|| حد له مواقف مع المتسولين .. ؟ .. لي موقفين معاهم . ! . |

[إنّ]

الســلام عليكم ..

موقفين مروا علي ..


الموقف الأول ..

كنت في مواقف مستشفى الرميلة .. في حدود الساعة 6 المغرب .. وأنزل أغراضي من السيارة وفجأة توقف جنبي سيارة برقم دولة خليجية وبداخلها شابين .. وقام صاحب السيارة وبدأ بالسلام عليكم .. صلي على رسولك .. أنا أخوك من المنطقة الفلانية .. وعايلتي في فندق سوق واقف .. وحرارة سيارتي ارتفعت وصلحتها وهذي الفاتورة .. وانا أسوي عمري منشغلة في تجميع أغراضي .. وأقول في داخلي الله يكفيني شرك .. وكمل كلامه .. ومحتاج فلوس .. علشان أرجع بلادي .. باللي تقدري عليه .. وقام يدعي لي .. قلت له .. اسمح لي .. حاجتك مب عندي .. وخليته ورحت .

اتذكر أن في حد مر عليه نفس هالموقف من أعضاء الأسهم القطرية .. وتكلم عنه .. المشكلة احنا مب كفاية علينا المتسولين داخل الدولة لين ييونا من خارجهـا .. مثل هالنوعية شلون تعرف صدقه من كذبه .. ؟؟ .. بعضهم بالفعل محتاج لمساعدة لكن صرنا نشك في الكل .. مثل هالنوعية بعد ممكن يتعرضون لأي وحدة .. واختيارهم للأماكن بعد دراسة .. والتوقيت بعد .. وفئة المستهدفين .. لأني بصراحة يوم تم يطلب .. كان الوقت مغرب والحركة خفيفة يعني ما في ناس وايد .. أبي اعرف شلون نتعامل مستقبلاً مع نفس هالنوعية من المتسولين المتجولين ؟؟؟؟

الموقف الثاني ..

وحدة من نفس الدولة الخليجية اللي صادفتهم في مواقف المستشفى بناء على تعريفها لنفسها .. التقيت فيها في المخازن الكبرى .. سالتني أنت من أهل قطر .. قلت نعم .. قامت تمدح .. وتقول لي عندي شايب كبير في السن وحاطته عند ناس وجايه أتشرى من المخازن وخذت أغراض كثيرة .. ولما جيت ادفع نقص علي 250 ريال .. ممكن تعطيني وأنا بعطيك رقم تلفوني تتواصلين معاي وارد لك المبلغ .. قلت لها .. آسفة .. ما أقدر .. حاولت .. قلت لها خلاص انتهى ما عندي إمكانية .. وراحت .. ما حبيت أقول لها رجعي الأغراض وأخذي على قد فلوسك .. المهم إنها راحت .. وخذت مشترياتي .. واتصادف معاها مرة ثانية تدور لها ضحية ثانية وتختار كل وحده لابسة عباية .


ما عرفت شلون أتصرف .. أبلغ عليها الأمن .. ويمكن بالفعل هي محتاجه .. !! .. نبي نفك كرب الناس بس شلون نميز بين المحتاج والمتسول ؟؟؟؟


يهمني رأيكم .. ولو كنتوا بمكاني شلون بتتصرفون ؟؟

[الـخـالـدي]

عليكم السلام ورحمة الله وبركاته

هذا مقطع لشيخ ابن عثيمين يبين فيه كيفية التعامل مع هذا الموضوع

http://www.you-tube.com/watch?v=1VueJsPdv38

تقبلي مروري

[كبير المتداولين]

"...قال تعالى : ( فَأَمَّا الْيَتِيمَ فَلا تَقْهَرْ (9) وَأَمَّا السَّائِلَ فَلا تَنْهَرْ ) [الضحى: 9 ، 10] .

والمحتاجين كثار في هذا الزمن وهذه قضيه منفصله
---------------------------

ولاكن مايحدث الان من تسول فهو يطمح لان يكون نصب واحتيال من بعض ضعفاء الانفس والاستغلاليين ....

قبل فتره ليست بالقصيره عند تجولي في احد الجمعيات التعاونيه احتاجت احد النساء وانا في مجمع لبعض المواد فطلبت مني تحمل الفاتوره وعند الكاشير تفجأت ان المشتريات اشياء كماليه من عطورات وحلويات وغيرها ..

[اوف ليميت]

اووهوووو كم تحملنا وكم انقص علينا ..

ولكن فالنهايه..النيه طيبه, احسان الظن للغير, الله يعوضك ويزيد لك

[مدرسة]

بنت حلال !!

كنت أبي آكتب بنفس الموضوع وفرتي علي :nice:

4 مواقف الله وكيلج خلال الأسبوع الماضي و اسمحولي بذكر الأماكن :anger1:

1- عند الشاهين في واحد هندي على الباب الرئيسي يسوي لك فلم مدبلج باللغة العربية الفصحى رفعت عنه جامة السيارة و مشيت فورا ، أساساً أنا فكرته اللي جاب لي الأغراض و كنت مفكرة أعطيه اللي فيه النصيب و لما كثر الكلام دريت انه متسول الهيس :anger1:

2- عند باب مكتبة جرير اللي بالريان في وحدة عند الباب و شايلة ياهل و ما سكة الثاني من يده ،، على طول اول ما نزلت من السيارة الا تقوللي احنا شاردين من سوريا و ما عندنا شي ،،، مادري شلون عورت قلبي عطيتها ،،،

3- عند مطعم البيتزا اللي في المرخية بينه و بين فروج الطازج في واحد عيله ملابس البتان شكله مريب وقفت شوي والا هو جاي عند الدريشة و ما نزلت له الدريشة طالعته بنظرة غضب وراح

4- عند مطعم البتراء اللي في تاون سنتر في واحد هندي يحوس و يستول ،، تم يطق دريشة السيارة لين بطل ريلي الدريشة و طرده ،،

انزين الجماعة شرايكم انا عندي قناعة ماحب اعطي المتسولين و احس بالذنب لما اعطي واحد فيهم احس ان المحتاجين الحقيقيين اولى بالمساعدة
احس يتسغلون طيبة المواطن القطري و رغبته في عمل الخير ،،، ابتزاز

[الخزرجي قطر]

الحين موسم قدوم شهر رمضان واكيد راح تزيد مثل هذه الحالات
ماتعرف الصادق او الاستغلالي منهم ويضعك في حيره من امرك
مواقف كثيره تصادف الواحد واعذار مالها نهايه وكل شخص حسب
قناعته ولكن مع الاسف في ناس اخذه الموضوع مهنه وتعودوا عليها

[بصمة قطرية]

مواقف كثيرة صارت لي من غير ذكر ..
صارت عندي قناعة ان المتسولين في الشوارع
والاسواق والمجمعات والمستشفيات وووووو
مش محتاجين
كاذبين ومخادعين ،،
يتلاعبون علينا بتمثيلياتهم واكاذيبهم ..
المتسول الحقيقي تلقاه يملك عزة نفس
لو وصل لمرحلة التسول تحس بنظرة الانكسار
عطيته اوكي ما عطيته نزل راسه للارض ومشى
ما يقعد يروي لك اكاذيب واوراق مزيفة ..

[Roo7MooT]

للأسف هناك فىة دخيلة تدعي الفقر والحاجة قامت وخربت على أهل الحاجة

والي يستاهلون الصدقة

[السكين]

ولكن فالنهايه..النيه طيبه, احسان الظن للغير, الله يعوضك ويزيد لك

أحسنّا الظن كثير يا اخي الفاضل ، بس الغالبية منهم غير محتاجين ورح اسرد لك الكثير من القصص ..والله على منا اقول شهيد ليوم الدين .

وحدة قابلتني عند باب عملي وانا طالع من المصعد ، قعدت تكلمني وتلمح تلميحات غريبة ، المهم اعطيتها اللي فيه النصيب وكان مبلغ كبير نوعاً ما بالنسبة لمتسول وأصرّت تاخذ غيره واعطيتها ، وانا اعطيها الفلوس مسكت يدي وسحبتها وحطتها على صدرها .. وأنا سحبتها بنفس اللحظة اللي طلع زميلي من الباب وشافني ورجع ، ناديته وقلت له تعااااال لا تفهمنا غلط هذا وحدة محتاجة .. الزبدة انها كانت مش مضبوطة وسببتلي احراج .

وواحد ثاني قال لي ممكن اشرب ماي عطيته ورجع قالي انا اخوك فلان الفلاني وسرد لي قصة واعطيته اللي فيه النصيب ..

وأخرى .. بنتين من اجمل ما يكون ولابسات عبايات وشنط اخر موديل وكنت اتكلم بالموبايل .. كنت بمحل واحد من الشباب .. وبعد ما راحوا قال لي الشاب ترى جايين يتسولوا !! وقال لهم الله يفك عليكم ، وحاولت تطلب ماي لانه الجو حر قال لها آسف أختي ما في .. لانها قربت منه جداً ..

وشباب بسيارات خليجية يسألوا عن صراف وانت وصف له يقولك انا محتاج ، وكثير قابلت منهم ..

القصص كثيرة بس الكثير منهم كاذبين ينسوا القصص مرة وحدة قالت زوجي مات وبعدها قالت زوجي مريض ، وغيرهم وغيرهم ..

الحمد لله على النعمة والله يفرج عن الجميع

[khalid525]

فعلا موقفج صحيح ، مفروض ابد ما نعطيهم مهما حاولوا وترجوا ، الناس المحتاجين معروفين واللي ما يعرفهم ممكن يتبرع عن طريق الجمعيات الخيرية .

اهم شي انك ما تصارخ عليهم ولا تزقرهم ، كلمهم باسلوب محترم وصارم ، عملا بالايه الكريمة ( واما السائل فلا تنهر )

انا من كثر ما لعوزوني المتسولين صرت اقلب الموضوع عليهم ، اذا جاني واحد او وحدة تطر اقوم على طول اقلب الموضوع واقوم انا اطر منه لين يمل ويدبر، ياليتكم تشوفون تعابير وجهم وانا اطر منهم كككككككك

[بوراشد82]

اليوم الساعه ١٠ (( يعني من ساعتين ))في شارع ال شافي ٧ طراروة اذوني يطقون علي دريشة سيارتي ،، وقلت لأول واحد روح للمؤسسات الخيرية مثل عيد او قطر الخيرية ،،وكان سعودي وقعد يتحندى ،، وجاني وراه واحد نفسه وقال احنا جهة خيرية ونجمع تبرعات!! قلت له ندل مكانكم ماله داعي تلوثون بالشوارع،، وبعدها ياني هندي وبعده باكستاني وهلم جرا"،،، هاي كله صار وانا واقفة عند كنتاكي فرع الريان ،، لاتقولون حرام عليج ومادري ايش ،، الحمدلله مب مقصرة من ناحية الصدقات وهالشي بيني وبين ربي وأسأل الله القبول ،، انا ما زقرت حد منهم ،، بس كثرتهم وجشعهم صرنا مانعرف من الصاج من الجاذب،، افضل اتبرع للمؤسسات وهم اذا محتاجين خل يروحون للجهات الخيرية ومعاهم الإثباتات اللي تبين حاجتهم،،

[بوراشد82]

والله مرة كنت في سوق الديرة من فترة قريبة وألحقتني طرارة ولما اعتذرت منها انه ماعندي كاش قالت مايهم ،، روحي اسحبيلي وكاهي ماكينة الصراف!!! وسحبتني من يدي بقوو وجارتني وراها مثل العنز ! ! صج خفت وسحبت يدي وشردت برا السوق،، عاد انا بروحي خوافة ،، الله يسامحني صرت اتجنب هالاشكال واتبرع للمؤسسات ،،

[لمعة الالماس]

انا جاتني وحده في الحياة بلازا كنت داخله الصيدلية

الا قالت لي السلام عليكم ووقعدت تدعي لي وحق اليهال وعقب تعرف بنفسها انها جايه من السعودية حق ناس وما حصلت هالناس ومتوهقين وتبي فلوس

قلت لها ما سحبت وماعندي شي قالت بس ابي ٢٠٠ ريال !!! قلت لها شوفي هناك في مؤسسات حق التبرعات روحي لهم وبيساعدونج ما وعيت الا اختفت المره !!

وكانت في حالة زينة وعبايتها اخر موديل وشنطة بس تطر !!*

[بوحمد111]

فيه ناس متعوده على الاطراره وحتى وهي مش محتاجة ولكن يدهم تاكلهم اذا ما طرو وبقرب شهر رمضان نشوفهم في كل مكان وخاصة من بعض الدول المجاوره الله يسامحهم وصعبة الواحد يفرق بين المحتاج والغير محتاج

حصلت معي سالفه وحده قالت لي ابي اشتري عيش من المخازن وقلت لها وانا طالع عند الكاشير جيبي العيش اللي تبينه وانا بدفع سعره ولكن المفاجئه انها كانت مجهزه عربانه متروسه اغراض وعاد اخوكم بوحمد ما ينحرج في هذه المواقف وقلت لها الاتفاقيه على العيش ومب الجاري المتروس وانصفق وجهها وحطت كيس العيش مع اغراضي ودفعت لها وقلت في نفسي بشوفها قبل لا احرك سيارتي وطلعت بدون كيس العيش والظاهر كانت متفقة مع اللي يحسب والله يسامحهم

وانا احتسبت الاجر من الله وقلت في نفسي الله ياجرني على ما فعلت ان شاء الله

[مرحوم قطر]

تحملو تعطونهم لان ترى اغلبيتهم حراميه

واذا شفتوهم على طول اتصلوا حق الشرطه


و الاهم الاهم الاهم

يا اخوان تحملوا اتدخلونهم بيوتكم

و اي طرار ايي البيت على طول اتصل حق الشرطه



اغلبتهم حراميه و الا واحد عنده امكانيه بدل ما يطر يروح يشتغل

ما لقا شغل يروح يغسل سيارات بيدخل فلوس

و الشركات الحين تدورهم دواره عيل يطر ليه



انا مره كنت نازل مستشفى الولاده وقفتني وحده من نفس الجنسيه الي اذكرتها صاحبة الموضوع


و تمت شوي وتصيح و انا ها اي ها اي

خلصتي ولا للحين قالة والله ما ابغي الا ميتين ريال ارجع بلادي و و و و و و

قلت لها طيب بروح اجيب لج من السياره


كان القصد اني اروح و اتصل حق الشرطه عشان ما تسمع و تشرد

تصدقون الحقتني لين باب السياره و ماخلتني اسكر الباب

قلت له اشرايج تركبين معاي مره وحده




طالعة الي معاها و قالت طيب بس ما نطول


يعني طلعة راعية بزنز


قلت لها طيب وقفي ولا تتحركين و مسكت التلفون اني بطلب الدوريه


اشردة و ما شفت الا غبرتها

[فارس بلا جواد]

ههههههههههههههاااااااااااييييي ي ي ي

مرحوم قطر

والله ياخوك الواحد مب عارف شيسوي يضحك ولا يحزن

ولا شيسوي بالظبط

لا نقدر ننهرهم ولا نقدر نهاوشهم

يعورون القلب ياخوك

الله يفك كربتهم يارب

اللهم امين

[(عبدالله)]

عن نفسي أتخذ أحد الطريقتين:

(1)
إذا قال نفس القصة الطويلة إن جه وضاع بوكه ويبغي فلوس بترول أو تصليح سيارته عشان يرجع بلاده أدليه سفارة بلاده وأقول له روح هناك بيساعدونك أو الحقني لين هناك... فيصرف النظر وهو يضحك.

(2)
إذا من المقيمين في البلاد أو الآسيويين أو الشاردين، أقول له اركب معاي أو الحقني بوديك جمعية خيرية وبيلبون كل حاجاتك..

في هالحالتين، إذا فعلاً صادق ببين صدقه.. وإذا كان محتال أو طماع أو كذاب... هم بيبين من أسلويه... وإذا كان متعفف بعد ببين من طريقته

والله يستر على الجميع

[faisalqatar]

والله الواحد اتصادفه مواقف ما يعرف يصيح منها ولا يضحك ولا يعصب

مرة كنت في القهوة مع رفيجي وقاعدين و سوالف و مستانسين شوي ولا دخل علينا شايب و صارخ من اخر القهوة السلااااام عليهم
ردينا السلام ولا الاخ نشب شحالكم ؟
والله تمام
معاكم فلان بن فلان الفلاني
هلا هلا -__-"
والمشكله انه من عيلة معروفه ومايندرى صاج ولا لا
المهم قعد احذانا و تم يسولف وانا شاعر وانا وانا وانا
وتم يقصد و يشعر و بط راسنا والمشكله احنا لا لنا في الشعر ولا القصايد
كل قلبنا و شيب راسنا واخرتها قال مامعكم خردة ؟ !!!
قلنا له اييييي جي موضوعك انت
قلنا له الله يعطيك .. شنو كانت ردة فعله؟ .. سبنا سب و هزأنا و راح ههههههههههه

موقف ثاني:
قبل اسبوعين في دبي .. نتمشى انا و رفيجي في دبي مول ولا انشوف بنتين متنقبات و مكحلين العين
و يعطونا نظرات .. عاد انا تشققت عبالي يشوفوني لاني جميل و كنت شوي وبغني ماهقيت ان البراقع يفتنني !!

بس زين اني ما استعيلت و قلت حق رفيجي شفيهم جي يخزونا .. المهم كملنا طريقنا ولا وحده اتناديني .. لوسمحت اخوي .. افتريت ولا اشوف نفس البنات .. قلت في نفسي هلا هلا .. والله اني جميل :$
شوي ولا قالت احنا من الدولة الفلانية وجايين حق ناس هني لكن لما وصلنا طلعوا مسافرين وماعندنا فلوس نرجع بلادنا .. قلت لها ماعندكم اختراع اسمه تلفون ؟ تسألون اللي يايين لهم موجودين ولا حركتوا ولا شالترتيب .. بس سمعتوا انهم هني شلتوا قشكم وييتوا .. قالت لا تفهمنا غلط قلت لها لا افهم غلط ولا صح يالله السلام عليكم انا مشغول .. و مشيت وكلي علامات استفهام ؟؟؟ شهالعذر الغبي؟؟

الله يستر رمضان قرب وبنشوف وايد من هالاشكال

[كازانوفا]

اوقات اقدر اميزززهم واوقات حالتهم اتخلي الواحد يوقف معاهم ويشحت ويعطيهم

الله المستعان

[موووج قطر]

بس في ناس عينها قويه ماينفع معاها ... هالاسلوب
لانها بروحها هي اتنرفز و اتصارخ ..
وتكون متواجده دووم في نفس المكان على اساس انها اتبيع مسابيح و العين الزرقااا مالت الحسد
ودايما اشوفها وبنفس المكان او لين تكلمت عنها جدام احد صديقاتي اعرفوها على طول
:
مره من المرات صادفتها عند البيت الحديث اللي جنب جرير .. وطلبت مني مساعده وانا موب اول مره اشوفها
ومشيت عنها ..
وانا طالعه كان الهندي شايل اغراضي .. الا اتقول لي انا اشيل اغراضج و عطيني مثل ماتعطين الهندي ..
سكت عنها ..
لحقتني .. لين السياره وجان اتقول لي تشترين بالالف و تستخسرين عشر الريال فيني انا
قلت لها في جهات خيريه اتساعدهم الله يرزقج ..
بس انقهرت من اسلوبها .. هاي اول مره اتكلم معاها بس انا صادفتها وايد ..
:
:
ومن كم يوم اختي قالت لي موقف .. هي طالعه من عياده الاسنان و بيدها للحين باقي الخرده تقريبا 100 ريال
جاتها وحده وقالت لها انا ابي 180 ريال بالضبط عشان اسوي اشعه
قالت لها ماعندي
الا قالت لها امبلا انا شفتها الـ100 في يدج
قالت لها اختي بس انتي تبين 180 .... ردت عليها قولي حق ريلج يعطيني ..
في نهايت السالفه و النقاش .. اختي قبضتها الـ 100
:
:
قلت لها انا اللي يتشرط علي و يقول لي ابي هالمبلغ الفلاني ماعطيه قالت شاسوي قعدت اتحن على راسي
وايد مواقف ... فيها استغلال ..
:
:
الله اعلم من نقاد الدراهم ... رحمت الله على ابوي دوم يقولها ..
يعني خلي نيت أنها صدقه ودافع بلى و في ثواب الميتين ..
و اسمحولي ع الاطاله

[طلعة الروح]

آخر مره صادفت هالحركة مرتين عند مطعم ناندوز ( طريج سلوى)
بصراحه منظر غير حضاري.....
لا وصاروا يدخلون لي المطعم ويطرون وبعضهم يكون مراقبك وينطرك برع ، آخر واحد كسر خاطري صج وعطيته المقسوم عقب ما سألته كذا سؤال قالي انا لجأت للجمعية الخيرية بس ماعطوني لأن بنتي تتعالج بره وبنتي مريضه وانا عامل بسيط ...
عموما اتمنى الكل ياخذ حذره وما نشجعهم على هالتصرفات
أول ما يجيك قوله لحظه واتصل بالشرطه ، مع اني ماسويتها بس بسويها
في المره الجايه لأن الظاهره صارت "أوفر"

[مبتدئة]

فيه واحد مركب له واير في معدته ويدور على السيايير

كلما راح حق سياره عطاهم ورقة عن حالته الصحية وكشف لهم بطنه عشان يشوفون الواير!!!

يعني شنسوي!!!!! يعرفون من وين يدخلون علينا وشلون يستعطفونا

[آنــه]

عن نفسي وايد مواقف تصيدني بس انا ما احب اعطي احد
لان لو فتحت المجال لـ واحد بيلتمون عليك الباقي


في مره في سوق واقف احد الاخوان الخليجينشاب ما شاء الله عليه متعافي وما يشكي باس يلاحقنا انا والوالده والممرات في سوق واقف ما يبي لها بعد كلام وقفت انا والوالده قلت يمكن يطوف , يوم وقفنا الا يقول طلبتك يا اختي ما تفهميني غلط قلت له خير ؟؟!! قال ان اخوه عليه فديه ما ادري اعدام وانه هو يبي اهل الخير يساعدونه وان هو ما يشتغل وانهم يبون يطلعونه من السجن ما يبونه ينذبح وان صار له 3 شهور في قطر وما كمل المبلغ انا هني قفلت صراحه " انه هو قاعد ما يشتغل ويدور المبالغ بالطراره ولا يبي القطريين بس هم اللي يدبرون المبلغ " امي كانت بتعطيه كسر خاطرها قلت لها ولا ريال تطلعين وقلت له اسمح لي ربي يرزقكم من فضله قال لي ليه انتوا عندكم فلوس كثيره بدل لا تصرفونها في الكماليات عطوها المحتاجين رديت وانت بدل لا تمد يدك اشتغل واخذ قرض واكفل اخوك

انا عندي لو طالب انه يشتغل في اي مكان ممكن اساعده لكن ما يطر مني
اكره ان شخص يطلبني حاجه وارده لكن مب لهالدرجه الاستغفال
وعندي الاقربون اولى بالمعروف وبعد اعرف ناس محتاجه ولا تسأل
عندي اعطي الناس اللي اعرف حالتهم ولا اعطي ناس احسهم نصابين

لان كم مره عطيت وحده محتاجه اشوف حالتها قدامي وايد تكسر الخاطر
تطلب الفلوس مسكينه ونفسها مكسوره وبعدها اتشفت ان ابوها الله يصلحه ويهديه
ياخذ الفلوس ويصرفها ع اشياء مب طيبه فقررت ما اعطيها فلوس واستمر على الاشياء العينيه افضل

ومن بعد هالامور ما عدت استوعب اللي يطرون
وان عطيت حد عطته عن طيب نيه مب لازم يقول لي قصة حياته عشان اعطيه

[رجل الجزيرة]

اليوم الساعه ١٠ (( يعني من ساعتين ))في شارع ال شافي ٧ طراروة اذوني يطقون علي دريشة سيارتي ،، وقلت لأول واحد روح للمؤسسات الخيرية مثل عيد او قطر الخيرية ،،وكان سعودي وقعد يتحندى ،، وجاني وراه واحد نفسه وقال احنا جهة خيرية ونجمع تبرعات!! قلت له ندل مكانكم ماله داعي تلوثون بالشوارع،، وبعدها ياني هندي وبعده باكستاني وهلم جرا"،،، هاي كله صار وانا واقفة عند كنتاكي فرع الريان ،، لاتقولون حرام عليج ومادري ايش ،، الحمدلله مب مقصرة من ناحية الصدقات وهالشي بيني وبين ربي وأسأل الله القبول ،، انا ما زقرت حد منهم ،، بس كثرتهم وجشعهم صرنا مانعرف من الصاج من الجاذب،، افضل اتبرع للمؤسسات وهم اذا محتاجين خل يروحون للجهات الخيرية ومعاهم الإثباتات اللي تبين حاجتهم،،


فيه خط ساخن، إتصل بالخط وخلك في مكانك لين يجوون الشرطة.

[basma222]

الحين المتسولين في كل مكان لنا معهم موقف حتى في المنتديات في الرسائل الخاصة

[الامل القديم]

انا مر علي هيك موقف من يومين بمواقف السنتر سياره من الخليج الله يستر عليهم قال انو ما معاه حق بترول وكان معي اخي فاعطاه وقال لي ( واما السائل فلا تنهر ) قلت انا ما اعترضت بس مصدومه يعني مظهره وسيارته مو شكل انسان متسول عموما هاد بينه وبين ربه

[زهرة بنفسجية]

بصراحه مواقف كثيرة
لكن اللي يحضرني الحين
مرة بفت ول كنت هناك و دخل رجال بيده صورة فيها ولد مشوه طبعا تفاجات انه دخل المحل و لا ردوه اهل المحل
قلت اكيد متفق معاهم
بس وحدة هناك من الزباين علقت يومها و تكلمت مع العمال

و موقف ثاني
كنت بيبي شوب بالستي
و كنت رايحه ابدل قطعه شريتها و طلعت صغيره
و انا بدور فجاة تجي وحدة و تقلي بعد المديح
ابي اشتري كم غرض كانوا بيدها و ما معاي فلوس تكفي
انا تفاجات
يعني داخله المحل. و فيه سيكيوريتي شالوقاحه
غيري وحده اشتكت عليها
المهم قلتلها جاي ابدل مو جاي اشتري
تمنيت لو رديت عليها روحي اماكن غير البيبي شوب لانه ماعتقد يناسب وضعك المادي
بس شيسوي الواحد ما يحب يهين اللي قدامه و لو بحرف
اعتذرت منها بادب

بس هي شكلها تتصيد ناس معينه


اما خارج قطر
يووووووه
مجرد ما يشوفون سيارة قطريه
كانه كنز و شافوه
ما حد يصدقهم
ترئ هذه مهنتهم
و هذا شي غير حضاري و يشوه الاسلام

علئ طول قولي لهم روحوا الجمعيه الخيريه لو كنت مستاهل بتساعدك

[منهم وفيهم]

كم رقم الخط الساخن ؟؟

من يومين عند هارديز سلوى جاتني وحده متنقبه تقول انها مقيمه ومعاها بنتها ام سبع سنين تقريبا تمت تدعي وقالت انها حامل وماتقدر تمشي بس الحاجه ..والاخت شكلها تراقب وموقته دقت الدريشه مع الحساب هههههههههه يوم طلعت البوك جاتني :)
..قلت لها راجعي الجمعيات الخيريه قالت جمعية عيد يدفعون لي ايجار بيتي بس ماعندي اكل ..المهم عطيتها محاضره والمقسوم وانا استلمت طلبي وحركت لقيت الاخت مع بنتها في هارديز :)
اللحين اللي ماعنده يقتصد مب ياكل من هارديز :rolleyes2:

[غيمة مطر]

اما السائل فلاتنهر ...

يابخت اللي يجيه السائل لين مكانه ... وربي يجزينا خير على نيتنا ... وهم لو مب محتاجين ربي يحاسبهم ...

[almaf1a]

شباب يطلبون من حرمه في الشارع فلوس
قوة وجهه غير طبيعيه

[منهم وفيهم]

اما السائل فلاتنهر ...

يابخت اللي يجيه السائل لين مكانه ... وربي يجزينا خير على نيتنا ... وهم لو مب محتاجين ربي يحاسبهم ...

هذا اللي مشجعهم ..اكبر دليل على ان الاغلبيه نصابين تواجدهم بشهور معينه ..
العام بنفس هالفتره واحد يوميا بنفس الوقت صوب سباير ونفس القصه (فلوس للتاكسي)صادف انه جاني اول يوم وقلت له ماعندي كاش ثاني يوم جاني واول مانزلت الدريشه وعرفني قام يضحك واختفى من المكان ..
غلط ان احنا نشجعهم .

[ماريسا]

لول قصص مضحكة

[ghanim911]

المشكلة انها بالنسبة لهم صارت مهنه .. مايستحون وعادي يوقف ويسرد القصه وبدون خجل كائنه يسمع قصيدة لمدرس لغة عربيه ...
من المضحك انه دخل علينا المجلس اثنان من الجنسية العربية واحد نشد عن صاحب المجلس بالاسم ,
لما عرف صاحب المكان بنفسه .بداء واحد منهم يلقي قصيده.. وكل بيت يبدا بأسم راعي المجلس على سبيل المثال :
صالح الي له .....
صالح راعي ....
وهلم جره,,,,
وطبعآ فيها من المدح مايندى له الجبين وينقز له الجنين في بطن امه ؟؟؟
المراد ...بعد ماخلص سرد القصيدة عطانا الزبده والمصيبة التي حلت وحاست بطن القبيلة ...
في نفس الوقت انا خرجت من المجلس .. وروحت مجلس اخر يبعد حوالي من 2 الى 3 كيلو ... وبعد القهوه عديت السالفه على راعي المجلس وعن الموقف الي صار .
وبعد حوالي 45 دقيقه الا بوالشباب داخل هو وخويه معاه ينشد عن راعي المجلس بالاسم كامل ..قاله امر
ونفس الطريقه عد القصيده نفسها بالضبط مع مراعات تغير الاسم فقط..ويوم خلص من قصيدته قمت وستأذنت من صاحب المجلس وطرتهم .. وقلت لهم المكان هذا فيه اكثر من 30 مجلس ان شفتكم في بلغت الشرطة.
انا عن نفسي اذا عنده اثبات مصدق من قبل وزارة الاوقاف القطريه .. او احد مشايخ العلم عندنا بقطر يبشر بالخير ..غير ذالك احس انها نصبه الصراحه

[BoFahed]

اتذكر سالفة صارت لي مع رفيجي عماني في مسقط سيتي سنتر طبعا اخوكم بالله بو فهد كاشخ حده وفجاة تجيني ومن بد كل الناس بنتين مووز مووز علا قولة اخوانا المصريين وسمعوني نفس الاسطوانه انهم امارتيات وبنات قبايل وانهم ضاعت الشنطة الخ الخ

المهم رفيجي العماني طق الصدر وقال والله ما تصير تنباقون في دار قابوس !!!!!!! هههه انا اعرفكم بنفسي ويطلع لهم بطاقتهم العسكرية (ملازم في الداخلية ) انا الملازم فلان بن فلان وانا بجيب الحرامي اللي باق شنطكتم يلا حياكم معاي انا بحجز لكم فندق علا حسابي انتو ضيوفنا علا راسنا من فوق وبوديكم عند ربعي الضباط يحققون معاكم علشان ترجع حقوكم

البنات شوي الا بيغمي عليهم ههههههههههه لا خلاصص ما في داعي ما نبي مشاكل خلاص خلاص ما نبي فضايح ههههه ورفيجي اللزقه يحلف لا والله ما يصير لا زم اجيبه اجيبه ما يصير ههههههه لين ما انا اقنعته انه يفكهم خلاص البنت منهاره الدمعه علا خدها

لما سالته بعدين ليش سويت جذي؟؟؟؟ قالي ابيها تلعن اليوم اللي فيها تنصب؟؟ هذيلا خمة من هني بس حشمة لك ولا كنت بابلغ الحين والشباب بياخذونها المركز ويتسلون عليها

[إنّ]

أشكر كل من شارك ..
ومشكلة التسول مشكلة خطيرة ..
ما يهم هو كيفية التصرف مع من يتسول ..
وخاصة نحن النســاء ..
اضطر احيانا للرد على المتسولات بأني إحدى موظفات البلدية ..
وقد اضطر للتبليغ عنهـا .. فلا أجد حتى خيالها .. !!
هناك رقم للتبليغ عنهم ..
ارجو من يعرفه أن يدرجه للجميع هنـا ..
وبارك الله فيكم ..

[البارع]

انا عن نفسي لن ارد سائل ابد عندي بعطيه ماعندي بعتذر منه

[M S A]

أبي أعرف ليس المتسوليين أكثر ما يوقفون عند atm ???

[feva qatar]

منتشرين هالفترة بطريقة كبيرة انا صادفت كذا موقف ونفس الشي اهلي
مرة كنت في عيادة خاصة وجاني واحد سلم علي وقالي والله الوالد مسوي تحاليل وناقصته اربعمية ريال .. قلت له ابشر ورحت عنه منعا للاحراج والاصرار ..
لو كان كلامهم صحيح ليه يسوون تحاليل فعيادة خاصة ؟ وانا اساسا شفتهم داخلين للعيادة و مامرو على الاستقبال .. يعني كذب عيني عينك
ونفس الموضوع مع الاهل صادفتهم وحدة فالجمعية شارية اغراض بالفين وماعندها تدفع ..
وتعتذرت منها
المشكلة ان احنى نستحي نرد اللي يسالنا لكن بما انهم صارو بنسبة كبيرة ولو بلغت عليهم ماتري هل هم محتاجين صج او نصابين ..

[الزعفراني]

على صلة بالموضوع شرطة دبي أقرت مكافأة مالية للي يبلغ عن المتسولين في شهر رمضان

[نجم سهيل]

السلام عليكم

افضل طريقة بالنسبة لي تكرار الدعاء لهم بالرزق والعطية وانت ماشي حتى بدون لاتصد صوبه

واذا برع قطر أحسن تصريفة انك تقول له انا ضيف مثلك شوف هل البلاد ويلا مع السلامة

واذا امصخت اذكر له حديث الرسول صلى الله عليه وسلم : لا يزال الرجل يسأل الناس حتى يأتي يوم القيامة وليس في وجهه مزعة لحم.

واذا مارده ولا شي من هذول يقول لك اللي مايستحي لاتستحي منه وعطه من الزين

[BoFahed]

السلام عليكم

افضل طريقة بالنسبة لي تكرار الدعاء لهم بالرزق والعطية وانت ماشي حتى بدون لاتصد صوبه

واذا برع قطر أحسن تصريفة انك تقول له انا ضيف مثلك شوف هل البلاد ويلا مع السلامة

واذا امصخت اذكر له حديث الرسول صلى الله عليه وسلم : لا يزال الرجل يسأل الناس حتى يأتي يوم القيامة وليس في وجهه مزعة لحم.

واذا مارده ولا شي من هذول يقول لك اللي مايستحي لاتستحي منه وعطه من الزين

القطري والاماراتي مستهدف بكل مكان من اول ما يطلع من الحدود (سلوى )حتى في الحرم الشريف ولا حول ولا قوة الا بالله صارو يعرفونه من ثوبه وعقاله

[الكنترول]

سبحان الله

[ريم الشمال]

كلمة إذا ما تبي تعطي السائل هي
الله يعطيك وتدبر عنه

[penguin]

اذا واحد بالجمعيه وطلب منك تدفع فاتورته ادفع يات عاللي يدور لقمه اذا جذاب في ذمته و اذا صاج الله يفرجها عليه

مره صادفت طرار رفع بلوزته تحتها كيس دم و قعد يتكلم عربي خرابيط ويعطيني اوراق شكلها تحاليل مادري من عنده معلومه شنو فيه