الطيران الاماراتي او الاتحاد

[ام خويلد]

لوسمحتوا اللي جرب الطيران الامارات اوالاتحاد من الدوحه الى لندن
يعطينا ايجابيات وسلبيات الطيران
من حيث الراحة،حجم الكراسي على الدرجة السياحيه،مده الانتظار،الترفيه على الطيران
واكون شاكرة لكم.

[المعنى88]

مايبغيلها كلام الأحسن انج ابتعدتي عن القطرية
الافضل في نظري وانا راد ورايح دبي على الإماراتية كراسي أوسع ترفيه حلو كرم ضيافة زايد عن الحاجة احترام للمسافر مهما فعلت .... عطوني ذهاب درجة اعلى من السياحية من الزحمة .... بس العيب راح توجهونه في الترانزيت المشوار في المطار طويل على حسب بوابتكم لكن سوق حرة كبير في مطار دبي وبالسلامة

[captin]

Fly Etihad via Abu Dhabi and you will not feel sorry :nice:

[catqat]

بالعكسسس ،، معاملتهم للمسافرين معاملة درجة ثانية... فرق بينهم وبين القطرية ,,, اللي ذابحنا بالقطرية بس أسعارها..... لكن هم ممتازين ..

[ام خويلد]

؟؟؟؟؟؟؟؟
انتظر مزيد من الردود
واشكر اللي ردوا علي

[المسعف]

الاتحاد
يمكن الطيارة الي بتروحين فيها أبوظبي موذاك الزود لكن الي من أبوظبي الى لندن أوسع والخدمه ممتازة ، توكيل على الله ومبتشكريني
..................
بالنسبة القطرية الطيران القطري ممتاز بس الأسعار غالية لان طيران بدون توقف وهذا متفق عليه في كل مكان في العالم .

[ذربة ألكلام]

ايهمها اخترتي فلن تندمي اهم شي ابتعدي عن القطرية.

[المسعف]

ايهمها اخترتي فلن تندمي اهم شي ابتعدي عن القطرية.
حرام عليك ياخوي الخطوط القطرية من احسن الخطوط الجوية من حيث الاسطول والخدمة

[ذربة ألكلام]

حرام عليك ياخوي الخطوط القطرية من احسن الخطوط الجوية من حيث الاسطول والخدمة

وانا اختك جربت الثلاث فتكونت عندي وجهة النظر هذي عن القطرية .

[ام خويلد]

يعني اش رايكم استقر عليه؟؟؟
والله احترت
انا اهم شي الكراسي تكون مش ضيقه وايدددد

[للصبر اخر]

اختي طيران الاتحاد حصل على المركز الاول في تقرير بثته شركه سكاي
القطريه فازت بالمركز الاول كافضل شركة طيران
لكن الاتحاد فازت افضل طيران في الدرجة الاولى


هذي القائمه

http://www.snyar.net/wp-content/uploads/2012/07/57866.jpg

ياريت بس حد يصغر الصوره اكون شاكره له

[المعنى88]

يعني اش رايكم استقر عليه؟؟؟
والله احترت
انا اهم شي الكراسي تكون مش ضيقه وايدددد
أنا أشوف الإماراتية أوسع حتى لو كان الشخص متين ..... والاريح البزنس في القطرية اذا نوع الطيارة بوينج 777/300
ولا الإماراتية بزنس افضل .

[dream-team]

القطرية مسوين عروض ادخلي موقع القطـــرية واحجزي الي لندن بــ special offer 3150

http://www.qatarairways.com/qa/en/homepage.page?s_kwcid=TC|11615|qatar%20airways||S| b|8546561296&gclid=CLn8xvi14KwCFQklpAodpXagGA

[ajabor]

اتوقع الاماراتية افضل انا شخصيا بروح امريكا بطيران الاماراتية

[ضوى]

والله ثم والله ثم والله

لو ادفع الاف مؤلفة زيادة عالقطرية ماراح اروح الا عليها

جربت الاتحاد وجربت الاماراتية الاثنين اردى من بعض

جربت الامارتية في سفرتي لتركيا ، قلت باقاطع القطرية عشان الغلا لكن اقول مثل ماقال خالد الفيصل يامدورالهين ترى الكايد احلى ، تبهدلت بهدلةعمري بحياتي ماصادفتها وانا عالقطرية ، الله يعز القطرية والباكر واقوله صج القطرية وبس والباقي خس

[Only Me]

الاتحاد اهي الافضل سوءا بالكراسي او الضيافه
وحتى الافلام جديدة وحلوه سواء للكبار او الصغار
بس مشكله الاتحاد مطار ابوظبي

[المعنى88]

والله ثم والله ثم والله

لو ادفع الاف مؤلفة زيادة عالقطرية ماراح اروح الا عليها

جربت الاتحاد وجربت الاماراتية الاثنين اردى من بعض

جربت الامارتية في سفرتي لتركيا ، قلت باقاطع القطرية عشان الغلا لكن اقول مثل ماقال خالد الفيصل يامدورالهين ترى الكايد احلى ، تبهدلت بهدلةعمري بحياتي ماصادفتها وانا عالقطرية ، الله يعز القطرية والباكر واقوله صج القطرية وبس والباقي خس

ماعليه اخت ضوى لج الحق في المدح والذم باللي صار معاكم ........ بس اسباب الكره للطيران الأماراتي ماشرحتيها ؟ واللي حصل لكم عادي اي شركة طيران يصير يحصل نفس الشيء .... والحمدلله على سلامتكم .

[سحر الليالي]

اشوف القطرية افضل لانها دايركت خصوصا لاوروبا التي تبعد 6ساعات ونص الى 7 ساعات
الاماراتيه مشكلتها الترانزيت مش اقل من 4 ساعات في المطار بالاضافه لمدة الرحله يعني يوم كامل بتروح عليج

[ضوى]

ماعليه اخت ضوى لج الحق في المدح والذم باللي صار معاكم ........ بس اسباب الكره للطيران الأماراتي ماشرحتيها ؟ واللي حصل لكم عادي اي شركة طيران يصير يحصل نفس الشيء .... والحمدلله على سلامتكم .

لا لا اسمح لي اخوي الفاضل اللي صار لي ماقد سمعت فيه صار لاشي مسافر اخر من قبل ، معاملة المضيفين الارضين سيئة جداً وكانك واقف تطلب صدقة منهم ينقعونك بالساعات وللعلم انا حاجز الكراسي بالنت وقطوا كل واحد بجهة واحنا معانا اطفال عيل شفايدة الحجز اونلاين ؟

غير هذا دخول المطار من بوابة اخرى غير الرئيسية للقطرية ، زحمة مووووت وطابور على كاونتر شي مب طبيعي زين اللي لحقنا على موعد الطيارة ، كانوا باردين بشكل ساعة ونص اذا مب اكثر على الكاونتر واقفين ، هذا في رحلة الذهاب لا وتاخرت في مطار دبي ساعات من غير لا احد يبلغ او يذكر خبر ، مع انه المفروض هذا حق من حقوق المسافر اني ابلغه باي مستجدات تطرا على الرحلة

رحلة العودة تبهدلنا اكثر واكثر ، صار تاخير على رحلة دبي على اساس بتطير 7.25 ليلا ونوصل دبي 12.40 بتوقيت دبي ، وصلنا 1.40 على اساس نروح البوابة اللي عليها رحلتنا لقطر ، ونتفاجا انه تم تغير رحلتنا من غير اي تبليغ وتاخير الرحلة مايقارب سبع ساعات تخيلوا سبع ساعات اتسمت في المطار مع اطفال صغار وبنتي الرضيعة اللي اصلا هلكانين من التعب طبعا مافوتها لهم رحت لمسولهم وقلت له الحين تطلع لي فندق لعايلتي انا مب جاية على خطوطكم عشان تبهدلوني وتتعبون عيالي ، تحجج لي مافي حج والروحة والردة بيضيع عليج الوقت خاصة لازم تكونين موجودة قبل الاقلاع بساعتين ، قلت له قبل الاقلاع بساعة او اقل باكون موجودة لانه ماعندي عفش ولا شنط والبوردينغ جاهز ، وماراح اطلع قبل هالوقت ، قال لي فندق المطار مافيه مكان فل ، قلت له انت قاعد تعجزني ؟؟؟ قلت له لو تطلع في وسط البلد وراحت عني الطيارة باحملك مسؤولية ثانية ، وكان يتكلم بنفسية كاني اشحت منه ربع ساعة الا هو مطلع لي حجز في فندق المطار رحنا وريحنا ساعتين وشوي خاصة الاطفال صج هلكوا ، وفطرنا على راحتنا ونوصل المطار الا النداء الاخير للرحلة ، وطبعا سفر ومشي لين وصلنا للبوابة ودخلونا الطيارة على طول ، تمينا منقعين في الطيارة ساعة ونص لين تحرك الطيار يعني بعد تاخير عن موعد الرحلة قريب الساعتين وطبعا من غير ذكر اي سبب !! طبعا هذالشي صار مع نفس خايسة من موظفي الاماراتية الارضيين والجويين مب احسن منهم

الحمد لله على كل حال بس هذا درس لي اني مادور الرخص في سبيل راحتي وراحة عيالي

[الخزرجي قطر]

بالنسبه لي عن تجارب شخصيه مااحب اسافر الا مباشر من مطار الدوحه وعلى الخطوط القطريه
بدلا عن البهذله والترانزيت بالساعات وضياع الوقت وخاصة اذا تاخرت الرحله وطارت عنك الرحله
المتوجهه للدوحه المثل يقول ( هين قرشك ولا تهين نفسك )

[المعنى88]

نصيحة اذا عيلة كبيرة روحوا دايركت ......... شخص او شخصين ترانزيت مو مشكلة

[ام خويلد]

مشكورين وماقصرتوا على كل اللي رد علي وافادني
ومبارك عليكم الشهر مقدما