عندي عماره وابي اطلع المحلات

[M.Alkhater]

السلام عليكم ورحمه الله وبركاته

ياجماعه الخير عندي عماره في موقع ممتاز جدا والعقود مع المحلات قديمه واسعارهم 1000 ريال بالشهر ..

بغيت اطلع اللي في العماره قالوا لي مايصير والقانون وياهم !!

شالحل ياهل الخبره ؟

[المليونير الفقير]

مالك الا حل واحد فقط هو صيانة العماره هاي الشي الوحيد الي يطلعهم او تقولهم بهدمها وببنيها من جديد واحد من الربع طلعهم عقب زور لو اقولك وش سوى ماتصدق هههه طرش ناس يكسرون شقة فالعماره وعقبها طلبو الامن وقالو العماره بطيح وروهم الشقة الي مكسره وسقفها طايح وعلى طول عطوه اخلاء للعماره في اسرع وقت وعقبها ضبطها شوية صيانه وأجرها اجار جديد

[شموخ دائم]

,

,


مرحبا

اخوي الكريم

الله يعطيك العافيه

لا ضرر ولا ضرار هذا الحديث عن عدم
إضرار العباد بعضهم لبعض

انت عارف ان القانون حدد الزياده بالعقود ومقدارها وطريقتها

احنا بوقت تتحكم فيه القوانين والعقود

احسن شي هو التفاهم بين المالك والمستأجرين
بتلاقي احد المحلات شخص له كلمه على الباقين ويتزعمهم وهو اكثرهم فهما للقانون
ويسمعون كلامه باقي المحلات عاده تكون الامور كذا بكل عماره
ابتدي قي هذا المحل او الشخص
اطلبه عندك ( بمجلسك ) او ( مكتبك )

وقوله
طبعا 1000 ريال مبلغ قليل وانا متضرر من هذا السعر
لانه ما يجيب سعر ( صيانه العماره )
واكيد انت فاهم هذا الكلام
وهو اقل من السوق بكثير ولو اختلفنا كثير
وما اتفقنا بهذي الجلسه

انا بفكر ابيع العماره جايني عرض بيكون فيه مربحه كبيره لي
احسن من الايجار هذا الي ما يفيدني الان وانا متظرر

والمالك الجديد ما راح يرضى بهذا الايجار وب يهد العماره ويبنيها من جديد
بعقود جديده


راح تكون مشكله عليكم لانك تعرف السوق كم سعر لايجار الان
وما ابي لك الضرر
وانت ايضا ما ترضى لي الضرر


واعرض عليه ( حل وسط )

قوله انا مابي اظلمكم واظلم اصحاب المحلات
قولهم ابي نسوي اتفاق ودي بينا
واذا ما اتفقنا على السعر الودي بيكون الموضوع
فيه ضرر للجميع

( كل اصحاب المحلات بيعرفون الموضوع )


وحاول توصل معاهم الى اتفاق معين عطهم اقل من سعر السوق
لو سعر السوق 4000 الاف ريال مثلا للمحل
عطهم 2500 ( على سبيل المثال )
وبعد سنتين يصير 3000 ريال تكتب في العقود

وكل شخص ينتهي عقده
تكتب معاه العقد الجديد ( بالتراضي )
هذا الترتيب ما يخالف القانون لانه اتفاق بينكم

اتوقع الجميع بيوافق ما دام السعر الجديد
بيكون اقل من سعر السوق
وانت بيكون عدلت عقودك للسنه هذي
وللسنتين القادمتين

بهذي الطريقه انت قربت من سعر السوق ( تدريجيا ) وهو احسن لك
لانك تجاوزت القوانين بالتراضي
وهم عندهم المحلات اقل من سعر السوق

وما انصحك تستخدم ( القوه) او القسوه في التعامل معاهم
لان ( التجاره ) بركه
وانت بتنزع البركه من هذي العماره بالتعامل هذا

هذولا الهنود كل محل ( وراه ) قطري صاحب السجل
وكلهم فاهمين القوانين زين


,

,


اخوك


شموخ دائم

[كبير المتداولين]

اخوي شموخ دائم عطاك زبده الحل


والله يوفقك ويوفق كل التجار

[اداري]

اعتقد قانون الاجارات لا يشمل المحلات التجارية يعني تقدر تزيد اللي تبيه اذا انتهى العقد

ثاني شي طلع رخصة هدم بانك تودي صور العمارة

-بس بعدين طلعهم وسو صيانة واجرها

[MAZEN37]

ايام الاجار ١٠٠٠ ريال يمكن من ٣٠سنه مافي احد يعطي مدة عقد ثلاثين سنه حتى في ابعد مكان
كلام غير منطقي واكيد فيه شيء منقوص

[الشلهوب]

حسب قانون الايجارات الزيادة 15 او 20 بالمئة بالسنة هذا اذا كانت العمارة لايتعدى عمرها 15 سنة اما اذا كانت اكثر من 15 سنة فلك الحق حسب قانون الايجارات بان تقوم باستخراج شهادة صيا نة كاملة للعمارة واشعا ر اصحاب المحلات بالاخلا القانوني والقانون معاك في هذة الحالة . واي محامي يعرف هذة الفقرة من قانون الايجارات

[قطري !]

مالك الا حل واحد فقط هو صيانة العماره هاي الشي الوحيد الي يطلعهم او تقولهم بهدمها وببنيها من جديد واحد من الربع طلعهم عقب زور لو اقولك وش سوى ماتصدق هههه طرش ناس يكسرون شقة فالعماره وعقبها طلبو الامن وقالو العماره بطيح وروهم الشقة الي مكسره وسقفها طايح وعلى طول عطوه اخلاء للعماره في اسرع وقت وعقبها ضبطها شوية صيانه وأجرها اجار جديد





وينه من رب العباااد ,,, اذا خدعهم مايقدر يخدع الله سبحانه وتعاللى

[كاشف الغطاء]

والله اعلم ان قانون الإيجار يحدد مدة تقدر تطلع المستأجر من خلالها وهي خلال عام 2013 يتكنسل القانون القديم أسأل زيادة في فض المنازعات

[بـــاروود]

قرار هدم