عقد لخصم مدة التاخير. اتمنى المساعده بطرح ارائكم

[مضارب دوسري]

السلام عليكم
المقاول عندي قرب ينتهي من شغل البيت عظم بلاستر
وتاخر علي 3 شهور و 10 ايام

افكر اسوي عقد بيني وبينه يوضح انه تاخر المده الفلانيه وتم خصم مبلغ التاخير حسب الشرط الجزائي المتفق عليه بالعقد الاول ( اللي هو قبل مايبدا فالبناء)

هل الافضل اسوي هالعقد واوقعه عليه ؟ ولا ما يحتاج ؟
واذا من الافضل اني اوقعه على عقد
ف لو تكرمتوا ارجوا المساعده في صياغة مثل هذا العقد

[شموخ دائم]

,

,


مرحبا


اخوي الكريم

المفروض هذي الامور يقوم فيها الاستشاري ويعرف طريقه التسويه والخصم
ولكن مثل ماهو معروف اكثر الشباب يبني البيت بدون استشاري
ويكون الاستشاري مجرد على الورق فقط
ويواجه الشباب المشاكل مع المقاول لوحده ويقع في اخطاء وصداع ماله نهايه

الموضوع هذا سهل باذن الله

بس عليك تتاكد ان العقد يبتدي من استلام ( الدفعه الاولى ) وليس من تاريخ توقيع العقد
واستلام الارض جاهزه وعليها رخصه بناء

بعد التاكد من تاريخ استلام الدفعه الاولى اكيد استلمت ايصال الدفعه وفيه التاريخ ياريت تتاكد منه



كل المطلوب منك انك ترسل كتاب فاكس او ايميل على عنوان المقاول
تشعره انك راح ( تخصم ) مبلغ وقدره ( حسب الشرط الجزائي ) بالعقد
الفقره رقم كذا وكذا ... الخ

وتخصم المبلغ من ( الدفعه الاخيره )

ومن حق المقاول يرد عليك بكتاب ثاني ويشرح لك سبب التاخير

وانا متاكد انه راح يحط لك الاسباب ومنها

( تأخير الدفعات ) يعني لو تاخرت بدفع الدفعه لمده اسبوع من التاريخ الي كلمك فيه
عن استحقاق الدفعه راح يضيف هذا الاسبوع ويخصمه من المده الثلاث شهور
وهكذا

ولو قمت بعمل تعديل في البناء مثل توسعه ابواب او تسكير شباك او تعديل في الكهرباء
او زياده حاجه معينه
راح يضيفها لك على المده لانها خارج العقد وهذا من حقه

وبعد الاتفاق فيما بينكم عن المده المتبقيه نفرض شهرين او 3 شهور
يعمل ورقه ( مخالصه ) مع تسليم المشروع لك ويستلمون باقي الدفعه

ونصيحه اخي الكريم اذا المقاول والمهندس تبعه كان متعاون معاك
في امور كثيره من توسعه ابواب او تسكير اماكن وكان جيد والتاخير خارج ارادته كان بسبب الحفر مثلا والارض كانت صخريه
والمبلغ بسيط بحدود 3 او 4 الاف لو تتنازل عنها يكون احسن


اما اذا كان المقاول مسبب لك مشاكل وغير متعاون تمسك في حقك وخصمها من الدفعه الاخيره


,


,



اخوك


شموخ دائم

[مضارب دوسري]

انا بديت المده من تاريخ ختم وزارة العدل على العق واللي كان بعد استلام المقاول الدفعه ب ١٥ يوم من يومها بديت حساب مدة العقد
وبخصوص الايصال عندي ايصالين لكل دفعه
الاول ايصال بنك قطر الوطني لان بنفسي اروح واودع المبلغ ف حساب الشركه
والثاني ايصال استلام الدفعه
وبخصوص التعاون اخرني كثير وماكان متعاون بشكل جيد
كل دفعه كانت تنزل في حسابه في اقل من اسبوع وهذا اللي حرصت عليه دايم
وانا كتبت الموضوع بعد الاتفاق لان انذار التاخير عنده من ٤ شهور من قبل نهاية فترة التعاقد ب ٢٠ يوم تقريبا

عشان الاسباب اعلاه مالقى اي سبب ضدي فوافق على خصم الشرط الجزائي

[مضارب دوسري]

انت فتحت عيني على امر كبير
وهو تاريخ استلام الدفعه الاولى
وليس تاريخ ختم توثيق العقد في وزارة العدل
اذا جذي يحق لي ازيد مدة الخصم ؟

[تميم بن خالد]

اذا شغله نظيف ... المسامح كريم