توجهات لاغلاق اكثر من 7000 محل!!!

[الدوحه1]

وزارة التجاره تقترح اغلاق اكثر من 7000 محل في الفرجان والمناطق السكنيه..
واقترحت الوزاره عدم تجديد الرخص لهذه المحلات بعد تاريخ 15/9/2012 !!!!

المصدر:
http://www.ameinfo.com/7000-stores-closed-qatar-308051?n=country_Qatar

[استغفرالله]

ان شاء الله يسكرونهم ويفكونا من تعطيل السير في الفرجان

[ولد الشحانية]

ههههههه عشان يجبرونا علي محلات لهم وأسعار محدده من قبلهم
الله كريم

[@الأدعم@]

احسن والله

[qtr qtr]

صعبه لان هالمحلات جاتهم امر من الامير الله يحفظه بعدم اغلاقها

[ولد الشحانية]

ان شاء الله يسكرونهم ويفكونا من تعطيل السير في الفرجان

صدقوني بكره راح ناكلها

[ANONYMOUS]

عيل كل ماحتجت خيط ولا ابره تطق مشوار الجمعيه ولا محطة وقود

قام سوق وقود

[البدع]

المكرمة الأميرية انتهت من ٢٠٠٤

وكل سنة يتم تجديدها

والله حرام إغلاقها

الدخل المحدود مستفيدين منها

[بن غيث]

راح تسبب مشكلة وضغط كبير على المجمعات

[بوخالد911]

حرام
ناس تسترزق من وراها

الله كريم

[ANONYMOUS]

راح تسبب مشكلة وضغط كبير على المجمعات

شوف الموضوع بنظره اقتصاديه تجاريه

راح تربح وقود والميره و بروه

[love life]

لا إن شاء الله ماسيكرونها كل شئ الحين قريب وأحسن

[بن غيث]

شوف الموضوع بنظره اقتصاديه تجاريه

راح تربح وقود والميره و بروه

نظرة اقتصادية احتكارية

[airbus]

تقترح

[ANONYMOUS]

نظرة اقتصادية احتكارية

حلو

الحين بديت تفكر نفسنا :p

[ANONYMOUS]

تقترح

مافهمت اش تقصد

بس اقترح ان ع الاقل يحطون مواصفات و مقاييس لمحلات الفرجان واللي مايطبق يسكر محله .. هذا ان كان يسعون فعلا للتنظيم

اما قطع الارزاق هذا ماله داعي

[غايه الطواش]

الصراحه قرار مهب حكيم
وخاصه الدكاكين
يعني كل ماحتجنا غرض شغلنا السياره ودقينا سلف ...
مثل هالمحلات تخدم الحي او الفريج الي هي في مثل مخبر ..دوبي..دكان

[عاهد بن علي]

:anger1:لا يكون محلي معاهم !!!!!!!!!!!!!!!!!!!!!!!!!!!!!

[النهار]

والله حرام خلق تترزق من وراء هالمحلات يعني لازم يأجرون من بروه
ان بغيت مطعم تحصله حلاق بعد سوبر ماركت بيب فيتر كل الي في بالك موجود
اذا سكروا المحلات والله نتلته عدل

[غير عنهم]

اذ هالكلام صحيح قرار خاطئ لان الفئيه المستفيده ذوي الدخل المحدود كان صاحب البقالة او سكان الحي

[الحاقول]

المحلات موجوده في جميع فرجان العالم وحتى في الدول المتقدمه

بصراحه اقتراح مجنون وغير منطقي

[مساهم فنان]

في أوروبا بكبرها محلا ت في الفرجان اشمعنى في قطر تسكر ... هذي مفيدة جداً بعض الأحيان الصبح يبي مثلاً خبز من وين ايجيبه طبعاً من الدكان

[airbus]

مافهمت اش تقصد

بس اقترح ان ع الاقل يحطون مواصفات و مقاييس لمحلات الفرجان واللي مايطبق يسكر محله .. هذا ان كان يسعون فعلا للتنظيم

اما قطع الارزاق هذا ماله داعي

يعني نفس انت ماكتبت

اقترح ان ع الاقل يحطون .................


يعني اقتراح مب خلاص تم ومن الترايخ المذكور بيبدأ القانون

[عاشق ميونخ]

ان شاء الخبر مايكوووون صحيح

[فارس بلا جواد]

عيل
معصره مافي
حلاق مافي
دوبي مافي
خضره مافي
خياط حمود مافي
فيتري مافي
زقاير بالخش مافي
بيبسي مافي

كل شي بيغلى

الله المستعان

[qatara]

شي حلو يغلغون المحلات التي بوسط البيوت

لاكن الاحلى ان يرخصو على الشوارع الخارجيه للمناطق نفسها التي تزال منها هذه المحلات

لتكون هذه المحلات بمتناول ايادي الاهالي

كمثال واحد ضرب عنده بنشر يعني يروح له عشرين كيلو يصلحه وهو وسط البلد ؟!

وقس عليها باقي الاحتياجات الخفيفه التي لا تستدعي الذهاب لمجمع تجاري او جمعيه الميره

[nadeemy]

المكرمة الأميرية انتهت من ٢٠٠٤

وكل سنة يتم تجديدها

والله حرام إغلاقها

الدخل المحدود مستفيدين منها

كلام سليم
لكن السؤال ايش الحكمه من اغلاغها ؟

[(بوطلال)]

ماراح تغلق قبل 5سنين على الاقل

[بريق الحق]

محد مستفيد غير الهوامير

[SOONALL]

يعني لو ابي علبة ببسي اروح السوبر ماركت وبتكون العلبه بوقتها يمكن ريالين

[ll vip ll]

تجار مايشبعووون

حسبي الله ونعم الوكيل

[خزامئ]

يعي كل مابغيت خبز او حليب او حلوا حق الصغار اركب سياره واروح
الله لايبارك فيه من صعب على المسلمين وقطع رزقكم

[خليفـة]

الهدف انعاش المحلات الي بالمجمعات التجارية الكبيرة بكل انواعها
:)

الله المستعان على ما يصفون

خليفــة

[الجسراوي]

في فريجنا بقاله حق هندي هو يعترف

مدخوله الشهري فوق 300000 ريال

اشرايكم

يعطي الكفيل مقسومه 5000 ريال والباقي يوديه الهند

لا وايجار المحل مايتعدى 2000 ريال

[alsoq]

صراحة اللي اشوفه مستفيد من محلات الفرجان الهنود والبنغاليه القطري اجار 1000 ريال
لا وبعضهم ها اللي في المحلات نصابين خله يسكرونها والله بيرزق اهل قطر

[خزامئ]

حن مهوب عشان صاحب الدكان وبس هل الفريق هم المستفيد الاكبر
حارم عشان اشتري حاجه بصيطه اركب السياره واروح مجمع

[نجدي قطري]

هل هذا معناه بيسكرون كل محلات شارع المطار التجاري؟ ولا شارع آل شافي؟
ولا المقصود المحلات اللي لاصقة قي البيوت؟

[alsoq]

المشكله المحلات الصغيره فيه اشياء انتهت صلاحيتها وبيعونها ورقابه عليهم شبه معدومه
فا من الافضل للصحتك وصحه عيالك انه يكون الاشياء في مكان بارد ومرتب ما تستخسر صحت اهلك وعيالك في مشوار 5 دقايق
هذا انتوا لبغيتور تروحون قطعتوا مئات الكيلو مترات :):):)

[البانوش]

في أوروبا بكبرها محلا ت في الفرجان اشمعنى في قطر تسكر ... هذي مفيدة جداً بعض الأحيان الصبح يبي مثلاً خبز من وين ايجيبه طبعاً من الدكان

في اوروبا قوانين واسعار موحدة

عندنا القوانين يحطها رفيق على كيفة

حليب الاطفال كل دكان عندنا تسعيرتة مختلفة

[alsoq]

في اروبا اتحداك تحصل يبيعون بندول او اشيا طبيه في المحلات هنا يعطيك بندول صاقعه الحر

[chillis]

والله فايدينا وايد بدال ما نطق للسوبر ماركات الكبيره للاشياء السريعه

[وحيد-الشوق]

مسكين يالفقير :(

كل باب يبونه يسكرونه بوجهك

الله يكون بالعون وان شاء الله تكون اشاعه

[BIG-VEGA]

نفس هاي القرارات المفروض الاصل فيها يكون خدمه المستهلك

اذا المشكله في الجوده عيل ايش فايده المراقبين والمفتشين
اذا المشكله في الامن عيل وين دور الجهات الامنيه والمراقبه
اذا المشكله في الاسعار عيل وين دور حمايه المستهلك ولجنه مراقبه الاسعار

الزبده اي مشكله بتجي في بال اي حد المفروض فيه جهه رقابيه لها

في اي دوله في العالم فيه محلات في الفرجان او نفس المناطق في امريكا مثلا بتحصلون قريب من كل منطقه سكنيه منطقه فيها كل احتياجات السكان من انواع المحلات المختلفه

قرار نفس هذا اذا صح الخبر قرار غلط وغبي ويخدم مصلحه ناس معينه فقط

والاولى اذا فيهم خير يناقشون ويشوفون حل في الاحتكار وكبار التجار
بس فالحين يقولون ويكتبون الشعارات والاهداف والسياسات الي تخدم المواطن ومايطبقونها الا على الصغار

[khalid525]

طيب يوفرون بدائل ، كل فريج يحطون فيه مجمع تجاري

[المليونير الفقير]

بروه الميره وقود هم المستفيدين من هالقرار الجائر نفس قرار الفلل الايداريه امنعو الشركات ياجرون فيها عشان يجبرونهم على محلاتهم وابراجهم انا ابي اعرف شي واحد بس متى بيشبعون هالتجار

[سعادة الوزير]

كالعادة ، كثير منا مايدرون ان معظم هذه الدكاكين فاتحه بيوت وتصرف على أسر قطرية كثيرة.

[captin]

بروه الميره وقود هم المستفيدين من هالقرار الجائر نفس قرار الفلل الايداريه امنعو الشركات ياجرون فيها عشان يجبرونهم على محلاتهم وابراجهم انا ابي اعرف شي واحد بس متى بيشبعون هالتجار

بيشبعون لين صاروا جثة هامدة وانلف الواحد منهم بقماش ابيض
وانحط في قبره وبدء الحساب الحقيقي

[MAZEN37]

ممتاز
لكن وين البديل
سهل اقتراح واتخاذ قرار بس بالمقابل لازم بديل
من يومنا متعودين على خدمان المحلات الصغيره الي بالفرجان
وهي تخدم شريحه كبيره للناس وبحسبه بسيطه راح نتوجه للمحلات الي بالشوارع الرئيسيه والي هي غاليه باسعارها

[abdo222]

الله يستر !! الحين في كل منطقه سوبرماركت وحلاقين، بكره الواحد يدور على الدكان دواره،، والله يعين الهنود الي يشتغلون فيهم،، فوق ال ٧٠٠٠ موظف

[جمال اليافعي]

الله يستر !! الحين في كل منطقه سوبرماركت وحلاقين، بكره الواحد يدور على الدكان دواره،، والله يعين الهنود الي يشتغلون فيهم،، فوق ال 7000 موظف


14000 الى 21000 موظف ممكن قصدت :)

[رُفق المجنّا]

غير مقبول والهدف تجاري بحت !

[مواقف النجادة]

الله يالدنيا .. يعني هالهوامير و اصحاب المجمعات ماحصلوا الا الشيبان و الفقارة ينافسونهم في ارزاقهم.

[M S A]

الله المستعان.

[رحال]

للأسف هناك طبقة مخملية تعيش حياة لايعيشها عامة الناس ..

[ولد شرق]

في اروبا اتحداك تحصل يبيعون بندول او اشيا طبيه في المحلات هنا يعطيك بندول صاقعه الحر

عفوا اخوي من قال لك في المحلات مايبيعون بندول ليش أتقول شي انت مهب متأكد منه*

[jajassim]

افا ،، يعني مافي سلف من راعي الدكان ،