طريق سلاح الجو .. 6 رادارات في 10 كيلو !

[بـارود]

http://www4.0zz0.com/2012/07/17/19/537718900.png (http://www.0zz0.com)

[وطن]

والله ربعنا متفننين في أشكال الرادارات

ما يقصرون crazy

[مشاكل]

اتمنى تركيب كميرات عند نهاية كل شارع ( قبل كل دوار وقبل كل اشارة ) لتصوير المتجاوزين من اقصى اليمين

[وطن]

اتمنى تركيب كميرات عند نهاية كل شارع ( قبل كل دوار وقبل كل اشارة ) لتصوير المتجاوزين من اقصى اليمين

يبي له :victory:

بعد حق اللي يتجاوزون اشارة الدوار حمراء
ويعرضون غيرهم للخطر

[بريق الحق]

^^^
خف علينا انك محافظ على انظمت السير
والله مصخرة الرادارة

[waseet]

لولا ها الاجراءات كان مدير المرور تبدل مثل غيره من زمااان صار له مايقارب ربع قرن مكانه لان الرجال يدخل دراهم فلوس بيزات للحكومه مب مثلك تاخذ راتب وماتدخل فلوس ..

والحوادث تزيد والشوارع خربانه والتخطيط المروري غلط .. لكن اهم شي كل كم متر رادار واذا مخشوش يدخل اكثر ........

[بوحنان]

استغرب من الي يقول يدخل فلوس الحكومه كم بيدخل يعني خمسين مليون وشو الحكومه الي تقوم على هالمبلغ

[الخزرجي قطر]

الله يعيننا على الرادارات الثابته والمتحركه؟؟؟

[الإكسير]

قمت اتجنب امر من الشارع هذا من كثر الرادارات الثابته والمتحركه

[Bin.Yousef]

7 رادارات مع الرادار المتحرك

[كتكوت الوحش]

الله يكفيناا شرهم يا رب واتمنى يخلون السرعه 120 معقوله

[Crown]

الحين هو شغال ولا لا ابي افهم

وهل في فلاش لاصاد

بس ماظن شغال لو شغال رحت وطي صارلي فتره امر عليه مستن على اساس للحين ماشتغل

[(بوطلال)]

جزاهم الله خير في ناس ماتحترم القوانين الا بهالطريقه.

اتمنى تطبيق الفكره على كل الشوارع والخطوط كل كيلو رادار

[رُفق المجنّا]

جزاهم الله خير في ناس ماتحترم القوانين الا بهالطريقه.

اتمنى تطبيق الفكره على كل الشوارع والخطوط كل كيلو رادار

:nice:

ع ان يكون هناك تحديد عقلاني للسرعة المحدودة

[آلملآزم]

شي طيب عشان المستهترين اللي ماينفع معاهم الا هالسوالف
بس بالنسبه للسرعه أشوفها قليله وياليت يتم أعادة النظر فيها

[نيساني]

خطوه جيده بس هذي الرادارت من زمان في الامارات !!!

على العموم اتمنى يكون الرادار يصيد بعد 120 شارع كبير حتى لو سرعة الشارع 100

نفس رادارات الامارات الشارع اللي سرعته 80 راداره يصيد بعد 100 واللي 100 راداره يصيد بعد 120 واللي سرعته 120 راداره يصيد بعد 140

اتمنى الفكره اوصلت

وشكراً

[الملا]

سهل ننتقد الحكومة واجراءاتها وننسى تصرفاتنا للاسف

[fhd4]

اللي ملتزم بسرعة الشارع ماراح يعطيهم اعتبار …

[كازانوفا]

بالفعل اللى ملتزم بالسرعه ما راح يشيل هم لا الردار ولا اللى ركبه ولا كلام المستهترين بارواحهم وارواح الناس اللى ما لها ذنب

[ابوالعبد]

اتمنى يحطون رادار عند بيتنا ويحطون رادار في الفرجان ترى ناس هم تسرع بالفرجان

[catqat]

علل: مااسباب ارتفاع حوادث المرور بقطر بالرغم من وجود قوانين ورادارات زي الرز !!!!!

[Q-tr]

قطر دولة متقدمة ومتحضرة.... والشباب فاهمين معنى سواقه السياره غلط (( الله يهديهم)) كنها حلبة سباق كلن يناطح الثاني خصوصاً في الشوارع المفتوحة عسااهم يترسون شوارع الدوحة رادرات...


احسن والله

[منابر خالده]

يعطيهم العافيه ونتمنى اكثر بعد وفي كل شوارع قطر

[Faisal75]

أنا من المؤيدين لكثرة الرادارات ..
كل يوم نسمع بحادث ووفيات ..
التزم بالسرعة ولاتهتهم بعدد الرادارات لأنها للمخالفين فقط

[بـــــدوي]

المشكله بعض السواقين يخلي الواحد مايعرف هو يفكر فالرادار او يفكر وشلون يتجاوزه او يفكر في شغلته اللي رايح لها تلقااه ماسك الخط اليسار ويمشي على السرعه القصوى المذكوره فالرادار ان مشيت وراه ماوصلت عاد لك عيون وان تجاوزته صادك الرادار احيانا اتمنى اني راكب شيول عشان اشيله هو وسيارته من كثر ماينرفزنني ياخي وسع وخل اللي يطوف يطوف

[مرتبش]

احسن
ناس ماتهمها الا الفلوس ... ولا يتعلمون الا لما يدفعون
واتمنى المزيد من المرور

[الزعفراني]

يالربع ليش زعلانين :)

ان شاء الله مليون رادار ، السرعة 100 خلاص كل واحد يلتزم بالسرعه وانتهى الموضوع :)

[Riku3]

عمري ما افتكرت بالردارات بهالشارع .. في العادة اثبت السرعة على 100 وامشي ..

المشكلة ان السرعة المخصصه ما تناسب الشارع ابداً !! .. المفروض 120 لان الشارع شبه فارغ في معظم الاوقات وطويل والسرعة البطيئة تسبب ازدحام في الفترة الصباحية .

[النواخذة]

استغرب من الي يقول يدخل فلوس الحكومه كم بيدخل يعني خمسين مليون وشو الحكومه الي تقوم على هالمبلغ

تشتري فيها رادرات وتدفع رواتب موطفينها وتحافظ علي ميزانيتها ههههههههههه

[بـــــدوي]

عمري ما افتكرت بالردارات بهالشارع .. في العادة اثبت السرعة على 100 وامشي ..

المشكلة ان السرعة المخصصه ما تناسب الشارع ابداً !! .. المفروض 120 لان الشارع شبه فارغ في معظم الاوقات وطويل والسرعة البطيئة تسبب ازدحام في الفترة الصباحية .

تصدق ان فيه شوارع في امريكا الرادارات فيها لو مشيت اقل من 120 يصيدك والانسيابيه ولااروع بتقولون لي الشوراع وسيعه بااقول وسعوا الشوراع او لاتحاسبونا على ضيقها وحالتها ولو انها افضل بكثير من اول :playball:

[سارونه]

خلهم يحطون مليون رادار :) مب مشكلة :) لان الرادارات جديدة :) الف مبروك

بس يحطون السرعة المناسبة مش (100) في شارع طويل جدا :(

[GENIUS]

انتبهوا من اول رادار القريب من إشارات بروة. وانت طالع من الإشارات السرعة في منطقة الرادار ٦٠ فقط ولكن وانت قادم للإشارات السرعة ١٠٠ لنفس الرادار. واللي يستخدم الشارع يركز علئ مواقع لوحة ال ٦٠ بالنسبة لهذا الرادار. الأخوة في المرور. يرجى منهم النظر في هذا الامر.

[الحال مايساعد]

أحيانا أنزعج من وجودهم في شوارعنا
لكن وللأمانه وجودهم ضروري ، أرواحنا وأرواح عيالنا غاليا علينا
وياليت يكثفون الرادارات على طريق 22 وخط الشمال

[Abdullah_89]

بصراحه شارع سلاح الجو مازالت فيه سرعه بالرغم من انتشار الرادارات ..



اشارات بروة ماشفنا ولا حادث الحمد لله من اول ماركبوا الرادارات ..



المطلوب الحين الدواوير اللي عليها اشارات يركبون عليها رادارات تخالف المتجاوزين ..

الاشارات لما يجيك واحد من اليمين ويدخل لك يسار واهو طريقه سيدا ( مثال : اشارات مطار الدوحة الدولي وانت جاي من اشارات اللولو // اشارات عبدالله عبدالغني وانت جاي من دوار الساعه )



والله يحفظ الجميع

[بـارود]

اتمنى تركيب كميرات عند نهاية كل شارع ( قبل كل دوار وقبل كل اشارة ) لتصوير المتجاوزين من اقصى اليمين

وأتمنى تركيبها كذلك ..

ولكن للمتباطئين في أقصى الشمال !

[بـارود]

يبي له :victory:

بعد حق اللي يتجاوزون اشارة الدوار حمراء
ويعرضون غيرهم للخطر

في هالنقطة أنا معاج 100 %

[بـارود]

الله يعيننا على الرادارات الثابته والمتحركه؟؟؟

أي والله ,,

الواحد بدال ما تكون عينه على الشارع
تكون عينه على الطبلون !

[بـارود]

قمت اتجنب امر من الشارع هذا من كثر الرادارات الثابته والمتحركه

أريح لك ,,
وشكلي بسوي نفسك !

[بـارود]

الحين هو شغال ولا لا ابي افهم

وهل في فلاش لاصاد

بس ماظن شغال لو شغال رحت وطي صارلي فتره امر عليه مستن على اساس للحين ماشتغل

أتوقع بيشغلونه مع الاشارة ,,

[بـارود]

سهل ننتقد الحكومة واجراءاتها وننسى تصرفاتنا للاسف

لسنا مع كثرة عدد الرادارات ,, بل مع السرعة الموضوعة التي لا تناسب هذا الطريق !

[بـارود]

اللي ملتزم بسرعة الشارع ماراح يعطيهم اعتبار …

أوكي ,, بس اللي مستعجل وعنده ظرف أو حالة ؟!

[بـارود]

اتمنى يحطون رادار عند بيتنا ويحطون رادار في الفرجان ترى ناس هم تسرع بالفرجان

فكرة الفرجان اشوفها صعبة
بس اشرايك بعد داخل حوشكم :secret:
ههههههههههههههههه امزح معاك

[بـارود]

علل: مااسباب ارتفاع حوادث المرور بقطر بالرغم من وجود قوانين ورادارات زي الرز !!!!!

اسأل الخرجي :secret:

[بـارود]

قطر دولة متقدمة ومتحضرة.... والشباب فاهمين معنى سواقه السياره غلط (( الله يهديهم)) كنها حلبة سباق كلن يناطح الثاني خصوصاً في الشوارع المفتوحة عسااهم يترسون شوارع الدوحة رادرات...


احسن والله

والامارات كذلك ,,

هل هم فاهمين السواقة غلط ؟!

[بـارود]

يعطيهم العافيه ونتمنى اكثر بعد وفي كل شوارع قطر

يا رجل قـُل غيرها :secret:

[بـارود]

أنا من المؤيدين لكثرة الرادارات ..
كل يوم نسمع بحادث ووفيات ..
التزم بالسرعة ولاتهتهم بعدد الرادارات لأنها للمخالفين فقط

لا دخل للوفيات بالرادارات
طيب ماهو تفسيرك ؟

أكثر الوفيات تكون على الطرق الخارجية ؟ ليش ؟
الشوارع تشكي الحال ؟ ضيقة .. مكسرة .. خط واحد

بالعكس كثرة الرادارات تضر
الكل بيلتزم بالسرعة صحيح
بس لما يجيك هندي وطول الوقت
على كل رادار بيكع له بريك شنو مصير
اللي وراه ؟

[بـارود]

المشكله بعض السواقين يخلي الواحد مايعرف هو يفكر فالرادار او يفكر وشلون يتجاوزه او يفكر في شغلته اللي رايح لها تلقااه ماسك الخط اليسار ويمشي على السرعه القصوى المذكوره فالرادار ان مشيت وراه ماوصلت عاد لك عيون وان تجاوزته صادك الرادار احيانا اتمنى اني راكب شيول عشان اشيله هو وسيارته من كثر ماينرفزنني ياخي وسع وخل اللي يطوف يطوف

أنت كذا
:nice:

[اوف ليميت]

الى الامام يالخرجي..تحيه لك

لكن تكفى امسح مخالفاتي الصفريه..بس ثنتين فديت خشمك

[khaldoon]

لو بس السرعة تكون 100 بتكون الامور طيبة حتى لو زادوا الرادارات

[bo_hamad]

كل 2 كيلو رادار ههههه

أتمنى من إدارة المرور زيادة السرعه لـ 120 بدلاً من 100

انا تعبت من الخط لان في ناس تسوق على مسار السريع اقل من 100 ويتسبب في عرقله السير والزحمة

[الـخـالـدي]

كل 2 كيلو رادار ههههه

أتمنى من إدارة المرور زيادة السرعه لـ 120 بدلاً من 100

انا تعبت من الخط لان في ناس تسوق على مسار السريع اقل من 100 ويتسبب في عرقله السير والزحمة

احمد ربك .. شارع الامارات كل كيلو رادار .. مايمديك تسرع بس جزاهم الله خير

الخطوط السريعه عندهم 140 .. اذا رحت فوق صادق .. وهذا افضل شي

[بـــــدوي]

أنت كذا
:nice:

لو فيه مني اثنين كان الامور طيبه :shy:

:p

[وطن]

لا دخل للوفيات بالرادارات
طيب ماهو تفسيرك ؟

أكثر الوفيات تكون على الطرق الخارجية ؟ ليش ؟
الشوارع تشكي الحال ؟ ضيقة .. مكسرة .. خط واحد

بالعكس كثرة الرادارات تضر
الكل بيلتزم بالسرعة صحيح
بس لما يجيك هندي وطول الوقت
على كل رادار بيكع له بريك شنو مصير
اللي وراه ؟

مصير اللي وراه يسلم عليه :secret:


الأحسن الواحد ما يلزق في اللي قدامه ويترك مسافة امان
:nice: