كيف يمكن حل مشكلة المياه الجوفية؟

[(عبدالله)]

السلام عليكم وحمة الله

بدأ المقاول عندي بالحفر في منطقة شمال دحيل فطلعت لي مشكلة المياه الجوفية

المقاول أشار علي بحل، إن نسحب المياه بتناكر وعمل تصريف ببئر ارتوازية حتى اكتمال صب الخرسانات مرحلة مرحلة بسمك 60سم وسد المنبع نهائياً وبتكلفني هالعملية 80 ألف ريال إضافية.
الاستشاري تل لي إن الخريطة الإنشائية عندي قوية وبتمنع تأثير المياه الجوفية

أو

آنتظر أشغال تنفذ مشروع الصرف الصحي واللي ممكن يبدأ ويكتمل بعد سنة وبالتالي لازم أوقف البناء اللي بديته ونسوي مراجعة أسعار مع المقاول بعدين عند الاستئناف في حالة ارتفاع أسعار البناء


ممكن تفيدوني أهل الخبرة بارك الله فيكم؟

[qatara]

وبعد سحب المياه

برتجع تتجمع نفس الشي تحت البناء

قد يفيدك الاخوه المجربين

الله يوفقك

[Bo AbduRhman]

السلام عليكم وحمة الله

بدأ المقاول عندي بالحفر في منطقة شمال دحيل فطلعت لي مشكلة المياه الجوفية

المقاول أشار علي بحل، إن نسحب المياه بتناكر وعمل تصريف ببئر ارتوازية حتى اكتمال صب الخرسانات مرحلة مرحلة بسمك 60سم وسد المنبع نهائياً وبتكلفني هالعملية 80 ألف ريال إضافية.
الاستشاري تل لي إن الخريطة الإنشائية عندي قوية وبتمنع تأثير المياه الجوفية

أو

آنتظر أشغال تنفذ مشروع الصرف الصحي واللي ممكن يبدأ ويكتمل بعد سنة وبالتالي لازم أوقف البناء اللي بديته ونسوي مراجعة أسعار مع المقاول بعدين عند الاستئناف في حالة ارتفاع أسعار البناء


ممكن تفيدوني أهل الخبرة بارك الله فيكم؟



،
.

وعليكم السلام ورحمة الله وبركاته

إن شاء الله الأخوان واصحاب الخبرة يفيدونك اخوي (عبدالله)

وان شاء الله تحصل حل ابداعي ومبتكر غير مكلف وفعال

والله يعينك

.
.

[معماري قطري]

إخوي وضح المشكلة أكثر .. على أي عمق هذي المياه؟ هل حولك بنيان غير؟ هل لك خطة تسوي بيسمنت؟ هل كمية المياه كبيرة؟

وصعبة صراحة في هالوقت لا مطر ولا برد والماي يتبخر بسرعة من الحرارة، ومشكلة المناطق القريبة من البحر إحتمال تكون مياه جوفية مالحة بحرية، انا تعلمت صراحة إني أتذوق ماء البنيان اللي يجيبه المقاول بعض المرات بعضهم يجيبون مياه آبار مليانة أملاح وتخرب البنيان والبلاستر، ،،

شوف جرب خل حد يتذوق طعم الماي إذا مالح المشكلة صعبة وبتكون فيه تسربات من مياه البحر مثل الصبخة، وحل المقاول بيكون أسلم وأأمن من حل الإستشاري بس بضرورة وضع حماية كاملة للأساسات، ولو يركب بايبات صرف تحت فيها فتحات لشفط الماء وتصريفة في بئر إرتوازي أفضل بس تحتاج دراسة للتصريف بواسطة إختصاصي، وتحتاج مكائن شفط خاصة تشتغل وقت إرتفاع منسوب المياه وتشفطها وتصرفها.

الحل الثاني في يد أشغال ومشروع الصرف الصحي غير نهائياً عن مشاريع تصريف المياه الجوفية الضحلة وحتى لو سووا أشغال مشروع صرف صحي ما يسمحون لحد يصرف عليه هذي المياه، مع إن المفروض يكون مشروع واحد يخدم الغرضين ونضيف عليهم تصريف مياه الأمطار، وأشغال علشان تسوي مشروع بسيط تاخذ سنوات تخطيط وبعد شكاوي الناس ويتنفذ المشروع بطلعة الروح وبأغلى سعر على الدولة مع العلم إن هذي المشاريع بسيطة ولا تحتاج لتعقيد زائد.

[النهار]

الله يكون في عونك من الدحيل هذه المنطقه معروفه بكثرة الدحول لايكون ارضك من ضمن هذه المنطقه الدحيل سميت بهذالاسم لكثرة الدحول فيها

[الخزرجي قطر]

اعتقد المشكله ممكن حلها بس يبيلك استشاري ومقاول
لمعالجة المشكله بس مكلفه لصاحب البيت تكاليف اضافيه
الله يعينك ويوفقك ان شاءالله

[ameeer3]

اخوي خذ عينة من هذه المياه وافحصها عن طريق ا وزارة البلدية الي على خط بوهامور وبالتحديد صوب القمسيون الطبي علشان تتأكد من نوعية المياه الجوفية وبعدين حل المشكلة وللعلم واحد من الربع ارضه في أدحيل وطلعت له نفس المشكلة وقبل ليحلها فحص نوعية المياة عن طريق المختبر نفسه وبشوف شلي سواه عقب وبرد عليك واللهيتمم لك على خير

[(عبدالله)]

:: qatara ::

:: Bo AbduRhman ::


ويعينكم ويوفقكم أجمعين... جزاكم الله خير على الاهتمام
بإذن الله تتيسر الأمور



:: عبدالله ::

[(عبدالله)]

:: معماري قطر ::


مرحبا أخوي... جزاك الله خير على التوضيح

الحفر تم حتى عمق 3 أمتار على أساس إني بابني بيسمنت، حول الأرض الله يسلمك بيوت وعندي من الجهات الأربع فلل وبيوت شعبية نظراً لأن أرضي في زاوية فريج تطل بفتحة على الشارع 10 متر. كمية المياه تتزايد باستمرار... على كلام المقاول والاستشاري إن الماي فيه نسبة من الملوحة... والاستشاري يأكد لي إن في حالة وضع الصبيات مستحيل يدخل الماي أو يأثر على الأساسات..

الفترة هاذي قلت خلني أستشيركم وأستفيد من تجارب الأعضاء

والله المستعان

جزاك الله خير أخوي ما عليك قصور

::عبدالله ::





إخوي وضح المشكلة أكثر .. على أي عمق هذي المياه؟ هل حولك بنيان غير؟ هل لك خطة تسوي بيسمنت؟ هل كمية المياه كبيرة؟

وصعبة صراحة في هالوقت لا مطر ولا برد والماي يتبخر بسرعة من الحرارة، ومشكلة المناطق القريبة من البحر إحتمال تكون مياه جوفية مالحة بحرية، انا تعلمت صراحة إني أتذوق ماء البنيان اللي يجيبه المقاول بعض المرات بعضهم يجيبون مياه آبار مليانة أملاح وتخرب البنيان والبلاستر، ،،

شوف جرب خل حد يتذوق طعم الماي إذا مالح المشكلة صعبة وبتكون فيه تسربات من مياه البحر مثل الصبخة، وحل المقاول بيكون أسلم وأأمن من حل الإستشاري بس بضرورة وضع حماية كاملة للأساسات، ولو يركب بايبات صرف تحت فيها فتحات لشفط الماء وتصريفة في بئر إرتوازي أفضل بس تحتاج دراسة للتصريف بواسطة إختصاصي، وتحتاج مكائن شفط خاصة تشتغل وقت إرتفاع منسوب المياه وتشفطها وتصرفها.

الحل الثاني في يد أشغال ومشروع الصرف الصحي غير نهائياً عن مشاريع تصريف المياه الجوفية الضحلة وحتى لو سووا أشغال مشروع صرف صحي ما يسمحون لحد يصرف عليه هذي المياه، مع إن المفروض يكون مشروع واحد يخدم الغرضين ونضيف عليهم تصريف مياه الأمطار، وأشغال علشان تسوي مشروع بسيط تاخذ سنوات تخطيط وبعد شكاوي الناس ويتنفذ المشروع بطلعة الروح وبأغلى سعر على الدولة مع العلم إن هذي المشاريع بسيطة ولا تحتاج لتعقيد زائد.

[(عبدالله)]

:: النهار ::

الله المستعان .. بإذن الله تتيسر

:: الخزرجي قطر ::
إي والله وهذا اللي صاير... ويبي لي أتأكد من نسبة نجاح الحل 100% حتى أقرر أدفع التكاليف الإضافية ولا لا... الله يعين.

:: ameeer3 ::
بكلم المقاول بهالخصوص... جزاك الله خير



:: عبدالله ::

[بن غيث]

يا الغالي
في شركات متخصصة في هذا المجال
وليست شركات المقاولات التي تحل المشكلة
شركات تسمى .. معالجة المياه الجوفية
على ما اذكر شركتين في قطر
تقابلت معاهم في معرض

[معماري قطري]

:: معماري قطر ::


مرحبا أخوي... جزاك الله خير على التوضيح

الحفر تم حتى عمق 3 أمتار على أساس إني بابني بيسمنت، حول الأرض الله يسلمك بيوت وعندي من الجهات الأربع فلل وبيوت شعبية نظراً لأن أرضي في زاوية فريج تطل بفتحة على الشارع 10 متر. كمية المياه تتزايد باستمرار... على كلام المقاول والاستشاري إن الماي فيه نسبة من الملوحة... والاستشاري يأكد لي إن في حالة وضع الصبيات مستحيل يدخل الماي أو يأثر على الأساسات..

الفترة هاذي قلت خلني أستشيركم وأستفيد من تجارب الأعضاء

والله المستعان

جزاك الله خير أخوي ما عليك قصور

::عبدالله ::

هلا ومرحبا أخ عبدالله

يا اخوي إستشاريينا إسمح لي على هالتعبير يسوون أقل ما يمكن وياخذون أكثر ما يمكن، ولو واجهتهم مشكلة يقولون لك لا تهتم .. الخرسانة يا اخوي فيها فجوات صغيرة مثل الإسفنج لو تشوفها بميكروسكوب، وتشفط الرطوبة شفط مب بس الماي إلا في حالة عزلها عزل جيد بعازل مائي سميك، فهذا ممكن يدوم عمر .. بس بيكلفك وصعب يسوونه بنظافة ودقة وبدون ما يتسببون بتشققات فيه يدخل منها الماي.

انا فهمت من كلامك إن الأرضية بتكون كلها مصبوبة خرسانة، بس من رايي خرسانة محمية خصوصاً إن الماي المالح ياكل حتى الخرسانة، ولازم تحط حديد مغلف .. الأخضر، وانا باقول لك الصح وباقول لك أقل المطلوب.. وخلني أبدأ بالصح.

الصح تتمدد بايبات صرف صحي بمواصفات خاصة تحت أرضية البيت بمسافة معقولة خلنا نقول نص متر وتكون محمية وفيها فتحات لتصريف المياه، وتكون مكملة على داير أسفل حايط البيت، وبعدها تندك الأرضية زين وينحط بلاستيك سميك وفوقه ينحط العازل المائي الأسود الرولات بسمك 4 أو 6 ملم، ويكون ملحوم بلحام حراري زين في الوصلات، وشوف شركة المسند بتسويه لك بسهولة، وبحيث تكون الأطراف زايده حق ينشبك معاها العازل اللي حق الجدار، وطبعاً مهم يندرس سمك ارضية البيسمنت صح ما يخسرونك بخرسانات ما لها داعي وعارف بيقولون لك الحديد العادي أحسن لأنه يمسك مع الخرسانة،،

من رايي عوض ضعف الخرسانة وقلة الحديد بالحماية ضد الرطوبة، وخل الخرسانات وكميتها مدروسة صح، انا واجهتني المشكلة ذي من حول 13 سنة في عمارة من 4 أدوار وما فيها بيسمنت بس إضطرينا نسوي القاعدة قطعة وحدة وبسمك على ما اعتقد 30 سم لكن مكان الحوايط السمك كان يزيد، وعملنا الحماية بس بدون البايبات مالت الصرف والحمد لله للحين ما فيها مشاكل.

بعد صب الخرسانات حسب التصميم نجي للأطراف ونكمل عليها مع شبك الحديد اللي حق الحوايط مع الأرضية في الأطراف، ونكمل العازل بلحام حراري على الجدار اللي بيكون تحت الأرض، وهنيه أنصحك بعمل بلكونة نازلة في مستوى البيسمنت تنفتح على الحوش .. يعني جزء الحوش اللي مقابل هذي البلكونة يكون نازل للإنارة الطبيعية وبحيث يكون فيه مخرج ثانوي من تحت للحوش، وطبعاً تحت بعد الحايط بيكون داير حوله بايبات الصرف اللي بفتحات ينزل عليها الماي سواءً من جنب الحايط أو من تحت كمياه جوفية وتنعمل منهولات خاصة فيها ما يسمى ببرميسبل بامب، وهذي تشتغل تماتيك في حال تتعبى هذي المنهولات ماي وتصرف الماي أما على تصريف حكومي أو خزان تحت الأرض أو حفرة إمتصاصية.

والحل الأسهل عمل كل شيء كحماية بدون بايبات الصرف والمنهولات، وبقى شيء مهم الجدران الجانبية اللي تكون تحت الأرض ينحط حولها حجارة ناعمة مكسرة ووراها ينحط بلاستيك سميك ما يسرب تراب ولا ماي، وبعدين يندفن الحوش، والسبب إن الدفان برمل أو مواد صغيرة كالرمل يسمح بخاصية تجمع الرطوبه جنب الحايط ودخولها للبيسمنت، وهذي الطريقة تنعمل في مناطق كثيرة من العالم اللي عانى من هذي المشكلة، وهي سهلة جداً، وأذكر واحد من الإخوان بنى ست بيوت كبار في منطقة صخرية ما تتوقع فيها ماي ولا طلعت رطوبة وقت البنيان، لكن بعد فترة وقبل لتنسكن البيوت تسربت مياه للأرضية اللي في البيسمنت بإرتفاع حول 20 سم وإضطر يسوي حلول وحفر وشغل متعب وغير مضمون لأن الرطوبة خلاص تغلغلت في الأساسات ومسئلة وقت وينتهي عمر البناء الإفتراضي.

مع تمنياتي لك بالتوفيق ولا تنسى الوقاية خير من العلاج وإعقلها وتوكل وحول هالكلام للإستشاري، وإذا يضمن لك خله يعطيك ضمان مكتوب لعشر سنين.

[(عبدالله)]

:: معماري قطر ::

جزاك الله خير على الشرح الكافي الوافي

تناقشت باللي قلته مع المقاول والاستشاري

واثنينهم قالوا لي إن مواصفات كميات ومواصفات الخرسانة في التصاميم
تغني عنها واثنينهم أكدوا فعاليتها 100% لأن الصبية عندي 10سم نظافة (قبلها مادة تجفف طين الأرض ما أذكر اسمها) وفوقها عازل وبعدها صبية جامدة 60سم، كان هدف المصمم فيها إن الأرض محوطة من الجهات الأربع بفلل وبغى يحافظ على سماكة الإنشاء

عموماً أنا كمالك وعدم وجود خبرة عندي في هالأمور ما قدامي إلا ثقة الاستشاري والمقاول وتأكيدهم لي بالطريقة اللي يتبعونها.

والله المستعان