البضاعة المباعة لا ترد ولا تستبدل !!!!!

[فريج النجادة]

وزارة التجارة والصناعة السعودية تمنع استخدام عبارة "البضاعة المباعة لا ترد ولا تستبدل"

#عاجل
#السعودية

[شموخ دائم]

,

,


مرحبا


بعيد عن القوانين هنا او هناك

بصراحه التاجر الي يستخدم هذه العباره في الفواتير هو تاجر غبي ومتخلف

:)

كل دول العالم والشركات المحترمه ترحب بعوده البضاعه وممكن استبداله

الان الحمدالله الشركات بقطر اصبحت تهتم بالزبون وتاخذ البضاعه وتستبدلها
امس انا استبدلت بعض الملابس في ( الركن الرياضي ) بسبب المقاسات

,

,


اخوك


شموخ دائم

[بن غيث]

هذه العبارة صحيحة لبعض المنتجات
مثل -- الملابس الداخلية -- المكياج

[intesar]

بالخارج ممكن تستخدمه لأن فيه ثقة واحترام متبادل ما بين البايع والمشتري..
أما هني فلا.. تخيل فستان تشتريه وحده.. تلبسه بمناسبه وعقب ترجعه.. تقول لا ماعجبني ولا موقياسي..

هذا أبسط مثال أعطيك اياه..
لما صار فيه ثقة ممكن نشيل هذي العبارة..

ودمتم بحفظ الرحمن..

[QaTaR MaFia]

^

بالعكس هذي الحركة مشهورة عند الاجانب اكثر هههههههههه

[النهار]

ياخوي يمكن يجيك واحد بعد شهر يرجع البظاعه او مثل ماقالت اختي انتصار فستان تشتريه وتلبسه اليوم وترجعه اليوم الثاني بلفيت موعاجبها

[Dana’1]

المفروض ان البضاعة ترد او تستبدل في حال الغش وفي حال انها غير مناسبة للمشتري إلا بعض البضاعات الحساسة وبالذات بالسعودية

لأن بدول العالم .. في غرف قياس بنفس المحل .... لكن بالسعودية مافية هالكلام ولا فية فلبينية او اي موظفة مشرفة على هالمكان
بالتالي هي مضطرة تاخذ هالفستان وتجربة واذا ما عجبها او مش مثل ما توقعته من حقها ترجعة او تستبدلة اذا في شي بنفس المحل عجبها

ملاحظة:
بعض المولات يكون فيها قياس للنساء بس مو بنفس المحل ...يكون بقسم خاص بالنساء يوجد فية دورات مياة وانتو بكرامة .. ومكان خاص لتبديل الملابس ... ومصلى قسم متكال يعني
لكن هذا مو بكل مولات واسواق السعودية .. والا خذي الفستان وروحي المشغل الفلاني "صالون تجميل" وقيسي هناك طبعا بفلوس بعضهم رمزي وبعضهم سرقة! غير كذا في ناس مستحيل تقيس برا بيتها

بالتالي عادي لو يردون البضاعة او يستبدلونها في حالة رجوعها كما كانت باليبل عليها ونظافتها هذا بالنسبة للفساتين والملابس ويحددون لها ايام للترجيع وايام للاستبدال او اعطائها فاتورة بالمبلغ في حالة حبت تشتري شي بالمستقبل اذا ما عجبها المعروض حاليا


**في محلات كثيرة تستبدل او تتيح لك ارجاع البضاعة بالسعودية وهي ككثيرة ومتنوعة من محل الاثاث والادوات المنزلية ...إلى الملابس وغيرها ...وهذا هم مبسوطين وربحانين والا ما كان كملو في مجالهم،،،والله يزيد ويبارك لهم

[شمس]

زين جزاهم الله خير
وليش عاجل؟

[شيزكيك]

محلات اللاند اذا ما اعجبتنا البضاعه ممكن نسترد الفلوس بعد وكرهات على الي يشترون فساتين ويلبسونها حق مناسباتهم وعقب يردونها وياخذون فلوسهم

[فـــــواز]

مساء الخير او صباح الخير يا وزاره الاعمال والتجاره ويا حمايه المستهلك ويا تجار


وينكم من ستارلينك الي لايرد ولا يستبدل بضايعه وهو لاعب بالسوق لعبه

[ahmed203949]

هذه العبارة صحيحة لبعض المنتجات
مثل -- الملابس الداخلية -- المكياج

كلام سليم ..

[captin]

الموضوع

يحتاج قرار رسمي من الوزارة المختصة
لتحديد الأصناف والسلع اللي ترجع أو تستبدل

لأن ثقافة خدمة الزبون أو رضاء العميل عندنا شبه معدومة
إذا بترجع سلعة لسبب أو لآخر كنك تطر عند راعي المحل
تقعد تترجاه وتشرح له ليش ما تبي السلعة أو تبي تبدلها.

معظم دول العالم المتقدم أمريكا واوروبا
عندهم إعادة البضاعة أو استبدالها شيء أساسي
وخصوصا في الولايات المتحدة تتنافس المحلات على سياسة
الإرجاع والإبدال للبضائع المهم عندهم انهم يكسبون الزبون
عشان يرجع يتسوق مرة ثانية وأيضا في مواقع التسوق
الإلكتروني يقدر الواحد بكل سهولة إرجاع البضاعة إذا ما عجبته.

[إينشتاين]

ذكرتوني بحركات بعض الشباب الي يدرسون برا

واحد من الربع يقول يوم كانوا يدرسون في امريكا قبل لايطلعون رحلة أو سفرة لولاية ثانية يمرون محل الكترونيات ويشترون كاميرة فيديو ويصورون طول الرحلة وبعد مايرجعون يروحون للمحل ويرجعونها وياخذون فلوسهم ومحد يسألهم ليش رجعتوها

[بوخالد911]

هلا


حتى عندنا
تم الغاء هذه العبارة والتي دوما تصب لمصلحة التاجر

[chillis]

البضاعه ترد وتستبدل في حاله انه اكتشف به عيب فعلا ما اايد انه يرد لان ممكن يكون استعمله وتالي رجعه بالذات الملابس