تبليط ارضيه الحمام اولاً أو تبليط أرضيه الفيلا اولاً ؟؟ [الأرشيف]

Chambray

15-07-2012, 03:35 AM

خلصت من شغل الكهرباء وافكر ابلط البنت هاوس ثم الدور الاول ثم الارضي

لكن ماخلصت من شغل الحمامات وانتوا بكرامه ومفكر أجل تبليط الحمامات حتى انتهي من تبليط الارضيات في الغرف والصالات ثم البدء في اعمال الصرف الصحي للحمامات ثم تبليطها

هل الي اسويه صحيح ؟؟

ولا لازم اول شئ انتهي من الحمامات ؟؟؟؟؟؟؟؟؟؟ انا اقصد الارضيه ،، الحوائط مخلص منها من زمان

معماري قطري

15-07-2012, 04:04 AM

كله يمشي إذا عارفين وشو المستوى ومب ملخبطين

بس يُستحسن تخلص الصرف الصحي والعزل قبل ليوصخون لك باقي ارضيات البيت .. وجدامك حلين أما تسوي أرضية الحمام نفس مستوى باقي الأرضيات وتحط قطعة رخام شوي مرتفعه 2 سم ومحفوفة الأطراف على أساس تمنع الماي يطلع من الحمام للغرفة .. أو تسوي أرضية الحمام كلها في مستوى أنزل ب 2 أو 3 سم مع ملاحظة إن المستوى يكون واحد صوب الحوايط وينزل بسلوب خفيف صوب الصرف الصحي، والحل الأول يطلع أحلى يصك الباب معاه بالكامل ما يكون فيه فراغ .. بس علشان الشفاط يشتغل عدل تسوي فتحات بسيطة في أبواب الحمام .. أو تسوي طريقة غريبة شوي انا سويتها للحمام الرئيسي باحاول أصورها وباشرحها .

يمكن تنفهم .. انا سويت فتحة دائرية 4 انش على ارتفاع مترين و40 سم تقريباً وركبت فيها بايب نفس بايب الصرف الصحي، وهذي مغطاة بفتحات بلاستيك تسكر لو بندت مروحة الشفط وتفتح وقت المروحة تشتغل، وطرفها الثاني مفتوح فوق كبت في غرفة الملابس، وغرفة الملابس سويت في بابها فتحات خشبية، فصار عندي الهواء ينشفط ويدخل في غرفة الملابس يسوي لها تهويه، وغرفة الملابس هذي اللي تدخل فيها يعني مب نظام كبتات الغرفة كلها عبارة عن أرفف وتقسيمة لتعليق الملابس بعضها بدون أبواب لسهولة أخذ أي شيء تبيه، فبهذي الطريقة ضمنت إن تتهوى هذي الغرفة ويجيني هواء بارد من التكييف برا ومن فوق والمراوح تشتغل بدون ضغط قوي عليها.

سوها بترتاح لها وايد والبلاستك موجود عند الدرويش الخاص بمراوح التهويه.. وسامحني على الشرح المسهب ذيه وبالتوفيق إن شاء الله.