ابي المشوره من اهل الشور

[ام_عيالي]

انا مواطنه قطريه وحابه اعدل وضع اسرتي الاقتصادي فدشيت دوره تجاريه في دار الانماء الاجتماعي وقالولي اختاري مشروع واعملي له دراسة جدوى وهم بيعطوني قرض حسن وبالفعل خلصت الدوره ومن ثاني يوم من التخرج عملت الدراسه جدوى لصالون نسائي من الالف الى الياء بس عندي خوف من الاقدام على المشروع من ناحيه القرض واقصاده و الفيلا والعاملات والزباين ولا ادري شوروا علي ياهل الشور وش تنصحوني فيه من ناحيه الفيلا والعاملات والخامات والزبائن والموقع والاسعار والخدمات المرغوبه طبعا عن طريق الخاص علشان تاخذون راحتكم في الكلام :victory:
وشكرا

[ام_عيالي]

اربعين مشاهده ولا رد مش معقول انا مسجله في هذا المنتدى بالذات لان الاعضاء مشا الله عليهم ما يخيبون من استشارهم
معليه التمس لكم العذر يمكن لاني جديده
بس هذا ما يمنع انكم اتشورون علي بالسلب ولا بالايجاب ولا وش رايكم ؟؟؟؟؟

[ذيب ازغوى]

اختي الصالونات وايد في قطر لاكان لودج تدخلين فيه وتتميزين عندج طريقتين
1- ان تكون اسعارج غير عنهم وان يكون اقل منهم وخاااصه في البداايه

2- ان يكون الموقع في المناطق اللي مافيها نفس مشروعج وايد

وطبعا اهم شي التعامل الطيب وانج تيبين ناس يعاملون الزبون معامله عدله

والله يوفقج

[معماري قطري]

والله الصالونات النسائية منتشرة حتى في المناطق السكنية

وأي مشروع ولو مدروس بأكبر دقة لا بد ووقت التنفيذ تشوفين ثغرات ومساويء ومحاسن وتعدلين عليها مع إشتغال المشروع .. وشغل الصالونات سواءً رجالية أو نسائية ماشي وله حاجة كبيرة خصوصاً مع زيادة السكان ... نصيحتي حاولي تشوفين بيت أجاره معقول وتوكلي على الله والله يوفقج إن شاء الله

[ام_عيالي]

تسلمووون والله يعطيكم العافيه
اما عن الاسعار انا دارستها عدل وراح يكون فيها تخفيظ عدل
اما من ناحية البيت الا الحين ما حصلت والي منكم يعرف منطقه محتاجه صالون وكافي شوب نسائي يقولي والله تعبت وانا ادور

[جلاد_قطر]

اختي العزيزه ..

حاولي تفترين عند المناطق اليديده واللي توها تنبني ومافيها وايد خدمات عالحلاليق والصالونات والدكاكين

[ام_عيالي]

مثل اي مناظق قصدك ؟ تعرفون مناظق جديده حوالين او في الريان
اكون شاكره

[جلاد_قطر]

والله الريان ماعندي فكره .. ممكن تشوفين صوب الخريطيات والناصريه او حتى المنطقه جنب المستشفى الجديد فالوكره .. لان هناك قاعدين يبنون مول كبير (ازدان مول) والمنطقه لها مستقبل

[ام_عيالي]

اتمني من اخواني اللي عنهم فكره عن المناطق الجديده حول الريان يطوني خبر ولا تبخلزن علي باي نصيحه

[Bo AbduRhman]

انا مواطنه قطريه وحابه اعدل وضع اسرتي الاقتصادي فدشيت دوره تجاريه في دار الانماء الاجتماعي وقالولي اختاري مشروع واعملي له دراسة جدوى وهم بيعطوني قرض حسن وبالفعل خلصت الدوره ومن ثاني يوم من التخرج عملت الدراسه جدوى لصالون نسائي من الالف الى الياء بس عندي خوف من الاقدام على المشروع من ناحيه القرض واقصاده و الفيلا والعاملات والزباين ولا ادري شوروا علي ياهل الشور وش تنصحوني فيه من ناحيه الفيلا والعاملات والخامات والزبائن والموقع والاسعار والخدمات المرغوبه طبعا عن طريق الخاص علشان تاخذون راحتكم في الكلام :victory:
وشكرا

بالتوفيق اختي الكريمة (ام_عيالي)

شي طيب ان تفكرين تكونين لج مشروع

خطوة جيدة انك اخذتي دورة في دار الانماء الاجتماعي

اول شي تاكدي من قيمة القرض اذا كان اعتمادج على القرض بشكل كبير لان يمكن ما يغطي ميزانية المشروع

ثانيا انتبهي لدراسة الجدوى من السهل ان اخذ قالب واعبي البيانات واطلع لي بدراسة الجدوى

ولكن هل هي مقاربة للواقع ام مبنية على افتراضيات

ثالثا لا تحصرين نفسك في مشروع واحد فكري في اكثر من مشروع واختاري الأنسب

هذي نصايح عامة

اما بالنسبة لمشروعك (صالون نسائي)

اولا: احرصي على ان يكون المشروع خالي من المحرمات و المحاذير الشرعية وذالك بسؤال اهل العلم الشرعي المعتدلين.

ثانيا: دراسة المشروع من كافة جوانبة ومحاولة معرفة اسراره وخباياه وذالك بسؤال اصحاب الخبرة في المشروع.

ثالثا: تحديد الشريحة المستهدفة.

رابعا: معرفة نقاط القوة و الضعف.

خامسا: التميز في شي (باب الابداع مفتوح).

سادسا: وضع خطة عمل وخطة تسويقية للمشروع.

سابعا: التوكل على الله والسير في الاجراءات.


وبعد في اشياء كثير لازم تنتبهين لها لا يتسع المجال و الوقت لذكرها

وفقكِ الله وما خاب من استشار

[السيليه]

الله يوفقك اختي مشروع ناجح ان شاء الله

[رحال الدوحه]

انا مواطنه قطريه وحابه اعدل وضع اسرتي الاقتصادي فدشيت دوره تجاريه في دار الانماء الاجتماعي وقالولي اختاري مشروع واعملي له دراسة جدوى وهم بيعطوني قرض حسن وبالفعل خلصت الدوره ومن ثاني يوم من التخرج عملت الدراسه جدوى لصالون نسائي من الالف الى الياء بس عندي خوف من الاقدام على المشروع من ناحيه القرض واقصاده و الفيلا والعاملات والزباين ولا ادري شوروا علي ياهل الشور وش تنصحوني فيه من ناحيه الفيلا والعاملات والخامات والزبائن والموقع والاسعار والخدمات المرغوبه طبعا عن طريق الخاص علشان تاخذون راحتكم في الكلام :victory:
وشكرا


السلام عليكم ورحمة الله وبركاته ،،
هلا وغلا إختي وتقبل الله صيامكم ويوفقكم لعمل الخير ..

بخصوص اجراءات صالون نسائي ، أشكر الجميع
على شورهم وزين ما سويتي يوم خذتي الدوره - الكورس - عند
دار الانماء الاجتماعي بس ما عرفت شنو نوع الكورس
اللي خذتيه .. ؟؟

من كم يوم حسب تخصصي سويت صالون جديد
حق إخت شرواج وخذت فيلا فالعزيزيه وطبعاً حسب الاجراءات الجديده لكل
التراخيص التجاريه لازم نروح الدفاع المدني وركبت حسب طلبهم
( كاشف الحريق + طفايات الحريق )
الموضوع ياخذ وقت شوي اختي فالاجراءات .

وبعد ما تخلصين السجل التجاري راح تأجرين
فيلا لانها مسموحه فالمناطق السكنيه حسب القانون الجديد للرخص ، وبعدها
بتحصلين على قيد المنشأة وبوجود
- السجل التجاري والرخصه التجاريه وقيد المنشأة -
راح تقدمين على طلب العاملات والموظفات من ادارة
العمل حطي فبالج تقريباً شهر من الاجراءات .

وبخصوص العاملات طبعاً لازم تجهزين لهم
سكن والتجهيزات تحتاجين مبلغ لما تسوين كل هالتجهيزات اللازمه والدعايه
حق الصالون ويصير عندج زباين ، وتأكدي الأرزاق مقسمه واطلب
من الله يوفقج ويرزقج من فضله .

وأتمنى كل هالاشياء عندج فالدراسه والشئ اللي
يكون صعب فالبدايه ( الايجار )
كل ما حصلتي ايجار رخيص ومناسب بيكون احسن وطبعاً هالشئ
يعتمد على مالك الفيلا وموقع الفيلا والاحسن تشوفين منطقه أو
فريج ما في صالون نسائي قريب ومحتاج خدمة صالون نسائي .

أما بخصوص الخدمات هالشئ يعتمد عليج
انتي وادارتج حق الصالون وحسن المعامله واهم الشئ الدعايه وتوفير
الخدمه المطلوبه بسعر يناسب الجميع ونشوف أراء الاخوات في هالموضوع
من ناحية الخدمات .

السموحه طولت عليج واتمنى قدرت افيدج حسب خبرتي المتواضعه ، وأي
استفسار وخدمه أنا فالشوفه إختي وربي يوفقج ويوفق الجميع ..
آمين

أخوكم : رحال الدوحه

[ام_عيالي]

مشكور اخوي رحال بس فيه استفسار عن سكن العملات شلون مايصيير يسكنون داخل الصالون ؟؟؟؟؟

[كركم]

الموقع ثم الموقع ثم الموقع

هو اللي يحدد نجاح مشروعج او فشله,,,ولازم لازم لازم تستعينين بوحدة لها خبرة في اداراة الصالونات على الأقل سنتين

[رحال الدوحه]

مشكور اخوي رحال بس فيه استفسار عن سكن العملات شلون مايصيير يسكنون داخل الصالون ؟؟؟؟؟


هلا وغلا اختي الغاليه وتقبل الله صيامكم وطاعتكم وربي
سبحانه يعينا واياكم على صيام وقيام الشهر الفضيل ..

آمين

بخصوص السكن لا يجوز الجمع بين السكن والعمل في نفس المكان وأشور
عليج اختي الغاليه تسألين عن الشروط من ادارة مراقبة الصالونات التابع
للبلديه حسب المنطقه والاخوات ( موظفات الاداره )
بينورونج بكل الشروط اللازمه حق الصالون .

وربي يوفقج ويوفق الجميع

[راسي براسك]

انا اقول تغيرين فكرة المشروع !!

لان فعلاً الصالونات انتشرت بكثافه ..

والحين فيه ناس من كثر ماتوهقوا قاموا يبيعون الرخص التجاريه مايبونها ..

شوفي لج مشروع ثاني جديد ومتميز ومنتج

[ام_عيالي]

تسلم اخوي راسي بس انا مو صالون بس انا بحط اضافات دينيه واداريه وخدميه للصالون بس على مستوى متواضع لين اوقف على ارجولي ان شا الله وبعدها اتوسع بحيل الله القوي بمجموعة صالونات مختلفه كليا عن المفهوم السائد لدى الناس بس انتوا ادعولي