نكبة الخطوط الجوية القطرية.

[kh84]

السلام عليكم

بدخل في الموضوع على طول و إسمحولي أكتب بالعامي.

كنت حاجز تذكرة للسفر إلى فيينا بتاريخ 23-8-2012 على متن الخطوط القطرية .

في التاريخ المذكور رحت المطار و يوم وصل دوري في الجك إن الموظفة قالت لي لحظة و طلعت من الكونتر و راحت تكلم موظف ثاني.

المهم قالولي أنه الطيارة فل و مافيها سيتات! أنا و ثلاث شباب غيري مالنا مكان في الطيارة و السبب أنهم بايعين تذاكر أكثر من عدد سيتات الطيارة؟؟ السياحية فل و البزنس فل!

شهالمصخرة؟؟؟؟؟؟؟؟؟؟؟؟؟؟؟؟؟؟؟

المهم قالولنا الحل أنهم بيطرشونا روما و من روما فيينا!!!!!!!!

في آخر لحظة و قبل الإقلاع بأقل من ساعة قالوا في سيتين فاضيين فقط على الطيارة!!!!!

أنا و رفيجي سافرنا على الطيارة و الشباب إلي كانوا ناطرين قالوا بيطرشونهم روما و من روما فيينا بس عشان يرقعون قالوا بيحطونهم على البزنس.

أترك التعليق لكم.

[ms-qtr]

هاي طيران عالمي وجي !!!
امحق طيران عالمي والله!!!

وانتوا مب اول من يصيده هالموقف للأسف
لازم توصل حق ادارة القطرية هالشكاوي
مب خوفا عليها لكن خوف على اسم بلادي الي بشعارهم

[وحيد-الشوق]

اكيد واحد من الهوامير سافر وحطوه مكان الفقير المسكين

المفروض هذي الحركة فيها تعويض بمبلغ كبير لكن شنقول الشكوى لله

[احساس غريب]

في هال يوم نفسه كنت ف المطار وكان وقت رحلتنا لإسطنبول الساعة ثنتين وربع وتأخرت الطياره لين الساعة سبع ونص بعد دوخه وصارت مشاكل واعتلاء ف الصوت بين المسافرين وموظفين القطريه وفعلا تبهدلنا أنا والعايله خصوصا ان راح علينا يوم كامل وغير التعب وطول الانتظار ف المطار وانا أشوف القطريه من أسوء الى أسوء وتوبه من عقب هالموقف أسافر على هالطيران الفاشل غير المشاكل اللي صارتلي قبل معاهم

[قطرية مثقفة]

اخوي هذي الشي عادي كل خطوط الطيران يسون اوفر بوك حق الرحلة يعني حجز إضافي علشان مايخسرون اذا في ناس كنسلوا في غيرهم @@ بس المفروض المسافر يكون عنده ثقافة الحصول على حقه @@ بالمختصر المفيد اذا صادك هالموقف مره ثانية من حقك انك اطالب مقعد على الفيرست اذا حولوك على رحلة ثانية @@ انه قبل 5 سنوات كنت حاجزه حق خدامتي على الفلبين وكان زوجها عايش في الدوحة وعلى نفس الرحلة حاجز اللي صار ان الرحلة في حجز إضافي فلما وصلوا المطار راحت عليهم الكراسي وطبعا القطرية عرضوا على زوجي انهم يطرشونهم على رحلة هونج كونج ومن هناك على الفلبين طبعا زوجي وافق على شرط يعطونهم مقاعد على الفيرست لان الرحلة طويلة ومتعبة وفعلا عطوهم على الفيرست @@ والخدامة طارت من الفرح :) :) لا تسكتون عن حقكم :)

[BuFaisal]

كنت رايح مع العائلة من الدوحه الى دبي بتاريخ 20 اغسطس رحلة الساعة 8 ونص صباحا وحجزنا اوكي
جيت المطار اكثر من ساعتين قبل الاقلاع ..
وطول الوقت والموظفة تقولي ان حجزنا اوكي لكن كراسينا عليها ايقاف (هولد) بلا سبب معروف
واخرتها كراسينا خذوها غيرنا وطارت الطيارة بدونا
عطونا رحلة الساعة 12 الظهر تقريبا

تم تعويضي بكل تذكرة استعادة مبلغ 550 ريال
لكن جد ما تسوا الانتظار مع ان حجزي اوكي و واصل المطار مبكر

الغريبة ان اكثر من شخص ايضا بنفس الرحلة فقدوا مقاعدهم بنفس الطريقة الي صارت معاي مع انهم واصلين مبكر

[البدوي]

.... ايش المشكلة؟ اهم شي الي جاي ترانزيت وتذكرتة نص تذكرتك


ايسافر

[ابوالعبد]

الله يعين

[ابوعلي]

اخوي صارت له نفس السالفة مع القطرية وكانت رحلته لماليزيا واقترحوا عليه ان تكون رحتله للصين وعقب ماليزيا ولكن سوالهم سالفة واشترط عليهم ان اذا بيحولونه للصين يركب درجة اولى ويسكن في فندق فايف ستار طبعا ارفضوا واخوي اصر على موقفه وعقب قالوا له خلاص حصلنا لك مكان

[فـــــواز]

في مشاكل صارت من يوم اول العيد الى الان في القطريه

احنا صار لنا موقف زين مع اني ما داني القطريه ابدا خير شر

لكن وش الي صاير حاجزين انا والاهل الى ميونخ بتاريخ 28 من شهر 8
طبعا اوكنومي سياحيه وصلنا المطار بدري الا يقولي الموظف سوينا لكم اب جريد الى رجال الاعمال انت والاهل حنا كنا 4 وعطونا والله الكراسي وانا طول الوقت وانا منصدم واقول الحين بيدفعونا او بيغيرون رايهم والى الان مو مصدق السالفه :tease: الي صارت لنا لكن الحمدلله ربي عوضنا لله الحمد

[elders]

اشتكوا وخذو تعويض

[Abdullah_89]

عادي تاريخ 23 من 10 ايام تقريبا حاجز انا والوالده رحله الى بانكوك على الخطوط القطريه درجه رجال الاعمال


وسويت online check in قبل موعد الرحله بيوم كامل واخترت الكراسي على الطياره ووصلني البوردنج بالايميل


رحنا المطار فالتاريخ المذكور الا الاخت الموظفه تقولي انت تذكرتك اوكي اما الوالده لا مو اوكي لأن مو مأكد على الحجز قلت لها شلون؟ تقولي لان الطياره فل ؟.؟ انزين والتشك ان اون لاين اللي سويته والبوردنج اللي عندي شنو هاي ورقم الكرسي شنو هاي


طبعا انا ماسكت وشرشحت امن جابتهم بالمطار وخليتهم مايسوون بيزه وفالنهايه ركبونا الطياره طبعا بعد معاناه ..


عادي هالامور تصير مع الخطوط القطريه بس اما باقي خطوط الطيران والله ماعمرها صارت

لاحياه لمن تنادي

[الخزرجي قطر]

كل خطوط الطيران فيه ايجابيات وسلبيات ولكن بالنسبه لي
مااسافر مع الاهل الا على الخطوط القطريه لأني مااحب الترانزيت
وماصادفتني مشاكل معاهم ولله الحمد الامور كلها ميسره وتساهيل من رب العالمين

[مساهم فنان]

صادني موقف مشابه من ثلاث سنوات كنت في بلد خليجي وحاجز على الدرجة الأولى ، الموظف قال لي مالك حجز ،،، لكن نقدر نوديك ع السياحية ، رفضت ذلك بشدة ، ومن موظف إلى موظف وبدون فايدة ، اتصلت ع مكتب القطرية في قطر وقلت لهم السالفة ، قالوا موجود لك حجزمؤكد ، أخذت الموبايل وعطيته الموظف وكلمه اللي في قطر ،،، بعدها قال الموظف : انتظر لين يكمل عدد الركاب وتعال ، بهدلوني ، وانتظرت بعد الركاب كلهم خلصوني ، لما ركبت الطيارة تفاجأت وجود كرسيين فاضيين ، الظاهر كانوا 3 أشخاص من أسرة واحدة ، كانوا يبون يركبون مع بعض.....ويبون يعطونهم كرسي .
لما رجعت الدوحة قدمت شكوى رسمية للقطرية واعتذروا مني وقالوا بنتخذ الإجراءات
أخي كان المفروض تصرون ع الركوب لأنكم دافعين التذكرة ،والمشكلة مشكلتهم
////////////////////////////////////
موقف مشابه شاهدته في عودتي من لبنان على الميدل إيست
قطرية قالوا لها مالج مكان في البزنس لج في الإكونومي والظاهر أخذت البوردنج للإيكونومي .. شفتها قبل الدخول للطيارة اتحنطم ... لما ادخلت الطيارة قالت أنا ما أجلس إلابزنس ، وجابوا المسؤولين لها ، آخرة السالفة ، انزلت من الطيارة مره قطرية وركبوا القطرية اللي اخذوا مكانها حق الثانية ، وجلست على الكرسي وفي عيونها فرحة الانتصار.
تلاعب هذا يكون من الموظفين وليس من الشركة

[اوف ليميت]

فالنهايه..لك الحق انك تطالب بتعويض وماتسافر
او هم يعوضونك بشي افضل

اشوف لقولك كرسي
واشوف عوضوهم ب بزنز كلاس

والحمدلله

وفكرتك اوصلت (كيف يتم بيع تذاكر سفر لكمية اكبر من مقدرة الطائره المخصصه)
ترى تدخل بها اشياء كثيره
1- التأكيد ا لنهائي للحجز
2- سحب واضافه
3- مقدرتنا على الدخول الكترونيا للموقع وحجز المقاعد بانفسنا
4- سوالف مقاعد نجوم والمقاعد الاعتياديه وتخصيصها
..الخ

:]

[Abdulraman]

عادي هم للنكبات
اشرايكم واحد من الربع سعودي مسافر الى اندونيسيا على القطريه ويوم بيرجع الدوحه قالوا له انك بلاك لست قالهم شلون انا ماسويت شي ولا ادخن مني مناك مافي فايده اتصل السفاره السعوديه وطرشوله مندوب وحاول معاهم ولا في فايده المم الرجال قطع تذكره في اليوم الثاني ويوم رجع الدوحه وراجع اكتشف تشابه اسماء واللي عليه بلوك قطري وهو سعودي
من المسؤل عن هالمسخره

[almaf1a]

يعطونك فوتجر بسعر قيمه التذكرة وتطير اليوم التالي

[بوخالد911]

وانا استغرب من شي وهو كيف القطرية فازت وتفوز بجائزة أفضل طيران سنويا ؟!؟!؟!؟!؟

[ضوى]

صارت لنا هالسالفة عالخطوط الاماراتية لكن رفضت تخلي نصنا عالبزنس والنص عالسياحية قلت لها يا كلنا مع بعض والا مافي سفر وراح ارفع عليكم قضية ، كان باقي عالاقلاع عشر دقايق والطيارة ناطرتنا احنا بس اشلون صار لنا مكان عليها الله العالم

[Abdulraman]

وانا استغرب من شي وهو كيف القطرية فازت وتفوز بجائزة أفضل طيران سنويا ؟!؟!؟!؟!؟

افضل طيران لان مدلعين الاجانب والعلاقات لها دور

[اوف ليميت]

افضل طيران مش اعتمادا على مشكلتك
افضل طيران اعتمادا على شروط دوليه وتقييمات عالميه والخدمات بشكل عام

شخص او شخصين مايمثلون خدمات او نشاطات الشركه ومساهماتها في جميع انحاء العالم

:]

[كازانوفا]

المفروض اطالب بالتعويض لو صار مع واحد اجنبي او اوروبي راح يعطوه تعويض بدون ما هو يسالهم

[اللوز]

الحمد لله
انكم سافرتوا

[يحفظك ربي]

افضل طيران مش اعتمادا على مشكلتك
افضل طيران اعتمادا على شروط دوليه وتقييمات عالميه والخدمات بشكل عام

شخص او شخصين مايمثلون خدمات او نشاطات الشركه ومساهماتها في جميع انحاء العالم

:]

شفيك الشيخ مع هالاسلوب ؟؟؟؟

والله الاغلبيه يشتكون من معاملة القطرية وقدامك كم شخص صاده موقف سيء معاهم ومن معاملتهم غير اللي يشتكون واللي يكتبون واللي نسمع
ومع ذلك مافي فايده ليش ؟ لان السالفه كلها مصالح ف مصالح فهمت؟
لاتسوي نفسك صايد السالفه !!!!!!!!!!!! وعساك عالقوة

[قطرية مثقفة]

في مشاكل صارت من يوم اول العيد الى الان في القطريه

احنا صار لنا موقف زين مع اني ما داني القطريه ابدا خير شر

لكن وش الي صاير حاجزين انا والاهل الى ميونخ بتاريخ 28 من شهر 8
طبعا اوكنومي سياحيه وصلنا المطار بدري الا يقولي الموظف سوينا لكم اب جريد الى رجال الاعمال انت والاهل حنا كنا 4 وعطونا والله الكراسي وانا طول الوقت وانا منصدم واقول الحين بيدفعونا او بيغيرون رايهم والى الان مو مصدق السالفه :tease: الي صارت لنا لكن الحمدلله ربي عوضنا لله الحمد
اذا كان الايكونومي فول وهم مسوين حجز إضافي عليه وكل اللي حاجزين جايين فعلشان يحلون هالاشكال يسون اب جريد للبزنس اذا كان فاضي @@ وطبعا بيكون محظوظ اللي يحصل اب جريد ماشاءالله

[قطري مفلس]

صارت لي قصة مشابهه لها سنة 2006 وكانت رحلتي لباريس انا وخالي ،،،،

ونفس الكلام قالووولي مافي كراسي ،رغم ان حجزي اوكي وامووري في السليم !!

لكن الحمدلله ان كان واحد حاضر المشهد والجدال كامل يوم كنا في المطار وارتفعت اصواتنا ،، وطلع اللي قاعد يشوفنا وحضر الكلام كله طلع ( محامي) ومعروووف على مستوى قطر ،،،

قال اطلعوا من المطار ولا تاخذون منهم لاحجز ثاني ولا ثالث ولا تعويض مادي اي كلام ،،،

فعلا رحنا وقلنا بنشتكي عليكم وبنحط محامي وبنرفع قضية وبنسوي وبنسوي ،،،

عطونا تعويض تذكره لاي دولة في العالم مدة صلاحيتها سنة كامله ،، وبالاضافة الا مبلغ تذكرة باريس رجعوووها لنا كاملة ،،، وبالاضافة الى انا سافرنا باريس ببلاش عقب السالفة بثلاث ايام ،،،

وافتل على اخر دلع

[مكين]

رجاءا من تحدث له هذه الامور ان يستدعي الشرطة ويعمل محضر إثبات

ومن ثم رفع قضية حتى يحترموا القطريين

لان هذه الامور تحدث مع القطريين فقط لأنهم لا يشتكون في المحاكم

ولو كل واحد رفع قضية راح تحترم القطرية المواطن القطري

[سداوي&مدريدي]

نفس الموضوع صار لنا وكانت الوجهه كوالامبور وقالوا لنا فل وبعد الحك والصك معاهم حولونا على البزنس ترانزيت سنغفورا ومن هناك الى كوالامبور

[muhanna]

الراحة رباحة. من قال لكم تسافرون. كهرب مجان وكنديشن بارد ماي بارد معاش وايد الحمد لله لاتشدالرحال الا لثلاثة المسجد الحرام والوجد الأقصى ومسجدي هذا . من انجي الإجازة ركضوا المطار هذه حوبات *

[قطــ86ــر]

للأسف انها تحمل اسم البلد...

صار معاي الموضوع اكثر من مره
وفي كل مره اسوي لهم سالفه و اخلي الطياره تتأخر و اسافر عليها (بما ان عندي حجز مؤكد)
نصيحة لوجه الله ياخوي حقك لا تخليه لازم تشتكي و تاخذ تعويض
احنا مشكلتنا في قطر العالم صارت تاخذ الامور بطريقة عفوية
لو الناس تصر على اخذ حقوقها كان حال القطرية شي ثاني

ما اقول الا الله يسامح و يصلح المسؤولين في هالطيران على سياستهم في التعامل مع المسافرين من قطر و تفضيل جميع الدول الاخرى عليها بصورة فيها الكثير من عدم الاهتمام و الاحترام...

[cavok]

حسبي اللة ونعم الوكيل

[bo3adel]

هذي عوايد القطريه .. واخر مره واحنا راجعين من هيوستن للدوحه عطونا اوفرات بس حق القطريين اللي الفاينل دستنيشن مالهم الدوحه .. طبعا لانهم حاجزين اوفر بوكد فلايت .. صارت مشكله معا البوردنق كارد مالي والظاهر السستم عطاهم ان فيه مشكله .. وهني قفلت .. قلت اليوم والله ماتطير الطياره الا وانا عليها .. اجازتي اسبوعين وابي ارد قطر اليوم قبل باجر .. الموظفه دخلتني ودخلت الربع وياي غصب مب طيب ..



اخوي هذي الشي عادي كل خطوط الطيران يسون اوفر بوك حق الرحلة يعني حجز إضافي علشان مايخسرون اذا في ناس كنسلوا في غيرهم @@ بس المفروض المسافر يكون عنده ثقافة الحصول على حقه @@ بالمختصر المفيد اذا صادك هالموقف مره ثانية من حقك انك اطالب مقعد على الفيرست اذا حولوك على رحلة ثانية @@ انه قبل 5 سنوات كنت حاجزه حق خدامتي على الفلبين وكان زوجها عايش في الدوحة وعلى نفس الرحلة حاجز اللي صار ان الرحلة في حجز إضافي فلما وصلوا المطار راحت عليهم الكراسي وطبعا القطرية عرضوا على زوجي انهم يطرشونهم على رحلة هونج كونج ومن هناك على الفلبين طبعا زوجي وافق على شرط يعطونهم مقاعد على الفيرست لان الرحلة طويلة ومتعبة وفعلا عطوهم على الفيرست @@ والخدامة طارت من الفرح :) :) لا تسكتون عن حقكم :)


اختي قطريه .. بخصوص ان كل الطيران يسوون هالحركه .. اسمحي لي اقولج اني الحين 4 سنين ف امريكا عمري ماركبت طيران داخلي او حتى البرتش وصارت لي هالحركه .. بس تصير هالحركات ف القطريه لانهم يبون يشفطون فلوس .. هاي هدفهم .. بالنسبه للتعويض .. لو كان الشخص قطري بيقولون له بنعطيك فلوس وتركب سياحيه + فندق .. وانا عندي تيقن انهم مايعطون القطري بزنس بدال السياحيه في حال التنازل بالعماله ..

حتى يوم فـ هيوستن سالتهم بدافع الفضول اذا بروح ع الطياره بكره شنو العرض مالكم .. قالو لي 1500 دولار وسكن .. وتركب سياحيه .. قلت لهم اذا بركب بزنس اوكي بوافق غيره اسمحوا لي .. قالوا لا مانقدر ..

السالفه كلها سالفه عناد .. لو الموظف كان اوكي وياك بيفرش لك الارض بورود .. وجربت اسلوب حلو مع احد الموظفين وخلاني اركب بزنس بدال السياحيه .. واتوقع لو اي حد يسويها ويسوي لهم بلبله ممكن يوصل لنفس النتايج ..

فـ، النهايه .. القطريه دايم مصايبهم علينا احنا القطريين لانا نخاف نتكلم .. لاكن لو هندي ولا غيره والله غصب عن خشومهم بيدلعونه ..

يعطيك العافيه يا راعي الموضوع