

[أحساس]

للعلم فقط
جميع الي يعرضون بضايعهم موجوديين في قطر
يعني تجار لهم محلات في قطر
ويستغلون شي أسمه معرض في قطر
وأقرب مثال (( محل يبيع ثريات كرستال مصري )) يصرح في
جريدة العرب الاقتصادي أنه يشارك للعام العاشر على التوالي
وانه لديه وكيل في شارع سلوى
أتمنى المعارض القادمة تكون محصورةعلى التجار الغير موجوديين في قطر

[al saad]

تجربتي اليوم في المعرض.....

محل مصري يبيع تحف وصور ايات عجبتني صوره فيها ايات بكم.....1900 ريال صج غالي....
ومشيت عنه وتم يناقش و يحاول قلت 500 لني مب شاريها والصدمه انه وافق.....
بس يوم قلت له ليش هاي الاسعار قال قيمه المحل 5500$ لمده 10 ايام....

هني سر الاسعار الجنونيه

[ريم 28]

نصيحه لا تروحون ولا شي


الاسعار مبالغ فيها وكله يلعبون بعقول الناسً

واخر يوم ينزل السعر وفي كل الاحوال ربحان لكن في البدايه شجع واستغلال المستهلك وللا سف القطريات رايحين رايحين بيشترون بيشترون

الله يعين

[الملا]

الكل يشتكي من الغلا ومع ذلك مع كل وحده طالعة من المعرض خمس او ست اكياس شايلتهم غير الاكياس اللي شايلهم العامل وراها

ليش هالتناقض الغريب !!!

[حياة]

نفس المعرض اللي في شهر 1
ونفس العارضين هم هم ونفس البضاعه
انا رحت العصر خذت طقم طاولات بلاستيك
ب800 بعد المكاسر وامس كنت في رويال بلازا
نفسهم 2200 ريال
فيه الزين وفيه الشين وفيه الرخيص والغالي
بس انتوا لازم تكاسرون الين اخر شي ..
انا خذت درس المعرض اللي طاف ..
خذت شرشف يتعلق ع الطوفه فيه رسمه
طبيعه 1500 وبعده بيوم شفت نفسه عند
سوري ثاني ب500 وانقهررررت
رحت ثاني يوم قلت بترده والا اشتكي عليك
واجيب الشرطه اللي براء .. المهم بعد يوم طويل
ردهم وكانوا حبتين .. لازم الواحد ينتبه ولايوافق
بالسعر على طول اكسروه بالسعر مثلا قال 1000
قولوا 200
والله يوفق الجميع

[السحابة]

صراحة غالي غالي بجنون

[pink pearl]

ان شاء الله تكون لي زيارة أحكم عليهم

[إينشتاين]

المعرض كذب وأسعاره مبالغ فيها لنا ( ذوي الدخل المحدود ) وأما اللي ما تفرق معه فالله يهني البياعين بمثله

الي ماتفرق معاه مايروح للمعارض ،، تلقاه في محلات الماركات في المولات :nice:

[QtrGate]

الاسعار ارتفعت دبلات بسبب الايجار

الهيئة العامة للسياحة اجرو المعرض على شركة
والشركة تاجر على العارضين
فطبيعي ترتفع الاسعار

[وطن]

تجربتي اليوم في المعرض.....

محل مصري يبيع تحف وصور ايات عجبتني صوره فيها ايات بكم.....1900 ريال صج غالي....
ومشيت عنه وتم يناقش و يحاول قلت 500 لني مب شاريها والصدمه انه وافق.....
بس يوم قلت له ليش هاي الاسعار قال قيمه المحل 5500$ لمده 10 ايام....

هني سر الاسعار الجنونيه

اخوي.. وحده بحرينية تقول لي سعر الايجار حول 7000 ريال
حق فترة المعرض كاملة
وهي كانت موجوده بالمعرض اللي طاف

شدعوه هو سعره 5500 $
يبالغ اكيد

[لاجل QT]

للعلم فقط
جميع الي يعرضون بضايعهم موجوديين في قطر
يعني تجار لهم محلات في قطر
ويستغلون شي أسمه معرض في قطر
وأقرب مثال (( محل يبيع ثريات كرستال مصري )) يصرح في
جريدة العرب الاقتصادي أنه يشارك للعام العاشر على التوالي
وانه لديه وكيل في شارع سلوى
أتمنى المعارض القادمة تكون محصورةعلى التجار الغير موجوديين في قطر

وهذا هو الصح واللى المفروض يصير

[الخزرجي قطر]

لا للمعرض من المقاطعين بناء على التعليقات من الاعضاء

[بنت المطر]

قاطعوهم

[نقاء]

انا اقول ( اللوم على الي رافع اجار المكان )) ومن الطبيعي يرفعون بضايعهم
واذا قلت لهم شي يقلون لك لا احنا بس ناخذ التكلفه !!!!!!!
عيل ليش جايين ومسوين زحمه

[رحال]

الكل يشتكي من الغلا ومع ذلك مع كل وحده طالعة من المعرض خمس او ست اكياس شايلتهم غير الاكياس اللي شايلهم العامل وراها

ليش هالتناقض الغريب !!!

:nice::nice::nice::nice::nice::nice::nice::nice:

[مشاكل]

نفس البضاعه
نفس الاشكال
نفس التنظيم
نفس البياعين
نفس الزباين
نفس التوقيت
الا الاسعار هي بس اللي اتغيّر

[aaa333]

المحلات اللي موجودة في قطر ليش تشارك!!
المعرض المفروض يجمع المحلات الخارجية ..،
اسعار نار وبضاعه ماتسوى.. ولا الاتراك واكسسواراتهم

[روح الاطلس]

^

الاتر اك لاعبين لعبتهم والبنات مثل المهابيل يالله الخيرة بس

قدامي وحده تبيع بلسان حلو وتكرم عينك ومافي منك قاصة على وحده بايعة لها خاتمين (اكسسوار) ويقولون مطلي ذهب ( طبعا مافي اي ضمان انه مطلي ذهب) على 550 ريال!!! واختنا في الله شاقة الحلج فرحانه

انا رحت استطلاع مب اكثر ومثله مثل المعرض اللي صار من كم شهر نفس الترتيب نفس العارضين نفس البضاعه كل شي نفسه لا وبعض المعروضات موجوده عندنا ورافعين سعرها

اضم صوتي لكم بالمقاطعه :) اهل قطر مب سذج وفلوسهم مب حرام عشان تنرمي بهالخرابيط وياليت سعرها فيها الا مدبل اضعاف

[naif3]

والله وقتهم مايحتاااج مع الرواااتب
الله يعيناا

[تحداني]

^

الاتر اك لاعبين لعبتهم والبنات مثل المهابيل يالله الخيرة بس

قدامي وحده تبيع بلسان حلو وتكرم عينك ومافي منك قاصة على وحده بايعة لها خاتمين (اكسسوار) ويقولون مطلي ذهب ( طبعا مافي اي ضمان انه مطلي ذهب) على 550 ريال!!! واختنا في الله شاقة الحلج فرحانه

انا رحت استطلاع مب اكثر ومثله مثل المعرض اللي صار من كم شهر نفس الترتيب نفس العارضين نفس البضاعه كل شي نفسه لا وبعض المعروضات موجوده عندنا ورافعين سعرها

اضم صوتي لكم بالمقاطعه :) اهل قطر مب سذج وفلوسهم مب حرام عشان تنرمي بهالخرابيط وياليت سعرها فيها الا مدبل اضعاف




معاج حق حبيبتي
كل الكلام الي قلتيه ما عليه نقطه غبار

وضيفي عليه غااااالي جدا
كل الاشياء الي كنت اعتقد انها زينه وصدقت كلامهم الكاذب في الزباله اجلكم الله لا اكسسوارات عدله ولا شي عدل مثل الناس
يمكن الي اكسسواراتهم مثل البشر هذيج الكنديه والايطاليه بس


شيئين ما اتحسف اشتريهم من المعرض
التمور والزعتر واوقات اشتري العسل من اليمنين


غير هالاشيا كله كلام فارغ


وكافي سذاجه



جملك الله برضاه

[ريم 28]

اليوم قعدت مع بنات

وحده فيهم تقول ان في اكسسوار عقد عند الاتراك ب5000 ريال

مب 500 تخيلو 5000 واكسسوار

كلهم انقعتهم ان الاسعار مرتفعه. ويلعبون علئ اهل قطر وبالفعل اغلبهم ما شروا

اسعار خياليه

لو قاطعتهم

بتتفاجون المره الجايه اشلون اسعارهم

بين الطلب والسعر علاقه طرديه
اما العرض والسعر علاقه عكسيه

وقفوا معانا وقاطعوهم علشان ما يلعبون بعقولنا

[مضاربه]

ليش تروحون له لو شافوا الاقبال من الناس قليل بينزلون الاسعار

[دنيا الاسهم]

اليوم في برنامج الدار عارضين المعرض في التلفزيون والاقبال اشوفة قليل جدا
انا مقاطعة المعرض .... ... والسبب يقصون على اهل قطر وحدة اعرفها شرت جلابية امس ب350 واليوم ارجعت عليهم عشان تاخذ منهم لقت الجلابية ب900 ليش يوم قالت لها امس اخذت اقل قالت لها خلاص بعطيج ب700
حرامية استغفر الله العظيم مايستاهلون العنوة

[qatarshark]

لولييين يقولون :
طقاق روحه ما يصيح
محد جبركم تشترون من المعرض
اشدعوة يعني لو ما شريتوا بتموتون
أنا المعارض ما اشتري منها
لانها مضحكة وغالية هذا غير الزحمة

[Qt.1]

كنت بروح مع ام العيال لكن عقب هالكلام خل افليساتي احسن بدال ماعطيها الي ايبقوني عيني عينك .

[بنت مريخ]

رحت امس بعد الدوام, الاسعار مختلفه حصلت جلابيات العام الوحده ب80 السنه ال3 ب100 عند محل مختلف والقطع احلى, الربيان عند الايرانيين العام يبيعون كل 10 حبات في كيس، السنه 3 حبات ب10 يقصون علينا, عطورات الجسار عندهم معطر الارض العام 3 غراش ب100, السنه كرتون فيه 12 غرشه ب300 حلو استخدمته العام وخذت منه السنه,,ماقهرني الا عارض خليجي عيونه في البنات ونظرات ماصخه مالها معنى وينكت بعد كان خاطري اسمعه كلمتين عقب قلت البنات راضين على عمارهم (الله يهديهم)

[الزعفراني]

وصلني برود كاست ع البلاك بيري من كم يوم :

كان في لقاء على قناة الريان للسيد لحدان المهندي مسؤول في هيئة السياحة ومسؤول بنفس الوقت عن المعرض التجاري صرح ان أغلب المشاركين في المعرض بلغوه انهم غطوا تكاليف الجناح والإقامة خلال أول يوم من افتتاح المعرض !!!!!

:rolleyes2:

طبعا الله يزيدهم ويوفقهم وشي طيب انهم حققوا أهدافهم من المشاركة بتغطية التكاليف على أقل القليل ، لكن هالشي ما يتناسب مع آراء الناس اللي تشتكي من ارتفاع الأسعار في المعرض ، وهذا اللي يخلي الواحد يتعجب أكثر و أكثر !!!!


وعلى طاري المعرض تقول وحده من زائرات المعرض :

صادف وجودي جنب أحد الأجنحة المشاركة وبينما أنا في الانتظار ، استرقت السمع لحوار بين أحد البائعين في جناح يبيع جلابيات نسائية وبين وحده جايه تشتري من عنده سألته عن سعرها فقال لها 150 ريال كاسرته وقالت له باخذها بـ 100 ريال .. ووافق .

بعدها بثواني جات وحده ثانية تبي تشتري نفس النوع وتسأله بكم سعرها قالها بـ 200 ريال .. كا سرته فقالت له باخذها بـ 150 ريال ووافق .

:rolleyes2:


مع الآسف مع الآسف النسوان مقصه الا من رحم ربي ، ومع الآسف ما عندهم ثقافة الشراء والتسوق ، كل همهم دام البوك عامر مب مشكله السعر .

وآخر شي نتهم الناس ونقول قاعدين يستغفلونا في الأسعار طيب ماهو انتوا اللي سمحتوا لهم ، وانتوا اللي غبائكم يخلي الغير يستغفلكم .

[غايه الطواش]

رحت امس بعد الدوام, الاسعار مختلفه حصلت جلابيات العام الوحده ب80 السنه ال3 ب100 عند محل مختلف والقطع احلى, الربيان عند الايرانيين العام يبيعون كل 10 حبات في كيس، السنه 3 حبات ب10 يقصون علينا, عطورات الجسار عندهم معطر الارض العام 3 غراش ب100, السنه كرتون فيه 12 غرشه ب300 حلو استخدمته العام وخذت منه السنه,,ماقهرني الا عارض خليجي عيونه في البنات ونظرات ماصخه مالها معنى وينكت بعد كان خاطري اسمعه كلمتين عقب قلت البنات راضين على عمارهم (الله يهديهم)

ليكون البحريني مال العبايات كرهت التعامل معاهم بسرعه هالخايس ....

[غايه الطواش]

انا رحت قصدي محلات السجاد ..في الاخير الايراني الي اعجبوني الزل عنده طلع في قطر وقالي تعالي المحل بطلع لج اكثر ..وبس استلمت الباب وطلعت

[qatarman8008]

انا منعت احد من هلي يروح المعرض .. لانه خلط ومسخرة ... وكل شي غالي 3 اضعاف السعر الحقيقي .. وانشالله قبل العيد درب الحسا .. ليلتين ... والله كريم ...

[بنت مريخ]

ليكون البحريني مال العبايات كرهت التعامل معاهم بسرعه هالخايس ....

لا اختي العماني الى يبيع لبان ولبان معطر,واحد منهم يقهرررر,يكلمني وعيونه في البنات

[غايه الطواش]

وصلني برود كاست ع البلاك بيري من كم يوم :

كان في لقاء على قناة الريان للسيد لحدان المهندي مسؤول في هيئة السياحة ومسؤول بنفس الوقت عن المعرض التجاري صرح ان أغلب المشاركين في المعرض بلغوه انهم غطوا تكاليف الجناح والإقامة خلال أول يوم من افتتاح المعرض !!!!!

:rolleyes2:

طبعا الله يزيدهم ويوفقهم وشي طيب انهم حققوا أهدافهم من المشاركة بتغطية التكاليف على أقل القليل ، لكن هالشي ما يتناسب مع آراء الناس اللي تشتكي من ارتفاع الأسعار في المعرض ، وهذا اللي يخلي الواحد يتعجب أكثر و أكثر !!!!


وعلى طاري المعرض تقول وحده من زائرات المعرض :

صادف وجودي جنب أحد الأجنحة المشاركة وبينما أنا في الانتظار ، استرقت السمع لحوار بين أحد البائعين في جناح يبيع جلابيات نسائية وبين وحده جايه تشتري من عنده سألته عن سعرها فقال لها 150 ريال كاسرته وقالت له باخذها بـ 100 ريال .. ووافق .

بعدها بثواني جات وحده ثانية تبي تشتري نفس النوع وتسأله بكم سعرها قالها بـ 200 ريال .. كا سرته فقالت له باخذها بـ 150 ريال ووافق .

:rolleyes2:


مع الآسف مع الآسف النسوان مقصه الا من رحم ربي ، ومع الآسف ما عندهم ثقافة الشراء والتسوق ، كل همهم دام البوك عامر مب مشكله السعر .

وآخر شي نتهم الناس ونقول قاعدين يستغفلونا في الأسعار طيب ماهو انتوا اللي سمحتوا لهم ، وانتوا اللي غبائكم يخلي الغير يستغفلكم .

العام مادري اول العام رحت المعرض اول يوم الافتتاح ...شريت جلابيه من سوري ب 150ريال

رديت العصر اخذ لاخواتي قالي ب 700 ريال
هاوشته وطلعت ...
فصرت اروح مع الافتتاح ..الناس يفتتحون وانا انطر بره عشان ادش على طول :shy:

[فلتة زمانها]

ابي اروح بس متردده من ردودكم احس المعرض مايشجع

[مساهمة]

كل سنــة من ادخل المنتدى واقراا الردود ..اقول اكيد المعررض يصفررررر ومافيه حد !

ولين رحت المعرض ..ماتقدر تنزل عند الباب من الزحمه ! :eek5:

شي غريييب :rolleyes2:

عموماا .. اذا كان في شي غالي احنا مب مضطرين ناخذه.. وبس

اماا اللي يشترون .. ويتحندون .. ويروحون المعرض 5 مراات .. لاتعليق صرااحه:nice:

[ANONYMOUS]

اصلا لو رخيص وباع لكم بربح بسيط

الكل راح يسب ويشجب ويستنكر ويذم


بس " البعض" مايعجبهم غير الغالي حتى لو تكرمون زباله

عشان الزبو وانا شريت وانا سويت


عشان كذا رافعين السعر ومدبلينه

الي يروح ويشتري في العافيه هو حر بماله وتصرفاته

بس شخصيا ماودي الاهل وهم مقتنعين بوجهة نظري

[الكونتيسه غلا]

الحمد لله مب من زوار المعارض :)

[لجين]

انا رحت أول يوم كانت الاسعار جيدة عدا محلات الاتراك

شفت محل جلابيات يبيع فيه سوري وخذت لي جلابية بعد المكاسر طلعت بـ 150

رحت له بعدها بيومين طلع اللي يبيع واحد ثاني سألته عن نفس الجلابية

قالي بـ 280 !! قلت له انا ماخذتها بـ 150 قالي خلاص 150 انتي وذمتج !

ونفس السالفة عند محل ثاني

والاتراك صج نهبة سألت عن طقم 6 فناجيل تركش كوفي مع الصينية بـ 1200 عسى ماشر

غير الاكسسوارات اللي هابين فيها تنباع بالآلاف

بشكل عام المعرض عادي نفس كل سنة ..واللي يبي الرخص يروح من اول يوم احسن

[فلتة زمانها]

اليوم رحت المعرض ،،ماشاءالله زحمه
وماشريت غير اساور وبيجامة سنفوره
عجبني الميني دراعه مال الركن الكويتي،،موديلاتهم حللللوه بس اسعارهم ضو
الدراعه الوحده 800 ريال وفي على شكل فستان ب1800 حاولت اكاسرها مارضت
وفي ركن سعودي اسمه الهنوف القويز دراريعهم تجنن بس بعد غاليه
بحاول اروح اخر يوم يمكن ينزلون الاسعار

[STAR]

أنا مستغربة ..ردودكم بصوب..وزحمة المعرض بصوب...
إذا كان غالي ومقصة ليش ماتقاطعونهم...

خل بضايعهم تخيس خاصة الاتراك...

[لمعة الالماس]

لاحظت المحلات اللي تبيع اشياء غالية مثل الجلابيات والميني دراعه والعبيايات وغيره محد عنده ومحلها مافيه بركه لان الناس بس تسال عن السعر وتروح

اما اللي اسعارها معقوله فعليهم اقبال وخاصة قسم الاكل والبهارات

[الصغيره]

الصرااحه لازم نقاطعهم وووووبقوه ونخلي اغراضهم تخيس

رحت ثلاث مرات

بناطيل سترج جنز تركيه 250 ريال ليه وهي تركيه وسعرها بتركيا 90 ريال

الملابس والاكسسوارات هي كل سنه مابه جديد

احلى شي السجاد واسعارها زينه لكن ما عليها زحمه

الشباب وما ادراك ما الشباب الصراحه انتفشل من شباب قطر يدورووون بدون هدف الا التطلل في وجيه النسوان

امس الخميس واليوم الجمعه الشباب مزاحمين النسوان ولا يشترون وينقلون ارقامهم ويلحقون النسوان عيب والله


والبنات الله يهديهن الصراحه كشخه ومكياج البعض مش كلهم وعبيهم مش عبي معرض الا عرس
البعض لكن الحمد لله البعض منهن والله محتشم وبدون لفت انتباه

لكن هالشباب ضايقوا النسوان وزاحموهن على الفاضي ولا حتى شاري له سندويجه بيده يراكضون خلف النسوان


الله يهديهم يبي لهم طرد من المعرض

[لاجل QT]

انا رحت أول يوم كانت الاسعار جيدة عدا محلات الاتراك

شفت محل جلابيات يبيع فيه سوري وخذت لي جلابية بعد المكاسر طلعت بـ 150

رحت له بعدها بيومين طلع اللي يبيع واحد ثاني سألته عن نفس الجلابية

قالي بـ 280 !! قلت له انا ماخذتها بـ 150 قالي خلاص 150 انتي وذمتج !

ونفس السالفة عند محل ثاني

والاتراك صج نهبة سألت عن طقم 6 فناجيل تركش كوفي مع الصينية بـ 1200 عسى ماشر

غير الاكسسوارات اللي هابين فيها تنباع بالآلاف

بشكل عام المعرض عادي نفس كل سنة ..واللي يبي الرخص يروح من اول يوم احسن

يعنى التجارة عندهم جس نبض اذا في اقبال على المنتج زادو الاسعار

اشكرة سرقة عينى عينك

اغلب البضائع موجودة عندنا وبسعر ارخص

[شموخ]

اسمع من الناس اللي راحت المعرض تشتكي من غلاء الاسعاروالمشكلة اتشوفهم كل يوم رازين الوجه ورايحين للمعرض وانا وحدة اكره زيارة هالمعارض اللي مامن وراها الا الخسارة عالفاضي

[sho_sha]

انا الحمد لله صار لي 4 سنوات مارحت له ولا ابي اروح له تجار طماعين وحرامية . المفروض الناس يخلون هالمعرض يولي لين ماتخيس حلوجهم وعقب بيعرفون شلون يبيعون عدل .

[ريم 28]

زوجي مستغرب الا مصدوم

يقول بنروح المعرض انا اقول له الصراحه ما ابغي اروح كله ينصبون علينا

قال كلام جديد

قلت اي منتدانا كاتب عنهم

قال سوا فيني خير

[غرِيبهـ]

رحت اليوم الظهر كان هادي الحمدلله مافي زحمة بدت الزحمة من 4 الناس زادو

عجبني طقم صحن كبير تقديم معاه صحون صغيره حلو للكيك خاصة ان له غطاء بلاستك وهو سراميك بس غالي ماخذته ب 350 ريال عند التركين

خذت ملحف مصري قطن لامي 4 قطع مقاسه دبل ب 160
وفيه اللي كنق سايز ب 260 اظن


خذت جلابيات بيتيه خفيفه قطنيه في كم محل مسوي عرض 3 ب 100 هاي مكتوب عليه محل مصري
وواحد عنده 3 ب 120 مكتوب عليه محل اماراتي ومحل قطري خذت 4 ب 150 ريال وكلهم نفس النوعيه في المحلات قطن الكيمري الخفيف في اللوان صيفيه
حلوه

خذت عطر اسمه فضة من محل كويتي اطياب الشيوخ ب 250 ريال

كنت ابي طحين حمص بس مخلص من عند البحريني يقول يخلص بنفس
اليوم وبكره بيجيبون بعد وعنده خلطة خنفروش

الاسعار حسب اللي معاي رايحين قبل قالو انها اقل اظن على النهاية
قامو يخفضون

اي نسيت المفارش عند الصينين البطانيات مرفعين اسعارهم لعام ماخذه ب 80 والسنة اشكال مختلفة بس السعر ب 250 واكثر

اللي تشوف محد عنده هاي غالي والناس مبتعده عنه

[نتفـه]

ابي اروح متى اخر يوم ؟؟؟؟؟؟؟؟؟؟؟ اخاف يخلص عني ابي اشتري من عند الصينيين الفوط اللي تنشف الماي عدل من الجسم حلوين ..

[لاجل QT]

اليوم رحت بصراحة في محلات منزلين الاسعار عن المعرض اللى طاف وفي اسعارهم ثابتة وفي المغليين

بس ضحكت يوم شفت الحريم مطيحين عند محل البواريك الصينى يشترون القذلة

شريت حق عيالي بجامات 3 حبات ب 100

[مبتدئة]

قبل لا تلومون التجار

اللوم على جهة التنظيم اللي كل سنة ترفع الاجار

وحدة أعرفها مشاركة في المعرض ومحل يمكن 3×3 ..

تحلف ان الاجار لمدة 10 أيام بـ40000 !! + مبلغ 500 ريال على كل 5 كراتين تدخل المعرض!!!

شلووووون ما تبون التجار يرفعون السعر عقب هالمبالغ! لازم يطلعونها من جبودنا

[روح الاطلس]

حبيبتي مبتدئة لو مايربحون ماشاركوا بالمعرض كل سنة اذا يدفعون 40 ألف صدقيني يدخلونها في يوم واحد من العشر ايام !!

[بنت العلي]

الصراحة انا مافكر اروحه لانه زهقنا نفس الشي كل مرة وفي كل مره يغلووون الاسعار ... خلي بضاعتهم لهم والمشكله ماينزلون في الاسعار الا اخر يوم ليش انزين نزلو اسعاكم من الاول احسن عشان الواحد يشتري

[زمان]

يقولون صاح البكسسسسس بين الحريم

3 ضد 3

عطهاااااا في الريووولها

[مبتدئة]

حبيبتي مبتدئة لو مايربحون ماشاركوا بالمعرض كل سنة اذا يدفعون 40 ألف صدقيني يدخلونها في يوم واحد من العشر ايام !!

أدري يبه انهم يربحون

بس لازم يدبلون السعر عشان يطلعون قيمة الاجار وبعدين يبتدي الربح

[فلتة زمانها]

رفيجتي في الدوام راحت المعرض خذت اكسسوارات وعسل وراحت صوب العبي
اظن الركن البحريني وعجبتها عباه طلعت ب2500 وتمت تكاسرها لين 1900
وقالت لها اللي تبيع اسمحيلي ماقدر انزلج اكثر انتي قطريه وراتبج عالي:omg:

[المــزن*]

رحت المعرض يوم الخميس
بالعكس اسعاره زينه ماعدا العبي وبعض الجلابيات

خذت
طقم دلال مع بيالات وفناييل وصينية ب 500 ريال
طقم الصواني الي حق التقديم بو غطا 3 ب 300 ريال
مفرش طاولة ب 80 ريال
بهارات بحرينية ب 40 ريال
بيجامات للياهال 3 ب 90 ريال
نعال وانتو بكرامة ب70 ريال
لبس قرنقعوه حق بنتي ب 150 ريال

اسعارهم زينة واشوف احسن من المعرض الي طاف

[OM_OMAR_QATAR]

غالي بالنسبة لمعرض ..

[حراير قطر]

بناطيل سترج جنز تركيه 250 ريال ليه وهي تركيه وسعرها بتركيا 90 ريال



انا رحت امس وعند الاتراك

واحد يبيعيهم 150 والثاني 120

رحت حق اللي بـ 120 خذت 3 بـ 320 ريال

واللي راعي بـ 150 عنده قمصان على 250 ريال

يمكن سألتي عن القمصان ..

وفي سوري بعد عنده حلوين خذت كم واحد بـ 300 ريال ...

[بنت العلي]

رفيجتي في الدوام راحت المعرض خذت اكسسوارات وعسل وراحت صوب العبي
اظن الركن البحريني وعجبتها عباه طلعت ب2500 وتمت تكاسرها لين 1900
وقالت لها اللي تبيع اسمحيلي ماقدر انزلج اكثر انتي قطريه وراتبج عالي:omg:

ولللللللللللللللللللللللل ليش عاد ...... :rolleyes2:
شنو راتبج عالي ’’’’’’ ولو عاااااالي يعني شنو مب معناته اني جابيه الفلوس من الشارع

[العربية نت]

ما اغلى كل شئ الا الحريم الموظفات :rolleyes2: عندهم قوة شرائية خارقة يمكن من زود الفلوس عندهم حتى بعضهم يخم على الماشي هههه :omg:

[pink pearl]

السلام عليكم

أنا رحته الصبح يوم السبت ، الصراحة أغلب المحلات أسعارها نااااار والله ، يعني واحد سوري عنده جلابيات بسيطة حق بيت وقال لي الوحدة على600 و700 ريال !! والله ما تسوى هالسعر !!
ومحلات الإكسسوارات حق الأتراك، إكسسواراتهم حلوة بس عاد مو على سعر الذهب 200 و300 ريال للخاتم !!!!!! وعلى 500 و600 للطقم وين عايشين !! هذيلا نافسوا حتى أسعار الذهب !!!

محلات اليمنين حلوة حق العسل والبهارات بس حسيتها شوي أسعارهم أغلى من العام ،

محلات العبي من دول الخليج أقولهم: عسى ماشر ليش الآلاف المؤلفة على العباية الوحدة !! العباية على 2000 و3000 ريال بنقش بسيط !!!!

محلات الشنط حق الصينين: أسعارهم معقولة بعد ما تكاسرونهم والشنطة أخذتها على 100 ريال بعد ما كانت 170 وهي أصلاً ما تستاهل لأنها تقليد

[دهــن العود]

الحمد لله انا مقاطعه المعرض من سنتين

ليش نسمح للغير انه يستغلنا او يضحك علينا

والبضايع الي في المعرض ممكن نلقاها براا وارخص بعد


:)

[kitmat]

لا والسوريين مصدقين نفسهم جلابيه كجرة ب350 ريال وكيلو الزعتر ب 120 ريال عسى ماشر ليكون احنا في قطر نمشي ونحصل فلوس

[غشيمة فالبورصه]

عفوا

عفوا المعارض كانت فالسابق لصالح المستهلك بحيث يتنافس التجار
في بيع السلع خصوصا الصينيين اللي وحدو اسعارهم وارفعوها
كان المعرض فيه مجال للخصم للسعر اللي يناسب الزبون والحين صار
التاجر يبالغ بسعره وفوق هذ يمارس حيل البيع خصوصا مع الحريم
شغل يدوي شغب بيت واخر قطعه وكل سنه تكرر نفس القطع ويتكرر نفس السيناريو
اذا كان الموضوع عالجمارك والمسؤولين عن تنظيم المعرض
نطالب الجهات المختصه بمطالبه التجار بقائمة واسعار المنتجات المعروضه
ومطالبتهم بتقديم اسعار تنافسيه

لان اهداف المعارض خدمة المستهلك وليس النصب على المستهلك

[كازانوفا]

انا برائي ما له داعي من الاساس هالمعرض

[catqat]

انا برائي ما له داعي من الاساس هالمعرض

:nice:

اسعارهم اغلى من السوق...

اللي يحر سوري، وبضاعة سورية ، بدلة اليهال اتجيك على 130-170 ، ليش؟؟؟ لاهي بماركة مثل ماذر كير او بمبكن، وتلقون هالاسعار بمحلات الاطفال نفسها وبكوالتي أرفع..

عن موضوع العبايات:

لو رحتيلها هالمصممة بالبحرين بتكون العباة ارخص دبل، الدبل

لو تروحين لخياط هندي بتلقين احسن خياطة ونفس الموديلات كوبي بيست مرتب ب 300 ,,, الا اذا بتشترين العباة لمناسبة تستاهل سعر 1000-2000 ترى الكل بنعمة وخير،

يعني من الاخر بلا خبال يا بنات قطر،

[^NoOOoR^]

رحت المعرض أمس وفعلا غالي ،، مع اني تعودت أخذ من الحسا أو الامارات
بس هالمرة قلت أجرب المعرض اللي الكل يتكلم عنه .. الأسعار فعلا غالية
و البضاعة أكثرها تقليد .. مشابهة لبضاعة السوق الصيني في دبي .. مع فرق في الأسعار

[حـ ن ـيـ ن]

رحت المعرض

صحون التقديم غالية ، والجلابيات غالية ، والعبي غاليه

شريت فرن الخبز الصغير بـ 590 والعام كان بـ 490 أو أقل

وخذيت قدر الشوي حجم وسط وقدر المندي الحجم الكبير بـ 380

وقوالب السيلكون 5 أشكال بـ 100

و طاولات بـ 800 أرخص من حياة بلازا ...

وعسل سدر جبلي بـ 300 وشي

[حراير قطر]

رحت المعرض

صحون التقديم غالية ، والجلابيات غالية ، والعبي غاليه

شريت فرن الخبز الصغير بـ 590 والعام كان بـ 490 أو أقل

وخذيت قدر الشوي حجم وسط وقدر المندي الحجم الكبير بـ 380

وقوالب السيلكون 5 أشكال بـ 100

و طاولات بـ 800 أرخص من حياة بلازا ...

وعسل سدر جبلي بـ 300 وشي

فرن الخبز كان بـ 480 ريال

خذت ميني استشوار حلو على 180 ريال

شكلي بحط لكم مشترياتي في موضوع الاخت بصمة ...

[مبتدئة]

اللي قهرني اللي حاط له فرن ويبيع بطاطا مشوية

يحط شوية ذرة ومشروم وجبن مادري شيخربط

ويبيع الحبة بـ 35 ريال !!! عسى ما شر!!!!!!!!!!

واللي يبط الجبد إن الناس كسررررره عليه!! جنهم مب شايفين خير

إذا الكرتون بـ10 وإن كثر 15 .ز انت تبيع الوحدة بـ35 لييييييييييييش

[فلتة زمانها]

^
التجاره شطاره خلية يربح ويترزق المسكين دافع 40 الف اجار

[شيزكيك]

فرن الخبز كان بـ 480 ريال

خذت ميني استشوار حلو على 180 ريال

شكلي بحط لكم مشترياتي في موضوع الاخت بصمة ...

تقصدين الوردي الصغير

واحد قال لي ب150 ريال وواحد قال ب220 ريال وما خذته

[قناص 787]

اغلب الردود مفوشررررر

[قناص 787]

اغلب الردود مفوشررررر :nice:

غالي و غالي ..... و عقب تعد اللي شرته كله :eek5:

ماشاالله عليكم شريتوا المعرض كله و انتوا ما شريتوا شي :)

عيل غالي المعرض :tease:

ما ينلام السوري يرفع عليكم السعر دامكم كذااا :anger1:

و لحد يقول وينكم يا حماية المستهلك :victory:

[مبتدئة]

^
التجاره شطاره خلية يربح ويترزق المسكين دافع 40 الف اجار

في مكان التجارة شطارة

الا عندنا: التجارة نهبة

من اول تسعير المحلات من المنظمين لين التجار اللي يطلعون هالأجار من الناس

[حراير قطر]

تقصدين الوردي الصغير

واحد قال لي ب150 ريال وواحد قال ب220 ريال وما خذته

في واحد نفس الاستشوار الاحمر

اللي يستعملونه في الصالون

وحده من صديقاتي خذته بـ 250 ريال

وانا قالي بـ 200 وبعد الخصم 180

وخذت الميني سيراميك على 150

اهم تقريبا 3 محلات انا ادور على الكل واسال

وارخص شي واللي يخصم لي اخذ منه :secret: ...

[Dana’1]

بناطيل سترج جنز تركيه 250 ريال ليه وهي تركيه وسعرها بتركيا 90 ريال


تقصدين البناطيل صناعة تركية بس الي يبعيون سوريين وفية منها الوان كثيرة وما يبيعون غيرها بالمحل؟!!......... اذا هذا الي تقصدينة!!
وإذا مو نفس المحل..فبتكب لك و للاعضاء على بعض ما يحدث في هالمعرض
اولا: البضاعة صينية مش تركية:)
ثانية: مكتوب عليها صمم في تركيا عشان ياخذ علينا الجو انه مصنوع بتركيا..ما اعرف اذا اسلوب جديد او قديم للتلاعب..؟ بس اول مرة يواجهني كستكر مكتوب بالعادة اعرف انهم يغيرونة من مصدر الصنع اذا قدروا يعني تلاعب اصلي:) مش زي الي حصل!!
الي صار
شفنا محل يبيع مثل هالنوع من الجينزات الي وصفتيها ..اختي كان خاطرها بواحد عاجبها لونة...هو احلى مافية الدرجات بالالوان كثيرة الالوان الترابية وحتى الوان الجينز نفسة وغيرها
بالبداية قال 100ومدري كم ناسية بصراحة بس اذكر قال120 << مع المرعاة على ما اظن
وطبعا يقول من تركيا@@

قلت له شوف ب 100 واعرف انها صينية الصنع :) واعرف انك مراعينا من كيسنا " جيبنا" وهي ارخص من ال 100 بالراحة ومنت خسران شي الا ربحان الاضعاف بس لان احنا جادين نبغى نشتري بتبيعنا والا ..لا ؟
كلام من عندة انها تركيا وان محلهم هناك بالاخير اخذناها ب ١٠٠ وهو ربحان الاضعاف بعد،،بس عرف ان عرفنا انها صينية وقام يستهبل
واتوقع لو كان اخر يوم بناخذها ب60 للقطعة اذا مو اقل بكثيير بعد بس شنسوي بعد الواحد ما يرد شي بخاطرة اذا السعر كان معقول نوع ماء
لان حتى الي برا بالاسواق عندنا بالدوحة على 100وممكن ب 95 تقريبا وصينية مافرقت كثير يعني لا بالسعر ولا بالجودة حتى
وهذي صور عشان تشوفون التلاعب لما يقول تركي ولحسة مخ عشان الوحدة او الواحد يصدقهم مع انها واااضحة والي بيدقق بيشوفها صناعة(PRC)
People's Republic of China
جمهورية الصين الشعبية ... مو على طول تشاينا!
http://img402.imageshack.us/img402/782/img4686mc.jpg
لاحظو الافرع...مو من بينها تركيا
http://img15.imageshack.us/img15/9382/img4683gx.jpg

http://img641.imageshack.us/img641/5355/img4696u.jpg

[ريم 28]

شكرا اختي ديور علئ التنبيه

نفس الصناعه قريتها اكثر من مكان. اكثر شي في كارفور والحين عرفت ان الصين

[ولد ازغوى]

عيل درزن فنايل داخليه حق بنت عمرها 5 سنين 400 ريال
قلت له خلها لك

[Dana’1]

شكرا اختي ديور علئ التنبيه

نفس الصناعه قريتها اكثر من مكان. اكثر شي في كارفور والحين عرفت ان الصين
*

*

*

العفو اختي حق وواجب
وفعلا مثل ماقلتي كثير بضايع مصنوعة هناك وعلى فكرة بعضها ذات جودة عالية لان صناعات جمهورية الصين الشعبية درجات بالجودة فيها الزين وفيها الردئ وفي شركات اجهزة الكترونية وغيرها من الشركات الاجنبية كبيررة
فاتحة افرع هناك وما يطلع المنتج الا بمعايير الشركة المطابق للجودة العالية


وكارفور تبيعة بكل وضوح على انة من الصين
مو مثل بعض المحلات يتلاعبون عالناس!!

وفي سوالف ثانية بالمعرض بس اكتفي بهذا

[راية الفخر]

بضاعه رديئه واسعار غاليه

[رحال]

أشكر كل من شارك في الموضوع ..

حيث بلغ عدد زوار المعرض 230 ألف زائر

بمعدل 23 ألف زائر يوميا

[ANONYMOUS]

أشكر كل من شارك في الموضوع ..

حيث بلغ عدد زوار المعرض 230 ألف زائر

بمعدل 23 ألف زائر يوميا



شلون حسبو الزوار

انا مارحت.. بس هل كان الدخول ب تذاكر

ولا بالبطاقه الشخصيه

[فلتة زمانها]

أشكر كل من شارك في الموضوع ..

حيث بلغ عدد زوار المعرض 230 ألف زائر

بمعدل 23 ألف زائر يوميا

ماشاءالله العدد كبير
يمكن حطوا عداد عن المدخل يحسب عدد الزوار