خل نسكته بآيباد

[ms-qtr]

بسم الله الرحمن الرحيم

من فترة زرت ناس نعرفهم وكان عندهم بنت متزوجة وعندها يهال اثنين اعمارهم مابين السنة و الثلاث سنوات الله يحفظهم

المهم اني لاحظت ان الام شارية آيباد لكل واحد منهم

وكل ما صاح واحد منهم او استعوه قالت حق الخدامه شغليله الآيباد

فكتشفت إن الأم شاريه الآيباد "قرقاشة" حق عيالها

القضية هي هل تعتقدون ان من الطبيعي والمنطقي ان يكون الايباد بحوزة طفل لا يستطيع ان يكون جملة مفيدة؟؟

وهل تعتقدون ان الموضوع فيه مبالغة ام انه شيئ جداً عادي في وسط التطور التكنلوجي الي نعيشه؟؟

[الخزرجي قطر]

هذا الشي عادي في زمننا الحالي
جيل اليوم خبرته وحياته بلاك بيري
او ايباد اوجلاكسي اواي فون وكل شي جديد هم اخبر منا فيه

[intesar]

مع أنني أرفض أن يكون جهاز ليس رخيصا.. كقرقاشة لأطفال لا يستوعبون شيئا.. إلا أحيانا أعيننا استسهلت تلك الأمور كوننا نعيش وسط التطور التكنولوجي..

ودمتم بحفظ الرحمن..

[Scout Sniper]

جيل الليدي غاغا :)

[سكتون]

بصراحه
سن ٣ سنين ينفعه الايباد ويطور مهاراته
لان في برامج للاطفال تعليميه والعاب تسليهم
الجيل الجاي خطير وتكنلوجي ههههه

[CH Engineer]

مع أنني أرفض أن يكون جهاز ليس رخيصا.. كقرقاشة لأطفال لا يستوعبون شيئا

مب سالفة رخيص وغالي
هالشي غلط ودوري بديل راح تضرين الياهل بهالجهاز
الشاشه تضر عينه والارسال يضره توه ياهل

[حميداني]

ماتشوف ثلاث ترباع اعيالنا صارو تنابل واكثرهم كانه خيشة عيش وش متن
لو من صوبي ما اعطيهم والله هالخرابيط

خلهم يلعبون كوره يتعلمون يختلطون ويا الناس يلعبون خشيشه اي شي فيه حركه , يلعبون بشي يقويهم
مب شي يخليه أبلد وابلد

الله يهدي هالاهالي اللي اشترو راحتهم بتخدير اعيالهم في مثل هالوسايل والالعاب

[qrt_trading]

أنا عيالي اعمارهم ٥ و٦ و٧ وكل واحد عنده إيقاد بس الحين خذته منهم ووديته يسوون له ابديت وبلغتهم اني ما راح اسلمهم إياه الا في الويكند لأني صراحة خلال هالاجازة لاحظت ان الايباد صار عندهم مثل الادمان سواء يلعبون فيه ولا لا شايلينه على جبدهم ويدورون فيه من مكان للثاني وبدل ما يلعبون ويركضون صاروا كله قاعدين عليه وهالشي كلش مش صحي لهم فخلاص مافي ايباد الا في الويكند جمعه وسبت وممنوع يودونه بيت حد الخميس لا لانها يمعة الأهل وابيهم يلعبون ويركضون.

[الشيخة شيوخة]

ايه ايه عادى وانا هم عندى بنت اخت عمرها ماتعدى ثلاث سنوات وكم شهر اطلبت من ابوها يشترى لها اي باد والله اشترا لها وتعرف تشغله احسن منى الحين صار عمرها اربع سنوات وكله تقولى انتى ماتعرفين شي لاتخربيت الاي باد مالى انا اصير كذا:secret:

[حميداني]

ايه ايه عادى وانا هم عندى بنت اخت عمرها ماتعدى ثلاث سنوات وكم شهر اطلبت من ابوها يشترى لها اي باد والله اشترا لها وتعرف تشغله احسن منى الحين صار عمرها اربع سنوات وكله تقولى انتى ماتعرفين شي لاتخربيت الاي باد مالى انا اصير كذا:secret:

هههههههه ذكرتيني بولد عمي الصغير , ما شاءالله عليهم
مع ذلك أشوف المفروض الكل يسوي ما يسوي qrt_trading لانه برايي هو التوازن الصحيح

[qrt_trading]

هههههههه ذكرتيني بولد عمي الصغير , ما شاءالله عليهم
مع ذلك أشوف المفروض الكل يسوي ما يسوي qrt_trading لانه برايي هو التوازن الصحيح



والله أنا ادري وش راح يجيني اصراخ وصياح ونواح بس أنا حالفه اني ما اعطيهم إياه الا في الويكند وزوجي امأيدني في هالشي لانهم صج مصخوها هالاجازة مع الايباد :discuss: المشكله انهم لحد الحين مش امصدقيني اني ما راح اعطيهم إياه خلاص بس مردهم بيعرفون وبيتعودون على الوضع الجديد :nice:

وشكرا اخوي حميداني على التأييد:shy:

[حميداني]

والله أنا ادري وش راح يجيني اصراخ وصياح ونواح بس أنا حالفه اني ما اعطيهم إياه الا في الويكند وزوجي امأيدني في هالشي لانهم صج مصخوها هالاجازة مع الايباد :discuss: المشكله انهم لحد الحين مش امصدقيني اني ما راح اعطيهم إياه خلاص بس مردهم بيعرفون وبيتعودون على الوضع الجديد :nice:

وشكرا اخوي حميداني على التأييد:shy:

:nice: كفووو عليكم والله ... اصمدو والفرج قريب

لا تخلونهم قرود بو خمس سنين يتحكمون فيكم مثل ناس أعرفهم كل مايبون شي
شغلو اليهال الصفارات وللاسف البعض يستسلم ويختار الحل السهل بانه يريح راسه على حساب مستقبلهم وصحتهم

[هامور خرطي]

انا ولدي عمره سنتين وعنده ايباد .

ياناس لازم تعرفون ان الايباد مب بس انترنت ، الايباد جهاز وفيه برامج تعليمية كثيرة مثل تعليم الحروف والارقام والتركيبات والاشكال والالوان وغيرها وقصص قبل النوم وغيرها وفي العاب ترفيهيية مناسبة لكل الاعمار من ابو سنة ونص الى 60 سنة .
وأنا بنفسي ادور البرامج وأشتري بعضها وأنزلها وخمس دقايق تتعلم ام العيال عليها .
وهو سلاح ذو حدين فهو مسلي للطفل والدليل يسكت اذا شافه واشتغل وقد يساء استغلاله بتشغيل بعض البرامج

[qatar.syria]

أنا مع فكرة ان يكون الايباد مع الطفل مهما كان عمره صغير ولكن بشرط ألا يكون قرقاشة أو تسكيته له.

أنا عندي ايباد واحد في البيت وتستخدمه ابنتي الكبيرة عمرها اقل من 4 سنوات أي لم تدخل الروضة بعد ومع ذلك فقد حفظت منه تقريبا كل الحروف العربية والارقام والألوان، أما الصغيرة والتي عمرها سنة ونص فهي تلعب بالعاب البزل والمربعات والمكعبات وتوجد المتشابهات وقد لاحظت ان مهاراتها تطورت بسرعة على الايباد مع العلم بانها صغيرة بالعمر.

ولكن الايباد عندي لا اعطيه للبنات إلا بوقت محدد وليس للتسكيته او القرقاشة

[بوخالد911]

بخصوص اليهال

الحين القرقاشة + المصاصة هي : ايباد

:)

[ضوى]

عيالي كل واحد فيهم عنده ايبود ، لكن مايستخدمونه الا بالاجازة فقط غير هذا نو واي ، الالعاب تنمي مهاراتهم بس مب اي العاب

عموما انا هالتكنولوجيا اكرهها للعيال لانه صج تخليهم تنابل

[كازانوفا]

للاسف من كثر ما هو منتشر عند فئة الخمس سنوات واقل
صارو عيالي يطالبوني فيه واستغرب انه يضل الواحد منهم يزن ليل نهار جيبيلي ايباااااااد

[شمس2]

انا ولدي طلعت عليه اعراض الايباد وهو صغير خمس سنين
طبعا هالاعراض معروفه حق المدمنين الصغار
1 لما ينزل راسه ويلعب بالايباد يقعد يمص ملابسه القريبه من رقبته لين تنعلج بتعبير عامي :eek5:
2 اصبعه في حلجه
3 يسولف مع زومبي وربعه اللي في الايباد:rolleyes2:
4 الله يعزكم مايرروح الحمام الا لين وصل حده كلش :shy:
واعراض اخرى طبعا
واحنا بصراحه علشان نفتك من حنته وشطانته الله يحفظه نخليه مع ادمانه
اللي عنده الحل يعطينا :(

[موووج قطر]

بنت اختي الله يحفظها لين جات بيتنا .. تطلب الايباد عشان تلعب .. بس موب ادمان .. عادي ..
حزات وهي تاكل لازم نحط لها لعبه اتعلمها الدائره و المثلث و المربع و المستطيل ..
الالوان .. الفواكه الخضراوات .. اعضاء الانسان ..
بالعكس انا اشوفه مفيد .. بس موب من الصبح لين الليل ..لا طبعا ..
انا ماشوفها مدمنه عليه ..
بس ضروري وقت الاكل ..
يعني قبل الااشتري الاي باد ..
كانت تجربنا كلنا انتابع قناة براعم معاها وقت الاكل او طيور الجنه ..
الحين نقدر انحط قناه ثانيه .. وهي لها قناتها في الاي باد
:
الله يحفظ عيالنا و عيالكم ..

[اوف ليميت]

انا الوالده عندها ايباد
والوالد عنده ايباد
وبنتي المتزوجه عندها اي باد
وولدي عمره 45 سنه عنده اي باد
والخدامه عندها ايباد
وانا عندي للحين كمبيوتر صخر..مستانس ع لعبة رامبو

محد يبي يشتريلي اي باد

:]

[موووج قطر]

انا الوالده عندها ايباد
والوالد عنده ايباد
وبنتي المتزوجه عندها اي باد
وولدي عمره 45 سنه عنده اي باد
والخدامه عندها ايباد
وانا عندي للحين كمبيوتر صخر..مستانس ع لعبة رامبو

محد يبي يشتريلي اي باد

:]

اجمع نقاط نجوم من كيوتل و شتر لك اي باد ... وفتل

[بوحمد2]

مع أنني أرفض أن يكون جهاز ليس رخيصا.. كقرقاشة لأطفال لا يستوعبون شيئا.. إلا أحيانا أعيننا استسهلت تلك الأمور كوننا نعيش وسط التطور التكنولوجي..

ودمتم بحفظ الرحمن..

جيل عجيب