شرايكم في عروض ريجنسي للسفريات والسياحه

[الاستاندر]

السلام عليكم
شحالكم شباب ومبارك عليكم الشهر
شباب انا شفت في عروض حق ريجنسي السفر شامل السكن في فندق خمس نجوم
في حد جرب وهل في اشياء ورى هالاعلان يعني الاعلان مب كامل واسافر وانصدم هههههههه
اذا حد جرب يعطيني خبر
لان شفت في عروض السكن مع السفر وانا ابغي اروح شهر عسل
ومحتار بين كذا مكان عرض ماليزيا وتايلند وتركيا حلو
اذا حد جرب اتمنى يفيدني

[آلملآزم]

ماعندي خلفيه عن عروضهم وماقد جربتها وان شاء الله الاخوان والاخوات يفيدونك
وبالمبارك مقدماً أخوي

[الاستاندر]

الله يبارك فيك اخوي وماقصرت اسعدني مرورك

[قطريه ماركه]

اي عروضهم حلوة

روح و توكل على الله

و مبروك مقدما

[NINA RICCI]

عرررروضهم فاشله الصراحه ..

السبب / اتصلت لهم تلفوون وكنت ناويه على ميونيخ او لندن وعطوني اسامي فنادق خمس نجوم والسعر ممتاز طبعا .. وقلت لهم اوووكي الحين بنجيكم نحجز , ويووم رحت طلع كل شي كلام في كلام .. يقوولوون لي فل .. وقمت غيرت البلده ( مع ان كلامهم فالتلفووون شي ثاني ) واخترت تركيا وقال لي بصريييح العباره يوم توهق : مااافي حجوزات اصلا كلشي فل لاتشوفين جدول العروض .. !!!!!!!!!!! انصدمت الصراااحه .. يقول لي المتوفر بس الخليج ؟؟؟؟؟؟؟
بصرااااااحه هاي المررره الثانيه اللي يسوونها ...
وخااصه شهر عسل احجز فنادق مضمونه وبدووون العروض ..

[AL-MAYSTRO]

الاعلانات توهق وخرطي

يعني احجز للفنادق من بوكنق اضمن لك

اعرف واحد شخصيا معرفتي فيه .. حجز من احد المكاتب السياحيه (( المعرووووفه ))
وكان العرض شامل رحله الطائره ذهاب وعوده + السكن فالفندق 5 نجوم لمده تقريبا 8 ليالي
بمبلغ وقدره ..
وتمت الرحله والوصول للفندق والسكن ,, وبعد الخروج من الفندق للجيك آوت والعوده للمطار
تفآجأ بالرسبشن يخبره عن المبلغ :eek5: انه مش مدفوع ,, ووقتها كان المكتب مغلق لانه
اتصل ولا يوجد رد ..!! ودفع مبلغ السكن ل 8 الليالي التي قضاها فالفندق لاحول ولا قوة ..
وعندما رجع للدوحه من المطار دايركت ذهب الى المكتب وهددهم برفع شكوى عليهم لانهم
وضعوه في موقف لايحمد عقباه ودفعوة من خلال الفيزا كارت لانه وضعها للضرورة ....
وهو محتفض بأوراق رسميه تثبت ما اتفقوا عليه ..

والخطأ من المكتب لم يودع المبلغ لحساب الفندق .. وكان الضحيه الشخص ..
نتخيل لو انه لايملك المال الكافي للفندق ,, او اذا كان مع عائلته ,,! ماذا سيفعل

ولكن قام المكتب بتعويضه بتذكره على درجه رجال الاعمال ذهاب واياب لاي منطقه في الخليج العربي يختارها
وقام ايضا بسداد مبلغ فيزته الائتمانيه لرضاء العميل ..!

يعني لو تحجز الفنادق بنفسك من موقع معتمد لحجوزات الفنادق

وبالتوفيق

[آنــه]

شوف انا جربت من مكتب سفر ومن موقع بوكنق
الاثنين عباره عن حجوزات عبر الانترنت

واثنينهم خرطي ههههه انت لو بتحجز من الاثنين سو اللي بقول لك عنه
انت عليك تأخذ كل الاوراق معاك وحتى الفلوس اللي دفعتها وانسحبت من حسابك
و اتصل شوف حجزك قبل لا تروح اوكي ولا لا وبعدها روح وانت متأكد ان الفندق لك فيه حجز وفلوسه مدفوعة من والى يبقى بس فلوس الأكل او اللاندري الاكسترا تشارج للغرفة

والله يتمم لك و يوفقك ويكتب لك الخير كله

[بحار]

هلا اخوي , ومبارك عليك الشهر
بخصوص عروض رجنسي كلها كذب في كذب
جرب اختارلك اي من العروض بدون ما تغير شي يعني انك تاخذ العرض مثل ماهو
يبدا بالاعذار ويقولك الموظف عن الموسم وتغيير اسعار شركات الطيران والضرايب
مع ان العروض سارية من 1/7 لين 30/8/2012 يعني جديدة ما يمديها تتغير بهالسرعة

[بحار]

والله انا نفس الشي يوم شفت العروض كلها غير واضحة
حجزت عن طريق بوكينك وتاكدت من الحجز عن طريق التلفون اسرع وارخص بوايد
والكومشنات الي ياخذونها انت ابدا بها ، والفلوس كل الفنادق ما ياخذونها الا يوم وصولك

[حاملة المسك]

احجز عن طريق سفريات المتحده اللي في سوق الغرافه انا صار لي سنة اتعامل معاهم ومرتاحه جدا صدق وامانه واسعاره معقولة وقريبه من اسعار بوكينق

[صغيرون قطر]

مرحباً
نصيحه مني روح سفريات اليه فرع شارع المطار التجاري
أرخص من ريجنسي

روح حق واحد اسمه شيراز او أسيل للعلم تقدر تشوف عندهم صور الفنادق اللي انت تبي تحجز عندهم

انا مجرب وللعلم هم متخصصين في شرق اسيا خاصه ماليزيا وتايلندا
وانا مجرب عندهم مرتين

روح وشوف الأسعار وقارنهم مع مكاتب السفريات الثانيه

للعلم مكتبهم ثقه وعندهم فرع في بانكوك

التجربة خير برهان

تحياتي

[الاستاندر]

تسلمون شباب على ردودكم الطيبه
وعلى نصايحكم
قررت اني احجز بالبوكنج والطيران بحجزه من ريجنسي
لاحظت ان عرض رجنسي التذكره مع السكن السعر افضل بمراحل
بس خوفتوني هههههههههههه

[saif-q6r]

مانصح بهالعرض

[hasss1969]

مثل ماتفضلوا الاخوان وقالوا احجز مباشرة وبدون وسيط...والافضل تدخل موقع الفندق اللي تحب تسكن فيه وتحجز بنفسك ونفس الشيئ لشركة الطيران...انا صار لي 3 سنوات مادخلت مكتب سفريات كل حجوزاتي عن طريق النت وكلها حجوزات مؤكدة ..

[captin]

اتركهم عنك

مبروك العرس مقدما

انت حدد وين تبي تروح تايلند او ماليزيا او تركيا وبعد ما تحدد الدولة حدد المدة مثلا 10 أيام
احجز الطيران اول شي بتاريخ الذهاب والعودة , وبعدها اختار المنطقة هل تبي العاصمة مثلا او منتجعات للاسترخاء .

اذا رايح شهر عسل يفضل انك تروح المالديف او سيشل او جزيرة بوكت والحجز سهل من خلال مواقع الحجز بالنت او مواقع الفنادق مباشرة ادخل على موقع الفندق بتلقى كل المعلومات عن الفندق والموقع والخدمات وأنواع الغرف

دامك شهر عسل خلك بعيد في منتجع ودلع نفسك ما بين سبا ومساج واسترخاء على البيتش وذاك الأكل الزين ولاحق على سفرات السياحة والتسوق.

[هارودز]

الافضل تحجز فنادق بنفسك ماعليك من العروض كلها كلام فاضي

[ساس الوفا]

انا اول يوم رمضان رحت لسفريات ريجنسي وبالتحديد الفرع اللي في الوكره عند المصري محمد لاني مكلمه فالتلفون وفرش لي الارض ورد وقالي سعر التذكره لتركيا 2250 ( على التركيه ) ولين رحت ابي ادفع قالي مافيه حجز عوده بالتاريخ اللي تبيه اول شي وثاني شي الفنادق اللي بنسكنك فيها فل لانه احنا مودين قروب سياحي ..
دخلت موقع بوكينغ وضبط اموري وباخذ التذكره على القطرية ب 3020 وودي هلي وانا مرتاح ولا اتلته

والله يوفقك ويتمم عليك بخير

[naif3]

كلام جرايد وع الواقع شي ثااااني

[الاستاندر]

والله كلكم خرعتوني
وانا للحين ماحجزت قلت بصبر شوي
بس خفت والله

[معماري قطري]

سفريات ريجنسي وغيرهم الكلام المهم يكتبونه صغير ما يبين

ويقولون لك العرض للشخص في غرفة مزدوجة يعني لو عندك 4 إضرب العرض في 4 ولو عندك 3 لازم يكون معاك رابع ولا تدفع قيمة 2 للغرفة، وتعال للضرائب وغيره والحجوزات المباشرة وايد أوضح من هالتلفيق .. حتى عروضات بانكوك عن طريق سفريات أُوروبا مره حصلت شقة فندقية بسعر معين وفي النت حصلتها بنص السعر بالضبط.

[Cooki]

انا جربت احدى هالعروض فاول مره اروح عمره من 6 سنوات .. الصراحه قعدنا فابراج زمزم وغرفنا مثل ماطلبنا وسعر التذاكر كان وايد معقوول وارخص من الحجز العادي .. 3 اياام من احلى اياام العمر وبسعر معقووول
على ما اذكر كان مكتب حملات حج وعمره او شي جذيه ...
مب كل العروض تطلع خرطي ومقصه بس انت خلك ذكي واسال واستفسر عن كل شي ..

الف مبروك مقدما .. واجازه سعيده

[المسعف]

اي عروضهم حلوة وايد
بالتوفيق انشاء الله

[السهم الملتهب]

شوف العروض اللي في موقع طيران القطرية اللي في holidays أضمن وأحسن ومجرب

لا رجنسي ولا سفريات ولا كلام فاضي .

خلك على الرسمي والمضمون والحكومي عندهم عروض حلوة أختار البلد والتاريخ

وأن أعجبك عروضهم توكل على الله لا تردد .

وهذا موقعهم :

http://www.qatarairways.com/qa/en/homepage-holidays.page

[blueZircon]

بعض المرات سفريات ريجنسي اسعارها ارخص من الحجز عن طريق بوكينج ومواقع النت ، دايم انصح الكل ان قبل مايدفع يشوف اسعار السفريات واسعار النت ويقارن . وعقب يقرر ، الاسعار تختلف وتتغير علا حسب الموسم واي وقت بالسنه والبلده.

[جرير]

اقطع الشك باليقين . . . خذ لك زياره لسفريات ريجنسي

وتاكد بنفسك . . . كلها ربع ساعه