المساعد الشخصي الرقمي

مشاهدة النسخة كاملة : الموضه الي طايحين عليها الشباب حيااااااكم موضوع قديم للنقاش


بومحمد المطاوعه
13-09-2012, 01:34 PM
السلام عليكم ورحمه الله وبركاته

حبيت اطرح لكم موضوع من قبل طرحته وحاب ارجعه للنقاش لان والله زاد ف الشارع

الموضه الي طايحين عليها الشباب عند الزحمه في رفع صوت الأغاني داخل السياره


الصراحه قمنا نشوف العجائب عند الدوار ولا اشاره اذا كانت حمره

ولا في زحمه اي شارع

فئه من الشباب الذين يحبون يطولون على الأغاني في السياره


يعني واقف في الزحمه وانت متضايق ولا فيك شي اتحصل الي جنبك مطول على الأغنيه

وطق وعنده عرس ف الموتر انزين ليش؟

ياخي يمكن انت اتطول على الاغنيه ولي جنبك رايح عزاء ولا حد من اهله متوفي في اليوم نفسه

راعي شعور غيرك ياخي

انت مسوي عرس جنبه لازم تقدر الاخرين

شالفايده منك يالي تسمع الأغاني ولا بعد تزيد الطين بله ترفع صوت المسجل حده يعني سمعوني ياناااااااااس انا الي اسمع حق فلان وعلان

(( والله مصخره ))

موقع سماحه العلامه ابن باز رحمه الله

ما حكم الأغاني بجميع أنواعها؟ وما العقاب الذي ينتظر المستمعين والمغنين؟



الأغاني كلها محرمة ولا يجوز الاستماع لها؛ لأنها من لهو الحديث المذكور في

قوله تعالى: وَمِنَ النَّاسِ مَنْ يَشْتَرِي لَهْوَ الْحَدِيثِ لِيُضِلَّ عَنْ سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا أُولَئِكَ لَهُمْ عَذَابٌ مُهِينٌ * وَإِذَا تُتْلَى عَلَيْهِ آيَاتُنَا وَلَّى مُسْتَكْبِرًا كَأَنْ لَمْ يَسْمَعْهَا كَأَنَّ فِي أُذُنَيْهِ وَقْرًا فَبَشِّرْهُ بِعَذَابٍ أَلِيمٍ[1]

ولهو الحديث هو الغناء وما يصحبه من آلات الطرب عند أكثر أهل العلم، ولأن ذلك من أسباب مرض القلوب وقسوتها وغفلتها عن الله عز وجل والدار الآخرة، ولأنها من أسباب الضلال والإضلال، ومن أسباب الاستهزاء بدين الله، ومن أسباب الاستكبار عن سماع القرآن والإعراض عنه، كما ترشد إلى ذلك كله الآيتان المذكورتان آنفا. فهي لها نتائج خبيثة وعواقب سيئة، فينبغي للمؤمن أن لا يستمعها بالكلية، لا من الإذاعة ولا من غير الإذاعة، ولا من الأشرطة،

ولهذا يقول ابن مسعود رضي الله عنه: (الغناء ينبت النفاق في القلب كما ينبت الماء الزرع).


انا لاحظت وايد شباب والله والقهر يترقصون بعد في السياره

(( اين ذهبت الرجوله ))

شتبي يقولون عنكم المشركين الكفار لو حد شاف شاب مسلم يفعل هالشي؟؟

الحمدلله والشكر على نعمه العقل

استح على وجهك رجال شكبرك واللحيه والشنب خاطين على وجهك تترقص كأنك بنت

لاحول ولا قوه الا بالله

يعني حبكت الا في الزحمه

ولا واقف على الدوار ولا على الاشاره وتترقص في السياره ورافع على الصوت

واغاني طقطقه ولا بعض الاحيان اسمع اغاني ام علايه

ياخي والله عيب عليك قسم بالله عيب

يعني انا اصكر الدريشه واشغل المسجل احط قرأن ولا احط اخبار ولا نشيده

اطول على الصوت بعد اسمع صوت الاغنيه ( الله المستعان )

يعني الواحد ماقام يفكر في الناس الثانيين ولا يحترمهم لازم يشوف الناس نفس اخلاقه التعيسه ..؟؟

يمكن الشخص رايح حق ابوه ولا امه ولا اي شخص غالي عليه في المستشفى وطول الوقت متضايق هالشخص

وفي الاخير ينصدم من سياره جنبه مطول على اغنيه ولا بعد يترقص

ومندمج الحبيب مع الاغنيه

الشارع له احترامه في هذا الشي مب تزعج الاخرين

الله يبعد عنكم هالشباب الي يسوون هالحركات

ان شاءالله محد يصادف سياره جنبه ومطول على الأغاني

ياليت لو قرأن ولا نشيده ولا محاضره بنقوله جزاه الله خير

حتى المتضايق بينشرح صدره لو سمع شي مفيد

مثل واحد يقرأ القرأن صدقوني اي متضايق يسمع بيستانس وبيفرح وبيقول جزاه الله خير

بس لو واحد مطول على الاغاني

المتضايق بيسبه وبيقعد يدعي عليه وبيلعن فيه استغفر الله

ليش الواحد يحب يجيب الكلام لنفسه

بطرح لكم سالفه صارت معاي من فتره حوالي سنه تقريبآ


مره من المرات كنت في الكورنيش قريب من دوار المسرح

قبل الاذان بشوي جنبي فورد موستنج وفاتح الشتري

ومب قطري من الاخوه العربيين الله يهديه ويصلحه

مطول على اغنيه انجليزيه وفي شرطي على الدوار انا شايفه

وانا التفت على راعي السياره والله ماعبرني انزين ياخي استح على ويهك

شافني مطوع زاد على الصوت حسبي الله عليه

والله ولا استحى ولا شي

اول ماسمعت الأذان لصلاة العشاء

نزلت الدريشه وقلت له

يالــطـــيـــب بكل احترام كلمته

لوسمحت قصر على الصوت قالي شووو

قلت له قصر على الصوت

ولا قصر ورد يطالع سيده

ويهزز راسه يمين يسار نفس الحمامه

رديت ناديته وقلت له ياهيييييييييه

قصر احسن لك

ماتسمع الأذان اتق الله في نفسك

ولا عبرني ولا شي

انا شدني الغضب لاني قاعد اشوف منكر جدامي وشي يخدش الدين الاسلامي وبعد فـ بلادي والله ما اسكت


فالواجب علي أن اعدل المنكر أينما كنت حسب طاقتي،

كما قال النبي - صلى الله عليه وسلم -:

(من رأى منكم منكراً فليغيره بيده فإن لم يستطع فبلسانه فإن لم يستطع فبقلبه وذلك أضعف الإيمان)

المهم اهو من الطخه الي يلبسون شغاب على الاذن
وسلاسل على الرقبه نفس
الحيوانات الأليفه الله يعزكم

قال رسول الله صلى الله عليه وسلم

لعن من تشبه من النساء بالرجال ولعن المشتبه من الرجال بالنساء.

وهكذا قال: (من تشبه بقومٍ فهو منهم).

المهـــم ...

ولا اهتم في كلامي و ماقصر على صوت الأغنيه المهم انا عرضت موتري في ويه موتره وسكرت عليه الشارع

ونزلت رحت حق الشرطي ركيض كان واقف عند الدوار

قلت له تعال وشوف المصخره مطول على الأغنيه والحين وقت الأذان اسمع ياشيخ

الشرطي ماقصر جاي لين عنده واخذ الليسن والملكيه وقاله اخذ الدوار وتعال وقالي انا اركب موترك يامطوع وتوكل على الله دربك خضر

يعني شوفو الوقاحه اشلون ولا واحد مقيم بعد الحمدلله والشكر بعضهم لايحترمون الدوله الي ضامتهم ولا شي

((( البعض وليس الكل )))

وحتى لو كان قطري او خليجي راح اسوي نفس ماسويت ولا بخاف منه اخاف من الله تعالى

اتمنى من الاشخاص الي لهم نفس هالسوالف

يبعدون عن هالحركات ترى مب حلوه لا في حقك ولا في حق اي انسان غيرك

وتحياتي لكم

وجزاكم الله خير


ـــــــــــــــــــــــــــــــ

سؤالي

هل انا اخطأت في شي ؟؟؟؟

وهل تصرفي كان صحيح ام لا؟؟؟

انا اتكلم في الدين الأسلامي مالي شغل في الديمقراطيه و الحريه يمكن الحريه تسمح له بذالك

كل القصد مني ان اسوي هالشي لوجه الله تعالى مب لأني ابي ابرز نفسي


اخوكم بومحمد المطاوعه

طرحت الموضوع للنقاش وللحق العام مب للمفاشر


واتمنى من الي بيرد علي بكلمه مفاشر ولا شي يكرمني بسكوته :)
فارس قطر
13-09-2012, 01:40 PM
صلب واللوفر والمجانين في كل ديرة تحصلهم مب بس عندنا

يسلموا على الموضوع.
بومحمد المطاوعه
13-09-2012, 01:46 PM
صلب واللوفر والمجانين في كل ديرة تحصلهم مب بس عندنا
يسلموا على الموضوع.

الله يسلمك ياريال صحيح كل مكان في بس قهر
Anas_G
13-09-2012, 01:54 PM
عاد انا اشوف ان هالفئة انقرضت من زمان وراحت هالموضة
بومحمد المطاوعه
13-09-2012, 01:55 PM
عاد انا اشوف ان هالفئة انقرضت من زمان وراحت هالموضة

للحين ياخوي موجودين

بس نفس الخفافيش يطلعون فليل
ريتويت
13-09-2012, 01:58 PM
هذول عندنا بمعيذر.. لا والمصيبه لو يصيده حادث ويموت كيف يقابل رب العالمين.. يارب اسالك حسن الخاتمه
عزووز قطر
13-09-2012, 02:00 PM
ياكثرهم في كتارا وخصوصا اللي عندهم الجيب الصيني
والسيارات السبورت المكشوفه

واتوقع عليها مخالفة
بومحمد المطاوعه
13-09-2012, 02:00 PM
هذول عندنا بمعيذر.. لا والمصيبه لو يصيده حادث ويموت كيف يقابل رب العالمين.. يارب اسالك حسن الخاتمه

الله يهديهم

والله بيقابل رب العالمين بندم
بومحمد المطاوعه
13-09-2012, 02:01 PM
ياكثرهم في كتارا وخصوصا اللي عندهم الجيب الصيني
والسيارات السبورت المكشوفه

واتوقع عليها مخالفة

صحيح عليها مخالفه

بس لو شافو اي دوريه

يقصرون

يخافون من الدوريه ولا يخافون من الله

الله يهديهم
بصمة قطرية
13-09-2012, 02:03 PM
والله موجودين و بكثرة
بالذات عند الإشارات ..!!!
للأمانة الغالبية اللي نصادفهم عند الاشارات
يكونون غير قطريين ...!!!
أكره هالتصرف ..
و أبداً ما أعتبره حرية شخصية ..
الحرية الشخصية تنتي لما تتعداك و توصل للغير ..
وقتها نقول ستوب انت تعديت حدود حريتك ..

الله يهديهم و يصلحهم
مادري اش ماخذين من هالأغاني ..
بومحمد المطاوعه
13-09-2012, 02:06 PM
والله موجودين و بكثرة
بالذات عند الإشارات ..!!!
للأمانة الغالبية اللي نصادفهم عند الاشارات
يكونون غير قطريين ...!!!
أكره هالتصرف ..
و أبداً ما أعتبره حرية شخصية ..
الحرية الشخصية تنتي لما تتعداك و توصل للغير ..
وقتها نقول ستوب انت تعديت حدود حريتك ..

الله يهديهم و يصلحهم
مادري اش ماخذين من هالأغاني ..

صحيح اختي

الاغلب غير قطريين

وحتى يكونون بعضهم اجانب مب عرب

وفي قطريين وخليجيين وعربيين

بس ليش هالشي

مستفيدين شنو من هالمهزله
chillis
13-09-2012, 02:07 PM
الله يهديهم الحين بينا واحد بيقول البنات منهم
ريم 28
13-09-2012, 02:09 PM
جزاك الله خير


الله يهدي الجميع يارب
حسن
13-09-2012, 02:17 PM
الصراحه ماشفت الى مره وحده عند المغرب وللاسف كانو بنات ولكن مهب قطريات

وبعدين الواحد وش يبي بالهياته في الشوارع الحمدلله من يعد المغرب على طول المجلس
لاكتارا ولا غيرها وش اسوي في كتارا اصلنا ماعندي سالفه دخلته مره ولا مرتين رغم بيني وبينه دوارين
ناس فاضيه قرو في بيوتكم خلصو اشغالككم الصبح ولا العصر على طول والمغرب في البيت ابرك واحفظ
الدوحة قطر
13-09-2012, 02:20 PM
من وجهة نضري ما تطلع هالسوالف غير من

واحد بزر توه داش عالم المراهقة بلفيت اني انا الفله ( الكول ما ادري شيسمونهم )

او واحد عنده نقص وعدم ثقة في نفسة ويحاول يلفت الانضار عليه باي طريقة

او واحد الله ابتلاه والعياذ بالله وصارت حياة كلها طق طبول ومسيقى وطرب وصار ما يقدر يعيش في غير هالجو

جميع الانصناف الي ذكرتها محتاجه حق حد يهديها للطريج الصحيح والله المستعان

عسى الله يهدينا جميعا الى ما يحب ويرضى قولوا امين
سهيمان
13-09-2012, 02:23 PM
جزاك الله خير يابومحمد وكثر الله من امثالك تصرفك عين العقل والحكمة

ولو كل واحد تصرف نفس تصرفك كان ماشفنا المنكرات تزيد
م. عبدالعزيز
13-09-2012, 02:54 PM
جزاك الله خير وبيض الله وجهك
سداوي&مدريدي
13-09-2012, 02:59 PM
عاد انا اشوف ان هالفئة انقرضت من زمان وراحت هالموضة

لا موجوده والمصيبه الاكبر من فئه البنات :eek5:

من يومين وحده واقفه حذاي ومطوله على الاغاني حدها :secret:
بومحمد المطاوعه
13-09-2012, 03:56 PM
الله يهديهم الحين بينا واحد بيقول البنات منهم

اللهم امين

ترى في بعض البنات

نفس الشي
بومحمد المطاوعه
13-09-2012, 04:01 PM
جزاك الله خير

الله يهدي الجميع يارب

اللهم امين

جزاج الله خير
بومحمد المطاوعه
13-09-2012, 04:04 PM
الصراحه ماشفت الى مره وحده عند المغرب وللاسف كانو بنات ولكن مهب قطريات

وبعدين الواحد وش يبي بالهياته في الشوارع الحمدلله من يعد المغرب على طول المجلس
لاكتارا ولا غيرها وش اسوي في كتارا اصلنا ماعندي سالفه دخلته مره ولا مرتين رغم بيني وبينه دوارين
ناس فاضيه قرو في بيوتكم خلصو اشغالككم الصبح ولا العصر على طول والمغرب في البيت ابرك واحفظ


الله المستعان

الله يهديهم يارب

هذولا الي يتمشون بدون سبب

معقدين
بومحمد المطاوعه
13-09-2012, 04:07 PM
من وجهة نضري ما تطلع هالسوالف غير من

واحد بزر توه داش عالم المراهقة بلفيت اني انا الفله ( الكول ما ادري شيسمونهم )

او واحد عنده نقص وعدم ثقة في نفسة ويحاول يلفت الانضار عليه باي طريقة

او واحد الله ابتلاه والعياذ بالله وصارت حياة كلها طق طبول ومسيقى وطرب وصار ما يقدر يعيش في غير هالجو

جميع الانصناف الي ذكرتها محتاجه حق حد يهديها للطريج الصحيح والله المستعان

عسى الله يهدينا جميعا الى ما يحب ويرضى قولوا امين

اللهم امين

صحيح الاكثريه هالمراهقين

بس ترى انا اشوف ناس كبار

وشفت مره عائله مع الادريول

شيء محزن والله

الله يستر عليهم
بومحمد المطاوعه
13-09-2012, 04:11 PM
جزاك الله خير يابومحمد وكثر الله من امثالك تصرفك عين العقل والحكمة

ولو كل واحد تصرف نفس تصرفك كان ماشفنا المنكرات تزيد

ويجزاك ياخوي

والله ياخوي اتمنى م الشباب يكونون احسن مني

والحمدلله في شباب ونعم فيهم

جزاك الله خير*
بومحمد المطاوعه
13-09-2012, 04:15 PM
جزاك الله خير وبيض الله وجهك

ويجزاك ياخوي

ووجهك ابيض بارك الله فيك
حميداني
13-09-2012, 04:17 PM
هل انا اخطأت في شي ؟؟؟؟

لاء

وهل تصرفي كان صحيح ام لا؟؟؟

صحيح

مع اني مع من قال باجازة الاغاني تحت الشروط والاسلام أوسع من انه يحجز في دايرة محدده من المفسرين والمفتيين لكن هذا موضوع ثاني


هذا اللي سواه الشخص تعدى عليك وعلى حقك في اعتقادك الديني وسمعك في شي انت ما ودك تسمعه فبدل ما يخليه لحاله قام يهايط فيه

فوق هذا قعد يرفعه على صوت النداء لله عز وجل يلهي ويحجبهم عنه
اهني يكون فعلاً ما سويته صحيح وزين ما سكت عن هالاشكال مع اني لو انا منك ما اسكت عنه في البدايه ان شايف هذا الشي حرام علي سمعه , احترام مشاعر الاخرين في ما يعتقدون بحد انه ما يضر باعتقاد غيره والاولويه لما يعتقد به أغلب سكان البلد ,, فهو فرض على كل واحد عايش في هالمكان يتبعه ويحترمك غصب طيب

المهم الله يقويك على ما سوييت , واصل
بنت المطر
13-09-2012, 04:24 PM
تصرفك سليم لان المنكر ماينسكت عنه


جزاك الله خير ووفقك الله
بومحمد المطاوعه
13-09-2012, 04:26 PM
هل انا اخطأت في شي ؟؟؟؟

لاء

وهل تصرفي كان صحيح ام لا؟؟؟

صحيح

مع اني مع من قال باجازة الاغاني تحت الشروط والاسلام أوسع من انه يحجز في دايرة محدده من المفسرين والمفتيين لكن هذا موضوع ثاني


هذا اللي سواه الشخص تعدى عليك وعلى حقك في اعتقادك الديني وسمعك في شي انت ما ودك تسمعه فبدل ما يخليه لحاله قام يهايط فيه

فوق هذا قعد يرفعه على صوت النداء لله عز وجل يلهي ويحجبهم عنه
اهني يكون فعلاً ما سويته صحيح وزين ما سكت عن هالاشكال مع اني لو انا منك ما اسكت عنه في البدايه ان شايف هذا الشي حرام علي سمعه , احترام مشاعر الاخرين في ما يعتقدون بحد انه ما يضر باعتقاد غيره والاولويه لما يعتقد به أغلب سكان البلد ,, فهو فرض على كل واحد عايش في هالمكان يتبعه ويحترمك غصب طيب

المهم الله يقويك على ما سوييت , واصل

الله يجزاك خير ياخوي

والله يقووييك

والحمدلله اني ما اسكت

وجزاك الله خير
بومحمد المطاوعه
13-09-2012, 04:27 PM
تصرفك سليم لان المنكر ماينسكت عنه


جزاك الله خير ووفقك الله

ويجزاكي اختي

الحمدلله على كل حال والله يهديهم
زقرتي ومزاجي
14-09-2012, 02:01 AM
اخرتها يامطوع يا بتنسجن ولا بتنضرب ... شلون تعرض الموتر في وجهه
خلاااص ياخي كلمته ماسمع كيفه بالقوه هو ... بدل ما تدعيله بالهداية تشتكي علية
تبيه يكره الدين ... شنو ياهيييييه وشنو قصر احسن لك
وينك عن كلااام الجبار الحليم (( وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ))

بعض المطاوعه يبيلهم دورة في فن التعامل مع الناس
بيبيب
14-09-2012, 03:10 AM
(( والله مصخره ))

(( والله مسخره )) :)


الله المستعان والله يهدي الجميع
qatarshark
14-09-2012, 03:25 AM
مرة من المرات كنت مع زوجتي والسيارة الي جنبنا الصوت عالي وطق سامري هههههه
المهم انا قلت لزوجتي اتراهنين ان الي بالسيارة ......؟ افهموها
المهم قربت من السيارة وهني الصدمة
وحدة مبرقعة ومعاها واحد ما ادري زوجها اخوها
المهم ان راسي عورني من الصوت
حتى زوجتي تقولي شفيك استنزلت ههههههه
مصخرة
الله يهديهم
بومحمد المطاوعه
14-09-2012, 02:26 PM
اخرتها يامطوع يا بتنسجن ولا بتنضرب ... شلون تعرض الموتر في وجهه
خلاااص ياخي كلمته ماسمع كيفه بالقوه هو ... بدل ما تدعيله بالهداية تشتكي علية
تبيه يكره الدين ... شنو ياهيييييه وشنو قصر احسن لك
وينك عن كلااام الجبار الحليم (( وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ))

بعض المطاوعه يبيلهم دورة في فن التعامل مع الناس


انت وينك على كلام الله تعالى


قال تعالى: ﴿كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ...﴾ [سورة آل عمران، الآية 110].

اول شي مدام انا مب مسوي شي غلط مب كفو انسجن ولا بكفو واحد يمد ايده علي

اذا انت ماتدافع عن الدين وخايف من الضرب هالشي يراجع لك

صحيح دعيت له بالهدايه بس شي اقدر ابدله بأيدي بسويه

وبعدين مامديت ايدي وقصرت ولا فتحت عليه الباب

كلمت الجهه المختصه فيها شي ؟؟

وانا كلمته بحترام مافاد اقرى موضووعي عدل عقب ناقش اخوي

يعني تسمع الاذان وتخليه على راحته وين غيرتك على الاذان

وبقولك شغله الرجال طلع لا ليسن ولا ملكيه والموتر بدون تأمين

يعني سويت خير الحمدلله

اتمنى تاخذ دوره فن الردود ف المنتدى

شكرا على ردك المحترم :)
خليفـة
14-09-2012, 02:33 PM
قواك الله اخوي ولد المطاوعة
بخصوص الموضوع اخوي
بعيد عنك هذي قلة أدب من البعض
مطول الصوت ومو مراعي الآخرين
ازعاج وفوضى وفي مكان عام للجميع

الي حابب يسمع اغاني بصوت عالي
يقدر يسكر درايش موتره ويكون ماسك بعيد عن الناس
وعليه بالعافية
اما منزل درايش موترك والصوت حده لأغاني هابطه
اعتقد ان هذا مو من حق اي شخص
والدليل ان القانون في المرور يمنع ذلك

عن نفسي لما اصادف شي من هالقبيل
اعطي راعي الصوت العالي نظرة .. كافيه ليشعر انه من حثالة المجتمع
:)

قواك الله مرة ثانية .. موضوعك طيب

خليفـــة
بومحمد المطاوعه
14-09-2012, 02:38 PM
مرة من المرات كنت مع زوجتي والسيارة الي جنبنا الصوت عالي وطق سامري هههههه
المهم انا قلت لزوجتي اتراهنين ان الي بالسيارة ......؟ افهموها
المهم قربت من السيارة وهني الصدمة
وحدة مبرقعة ومعاها واحد ما ادري زوجها اخوها
المهم ان راسي عورني من الصوت
حتى زوجتي تقولي شفيك استنزلت ههههههه
مصخرة
الله يهديهم

بعيد الشر والله مصخره

اقول اخوووي تحمل لايجيك رد الحين ومكتوب فيه

ياخي شعليك عادي خلها تستانس

وحاسب تشوفها ولاتنصحها يمكن تنضرب ضرب او تنسجن ههههههههه

ماخذ امور السجن لعبه الحبيب

قاعدين ف المريخ تعال اضرب وحرك هههههه


الله يهديهم
بومحمد المطاوعه
14-09-2012, 02:49 PM
قواك الله اخوي ولد المطاوعة
بخصوص الموضوع اخوي
بعيد عنك هذي قلة أدب من البعض
مطول الصوت ومو مراعي الآخرين
ازعاج وفوضى وفي مكان عام للجميع

الي حابب يسمع اغاني بصوت عالي
يقدر يسكر درايش موتره ويكون ماسك بعيد عن الناس
وعليه بالعافية
اما منزل درايش موترك والصوت حده لأغاني هابطه
اعتقد ان هذا مو من حق اي شخص
والدليل ان القانون في المرور يمنع ذلك

عن نفسي لما اصادف شي من هالقبيل
اعطي راعي الصوت العالي نظرة .. كافيه ليشعر انه من حثالة المجتمع
:)

قواك الله مرة ثانية .. موضوعك طيب

خليفـــة

الله يقويك ياخوي على طاعه الله

ياريال وايد اشوف هالاشياء بس بعضهم يقصرون لو تشوفه بنظره مبتسمه

وبعضهم لا يخربها ازيد

الله يهديهم

واتمنى بعص الناس يدري ان في نص فالقانون

والقانون تم وضعه ولي الامر

واجب علينا طاعته

وجزاك الله خير
Al-Kuwari
14-09-2012, 04:14 PM
الله يجزاك خير يابومحمد

سلم على اخوك شاهين يالذيب
intesar
14-09-2012, 04:21 PM
بالفعل.. هذه الظاهرة تكاد تختفي.. مع بروز ظواهر أخرى جديدة..
بومحمد المطاوعه
14-09-2012, 07:07 PM
الله يجزاك خير يابومحمد

سلم على اخوك شاهين يالذيب

ويجزاك يالغالي

ابشر يوصل ان شاءالله

:)
بومحمد المطاوعه
14-09-2012, 07:08 PM
بالفعل.. هذه الظاهرة تكاد تختفي.. مع بروز ظواهر أخرى جديدة..

صحيح

الله يستر ويهديهم
جفى الجوارح
15-09-2012, 02:45 AM
نقص دين وعقل واخلاق وتربيه
يااااااااااااااااااااااااااااا كثرهم لا وما يكتفون بسماعات السيارة يروحون يركبون سماعات اكبر
الله يهديهم ان شاء الله
بومحمد المطاوعه
15-09-2012, 03:15 AM
نقص دين وعقل واخلاق وتربيه
يااااااااااااااااااااااااااااا كثرهم لا وما يكتفون بسماعات السيارة يروحون يركبون سماعات اكبر
الله يهديهم ان شاء الله

اللهم امين

صحيح الحين قامو يركبون ام بي فاير وصوت اقوى
المدريدي
15-09-2012, 09:10 AM
جزاك الله خير وفي ميزان حسناتك
دااانة قطر
15-09-2012, 09:25 AM
الله يهديهم
والغريبه يختاارون وقت مابين الاذان والاقاامه لااحظتهم اكثر من مره
بومحمد المطاوعه
15-09-2012, 01:41 PM
جزاك الله خير وفي ميزان حسناتك

وياك ان شاءالله

بارك الله فيك
بومحمد المطاوعه
15-09-2012, 01:41 PM
الله يهديهم
والغريبه يختاارون وقت مابين الاذان والاقاامه لااحظتهم اكثر من مره
الله يهديهم

هذولا الغافلون عن الاسلام
حليتان*
16-09-2012, 02:13 AM
الله يهديهم ان شاء الله

جزاااك الله خير يا بومحمد


وفي ناس ثانين من الي يحطون لك لزقات على جامة الموتر وعبارات غريبه عجيبه
abo0o0od QtR
16-09-2012, 02:19 AM
جزاك الله خير واحسنت التصرف يوم كلمت الشرطي

اتوقع هاي مره ثانيه ما بيطول الصوت


الله يهديهم جميعا
hot2000
16-09-2012, 03:15 AM
اخوي أتوقع انقرضوا ولا خفت هالعادة

أنا وللامانه كل ما حد وقف جنبي ورافع صوت الاغاني يخفض الصوت من نفسه وخاصه لو معاي حد من الأهل

أشوف الموضوع ما يستأهل هالقهر كله ولو الواحد بحسب حساب للي عندة عزة ولا متضايق. ما عشنا

خذ الرقم واشتك عليه ومخالفه 500 ريال


ياريت مواضيعنا ترقي


الله المستعان


تقبل مروري اخي الكريم
امـ حمد
16-09-2012, 05:26 AM
بارك الله فيك اخوي

وجزاك ربي جنة الفردوس

وجعله ربي في ميزان حسناتك

قال سول الله صلى الله عليه وسلم( فوالله، لأن يهدي الله بك رجلا واحدا خير لك من أن يكون لك حمر النعم)
الراوي،سهل بن سعد الساعدي المحدث،مسلم ،المصدر،صحيح مسلم، الصفحة أو الرقم،2406
خلاصة الدرجة، صحيح
وتفسير الحديث ،أن هداية واحدٍ من الكفار على يد الداعي هو خير عظيم وفضل كبير
وقال بعض الأئمة أن معنى ذلك (خير من الدنيا وما فيها)
وإن شاء الله يهتدي عدد كبير من الناس من نصايحك لهم ولك الأجر إن شاء الله
زقرتي ومزاجي
16-09-2012, 06:22 AM
انت وينك على كلام الله تعالى


قال تعالى: ﴿كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ...﴾ [سورة آل عمران، الآية 110].

اول شي مدام انا مب مسوي شي غلط مب كفو انسجن ولا بكفو واحد يمد ايده علي

اذا انت ماتدافع عن الدين وخايف من الضرب هالشي يراجع لك

صحيح دعيت له بالهدايه بس شي اقدر ابدله بأيدي بسويه

وبعدين مامديت ايدي وقصرت ولا فتحت عليه الباب

كلمت الجهه المختصه فيها شي ؟؟

وانا كلمته بحترام مافاد اقرى موضووعي عدل عقب ناقش اخوي

يعني تسمع الاذان وتخليه على راحته وين غيرتك على الاذان

وبقولك شغله الرجال طلع لا ليسن ولا ملكيه والموتر بدون تأمين

يعني سويت خير الحمدلله

اتمنى تاخذ دوره فن الردود ف المنتدى

شكرا على ردك المحترم :)


لا تزايد اخوي بالدين مايندرى من اقرب عند الله
عموما اذا زعلك ردي اسمحلي بس هذي وجهه نظري

شوف هذا الرابط واستخلص العبر
http://www.qatarshares.com/vb/showthread.php?t=524784
في امان الله
بومحمد المطاوعه
16-09-2012, 08:32 AM
لا تزايد اخوي بالدين مايندرى من اقرب عند الله
عموما اذا زعلك ردي اسمحلي بس هذي وجهه نظري

شوف هذا الرابط واستخلص العبر
http://www.qatarshares.com/vb/showthread.php?t=524784
في امان الله

الحمدلله ما ازايد والي اسويه لله تعالى مب للبشر

وهذا الشي طبع فيني على تربيتي ولله الحمد

وصحيح محد يدري من الاحسن عند الله

يمكن انت تشوف العاصي ولا شي في الدنيا ولاكن عند الله شي ثاني

نسأل الله ان يتوب علينا ويرحمنا ويجعلنا من اهل الجنه

وجهه نظرك احترمها اذا كان كلام طيب :)

والحمدلله لا زعل ان شاءالله ومسموح بارك الله فيك

وجزاك الله خير
بومحمد المطاوعه
16-09-2012, 08:36 AM
الله يهديهم ان شاء الله

جزاااك الله خير يا بومحمد


وفي ناس ثانين من الي يحطون لك لزقات على جامة الموتر وعبارات غريبه عجيبه

ويجزاك اخوي

الله يهديهم يارب

والله مشكله ياخوي

بتمسك من وبتخلي من

وبتنصح من ومن

الله المستعان
بومحمد المطاوعه
16-09-2012, 08:37 AM
جزاك الله خير واحسنت التصرف يوم كلمت الشرطي

اتوقع هاي مره ثانيه ما بيطول الصوت


الله يهديهم جميعا

ويجزاك ياخوي

الله يهديهم ويصلح حالهم
بومحمد المطاوعه
16-09-2012, 08:38 AM
اخوي أتوقع انقرضوا ولا خفت هالعادة

أنا وللامانه كل ما حد وقف جنبي ورافع صوت الاغاني يخفض الصوت من نفسه وخاصه لو معاي حد من الأهل

أشوف الموضوع ما يستأهل هالقهر كله ولو الواحد بحسب حساب للي عندة عزة ولا متضايق. ما عشنا

خذ الرقم واشتك عليه ومخالفه 500 ريال


ياريت مواضيعنا ترقي


الله المستعان


تقبل مروري اخي الكريم

جزاك الله خير اخوي

خفت اي بس انقرضو لا اخوي

والحمدلله ان يقصرون على الصوت وماتطيح في موقف نفس ما انا طحت فيه

وتحياتي لك
بومحمد المطاوعه
16-09-2012, 08:40 AM
بارك الله فيك اخوي

وجزاك ربي جنة الفردوس

وجعله ربي في ميزان حسناتك

قال سول الله صلى الله عليه وسلم( فوالله، لأن يهدي الله بك رجلا واحدا خير لك من أن يكون لك حمر النعم)
الراوي،سهل بن سعد الساعدي المحدث،مسلم ،المصدر،صحيح مسلم، الصفحة أو الرقم،2406
خلاصة الدرجة، صحيح
وتفسير الحديث ،أن هداية واحدٍ من الكفار على يد الداعي هو خير عظيم وفضل كبير
وقال بعض الأئمة أن معنى ذلك (خير من الدنيا وما فيها)
وإن شاء الله يهتدي عدد كبير من الناس من نصايحك لهم ولك الأجر إن شاء الله

بارك الله فيج اختي

وجزاج الله خير

والله يهديهم

والحمدلله على كل شي

انا اسوي الي اقدر اسويه وادافع عن حق الاسلام
واسأل الله ان يعيني عليه

بارك الله فيج اختي
دانة الطواش
16-09-2012, 08:50 AM
ولد المطاوعة والله انك رجال وجزاك الله الف خير على عملك وفعلك وان شالله باقي الشباب يحذون حذوك في هذا التصرف ، أنا لي أيضاً موقف مع شاب قطري كان رافع صوت المسجل والأذان يأذن والإشارة حمرا قلت حق ولدي انزل واضرب علية الدريشة لانه مايسمع وكان يرقص وبعد ما نبهه اعتذر وسكر المسجل ورفع يده دليل على الاعتذار .
بومحمد المطاوعه
16-09-2012, 09:10 AM
ولد المطاوعة والله انك رجال وجزاك الله الف خير على عملك وفعلك وان شالله باقي الشباب يحذون حذوك في هذا التصرف ، أنا لي أيضاً موقف مع شاب قطري كان رافع صوت المسجل والأذان يأذن والإشارة حمرا قلت حق ولدي انزل واضرب علية الدريشة لانه مايسمع وكان يرقص وبعد ما نبهه اعتذر وسكر المسجل ورفع يده دليل على الاعتذار .

ويجزاج اختي

بارك الله فيج

واللهم امين يارب نشوف شباب احسن مني

والله يهديهم يارب

زين سويتي والحمدلله انه قصر

وفي ناس طيبين يسمعون الكلام وفي ناس يسبون والله

للأسف

الحمدلله على كل حال

وجزاج الله خير
راسي براسك
16-09-2012, 09:22 AM
ازيدك من الشعر بيت ؟

في العشر الأواخر من رمضان !!

كان جنبي سياره كان فيها عرس :)

والله تمنيت الأرض تنشق وتبلعني ولا أني سمعت اغاني وأنا مب متعمده أني أسمع ..

صاروا لايحترمون لا دين ولا عادات ولاتقاليد ..
بومحمد المطاوعه
16-09-2012, 10:34 AM
ازيدك من الشعر بيت ؟

في العشر الأواخر من رمضان !!

كان جنبي سياره كان فيها عرس :)

والله تمنيت الأرض تنشق وتبلعني ولا أني سمعت اغاني وأنا مب متعمده أني أسمع ..

صاروا لايحترمون لا دين ولا عادات ولاتقاليد ..

لاحول ولاقوه الا بالله

والله مصيبه كبيره هذي الصراحه

حتى في العشر الأوخر

الله يهديهم يارب
بومحمد المطاوعه
17-09-2012, 01:25 PM
للـــرفع ...
بومحمد المطاوعه
23-09-2012, 09:23 PM
للــــــرفع
Rashid554
25-09-2012, 01:00 PM
هالموضوع من اول يوم انحط ابي ارد عليه ولكن ما الله كتب ارد بنفس الوقت
للامانه الظواهر الي تصنف تحت صنف ازعاج الاخرين منها وايد
انا في ظاهره مزعجتنني وأتمنى تتفق معاي عليها ودائما اشوفها برمضان وبالمناسبات الي هي مثل الي بتوقيعك وهي تجمع شوية شباب كل واحد بسيارته وتكون من نفس النوع أتمنى تتفق معاي انها مصخره مثل الي يطولون الاغاني
بومحمد المطاوعه
25-09-2012, 01:27 PM
هالموضوع من اول يوم انحط ابي ارد عليه ولكن ما الله كتب ارد بنفس الوقت
للامانه الظواهر الي تصنف تحت صنف ازعاج الاخرين منها وايد
انا في ظاهره مزعجتنني وأتمنى تتفق معاي عليها ودائما اشوفها برمضان وبالمناسبات الي هي مثل الي بتوقيعك وهي تجمع شوية شباب كل واحد بسيارته وتكون من نفس النوع أتمنى تتفق معاي انها مصخره مثل الي يطولون الاغاني


جزاك الله خير على الرد اخوي

احترم وجهه نظرك

بس اني اتفق وياك اسمحلي ياخوي ما اتفق على شي يفسد التعارف والتجمع الطيب

لأني انا الي انظم التجمع

والحمدلله تجمعي عمره ماكان مصخره ولله الحمد نفس ماتقول

لأني اول شي ما اسوي التجمع الابعلم وتصريح

من المرور

والخرجي جزاه الله خير عنده علم بظهورنا في الكورنيش

2 - تجمعنا طيب وشباب محترمين ولله الحمد

3 - محد يسبب مصخره في الشارع ولا ازعاج ولا اي شي من استهتار ولا استعراض

4 - الحمدلله ماخذين السيد الايمن والاوسط ولا نسبب عرقله سير

5 - تجمعنا الي تقول عنه مزعجك ترى منه فوايد كثيره

اول شي التعارف والصداقات والحمدلله كل واحد ونعم فيه

بعدين ياخوي ليش زعلان على هالتجمع الي يصير ترى والله انت ماعشت الجو يوم تطلع رحله مع شباب شكثر ماشاءالله

جرب عقب احكم بتحسف بمعنى الاخوه والصداقه

يدخل علينا وقت الصلاه والحمدلله محد يترك فرض

وبعدين احنا قروب كامل نساعد بعض من اي شي

سواء تطلب اغراض للسياره نطلب من امريكا بنص سعر الوكاله ف قطر

مب اي تجمع تقول عنه مصخره اخوي ترى في تجمعان الله يستر عليهم

وكلمتي الاخيره شكرا لك ولكلامك ياخوي

احترم وجهه نظرك
وكلن يرى الناس بعين طبعه :)
Rashid554
25-09-2012, 02:01 PM
اخوي ولد المطاوعه
كلن له طبعه وهوايته وشي يحبه ويفضله وانا كل اعتراضي على كلمة ( مصخره ) عشان جي كتبتها بردي السابق.

فيه ناس تحب الموسيقى ومن هوايتها الاستماع الى الموسيقى وبصوت عالي والمفروض مانطلق عليهم ( مصخره ) ترى الكثير منهم يزعل من هالكلمه مثل ما انت اخوي تتضايق من كلمة مصخره على هوايه او شغله انت تحبها ولكن ما يفضلها البعض.

يعني مثلاً انت تقول ان هالي تسونه تجمع ومن هالكلام ولكم قروبكم والى اخره ، انا عن نفسي ما احب هالتجمع لان صادني موقف مره سيارات في شارع الكورنيش ماخذه السيود كلها مو مخلين احد يمر وخذيت فكره خاطئة عنهم .
انت تقول انكم تاخذون سيدين وبتصريح من المرور ووقت الصلاه تصلون ، على راسي ما قلنا شي ، لكن في قروبات بلشتيه بعد مخليني اخذ فكره عنكم مثل الي شفتهم انا بالكورنيش ومو مخلين خلق الله يمرون وفي من هالناس الي مستعجل والي عنده ظرف والي عنده شغله والي والي وهالقروب أخرهم عن عملهم .

حتى الي يشغلون اغاني في منهم بلشتيه مخلين الناس تاخذ فكره غلط عن الي يشغل موسيقى في سيارته ، فيه ناس تحترم خصوصيات الناس وتشغلها بالطرق العامه مو بالزحمه ولكن في ناس تخرب عليهم وتشغلها بالزحمه ويترقصون ووو ... الخ

كل اعتراضي في الموضوع على كلمه ( مصخره ) .

وخلاصه الموضوع ( مو كل شي انت ما تحبه يكون سلبي ، ومو كل شي انت تحبه يكون ايجابي )

قواك الله ،،،
بومحمد المطاوعه
25-09-2012, 02:10 PM
اخوي ولد المطاوعه
كلن له طبعه وهوايته وشي يحبه ويفضله وانا كل اعتراضي على كلمة ( مصخره ) عشان جي كتبتها بردي السابق.

فيه ناس تحب الموسيقى ومن هوايتها الاستماع الى الموسيقى وبصوت عالي والمفروض مانطلق عليهم ( مصخره ) ترى الكثير منهم يزعل من هالكلمه مثل ما انت اخوي تتضايق من كلمة مصخره على هوايه او شغله انت تحبها ولكن ما يفضلها البعض.

يعني مثلاً انت تقول ان هالي تسونه تجمع ومن هالكلام ولكم قروبكم والى اخره ، انا عن نفسي ما احب هالتجمع لان صادني موقف مره سيارات في شارع الكورنيش ماخذه السيود كلها مو مخلين احد يمر وخذيت فكره خاطئة عنهم .
انت تقول انكم تاخذون سيدين وبتصريح من المرور ووقت الصلاه تصلون ، على راسي ما قلنا شي ، لكن في قروبات بلشتيه بعد مخليني اخذ فكره عنكم مثل الي شفتهم انا بالكورنيش ومو مخلين خلق الله يمرون وفي من هالناس الي مستعجل والي عنده ظرف والي عنده شغله والي والي وهالقروب أخرهم عن عملهم .

حتى الي يشغلون اغاني في منهم بلشتيه مخلين الناس تاخذ فكره غلط عن الي يشغل موسيقى في سيارته ، فيه ناس تحترم خصوصيات الناس وتشغلها بالطرق العامه مو بالزحمه ولكن في ناس تخرب عليهم وتشغلها بالزحمه ويترقصون ووو ... الخ

كل اعتراضي في الموضوع على كلمه ( مصخره ) .

وخلاصه الموضوع ( مو كل شي انت ما تحبه يكون سلبي ، ومو كل شي انت تحبه يكون ايجابي )

قواك الله ،،،

الله يقوييك ياخوي

صحيح بارك الله فيك

الي يخرب على الغير يستاهل يتأدب

بس لاكن تخيل انت مع هلك واحد جنبك مسوي عرس

في فرق يالغالي

من الاحترام وفي فرق بالحريه

ترى هاي مب قانوني انه يطول على الاغاني

لو بروحه كيفه بس وسط العالم ماله اي حق

نفس الشي احنا قروبنا منظم ونعطي الشارع حقه

محد يقدر يقول انتو وانتو صح ولا غلطان

لان ماغلطنا بأي شي

بس لو الواحد يطول على الاغاني ويدخل وقت الصلاه وتسمع الاقامه او الاذان والي جنبك مطول على الاغنيه

ترى في ناس تسمع اغاني بأحترام وفي ناس تبي تسمع الي جنبه

وجزاك الله خير

واتمنى ماتجمع الكل بنظره وحده ياخوي

صحيح انك طحت في زحمه تجمع وسيارات بس في تجمع

مرتب نفسنا والحمدلله مانخرب على الناس

تحياتي لك
كتكوت الوحش
25-09-2012, 02:11 PM
اصلا هالشي سخافه
بومحمد المطاوعه
25-09-2012, 02:13 PM
اصلا هالشي سخافه

اي شي ياخوي..؟ :)
كتكوت الوحش
25-09-2012, 02:21 PM
اي شي ياخوي..؟ :)
نوع الشباب الي يطولون عالمسجل او الصوت يالغالي :omen2:
بومحمد المطاوعه
25-09-2012, 02:22 PM
نوع الشباب الي يطولون عالمسجل او الصوت يالغالي :omen2:

اي والله ياخوي

الله يهديهم

على بالي تقول عن القروب هههههههههه

كنت بصيح :weeping:
qatari911
25-09-2012, 02:32 PM
رفع الاغاني عند الاشارات وبين العالم لمجرد التسميع ويترقصون هذا غلط
وانت تقول تاخذ تصريح علشان تنظم قروبات يسببون زحمه في الشارع هذا غلط
اذا انتو تحبون تتعرفون تجمعو في المجالس والا اطلعو كشتات
اما انك تجي وتنتقد شي وانت تسبب زحمه
لاتقولي ناخذ الخطين اليمين
لان فيه ناس تبي تمر في الكورنيش تكون مجبوره او طريقها من هالمكان او اماكن ثانيه مو ذنبي اعلق بزحمه علشان تكونون قروبات وصداقات ؟؟
ارجو انك ماتزعل من يالغالي
وانا معك في نقط الاغاني بس مش معك في نقطة القروبات وزحمه على الفاضي علشان تكوين صدقات
خيالة قطر
25-09-2012, 02:32 PM
الله يكثر من امثالك اخوي
كفو عليك ،
كتكوت الوحش
25-09-2012, 03:01 PM
اي والله ياخوي

الله يهديهم

على بالي تقول عن القروب هههههههههه

كنت بصيح :weeping:

:nice: لا اتمنالك اخوي كل التوفيق مواضيعك جدا حلوه ومفيده
بومحمد المطاوعه
25-09-2012, 03:29 PM
رفع الاغاني عند الاشارات وبين العالم لمجرد التسميع ويترقصون هذا غلط
وانت تقول تاخذ تصريح علشان تنظم قروبات يسببون زحمه في الشارع هذا غلط
اذا انتو تحبون تتعرفون تجمعو في المجالس والا اطلعو كشتات
اما انك تجي وتنتقد شي وانت تسبب زحمه
لاتقولي ناخذ الخطين اليمين
لان فيه ناس تبي تمر في الكورنيش تكون مجبوره او طريقها من هالمكان او اماكن ثانيه مو ذنبي اعلق بزحمه علشان تكونون قروبات وصداقات ؟؟
ارجو انك ماتزعل من يالغالي
وانا معك في نقط الاغاني بس مش معك في نقطة القروبات وزحمه على الفاضي علشان تكوين صدقات

الله يجزاك خير ياخوي وبالعكس ليش ازعل

وجهت نظرك احترمها وعلى راسي من فوق

بس هالتجمع والمسيره ياخوي مانسويها الا ف رمضان العصر

وانت خابر الكورنيس العصر مب انا الي اسبب الزحمه بس

نص شباب قطر موجودين طال عمرك

اما تجمعاتنا الثانيه نكون واقفين
في مواقف ارض المعارض او مواقف نادي قطر اخوي

او نروح دخان رحله كلنا على خط الايمن والحمدلله الدوريه تمشي معانه
:)

ان شاءالله اذا في تجمع بطرحه فالمنتدى علشان تحضر وتشوف الترتيب والتنظيم

وتحياتي لك يالغالي :victory:
بومحمد المطاوعه
25-09-2012, 03:32 PM
الله يكثر من امثالك اخوي
كفو عليك ،

اللهم امين

بارك الله فيج اختي
بومحمد المطاوعه
25-09-2012, 03:35 PM
:nice: لا اتمنالك اخوي كل التوفيق مواضيعك جدا حلوه ومفيده

الله يجزاك خير يالغالي

ماتقصر والله

رحم الله. والديك
بوخالد911
25-09-2012, 04:37 PM
يبيلهم غرامة مشددة


والله لا يبلانا
بومحمد المطاوعه
25-09-2012, 04:42 PM
يبيلهم غرامة مشددة


والله لا يبلانا

اي والله ياخوي

اللهم اميين

جزاك الله خير