تجاربكم مع محلات وجبات الدايت

[(المهندس)]

ارغب بعمل اشتراك مع واحد من محلات وجبات الدايت بس مش عارف مع اي محل اشترك

اللي جرب يعطيني تجربته مع المحل واذا ممكن معلومات عن قيمة الأشتراك الشهري ونوع الوجبات اللي تقدم وتوقيت ووطريقة التوصيل واي معلومات اخرى ممكن استفيد منها

مع الشكر لجميع الأعضاء
*

[الريان76]

يمدحون دايت كافيه بس ٤ كيلو فالشهر شوي

[ولد الشحانية]

بالتوفيق
متابع

[@الأدعم@]

سليم اند لايت

[hot2000]

اكل خفيف
واترك عنك الخبز والرز
والحلويات والسكرريات وشاي الكرك
وخلك على الشاي الاخضر مرتين الى ٣ مرات باليوم
ومشي كل يوم ساعه بهذا الجو الحلو

اضمن لك ٧ كيلو بالشهر

[(المهندس)]

شكرا على نصائحكم

الاشتراك لوالدتي وهي ماتقدر تمشي علشان تعمل رياضه وهي مقبله على عملية تغيير عصب الركبة وطالب منها الدكتور تخفف وزنها قلت اعمل لها اشتراك في الدايت افضل شيء

اخوي اموري وين سليم اند دايت ؟ وهل جربته اذا جربته ياليت معلومات اكثر عنه

اخوي الريان المطلوب محل حق وجبات دايت يوصلها البيت مش كافيه

[@الأدعم@]

هلا المهندس انا جربته شهرين ونزل وزني 8 كيلو مع المشي يوميا نصف ساعه اما بخصوص الاكل هم يعطونك مينيو وانت تختار الوجبات كل اسبوع المكان خلف شركه بي ام دبيلو طبعا هالكلام من سنه واكثر وتقدر تتصل بالاستعلامات يعطونك الرقم والعنوان

[@الأدعم@]

على فكره اغلب الاكل شامي انا جربت قبل الدايت سنتر ماعجبني مثل سليم اند لايت

[Rashid554]

انا جربت ريجيم اشتراكه من الانترنت وللأسف صادتني اعراض هبوط بالدم والسكر وكنسلته بس للأمانه نزلت 6 كيلو خلال خمس ايام
وببتدي بالمشي والاكل العادي

فيه محل دايت بالنصر اسمه كامبرج يمدحونه بس ماجربته

[استغفرالله]

سلم اند لايت اكلهم حلو

واذا بغيت تنزل عدل خل تشترك في مركز نيوترشن

[غايه الطواش]

سلم ان لايت + دايت كافيه

[smile4qtr]

السلام عليكم. انا جربت دايت سنتر ودايت كافيه. دايت سنتر أكلهم أحلا من دايت كافيه بس الصراحة وزني نزل مع دايت كافيه خل الوالدة تجرب اول شهر والله يشافيها

[deema117]

سلم & لايت

ممتازين

مكانهم في بن محمود خلف شركة الفردان للسيارات ( بعد ما تعدي الصالون الأزرق تدخل يمين لفة مطعم لوبستر ) تمشي مسافة بسيطة وبتحصله على الجهة اليمين .

قيمة الاشتراك 2500 ريال للشهر

( كل أيام الأسبوع في وجبات ماعدا يوم واحد بيكون راحة للمشترك )

اعتقد أنهم بيسكرون 3 أيام بعد العيد

لو تحتاج رقمهم اطلبه ع الخاص

والله يشفي الوالدة ويخليها يارب

[بني تميم]

دايت سنتر اول شهر 10 كيلو بدون رياضه

[كروشيه]

دايت سنتر الاكل مب فريش وجدا عادي وعملية النزول جدا بطيئه واسعار مبالغ فيها افضل شئ اخوي روح لاخصائية تغذيه مثل عائشه صقر في مستشفى العمادي وبتشوف حالتها وسنها وبتعطيها الرجيم المناسب لها

[(المهندس)]

شكرا للاخوان جميعا

ان شاء الله رح اتصل فيهم واشوف المنيو والاسعار واحدد الاشتراك مع اي محل

يعطيكم العافية ماقصرتوا

[Toot]

دايت سنترر يمدحووونه

[(المهندس)]

وين مكان دايت سنتر؟

[بنت المزن]

سليم اند لايت.. الاكل فريش.. وتكون بخرة الوجبة واضحة على الغطا.. انا اخذ من عندهم وجبة الغداء بس.. ٥ ايام في الاسبوع ويكون معها سويت وفاكهة او عصير.. سلطة او شوربة مع الوجبة الرئيسية.. اليوم ٤٨ ريال .. الشهر ٩٠٠ وشي..

[همر]

بالنسبه للاخوان اللي يقيسون نجاح وفشل المراكز بكم كيلو نازلين من اول شهر ولا من اول اسبوع فهذا مش حكم سليم..

اولا .. اي حميه تتبعها راح يكون في نزول صاروخي في اول اسبوع الى شهر وهذي كلها سوائل يفقدها الجسم بسرعه ويرجعها بسرعه..

العبره في الشهر الثاني وبالتحديد الثالث عشان تحكم على الدايت..

ثانيا.. في حالة كبار السن يفضل يكون الدايت مع متابعه طبيه لقياس السوائل الحيويه والفيتامينات في الجسم لان تأثير الدايت يختلف من شخص لشخص وفي ناس تحتاج مدعمات..

اسمحلي على المعلومات اللي ما طلبتها بس حبيت اشاركها مع اللي مايعرفها...


بالنسبه للمراكز انا حاليا مشترك مع ايديل دايت.. الغذاء المثالي.. في بن عمران مقابل المطافي والمستشفى الاهلي.. فطور وغدا وعشا وحلو وفاكهه وشاي رجيم لحرق الدهون وحبوب كتان ترشها عالاكل تحرق الدهون على قولتهم..

كل هذا يجيك في صندوق الظهر او تروح تاخذه من عندهم الاشتراك ب2550 ريال و 100 زياده اذا تبي توصيل..

نزلت في اول شهر 8 كيلو والحين 20 يوم في الشهر الثاني انزل 2 كيلو وارجعهم :shy:

مشكلتي ما امشي .. قالو لي ضروري المشي نص ساعه..

واغش وايد في الاكل :shy:

واليوم المفتوح افتحه عالبحري لين مايغمى علي من الاكل..

مافي منيو .. بس تقدر تحدد معاهم الاشياء اللي ماتبيها عشان مايطرشونها لك.. الصندوق فيه ورقه شرح لوجباتك وفوايدها وتسجل فيها ملاحظاتك وتعطيهم اياها كل اسبوع لما تراجعهم عشان ياخذون قياساتك ووزنك..

اجازتهم الجمعه .. وحاليا مسكرين من السبت لين الثلاثاء..

وطبعا انا مستانس لاني معيد في المطبخ :nice:

[المسك1969]

أنا أخوي جرب مرة ريجيم من محل الابل بس ماعرف شسمه بالضبط بس استغفر الله سلطاتهم ما تنوكل

أختي راحت لمكان جديد اسمه نيو يو وعطوها علب هي تطبخهم في البيت بس ما شاء الله نقصت عليهم

عن نفسي من سنتين سويت رجيم اتكنز اللي هو عباره عن بروتين بيض ولحم ودجاج وسمك وشويه سلطة بس بدون خبز وعيش ونقصت عليه في شهر وعشرة أيام 13 كيلو

بس حلو هالدايت وما ترجع لوزنك

أنا أمي سوت عملية الركبة في المستشفى الامريكي في دبي وكانت دبدوبه ربي يحفظها بس ما طلب منها الدكتور سميح تنزل وزنها وسوى لها الركبتين

ونصيحة أن الوالده تسوي الثنيتن حتى لا تخلي حملها على ريل وحدة أن الثانيه فيها شويه ضرر

وربي يعافيها وييسر عمليتها ويعينها على مابعد العمليه من تمارين آمين

[Dark_QTR]

جوابي على سؤالك، نعم جربت "دايت سنتر" والحمد لله كنت زايد عن الوزن الطبيعي بمقدار 5
كيلو، وبفضل الله ثم التمارين الرياضية، ثم نوعية الأكل، صار وزني طبيعي

ميزة محلات الدايت انهم يوفرون أكل ذو سعرات جرارية منخفضة.. على سبيل المثال اللزانيا تحصلها في الغالب ما بين ال300-400 سعرة حرارية، عندهم تحصلها اب 250 سعرة حرارية وطريقة التحضير صحية

بس يا اخوي اذا انت ماشي بمنطق" أكل صحي بدون رياضة و عوار راس" راح تضعف، ولكن على المدى الطويل..الطريقة الأفضل لحرق الدهون (أكل صحي+رياضة) .. لأن خبرك "هالمجابيس و العيوش الي تكدست في الأعماق اشلون تبيها تطلع خخخخخ "

[(المهندس)]

اشكركم اخواني جميعاً على المعلومات القيمة بصراحة نورتوني وان شاء الله بعد العيد راح نعمل الاشتراك ونوافيكم بنتائجة وربي ينعم عليكم بثوب الصحة والعافية

[خالد البلوشي]

يا اخوي اقول لك و عن تجربه
نظام الدايت محتاج لنفس طويل جدا
افضل شي لتخفيف الوزن انك

تمشي على جهاز المشي لمدة 45 دقيقه + تركز على تمارين الخصر و البطن ( يوم تلعب اربع تمارين بطن + مشي لمدة 45 دقيقه على جهاز المشي و يوم تلعب اربع تمارين للخصر + المشي لمدة 45 دقيقه على جهاز المشي ويوم تكتفي فقط بالمشي لمدة 45 دقيقة على جهاز المشي ) و اتريح طبعا يوم بالاسبوع عن ممارسة الرياضة

بالنسبة للأكل .. بالريوق والغدا كل ولا تشل هم لكن بالعشا اتعشا سلطات يعني بعد الساعه 8 المسا ابتعد ابتعاد نهائي عن الاكل الدسم و خصوصا النشويات و عليك بالسلطات سلطات الخضار مع جبن حلوم قليل الدسم و سلطات الفواكه )

تاخذ لك لبس يساعد على التنحيف من نوترشن و تلبسه وقت التمارين اليومية

تكثر من شرب الماء ( 4 إلى 6 دبات ماي ) دبة الماي اللي يكون حجمعا 500 ملل و كثر من العصاير

يا خوي اقولها لك وعن تجربه شخصية اني اتبعت هذا النظام و كان وزني 79 و خلال 3 شهور وصلت 67


و في ناس كان وزنهم فوق ال 100 و مشوا على هالنظام اللي يعده لنا مدرب الصالة الرياضة المشتركين فيها و خلال شهرين نزلوا للثمانين و الكل لاحظ الفرق ..

وهذا اللي عندي واتمنى انك تحفظ هالنظام وانا متاكد انك راح ترجع له لو ما عجبك نظام الدايت المرهق نفسيا ..

[الحال مايساعد]

الأهل مجربين المراكز هذي بصراحة في نتيجة لكن ياكثر ماتدفع لهم