الرعاية المنزلية لكبار السن !!!

[نتفـه]

السلام عليكم
هل فعلا في قسم في المراكز الصحيه اسمه الرعاية المنزلية نقدر نروح لهم علشان يجون البيت ويرعون لنا كبار السن ؟!
علشان اروح واطلب للوالد ..
وجزاكم الله خير مسبقا ..
السموحه حطيت الموضوع هني لكن ابي ضروري اعرف علشان جذي حطيت الموضوع هني بدال قسم الاستفسارات ..

[عيون الدوحة]

اخوي في واحد مؤسسة شركة لرعاية المسنين بدعم من الشؤون الاجتماعية كأنة
ومرة جابو له لقاء بالتلفزيون
هو جابي ستاف خبرة من ممرضات الخ للرعاية بالمسنين
إذ تذكرة اسم المؤسسة بقول لك

[بصمة قطرية]

اذا ما خاب ظني هالشي صحيح ..
وحدة من صديقاتي ممرضة ..
و قالت مرة انها كانت تطلع تروح بيوت لكبار السن
عشان تعطيهم ابرة السكر ..

بتأكد لج أكثر ,,

[Rider]

فيه بس يمرون في الاسبوع مره

[فلتة زمانها]

اختي في قسم في ارميلة اسمة الرعاية المنزلية لكبار السن ومديرهم
الدكتور عيسى السليطي يتكفلون بزيارة المريض ومتابعة حالتة بشكل
شبه يومي ويعطونة العلاج والابر خصوصا اذا كان المريض مقعد او عليه
اجهزه واذا حبيتي تقدمين عندهم ويقيمون الحاله مكانهم في مدينة حمد الطبية
مبنى رقم B 22 اذا ما خاب ظني او اسالي السيكيورتي عن مبنى home care
واهم شيء عشان تستمر الخدمه تكونين متعاونة معاهم وتخلين اي شخص في البيت
يستقبلهم ويعطيهم تقرير عن حالة المريض مثلا اذا لاحظتي عليه اي تغييرات ومن هل القبيل واهما بدورهم يوصلون التقرير للدكتور ،،هذا اللي اعرفه

[نتفـه]

تسلمون .. بس يعني اروح وين المركز الصحي التابع لنا والا مدينة حمد الطبيه ؟؟؟؟

[فلتة زمانها]

مدينة حمد الطبية

[نتفـه]

ما تقصرين فلته .. رحم الله والديج ,,

[basma222]

أم زوجي الله يرحمها ويغفر لها كانت ممرضه من المركز كل يوم تمر عليها


روحي المركز التابع لكم وطلبي ممرض او ممرضه للوالد

[برشلوني قطر]

الوالد الله يرحمه ويغفر له كان ع السرير فالبيت..واذا كان عنده موعد تجي سيارة الاسعاف لين البيت

تاخذه وترجعه...لاكن سمعت ان ف خدمه فالاسبوع مره يجون البيت ويتابعون الحاله..

والله اعلم

والله يشافي مريضكم

[قلبي الطيب]

جارتنا من سنين مقعدة تجيها سيارة فيها ممرضات والمكتوب على السيارة الرعاية الأولية

[اوف ليميت]

والله نصيحه..جيبلك امرأه عربيه من هذول اللي يخافون ربهم وكبيره شوي بالسن..فالاربعين يعني بس حركيه .. من مصر او المغرب..دخلها البلد اذا عندك استثناء او دخلها تحت مسمى موظفه لنشاط تجاري تابع لك او ترخيص وجذي..

والله انهم يعرفون يهتمون اكثر .. وبالمره تساعدكم..وبعد تطبخ كل شي .. وتقدر تتفاهم معاها بكل بساطه وتفهم وتاخذ وتعطي مع الشيبان والعيايز وماينمل منها..وهي تصير مثلها مثل اخت لكم وبالمره تساعدونها على اعالة اهلها في بلدها..ك عرب

ترى في منهم اختصاصيات بهالشي..وتمريض..وفي بتلاقيلك اللي ددارسه طب لكن مابيدها شي تسويه عشان تشتغل وقاعده فالبيت اتعلم طبخ مع امها

مجرد رأي

:]

[نتفـه]

رحم الله والديكم ان شاء الله .. ما قصرتوا :)

[509]

اول من فتح الخدمة هذي في قطر شركة قطر كير للخدمات الصحية والطبية المنزلية

واللحين فيه اكثر من مؤسسه حكومية تقوم بنفس الخدمة لكن ماعرف منهم الا اللي في مستشفى حمد

[الصغيره]

الرعايه لكبار السن من الرميله يجون كل شهر مره اما اللي من المركز الطبي هم اهل السكر يضربون ابر السكر