أسوء نظام مواعيد هو (نظام مواعيد مستشفى حمد ) !!!

[Chambray]

السلام عليكم
الصراحة شفت ان مستشفى حمد والولادة شغالين تطوير فيه . والله يعطيهم الصحة والعافيه على هذا المجهود . بعد افتتاح مستشفى للقلب ومستشفى الوكرة والخور ألخ ..
تفائلت خير بتطور الخدمة الطبيه بدولتنا الحبيبه قطر .

وبالصدفه قريت عن نظام المواعيد ( الجديد ) بمستشفى حمد العام ..
وتفائلت اكثر انهم طوروا وبدوا يحسون في معاناة المواطن في الحصول على مواعيد في ( العيادات الخارجية )

ماطول عليكم .
انا الله يسلمكم رحت للدكتور هشام في العيادات الخارجية ( قبل النظام الجديد ) في شهر 6 - 2011 وعطاني موعد لاجراء عملية السليف مع الدكتور ميشيل .
نطرت حتى شهر 6 - 2012 ، لكن لم يتصل بي اي حد
بكل أمانه عندي تأمين طبي عالمي ( مش خليجي ) ورحت للمستشفى الأمريكي بباريس ، بما انه افضل مستشفى في باريس ، وامهر الاطباء هناك والتأمين وافق على تحمل تكاليف العملية الي تقدر ب 20 ألف يورو .
لكن قبل العملية ب شهر اتصلت للتأمين وقلت لهم اني ارغب في الغاء العملية . وإجراءها في قطر بين اهلي وناسي .

انتظرت في مستشفى حمد اكثر من سنه لموعدي لكن محد اتصل فيني !!!

من اسبوعين اتصلت للرقم الموجود في موقع مستشفى حمد للمواعيد بعد قرائتي للإعلان
http://site.hmc.org.qa/opd/Images/Banner1Big_Arabic.jpg

http://site.hmc.org.qa/opd/Images/Banner1Small_Arabic.jpg

http://site.hmc.org.qa/opd/Images/Banner3Big_Arabic.jpg

قلت ماشاء الله عليهم والله تطوروا :)

اتصلت عليهم .. وخبرتهم اني انتظر موعد العملية من شهر 6 - 2011 !! صحيح ان في زحمه على الدكتور ميشيل وعلى اجراء هالعملية . لكن انا صار لي اكثر من سنه !!!!!!!!! محد اتصل فيني !!!!!
قالت لي الموظفه هو سجل موعد العملية بالسستم !
قلت لها لا . لان في قائمة انتظار كبيرة وسجلوني بدفتر عندهم !!!!!!
عاد وش مصير الدفتر والله مادري ..

قالت لي لا لازم يتسجل بالسستم ..
قلت لها انزين والحل . قالت لي اخذ لك موعد مع الدكتور هشام !
قلت لها انا مابي الدكتور هشام جربناه ولا منه فايده ..
ابي موعد مع الدكتور ميشيل الفرنسي .
قالت لي انت موعدك مر عليه سنه
يعني لازم تقدم طلب تحويل جديد

قلت لها كيف

قالت لي : تروح للمركز الصحي التابع له . وتطلب منهم تحويل للعيادات الخارجية

وبالفعل رحت للمركز الصحي وشرحت له حالتي وكتب لي تحويل لمستشفى حمد .

رحت للعيادات الخارجية . كونتر رقم 4
عطيتهم ورقة التحويل .

قالولي خلاص توكل على الله وقسم المواعيد بيتصلون فيك !

قلت لهم انزين انتوا وش دوركم !
قالولي لا احنا ناخذ اوراقك ونرسلها لقسم المواعيد !!!!!!!!!!!!!
وهم بيتصلون فيك خلال اسبوع !!!!!!!!!!
بل اسبوع علشان يحددون لي موعد ..
يالله امرنا لله ..


والله مر علي اسبوع جاني رقم غريب أول امس لسبب انشغالي مارديت عليه لكن بعد 3 دقايق بالضبط اتصلت على الرقم إلا الموظفة تقولي ( معاك العيادات الخارجية ) قلت لها اختي انا عندي طلب تحويل وابي موعد ! قالت لي اوكي عطني رقمك الصحي . عطيتها . قالت لي خلاص هم بيتصلون فيك قسم المواعيد ! قلت لها وهالرقم مال شنو .؟؟ قالت لي هنا الاستقبال . لازم تنتظر اتصال منهم وهم بيتصلون فيك 5 مرات بس .. اذا مارديت عليهم راح ينلغي طلب التحويل !!!!!!!!!!!!! ( تهديد ووعيد ) حاسب لازم ترد لاتطنش خخخخخخخ
قلت لها انزين فرضاً انا مب فاضي ارد في الوقت الي اتصلوا لي فيه . واتصلت لكم احين وتقولين لي مانقدر نحولك لقسم الاستقبال وانتظر اتصالهم . لين متى يعني !!!!!!!!!!!

قالت لي ان شاء الله بيتصلون فيك خلال هاليومين !!
قلنا لا حول ولا قوة إلا بالله . امرنا لله ..

اتصلت فيني اليوم مع صلاة المغرب بالضبط قسم المواعيد ..
قالت خلاص احنا عطيناك موعد مع الدكتورة هيفاء مادري هنا مادري شسمها .. بتاريخ 8-12

قلت لها بس انا مابي هالدكتورة . في طلب التحويل كاتب ( أسم الدكتور انا ) الدكتور ميشيل !!!!!!!!!!!!!! شسالفه يعني !!

قالت لي خلاص 5 دقايق وزميلتي بتتصل فيك علشان تعطيك الموعد مع الدكتور ميشيل لان هي المسؤوله عن مواعيد الدكتور ميشيل

صكرت ورحت اصلي وقلبي في يدي لا يتصلون ومارد واتلطش معاهم :anger1:

خلصت صلاه شيكت على التلفون ( إلا مافي ولا مكالمة ) !!
انتظر نص ساعه - ساعه !!!!!! محد اتصل

اتصلت لهم مرة ثانية . ونفس الكلام

مانقدر نحولك لقسم المواعيد ..
هم بيتصلون فيك :anger1:

انزين شسالفه
رحت لهم مايصير اشوفهم
وبالتلفون مايصير اكلمهم


يعني لازم هم يكلموني !!!!!!!!!! وش هالسستم والنظام الغبي :anger1::anger1:

الي مر في نفس حالتي مع قسم المواعيد ياريت يخبرنا .. لان الي يصير فعلاً بحاجه إلى حل . وتقولون ليش المواطنين يروحون اوروبا وتايلند والهند والسعوديه يدورون العلاج !!!!!!! امحق علاج اذا بيجي بعد تعب وملطشه وأخرتها موعدك مع الدكتور لايتجاوز 4 دقائق بالكثير

[هامور خرطي]

في فرق بين موعد الدخول للدكتور أو موعد العملية

العمليات بالواسطات وماعليك من الخرابيط اللي يقولونها ان بالدور
وانا انتظرت وقصتي قصة طويله وياهم خصوصا اذا الحالة ان سمنة عاديه مافيها قلب او ضغط او سكر او مفاصل . والقصة ان اصحاب المشاكل الصحية تكون لهم الأولوية وهكذا تزيد القائمة فربما موعدك للعمليه بعد 3 اشهر وتتفاجأ بأن اصحاب المشاكل الصحية ومن لديهم واسطات اصبحوا قبلك وتصبح القصة 5 أشهر وهكذا تستمر القصة
ويوم شفت ان السالفة مطولة وكل واحد يقلني على الثاني
وفي الأخير توكلت على الله وتوجهت لمستشفى العمادي واجريت العملية
والحمد لله

[ولد ازغوى]

دام ان التامين يشيلها روح العمادي واشخط بطاقة التامين جزاهم الله خير وفروها لنا
العمليه تقريبا ٥٥ الف شحادك على غثى مستشفى حمد
شخصين اعرفهم مسوينها هناك وماشالله نتايجها ممتازه

[بومحمد المطاوعه]

مستشفى حمد

حذفت الملف عليهم وطلعت

واشتكيت في وطني الحبيب

رحت فتحت ملف في مستشفى الأهلي حق عيالي

تخيلو موعد بنتي

واخذ بنتي عمرها 4 شهور

واهي مولوده قاصر في شهر السابع

مافيها مناعه ولا شي

يوم وصلت وقعدت ساعه تقريبا

اخرتها يقولون لي الدكتور مب موجود

طالع اجازه هبي نيو ير مادري عيد الحب

واحد من هالاعياد المصخره والمهزله

سويت لهم عرس من الصراخ والهواش

واحذف عليهم ورقه الموعد من القهر

واطلع واروح مستشفى الاهلي وافتح لها ملف

وتكلمت في وطني الحبيب وضغطي مرتفع مليووووون

الله كريم والحمدلله على كل حال

[رذاذ]

انا بالعكس اتصلوا بي مرتين ..
السستم الان افضل وتاكد انك ما تطلع من العيادة الا بعد تاكيد موعدك بالستتم ووقف دقايق اما الكونتر وامورك تمام وسجل رقمين بدل رقم ..

الله يشفينا ويشفيك ويشفي جميع المسلمين

[بونووف]

اول شي اخوي اتمنى لك الشفاء العاجل وتقوم بالسلامه انشاءالله

ماجربتهم من قبل لانه كله على التامين الصحي في عيادة الدوحه والاهلي لكن الحين عندي زوجتي قرب موعد ولادتها وماتبي تربي الا في مستشفى حمد والمشكله كل الفحوصات مسوينها في الدوحه ويوم راحت تاريخ8\8 قالوا لها بنعطيج موعد تاريخ 30\9 وقالت ابي مسائي قالوا لها مسائي في اخر شهر 10 يعني والمشكله انه محددين له موعد ولاده تاريخ 13 \ 10 وعلى كلامها انه المستشفى ماتولد وحده ماعندها ملف او ماتم الكشف عليها مايندرى صج هالكلام ولا قصدهم انه بيسون سالفه طويل ويبون بيانات فالله يستر منهم وانشاءالله تعدي الامور على خير

واتمنى ينحل موضوعك وموضوع المواعيد اللي كله اسمع العالم تتشكى منها

[بوالبيض]

الله يعين الجميع ويشفي الجميع يارب
المواعيد كلها خرابيط وتاخير والله يستر والله

[Abdulraman]

الحل الوحيد يطورون المراكز الصحيه وبنفس مستوى مستشفى حمد سواء الاجهزه والدكاتره وعقب كل واحد يروح المركز الصحي التابع له بالمواعيد
صدقوني مافي الا هالحل

[bo_s3ood]

سياسة المواعيد في مستشفى حمد والعيادات الخارجيه كلها يبي لها اعاده جدوووله

[Chambray]

جزاكم الله خير جميعاً ..

اخوي هامور خرطي . والله انا متردد في هالمستشفيات الخاصه خاصه العمادي مادري ليش مع ان المجال مفتوح لي اني اتعالج في اي مستشفى بالعالم .. لكن عندي ثقه ان هالعمليات عند هالدكتور ميشيل في مستشفى حمد افضل لانه متمرس عليها اكثر من اي واحد ثاني .

اخوي رذاذ . يمكن افضل من ناحيه التغيير . لكن من ناحيه الجودة والنظام ( شغل سئ ) كيف انا اتواصل مع قسم المواعيد ؟؟؟؟؟؟؟ اقلها ( ارسلوا لي مسج بالموعد ) وانا اتصل اغير الموعد اذا ماعجبني هالموعد .
لكن انتظر ايام واسابيع . بس علشان يقولون لي انت موعدك في هاليوم او في هاليوم !!!!!! واذا مارديت عليهم لسبب او لآخر . واتصل لهم ويقولون لي مايصير نحولك للمواعيد ! انزين انتوا توكم متصلين فيني من 30 ثانية بس !! وش الحل في وجهة نظرك ؟

[بـن عدوان]

اخوي اللي اعرفه انه الدكتور ميشيل قسمه منفصل عن دكاترة الجراحة اللي في العيادات الخارجية

الاجراء يكون كالتالي

تاخذ موعد مع اي دكتور في قسم الجراحة - العيادات الخارجية٬ وهو بعدين بيسوي طلب مع قسم الجراحة اللي تابع للدكتور ميشيل

انا انصحك تروح مكتبهم السكرتارية: بتحصله في الممر بين مبنى مستشفى حمد العام وبين مبنى العيادات الخارجية

عند وحده اسمها زرينة شي جذي - فلبينية

وتتابع معاها الموضوع٬ اسمك اكيد موجود

[deema117]

أخوي كل اللي قلته مريت فيه بالضبط خصوصاً إذا تبي موعد لعمليات السمنة

الظاهر مب ملحقين من كثرة المراجعين

سويت تحويل من المركز الصحي لمقابلة أحد الدكاترة الجراحيين ولحد الآن مر

أكثر من 6 أشهر ومحد اتصل لتحديد الموعد والسمفونية مالتهم نفسها لما تتصل

عليهم عشان تسأل اشصار فالموضوع يقولون احنا الاستقبال وما يصير نخليج

تكلمينهم وهم اللي بيتصلون !!!

بس

للأمانة

للمواعيد في الأقسام الثانية ( غير قسم الجراحة ) ما يقصرون يتصلون

ويذكرونك بإرسال مسج

يعني المشكلة بس في قسم الجراحة الكل يبي دكتور ميشيل

وصار ضغط عندهم في المواعيد !

[khaldoon]

هههههههههههههههههههههههههههههه الله يكون في عونك والله يا اخوي


انت زعلان انه كانوا يبيلهم اسبوع لتحديد الموعد؟؟؟!!!!.... يا صديقي العزيز انا انتظر يحددون لي موعد من شهر 4 للحين في الرميلة للاسنان

تخيل اني رحت لهم على الطوارىء بشهر ابريل .... انتبه انا اقول الطوارىء .... يعني حالة مستعجلة و فحصوني و اعطوني بروفين و اخذوا تليفوني و قالولي بنتصل عليك اخر شهر 4...... راجعت المواعيد ... قالولي بنتصل بنص شهر مايو.... بنتصل اخر شهر مايو..... بنتصل نص شهر يونيو..... اخر شهر يونيو..... رحت للمسؤوله و انا مستاء جدا و قالت لي اسويلك موعد برمضان.... قلت لا حول و لا قوة الا بالله..... رمضام رمضان ايش اسوي ابي اخلص علاج العصب و امري لله.... راح اضطر افطر في ذاك اليوم.... حجزت لي موعد يوم 16/08/2012 و يوم قرب الموعد بلغوني انه 15/08/2012 هو اخر يوم دوام و انه 16/08/2012 بيكون اجازة العيد و انهم بيتصلون علي و بيحددون موعد بدل هذا الموعد الغلط منهم ..... و للحين ما اتصلوا مع اني حريص تماما اني ارد على التليفون و ما اتجاهل اي رقم غريب لاني متحفز لاتصالهم و استحلفت الورثه و وصيتهم انه بعد موتي لو لقيوا رقم غريب يردوا عليه على طول علشان ما يضيعوا موعدي و كل عام و انت بخير


يوم حجزولي موعد كان بتاريخ 16/08/2012 على ما اذكر...... يعني اول يوم اجازة في رمضان قبل العيد

[بوخالد911]

الحالة صعبة


والله يسهلها عليك اخووي