مقارنة بين الاطباء في قطر

[فارس بلا جواد]

السلام عليكم واسعد الله صباحكم بكل خير وبركة

وتقبل الله طاعتكم وصيامكم وقيامكم

الحقيقه انا عندي استفسار بخصوص الاطباء في دولتنا الحبيبة قطر

سؤالي كالتالي :

هل هناك فرق بين اطباء مستشفى حمد العام واطباء المستشفى الأهلي ؟

اقصد الاطباء بشكل عام

لانه وبكل صراحه حصل لي موقف واستغربت منه

فا حبيت اتئكد قبل ما اتكلم عن الي صار لي مع الدكتور او الاستشاري في مستشفى حمد

صيام مقبول وافطار شهياً

انتظر منكم الردود وجزاكم الله خير

[ضوى]

فرق من اي ناحية اخوي الكريم ؟؟.

وضح المطلوب

[فارس بلا جواد]

مرحبا اختي الكريمه

اهلا وسهلا

الحقيقه الموضوع عن اطباء العيون تحديداً

مابي اطول عليكم

راح ادخل في الموضوع على طول

الله رزقني بنت ولله الحمد والفال لكم ان شاء الله

لاحظت بعد ولادتها بكم اسبوع وجود انتفاخ في المنطقه القريبه في الجفن ونزول كميه من الي انسميه احنا القمص او الاوساخ المهم خذنا موعد في مستشفى حمد العيادة الخارجية وقالو لنا بعد ثلاث شهور موعدها قلت ما يخالف بعدها باسبوع خذتها المستشفى الاهلي وعملت موعد لها لما دخلت على الدكتور قالي الامر بسيط ومافي داعي للقلق راح اعطيكم مرهم لعيونها وسوو لها مساج خفيف حول منطقة الانف عشان يطلع الوصخ وبعد مرور ثلاث اسابيع او شهر تغريبا طابت و طلع الوصخ من عيونها وراح الانتفاخ ولا زال الموعد باقي له شهرين المهم جا وقت الموعد ورحت لهم العيادة الخارجية عند دكتور قطري ينقال القمرا او حمد القمرا مش عارف اسمه بالظبط لما جا دوري ودخلت لقيت الدكتور القطري ومعاه اطباء من جنسية عربية المهم رويتهم المرهم الي شريته من الصيدليه وشرحت له الي صار مع بنتي قال الطبيب العربي اول شي المرهم هذا مش كويس في دهون وبعدين لازم تعملون لها مساج بقوه وتم يضغط على عينها لين ما قامت تصيح البنت بغيت اتهاوش معاه وطلعت منهم بغيت اسوي لهم سالفه هشكل عاد يسوون في البنت ؟ والله ورب البيت الدكتور الي في المستشفى الاهلي قال لا تضغطون على عيونها بالقو ايش هدكتور الصراحه انا مستغرب فا قلت باكتب لكم هلموضوع ابي اخذ رايكم

استغفر الله العظيم يارب

[Ahmed25]

كل دكتور و له تشخيصه و طريقته ، و لاحظت انها عادة في "جميع" الدكاتره انه ما يحب تقوله راي دكتور ثاني او تشخيص دكتور ثاني.

اخوي دام البنت تعالجت و خلاص ، لا تروح لحمد. ان ما خاب ظني ان اطباء المستشفى الاهلي كفاءتهم اعلى ، لكن المشكله اذا صار القطاع الخاص يدور فلوس ما راح يخلي شي ما يطلعه فيك.

اذا الحاله خطيره و خايف على بنتك ، ودها على المانيا او امريكا

[بن غيث]

سلامة بنتك .. وما تشوف شر
صارلي حادث من فتره وتلتهت مع الدكاتره في الدوحة
سافرت بره وسويت عملية وحطولي بلاتين في الساق وتركيب ركبه
جيت الدوحة اكمل العلاج الطبيعي
شافني دكتور سوداني .. وشاف الاشعات والتقارير
كتب توصية في ملفي اني اخذ جلسات كهربا ...؟؟؟؟
تهاوشت معاه وقتله اشلون اخذ كهربا وانا في رجلي معدن
وكملت العلاج في البيت

[الامل القديم]

اي طبيب براي خارج مشفى حمد هو الافضل

اخذنا ابي من اسبوع الى المشفى بازمة ربو فقالوا للنا انها جلطه في القلب قال لهم اخي لا عوارض الجلطه تختلف هذي ازمة ربو قال له الطبيب انت لا تعرف قال له انا صحيح مش دكتور عام ولكني دكتور صيدلي واميز المهم راي الطبيب هو الي مشي ونقلوه على مشفى القلب وجلس عندهم 4 ايام بالاخير قال الطبيب نعتذر لم تكن اخلطه هو ارهاق بسيط وضيق تنفس وياريت تروحوا الصندوق تدفعوا قبل ما يطلع

يعني حسبي الله ونعم الوكيل فيهم

والحمدلله على سلامة البنوته الصغيره وربنا يحميها من كل شر ويحفظها لكم

[faisalqatar]

اخوي في كل مستشفى اتحصل الدكتور الزين والدكتور الشين
والحمدلله ان البنت تعالجت وهاي اهم ما في الموضوع

ما اتشوفون شر و تتربى في عزك ان شاء الله

[فارس بلا جواد]

شاكر لكم تعليقكم اخواني و اخواتي الاعزاء

و اسئل الله لكم الشفاء العاجل ان شاء الله

انا لا زلت اسمع واقراء عن الي يصير في مستشفى حمد

لكن بعد الله صار لي انصدمت وما كنت متوقع الي راح يصير لي

ولا حول ولا قوة الا بالله العلي العظيم

طيب والحل يا اخوان

ايش الي ممكن اسويه في ظل هلموقف الي صار لي ؟

وتحياتي لكم جميعاً

[مسفر2]

ماتشوف شر وعؤبال ماتشوفهااا عروسه ياعم

الله الله في الكمادات .. ماي دافي وبعدين نصيحه لوجه الله لك ولكل الاخوان

لاتعبثووون في العيون وخاصة في الدوحه

اسألوووووووا مجرب ندمان

[عاهد بن علي]

ما تشوفون شر

[فارس بلا جواد]

شاكر لكم اخواني على مشاعركم الطيبه

انا والله خايف من هلموضوع وقلت لازم اتحرى واستفسر اكثر

احنا عيبنا ما نقرا

انا لما قريت في النت عن امراض العيون وكيفية العلاج على طول رحت المستشفى الاهل لما له من سمعه طيبه عند اغلب الاخوان والزملاء والتجارب الي مرو فيها

نسل الله لنا ولكم الشفاء العاجل

وتقبلوا تحياتي

[اوف ليميت]

وربي..والله شاهد على ما أقول

لو في شي بأهلي (بنتي او ابني او زوجتي او اختي او امي او ابوي او اخوي) هؤلاء ... والله ثم الله ثم الله مايعوقني الا القطرية وعلى يا المانيا يا كليفلاند او كاليفورنيا بامريكا
هني ماراجع دكاتره الا اذا كحه او زكام .. وخلهم يلعبون فيني بهالشيئين..عادي..اصلا دواهم يونس مال الزكام

:]

[فارس بلا جواد]

يا مرحبا اخوي اوف ليمت

انا حاليا في مستشفى كليفلاند في امريكا بولاية اوهايو

رايح علاج مع الوالد

قسم بالله خدمه و اطباء لا يعلى عليهم

شطار ودقيقين ومتعاونين الى ابعد الحدود

وخدمتهم وايد زينه

مخليينا يا دهينه لا تنكتين

لكن عيبهم في المواعيد

كل اسبوعين موعد

لكن بشكل عام تشخيصهم وايد زين

الوالد الله يسلمك قالوا له عندك شرايين ثنين او ثلاثه منسدين ولازم نفتحهم

الوالد من كثرما سمع عن مستشفى حمد قال لا مب مسوي العمليه عندهم في الدوحه

باشوف لي طريقه وبتعالج برع

اتصدقون يا اخوان لما سوا القسطره قابلني الطبيب المعالج

قالي شريان واحد منسد شلون يكتبون في التقرير ثلاث شرايين ؟؟!!

انا سكت ما قدرت ارد قلت له مشكور وجزاك الله خير

ومن عقبها سحبت على مستشفى حمد

والحين الحمدلله امور الوالد طيبه وبصحه جيده

موضوع الاطباء في مستشفى كليفلاند موضوع طويل

فا انا اختصرت لكم

واسئل الله لنا ولكم الشفاء العاجل لجميع مرضى المسلمين

انه القادر على كل شي

اللهم امين

[اوف ليميت]

يا مرحبا اخوي اوف ليمت

انا حاليا في مستشفى كليفلاند في امريكا بولاية اوهايو

رايح علاج مع الوالد

قسم بالله خدمه و اطباء لا يعلى عليهم

شطار ودقيقين ومتعاونين الى ابعد الحدود

وخدمتهم وايد زينه

مخليينا يا دهينه لا تنكتين

لكن عيبهم في المواعيد

كل اسبوعين موعد

لكن بشكل عام تشخيصهم وايد زين

الوالد الله يسلمك قالوا له عندك شرايين ثنين او ثلاثه منسدين ولازم نفتحهم

الوالد من كثرما سمع عن مستشفى حمد قال لا مب مسوي العمليه عندهم في الدوحه

باشوف لي طريقه وبتعالج برع

اتصدقون يا اخوان لما سوا القسطره قابلني الطبيب المعالج

قالي شريان واحد منسد شلون يكتبون في التقرير ثلاث شرايين ؟؟!!

انا سكت ما قدرت ارد قلت له مشكور وجزاك الله خير

ومن عقبها سحبت على مستشفى حمد

والحين الحمدلله امور الوالد طيبه وبصحه جيده

موضوع الاطباء في مستشفى كليفلاند موضوع طويل

فا انا اختصرت لكم

واسئل الله لنا ولكم الشفاء العاجل لجميع مرضى المسلمين

انه القادر على كل شي

اللهم امين

كفو والله .. هذا الصح..كل مايصير شي يبيله متابعه خاصه او جراحه..على كليفلاند او la
الحمدلله انك رحت لعندهم...الى الافضل في المجال

الله يشافي غاليك وهلك وتردون بالسلامة

[مسفر2]

كفو والله .. هذا الصح..كل مايصير شي يبيله متابعه خاصه او جراحه..على كليفلاند او la
الحمدلله انك رحت لعندهم...الى الافضل في المجال

الله يشافي غاليك وهلك وتردون بالسلامة

وين افضل دكتور عيون للقرنيه

[فارس بلا جواد]

الله يجزيك خير اخوي العزيز

صحيح الغربه صعبه لكن كل شي لجل الوالد يهون

وبراً بوالدي

اذا نقول الحل مش في مستشفى حمد

بل المستشفيات الخاصه

[اوف ليميت]

وين افضل دكتور عيون للقرنيه

اجذب عليك ان قلت تعرضت لحديث مع احد مثل هذا او سمعت شي عن اطباء قرنيه تم تجربتهم

ولكن..لإي فكليفلاند اذا ماخاب ظني..استشاري ومختص اسمه وايلي wiley في عيادة كليفلاند لليزيك بمنطقة نورث ريدجفيل north ridgeville يقولون يسوي عمليات زراعه قرنيه ب 3000 دولار بس

وبعد تقدر تستشيره باشياء ثانيه اذا تبي

اذا ماعجبك كليفلاند..روح لوس انجليس..جنوب شارع بيفيرلي هيلز مال المشهورين والاغنياء..بتلاقي ماشاءالله ولا 100 عياده كل وحده مختصه بشي..وكل وحده مبنى بكبره وبروحه ... عملياتهم لكن اغلى بوايد..يسوون لكبار الشخصيات والفنانين

وبتلاقيلك فنادق رخيصه الليله ب 400 او 600 دولار بتقاطعات ألكابينو او سانتا مونيكا مع البيفي

[naif3]

ماتشوف شر انشالله

[ثابت]

اذا تبي اسؤ وازفت تعامل
روح مستشفى حمد كل العمال ما احدد احد من ادارة الي دكاترة الي ممرضين الموظفين كلهم عمري ماشفت اسفل من هذا المستشفى في تعاملة وخيبتة وتصرفات القذرة من الممرضين والدكاترة مع المرضاء والله ما اتشرف انة يحمل هالمستشفى اسم حمد

اذا حد كفو من هالمسؤلين ينزل الحين ويروح يشوف اي قسم بالمستشفى اذا ماحصل ناس مرضاء منقعين وتعامل من موظفين المستشفى زفت

ابسط مثال الولادة روح شوف كيف يعاملون بنات قطر في الولادة ازفت معاملة والله لو تودي اهلك على مسشفى بقرية بالهند ماتحصل مثل هالمعاملة الزفت

يبة والله يقلبونة سوق للغنم ابرك ويوفرون هالرواتب الي تروح لناس نايمة وغير مؤهلة

[كازانوفا]

الحمدلله على سلامة بنتك هذا اهم شي
وبالفعل الكثير يشتكي من مستشفى حمد وكذلك الاهلى يعني في الصالح والطالح بكلا المكانين

[فارس بلا جواد]

مع الاسف يحزني الي قاعد يصير في مستشفى حمد

مافي حد مهتم

الاداره ضعيفه واحس انه بعض الاطباء ماعندهم خبره كافيه

وما عندهم استعداد للتطوير

لازم يسوون لهم اعادة صيانة وتأهيل في كل شي من جديد

انا اسمع انه فيه اجهزه في مستشفى حمد تقدر بالملايين ومن احسن الاجهزه

طيب ليش ما يستخدمونها ؟

انا ما قهرني الا الدكتور العربي الي ضغط على عين البنت وخلاها تصيح وتصرخ

يقول لازم اعمل كذا عشان يطلع الوصخ من العين

وبالمقابل الدكتور الي المستشفى الاهلي عالج الموضوع بحكمه ورويه وقالي بالحرف الواحد

لا داعي للقلق بالانقليزي

مادري مناحس بينهم ولا كل واحد يعاند الثاني ولا ايش القصه بالظبط

[الحاقول]

اخوي الدكتور حمد القمرا المري هو من افضل اطباء العيون في مستشفى حمد

وهو رجل متدين ويخاف الله في عمله وياليت كل الاطباء مثل الدكتور حمد القمرا

هذا شهاده مني عنه وهو ليس من اهلي

[فارس بلا جواد]

مرحبا اخوي الحاقول

اذا تكرمت ترجع وتقرا الموضوع الي كتبته من البدايه

انا قلت طبيب عربي كان مع الدكتور القمرا

وتكلمت عن الي صار حق بنتي يوم الموعد الي في مستشفى حمد

والي صار لنا في مستشفى الاهلي

والمقارنه الي بينهم

هذا للتوضيح

وشاكر لك مرورك اخي الكريم

[muhanna]

اخوي الدكتور حمد القمرا المري هو من من اطباء العيون في مستشفى حمد

وهو رجل متدين وذو خلق ومستشفى حمد في رأيي مستشفى ممتاز والحمد لله على النعمة

[Dana’1]

انا لي تجربة .. نزلة معوية تسمم وحطوني بالإقامة القصيرة..بلفيت بيعالجوني بالمعذي وبعض الادوية ولابة نتيجة
المهم طلعت منهم ورحت لمستشفى الجزيرة عند د. حمدي ..عمل لي تصوير سونار للباطنية من معدة وكبد وغيرة وشرح لي الحالة واعطاني العلاج المناسب من مضادات ولله الحمد والمنه خفييت
مستشفي حمد حتى مضاد ما اعطاني!!!
بس فية اهتمام بقسم الولادة والقلب لكن تبقى المشكلة ببعض الممرضين والدكاترة في التعامل والتشخيص الدقيق للحالة


وللآمانة من زمااان اختي الصغيرة جاتة ضربة في عينها ما كان في دم بس سبحان الله تغير لون السواد بالعين الى اخضر غااامق عالزيتي غريب زي كدمة كذا ودينها مستشفى حمد الطورارئ وشافها طبيب كحالة طارئة اظن كان قطري ملتحي اظن ان ماخاب ظني د. فهد القحطاني ،،، فيها قحطاني على ما اذكر:)
وطمنا حتى انة هذا شي عادي مثل لما الجلد تصيبة جرح او كدمة وامورها إن شاءلله طيبة يعني يعطي كلام يطمن واعطانا علاج بعد زين
وفعلا الحمدلله الله سبحانه وتعالى من عليها بالشفاء على يد هالدكتور وردت عينها مثل قبل باللون والشوف

[OREO]

الدكتور حمد و نعم فيه و نعم في الدكاتره القطريين كلهم ،،

شخصيا ما اثق في الدكاتره العرب في مستشفى حمد ما عدا الدكاتره القطريين ،،

المفروض تعاملت من البدايه مع الدكتور القطري وهذا كان افضلك و افضل لبنتك ..

ما تشوف شر و الحمدلله ع سلامتها اخوي ،،،

[مساهم فنان]

مستشفى حمد عندك واسطة بيعالجونك زين ، ما عندك رن أشهر لين اتشوف الدكتور ومن تجربة أغلب دكاترة حمد غير القطريين ما يتصخرون حق القطريين إلاما ندر ....

[قطر دزاين]

اخوي في كل مستشفى اتحصل الدكتور الزين والدكتور الشين
والحمدلله ان البنت تعالجت وهاي اهم ما في الموضوع

ما اتشوفون شر و تتربى في عزك ان شاء الله

هذي ارواح ما فيه مجال دكتور شين
مستشفى حمد مقصب دام الدكتور ياخذ مبلغ وقدره على العمليه ولا فيه حسيب ولا رقيب مات المريض بخاء والطبيب لم يتعرض للتحقيق ايش يهمه المريض صحى او مات

مستشفى حمد يبي له تغير كامل من الوزير للفراش
اجل كله صار من الفلبين واللي يتحكم في التوظيف معروف شخص واحد هو من يخيط ويميط بمستشفى حمد تم التضيق على ممرضين من الجنسيه العربيه حتى تم تفنيشهم واطباء اكفاء تم تضيق عليهم

[الأصيلة]

ياليت ماتعممون
والله إن مستشفى حمد فيه من الأطباء المبدعين ولايعلى عليهم
لكن قلة الثقة فيهم هي سبب النفور بالإضافة إلى زج بعض الكوادر المتواضعة الضعيفة بينهم
مما أضعف سمعتهم...
لو ينخلونهم ويستبعد صاحب الأخطاء المتكررة
يكون أفضل
أنا جربت أكثر من دكتور والتشخيص ممتاز ولا عليه أي كلام...

[kitmat]

ماتشوف. شر بنتج

[فارس بلا جواد]

السلام عليكم

وتقبل الله صيامكم وقيامكم

يا جماعة الخير انتو لما تكونون في نفس الموقف الي انا كنت فيه مع بنتي

ما ظن راح تسكتون

وانا في بداية حديثي قلت ابي اشوف وجه المقارنه بين الاطباء في قطر

وذكرت لكم الي حصل مع بنتي

ماكنت عارف انهم راح يعملون في بنتي جذيه

الدكتور القمرا كان قاعد والي شاف بنتي واحد اجنبي ( من احد البلدان العربيه )

ضغط على عين بنتي بالقو قمت وشليت يده يقولي عادي مافيها شي بس لازم تعمل مساج

عند طرف العين عشان يطلع الوصخ

وبالمقابل الدكتور الي في المستشفى الاهلي

قالي لازم تعمل لها مساج على الخفيف بصبعك ولا تضغط على العين

وعطاني مرهم وامورها في السليم ولله الحمد

حتى اني فكرت ما روح الموعد في مستشفى حمد البنت خلاص حالتها زينه

بس قلت خلني اروح باشوفهم شيقولون

وما كنت متوقع الي بيصير

وهذا الي صار معاي يا جماعة الخير

[الزعفراني]

مشكلة مستشفى حمد الضغط الكبير على هالمستشفى من قبل المراجعين والمرضى ، وهالشيء يمثل عبء على الأطباء وضغط كبير .

غير كذا البلد صغيره وأي خطأ طبي ينتشر كالنار في الهشيم في المجالس ويصير حديث الناس وفيه اساءه للمستشفى ولسمعته .

مع ان الناس ما تدري ان يوميا مستشفى حمد تجرى فيه أكثر من 40 عملية ، غير العمليات الصغيرة في الطوارىء !!

والناس ما تدري ان نسبة الاخطاء الطبية او المضاعفات اللي تنتج عن العمليات او العلاج في مستشفى حمد هي ضمن النطاق العالمي المتعارف عليه ، وهي أقل من نظيرتها في أمريكا !!!!!


صحيح ان قدرات الأطباء وتشخصيهم للحالات اللي يواجهونها تختلف من جهة إلى أخرى وان الكفاءات مش بمستوى واحد ، وأن كل دكتور هو في الأخير بشر يواجه ضغوطات ومشاكل ونفسيات و أمور ممكن تؤثر على قدرته في اتقان العمل او الاخلاص فيه أو تخليه يقصر في تشخيص حاله معينه او طريقة تلقيه معلومة العلاج ، كلنا نتمنى استقطاب الكفاءات المتميزة لكن تبقى هالكفاءات تبحث عن الفرص الانسب والأفضل لها .

يعني الكفاءات الموجوده على قد المستشفى كونه مستشفى حكومي وليس أهلي أو خاص .

الله يشفي بنتك أخوي فارس ، ويشفي الوالد وتردون بالسلامة إن شاء الله .

[فارس بلا جواد]

الله يجزيك خير ياخوي الزعفراني بارك الله فيك

وتقبل الله صيامك وقيامك ياخوي

الحديث عن مستشفى حمد العام حديث ازلي قديم

والمرضى خايفيين على ارواحهم ويبغون الخدمات الزينه

ومثل ما قلت الضغط الغير طبيعي على المستشفى ادى لمثل هلحالات

نسئل الله السلامه

و انا اطالب ومن هذا المنتدى انهم يفتحون اقسام عديده ومراكز ومباني

ليتسع لهذا الكم الهائل من المرضى

والاهم من ذلك كله الاداره

ووضع خطط مستقبليه للمرضى وكيفية التعامل معاهم

واستقطاب الكفاءات المميزه

انا تكلم عن قسم معين الا وهو العيون

وما عندي فكره عن باقي الاقسام

كل ما ازور مريض مرقد في مستشفى حمد يشتكي من الخدمات واحيانا من سؤ المعامله

والله يصلح حالنا جميعا يارب

اخوك الصغير

فارس بلا جواد

[خــالــد]

السلام عليكم

وتقبل الله صيامكم وقيامكم

يا جماعة الخير انتو لما تكونون في نفس الموقف الي انا كنت فيه مع بنتي

ما ظن راح تسكتون

وانا في بداية حديثي قلت ابي اشوف وجه المقارنه بين الاطباء في قطر

وذكرت لكم الي حصل مع بنتي

ماكنت عارف انهم راح يعملون في بنتي جذيه

الدكتور القمرا كان قاعد والي شاف بنتي واحد اجنبي ( من احد البلدان العربيه )

ضغط على عين بنتي بالقو قمت وشليت يده يقولي عادي مافيها شي بس لازم تعمل مساج

عند طرف العين عشان يطلع الوصخ

وبالمقابل الدكتور الي في المستشفى الاهلي

قالي لازم تعمل لها مساج على الخفيف بصبعك ولا تضغط على العين

وعطاني مرهم وامورها في السليم ولله الحمد

حتى اني فكرت ما روح الموعد في مستشفى حمد البنت خلاص حالتها زينه

بس قلت خلني اروح باشوفهم شيقولون

وما كنت متوقع الي بيصير

وهذا الي صار معاي يا جماعة الخير


ارفع قضية على الدكتور وتواصل مع جريدة افضح فعلة الدكتور باسمة مثل اوروبا ما يسون عندهم تروح سمعة الدكتور ويحترق كرتة خلاص.

[فارس بلا جواد]

مرحبا اخوي خالد

وتقبل الله صيامك وقيامك

بل بل مب لهدرجه عاد

الامر لا يستدعي كل هذا

انا اذا ماعرف عن الشي استفسر واسئل قبل الحكم

والله يصلح حال الاطباء عندنا

[دلة الرسلان]

اخوي فارس ماقالوا لك اللي مع بنتك ضيق في القناة الدمعية؟

والحل بعض المساج والضغط على القناة وانت تضغط تلاحظ الأفرازات تطلع صارت مع عيالي

ونفس العين اليمين وتلاحظ كثرة خروج الدموع على طول وكان البزر يصيح لأن ضغط

الأصبع مؤلم للطفل وبعد كم شهر بعضهم احتاج عملية توسيع للقناة وبعضهم نفع معاه المراهم

والمساج بأمر الله .

[chillis]

في كل مدينه مقبره مستشفى الاهلي هم لهم اخطائهم ومن دكاتره كبار في النهايه كله نصيب ومكتوب :) لان لي تجربه فاشله مع المستشفى الاهلي للاسف

[فارس بلا جواد]

نعم قالي الدكتور الي في المستشفى الاهلي احتمال تكون القناة الدمعية ضيقه ولكن في بداية الامر احنا راح

نمشي خطوه خطوه .... بالنسبة للعملية الجراحية هذا في اخر الامر عندما تبؤ كل المحاولات بالفشل

والحمدلله انجحت من اول مرحله حطينا شوية مرهم ومساج خفيف عند طرف العين صوب الخشم

والحين هي سليمه ولله الحمد ...

[فارس بلا جواد]

اختي شيليز

وانا الحمدلله انجحت معاي التجربه بفضل من الله سبحانه وتعالى

[مزايين]

السلام عليكم ورحمة الله وبركاته
الحقيقة أنا رأيي غير عن مجموعة كبيرة من الآراء اللي قريتها وعن تجارب والله الشاهد
بالنسبة للدكتور حمد القمرة احنا انولدت عندنا بنت وكانت بحالة مرضية صعبة في عينها وعالجها وعمل لها الدكتور القمرة عملية وهي عمرها 10 أيام وكان مستوى اهتمامه بالطفله رائع والحمد لله البنت الحين عمرها سنه وهي بخير وعينها بأحسن حال
وبالنسبة للفرق بين دكاترة مستشفى حمد والمستشفيات الخاصة وبعد عن تجارب
بنتي راحت المستشفى الأهلي عن ألم في رقبتها وسووا لها كل الفحوصات اللازمة واللي طبعا كلفت مبلغ وقيمته .... وفي الأخير قالوا نزيف في منطقة الألم والمفروض ماتحرك رقبتها وتحط جهاز الرقبة وعشنا مع البنت على أعصابنا وكانت طول الوقت خايفة تحرك رقبتها وبعدين أخذتها لطوارئ حمد وأخذت نتائج أشعة الأهلي معاي ومع الفحوصات والتأكد بعد من نفس أشعة الأهلي طلع اللي عند بنتي الغدد اللمفاوية وهذا تأكدنا منه بعد عقب مدة
ومرة ثانية تعبت بنتي وراحت عن الزحمة بعد المستشفى الأهلي وشخصوا المرض بتجلط بالدم ولما سألت الاستشاري تجلط وين قال لي بالرئه وهذا يعني امكانية إن يصير عندها جلطة بالرئة الله لايقول ولازم تنام في المستشفى عشان تكون تحت المراقبة وكان لازم نتأكد فخذناها لحمد ومعانا بعد كل تقارير الأهلي وفي حمد سووا لها كل التحاليل والفحوصات اللي سووها لها الأهلي وزيادة واللي طلع فيها إن مستوى التجلط قليل جداً وطبيعي لواحدة حامل ويصير في فترة الحمل وأساسا كنا إحنا سوينا بحث في النت وقرينا عن المرض وعرفنا إن ممكن الحامل تتعرض لمستوى معين من التجلط وبعد الحمد لله الله سلم بنتي وطلعت بخير
يعني مب شرط إن دكاترة المستشفيات الخاصة هم اللي يعرفون ودكاترة حمد لا
في مستشفى حمد دكاترة على مستوى من الكفاءة حرام الواحد ينكرها
وإحنا كنا نروح المستشفى الأهلي على أساس عن الزحمة ونبي نخلص بسرعة بس اللي لاحظته في المرات الأخيرة إن عندهم زحمة وايد ومايدخلون الا بالغصب لأن ماعندنا تأمين صحي ويحاولون يحولونا للعيادات اللي عندهم هذا طبعا غير المبلغ الكبير اللي يندفع وياليت بفايدة

[رجل الجزيرة]

انا لي تجربة .. نزلة معوية تسمم وحطوني بالإقامة القصيرة..بلفيت بيعالجوني بالمعذي وبعض الادوية ولابة نتيجة
المهم طلعت منهم ورحت لمستشفى الجزيرة عند د. حمدي ..عمل لي تصوير سونار للباطنية من معدة وكبد وغيرة وشرح لي الحالة واعطاني العلاج المناسب من مضادات ولله الحمد والمنه خفييت
مستشفي حمد حتى مضاد ما اعطاني!!!
بس فية اهتمام بقسم الولادة والقلب لكن تبقى المشكلة ببعض الممرضين والدكاترة في التعامل والتشخيص الدقيق للحالة


وللآمانة من زمااان اختي الصغيرة جاتة ضربة في عينها ما كان في دم بس سبحان الله تغير لون السواد بالعين الى اخضر غااامق عالزيتي غريب زي كدمة كذا ودينها مستشفى حمد الطورارئ وشافها طبيب كحالة طارئة اظن كان قطري ملتحي اظن ان ماخاب ظني د. فهد القحطاني ،،، فيها قحطاني على ما اذكر:)
وطمنا حتى انة هذا شي عادي مثل لما الجلد تصيبة جرح او كدمة وامورها إن شاءلله طيبة يعني يعطي كلام يطمن واعطانا علاج بعد زين
وفعلا الحمدلله الله سبحانه وتعالى من عليها بالشفاء على يد هالدكتور وردت عينها مثل قبل باللون والشوف


إذا هو قصير ولابس نظارة فهذا الدكتور فهد
وإذا هو طويل شوي وعريض فهذا: الدكتور عمر القحطاني وإثنينتهم إستشاري العيون.
وهم نعم الأطباء والدكتور: حمد القمرا والنعم به.